Ei pau, ei lai bek zatna in minam itna man mah maw leh?
Hih a tunga dotna dawnna dingin, hih dotna mah laigualh zia dang khat tawh gual kik leng kician zaw leh kilawm hi. Tua in, " Minam dangte pau, lai zat pihna in ei minam it lohna hiam? cih tawh dotna pen ki dawng hileng dawn nop tuak zaw hi. Hih dotna nihte tawh hong kidong phial ta leh, a deihna kibang tuak a hihi. Tua dotna nih tawh mimal khat ciat hong ki dong leng, mi khat leh khat i dawnna kibang kim lo dingin ka um hi. Pawl khat in, " Minam it ci na pi'n a ma pau,lai zong zang utlo pen, minam it hi kei" a ci ding a om bangin, pawl khat leuleu in, " Minam dang pau, lai zat manin minam itlo hi tuanlo hi" a ci zong om ding hi.
A taktak in ei Zomi namte banga minam lianlua lo minamte a dingin ei pau bek, ei lai bek zatna tawh minam itna leh minam itlohna tekkak leng bel kikhial kha ding hi. A hangin, lai leh pau kician tak in i neih hang in, i lai leh i pau pen tu ciangciang kicing taak (standard) takin kinei nai lo hi. I Zolai bang cileng, Zomi a kici khempeuh zat dingin laigelh zia man na ngawn kinei zo taktak nailo hi. Pawl khat in "Zo mi" ci'n "Zo" leh "mi" kigawm sak lo, pawl khat leuleu in "Zomi" ci'n a kigawm sak om hi. Kammal kigawm zia ding, khen zia ding na ngawn zuih ding kician ki nei nailo in, ut bang peuh a lai gelh Zomi sungah kitam mahmah lai hi. Lai gelhzia bek hilo, laimal (word) mahmah zong ei Zomi te'n kicing takin i nei nai kei hi. Gentehna in, lai simbu a hi, "History" bang Kawlgam lam a om Zomi te'n Kawlte cihna kila in, " Tamaii" mah kici suk lel a, India lam a om Zomi te'n mikang te cihna " History" mah ci uhhi. Tua mah bangin, kammal dangdangte a hi, Geography, Science, Math, leh a dang te zong tua bang mah ahihi. Hih pen i Zolai tawh kisai tawm bek pulakna a hihi.
