Tuhun Sen gam in leitungah a thahat penpen (superpower) gamte sungah a hawllut zo makai sungpan Deng Xiaoping zong khat in kihel hi. “Zawhngeu pen a vom a kang a thupi pen hilo a, zusa a mat khak/theih ding a thupi hi zaw hi” a ci pa in zong kithei hi. Deng Xiaoping pen Communist Party in power a ngah man pek pan in party sungah makai khat hi a, “Khual gamla pi zinna- the long march” ah zong panmun thupi len khat a hihi.
Sumbup sum le pai vai (economic policy) pen gamkumpi bek in humcip in gel ding cih a bulphuh – communism/socialism economic policy pen lawhcing lo ding hi; ngeina langpanna (cultural revolution) in Sen gam pen huu zolo ding hi cih thute a gen ngam makai a hihi.
A thuakna tom khat:
A mah: Deng Xiaoping pen Communist Party in “gam leh minam tungah ciampel” cih paulap in man uh a, a mau kammal zui in cileng pilsin kikna – reeducation ci’n Peking pan in khua ta lam ah Tractor Repair factory ah koih khia uhhi. Party makai – thunei mite in 1966 kum in khat vei, 1976 kum in khat vei man in a zaa beisak uhhi. (Makai panmun pan a kitawp sak ciangin gambup mipi mai ah nakpi tak in mawhsakna, a sia a genna, leh minsiat sakna tampi kigen a, thuak hi).
A zi: Zhua Lin zong a pasal, Deng a kimat, a ki nawlkhin – exile ciangin a mah zong kimaap tuan lo hi. Gensiatna, kona leh nuaisiahna cihte a kipan, maizum theihna ding tampi kibawl khum na pi’n, lung kia lo in, a pasal kiangah thuak pih hi. A tateng a lung kiat lohna ding, hoih tak in kem zo hi.
A tapa upen: Deng Pufang – ngeina langpanna (cultural revolution) hun sungin Red Guards- Sen galkap te bawlsiatna hangin University innpi tung pan in kia suk a, a kawng nuailam teng zaw (paralyze) hi.
A tanu u pen- Deng Lin, a u zom – Deng Nan, tanu thumna – Deng Rong, a tapa neu pen – Deng Zhifang te unau teng zong a pa nasepna hangin gaakna, minsiat sakna cihte tampi a puak khop uh thuak tek uhhi.
A inn kuan un gambup mipi kosiatna, gam vai tawh kisai muan lahna, nek leh tak zonna, pilna siamna sina leh mailan ding kician omlo in koihna cih bang tampi thuak uhhi.
Party makaite leh, makaite kaihzatam mipite in ko-na, bawlsiatna leh nuaisiahna tampi a thuak hangin duaitak a thuakna – resilience leh lungduaina – patience nei a hih manin, gam le minam it taktakna tawh makai panmun hong ngah kik hi. Panmun a ngah kik tak ciangin gamsung a kibatlohna te, tumdannate khempeuh sungah kigolh theihna (adaptability) pen thahatna in hong hei a, Sen gam khantohna ding kongpi tawhtang a hong pa hong suak hi.
