Democracy paizia a vaihawmna i cih in…
Tual Khan Suan
Mi pawlkhat in Democracy paizia i cih pen
a tamzaw thu tawh kivai hawm ding a, mi tamzawte’ deihna bek kizui ding ci’n ki
letkhia ziau uhhi. Mi pawlkhat leuleu in Democracy paizia a vaihawmna pen
leitung vai ki-ukna bek a kizang hi a, leitung vai a hilo vaihawmna ah zat ding
hilo hi, a ci zong om leuleu hi. Mi khenkhat leuleu in Democracy i cih pen mi a
tamzaw thuneihna a hih manin mi a tawmzaw (minority) te in midangte uknna nuai
ah om den ding a hih manin tanh kikimna (equality) om theilo hi ci’n nial
leuleu hi. Hih a tung a khempeuh pen a khial omlo a, i etna kiukhat pan in a
man vive a hihi. A hangin Democracy pen ngaihsutna (ideas) bulphuh a hong piang
khia hilo a hih manin a khial, a man om tuanlo a, paizia (system) hizaw a hih
manin, democracy nam tampi om sak zaw uhhi. Democracy tawh kivai hawmna leh
ki-ukna pen paizia (system) zui a kalsuanna a hih manin ei dinmun tawh kituak
a, a hoih pen ding a, kibulh tuah tek a hihi.
Democracy pen paizia (system) bek hita
leh, a deihlo kilkel mi pawlkhat om vive hi. Tua mite pen democracy a deihlo cih
ding zong hi sam na ven, paizia (system) a deihlo hi cih ding hi zaw hi. A hang
pen tua paizia (system) in a maute dinmun (status), zaa (rank), leh panmun
(position) te khek thei a, a mau hihna khah suak ding a lauhman uh hizaw hi.
Kammal dang khat in gen leng, tua bang mite pen a mau bek mahin ukna nei
suaksuak ding, a mau bek mah lukhaipi hi den ding cih a deih mite hi zaw uhhi.
Democracy in paizia i cih khit bangin
Democracy a kicih theihna dingin thumeng (elements) pawlkhat om hi. Tua thumeng
omlo in thu khat bek tawh a pai ciangin democracy kicing zolo hi. Democracy pen
mi a tamzaw thu neihna, ukna leh vaihawmna hi, cih tawh a tamzaw in i theihna
pen man hetlo hi. Tua ban-ah Democracy ukna sungah mi a tamzaw in zo den ding
cih bek tawh tehkak ding hilo hi. Tua bangin a tamzaw’ thu neihna bek en ziau
a, democracy thumeng (elements) dangte i zat nawnloh hun ciangin democracy pen
mihon ukna (mob rule) suak ziau hi. Tua thumeng (elements) te om kei leh
Democracy pen mihon ukna (Mob rule) suak pah a, tualsung (society) a dingin
hoihna sangin siatna piang sak zaw hi. Mihon ukna pen a tamzaw thu kizui a hih
tei hangin, thu dik leh thutang tawh vaihawmna hilo a hih manin siatna a ngahlo
ding mikhat peuh in siatna ngah lawh thei hi. Aristotle in zong hih bangin
Democracy paizia thumeng (elements) te omlo a, mihon ukna (mob rule) tawh thu a
kikhensatna hangin Democracy na gensia ngei hi.
Democracy paizia a vaihawmna a kicing sak
thumengte (elements) pawlkhat pen hih bangin ki mu thei hi. Tuate in:-
1. A suakta leh
thutang a ( free and Fair) kitelna zui in thu nei ding (Makai ding) telna or
khekna;
2. Tangpi tangta (mipi)
in nisim nuntakna a kisam kipawlna leh gamvaite ah thalawp tak in kikum/kihel
theihna;
3. Mihing khempeuh
in a kikim a, a ngah mihing hamphatna (human rights) pen mi kim a dingin a kibang
in hutsakna;
4. Thukhun leh
paizia (procedures) in mi kim a hut leh a huam ding Thukhun vaihawmna;
5. Kisitna leh
kikhai kimna (Check and balance) leh a tawmzawte hutna ( protect minority)
Hih a tunga thumengte (elements) a kicing
zawdeuh in a nuai ah i gen ding hi. Tuate a kicing zaw deuh in genleng
Democracy pen a kicinna kitheitel zaw ding hi.
1. Mihing in a makai
dinguh, a mau deih mi mah tel ut hi. Hih pen mihing in a pianken suahtakna khat
zong a hih manin, tua suahtakna bangin gamtat theih ding a lung gulh uh ahihi. Mi
khat in mi hon khat a uk ding leh a makaih dingin a ma’ deih mi khat sawl leh,
tua mi hon in a hong kisawl mi pen sang zolo thei hi. Tua a hih manin hong
makaih ding mi pen ei mah in tel theih ding ki-ut hi. Tua kitelna pen mi
khatpeuh in thagum hatna, sum leh paii neih manin thupiakna tawh deihlo pi
telsakna nam hilo ding hi. Tua banah, kitelna pen a thu tang, thu dik leh vote
kiguksakna hilo ding a, kitelna ah vote pen a simtham theithei hi ding hi.
Hih munah thu
kalzeh in i gen ut thu khat in, panmun khempeuh ah kitelna tawh kalsuan ding
cih pen hi thei kimlo hi. Mi khempeuh, tangpi tangta tawh kisai vaite bek a
kitelna zat hoih hi. Mi khempeuh, tangpi tangta tawh kisailo, a kisam mite bek
tawh kisai kha thute ah pen kiguanna (appointment), kisehna (selection) hoih
zaw thei hi. Gentehna in Siamna (skills) bulphuh na sepna, kiva’kna
(Profession) na sepna cih munte ah kitelna tawh panmun (position) tel mawk pen
nasepna ah lawhcing (effective) zolo hi. Galkap mang a sem ding pen mipi in tel
ding kilawm hetlo ding a, galvai sa vai a siam leh a sin khin khat a kiguan
thoh (appointed) hoih zaw hi. Panmun a ding kiguanna (appointment) leh kisehna
(selection) pen Democracy inn khuampi (institution) sungah, a kisapna mun a
kizang thei a hihi. Tua banga i zat teh zong lawhcing zaw hi. A hizongin, a
huampi leh a buppi ( as a whole) in kiguanna leh kisehna zang lenglah hoihlo
kawikawi hi. Kipawlna or gambup huam in a kizat tak ciangin lah mipi or tangpi
tangta kihel khakna omlo in, a siam leh a kivaa’ te bek in a kikumna hong suak
zel a hih manin tangpi tangta lungkimna om theilo hi. Mipi or tangpi tangta
tawh kisai vaihawmna gambup or kipawlna bup vai a panmun leh makai sem ding
mite pen mipi in a suakta leh thutang tawh kibawl kiteelna pan telkhiat na pen
mipi lungkimna hi pen hi. A buppi vai kitel khit ciangin a thu leh la zui a
kisam panmun len ding pen siamna leh kiva’kna (merit) zui-in mipi tel khiat
makaite’n kiguanna leh kisehna a neih pen lawhcing (effective) zaw hi.
2. Kikum leh kihelna
(participation) pen tualsung, khuasung, kipawlna sung leh gamsung khantohna dingin
vai kisam penpen a hihi. Mipi or tangpi tangta in kipawlna bup vai, gambup vai
leh khuasung tualsung bup vai tawh kisai thusia thupha ah kitheih mawhbawl
mawkmawk lo in, kikum leh kihel ding thupi mahmah hi. Thunei vaihawm mite in
kipawlna bup vai, gam bup vai pen mite theih ding a kilawm thute mipi in a
theih na ding a gel bangun, mipi lam panin zong i theih ding a thupi vaite pen
kan ding leh zon ding a hihi. A hangin Democracy paizia hoih tak a, a kizatna
mun ah thu neihna leh ukna pen mipite kiang pan kipan hi a; mipi in tua thu
neihna leh ukna pen makai thunei mite tungah hun tawlkhat sung a kawm (lend) pak
uh tawh kibang a hihi. Tua thu neihna leh ukna pen a kikawm pak a hih manin a
kizatna ding mun ah a kizat ding mipi in etcik a, thuman leh thutang tawh a
kizat ding leh lam a lah ding kisam hi. (A kikawm sung pen phalna tawh kipia
a hihna zui in, a kipiakkik ma hun or a kikawm sung a kizatna mun khempeuh ah,
a zatzia ding pen a kawmsak (lender) te’n a kilawm lo ciang dong vasawk sak loh
ding ahihi.) Mipi or tangpi tangta kikumna/kihelna ding zong a lampi/ a
zawi om hi. Tua zawi zui in a hunhun a kinei makai kitel hun ciangin a deih mi pen
mah pilvang tak a, a tel ding a hihi. Van na kawm (zatsak) ding mi pen na muan
pen mite mah na teel ding a hihi. Mipi kikum theihna dingin kipawlna leh
gamsung a thuneihna ah dinmun ngah tektek kullo a, kipawlna bup or gambup a
ding hoihna a piang sak thei a hiang neuneute tungtawn in zong kihel theih hi.
Na sepna leh kipiak khiatna tawh zong kisem thei hi. Tlawm ngaihna (volunteer)
nasep pan in zong kikum theihna om hi. A hizongin tua bang a kikumna ding or
kihelna dingin mi khat peuh pen kipawlna or panmun khat nei teitei ding cih
thatang zang a kisawl theih ding hilo hi. A thupi pen in kipawlna bup or gambup
vai ah kikumna leh kihelna neihna ding lampi leh zawi tampi om a, tuate in thuman
leh thutang bulphuh a kigelh thukhun zui a paidan te zui ding a, thudam tawh mi
khat leh khat ki zahtakna a bulphuh hamtang ding a hihi.
3. Democracy paizia vaihawmna
ah a thupi pen in mihing a min piang khempeuh in a kikim leh a kibang in a
piang vive hi hang! cih thu pansan leh kipsakna a hihi. Ukna nei mi khatpeuh in
(Ukpi, Kumpi or tou ) na pianna mun hang, minam hang or mel leh puam hang, na
nu le pa hang, hauhna leh zawnna hang leh thu dang khatpeuh hang tawh a
tualniam zaw mi a hong koih dinguh pen ngeina hilo hi. Mihing khat hihna hang a
nisim kisapnate ah tualniam tualsang cih paulapna tawh liangko kikim lohna pen
democracy in deih lo hi. Mihing khat hihna tawh kitang sapna kibang teng pen mi
kim in a kikim ngah theihna a neih ding hi a, tuate pen mi dangkhat in thatang
hat thu tawh kisuhsak, kikhak tansak ding hilo hi. Mi khempeuh in a kikim a
mihing kisapte a ngah theihna ding pen thukhun in a hut ding democracy paizia a
hihi. A thahat mi khat in a zawhthoh midang khat kiangah a ma’ deihna bangin
sepsakna, thu leh la zuih sakna, biakna leh ngeina bawlsakna cih peuhmah pen
mihing ngeina hilo hi. Na sin ut pilna leh siamna, na zon ut thu leh la pen mi
kim in a kibangin zon theihna neih tek ding a hihi. Thu gen lasak ding zong
sawl zawh thu tawh hilo hi. A hizongin nang ma hangin midang khat in siatna a ngahna
ding, mi dang khatpeuh nuntakna a siasak ding thute pen thukhun in phallo a hih
manin sep loh ding a hihi. A thupi pen ah, thuneihna, pilna, hauhna leh biakna
a kipan a hang khatpeuh paulam zangin mi khat peuhpeuh zawhthoh bawl loh ding a
hihi. Khuaneu mi hihna, khuapi mi hihna hang tawh a hi zongin, citheih cimawhna
hang tawh a hi zongin kisim mawh tuam ding pen democracy in deihlo hi. Biakna
leh Pupa upna khatpeuh van zat a zang in mite khim a, khemna tawh thu neih khum
ding hilo hi. Thu gen la sa mi in a ma sep dingte a kilawm bangin a sep mah
bangin a za a ngai leh a zui a zang mite in zong thu khinkhai in a mau
hoihsakna tawh a pai dinguh a hihi. Suahtakna tawh thu gen la sa, na sep
silbawlna ah thukhun tawh kituak a sepna pen democracy zungpi khat a hihi.
4. Thukhun in mi
khempeuh a kikim leh a kibangin mun citeng ah a hut, a kep ding a hihi. Panmun
nei makai or Ulian a hih man, Sia/Siama a hih manin thukhun pen a mau a ding
zaidam deuh ding, thukhun in a mau enkai lo ding cih hi lo ding hi. Democracy
paizia vaihawmna ah mi khempeuh in a sepna tawh kituak thaman a ngah ding leh a
kipiak ding thupi hi. Na hoih sem mite in phatawina leh min phatna a ngah ding
bangun, na hoihlo a sem mite in gawtna a ngah dinguh a hihi. Cihnopna ah,
meigong tagahte tungah a kibangin a kisep bangin Kumpi Ulian leh Sia/Siamah te
tungah zong a kisep ding paizia a hihi. Thukhun tungah kuamah omlo ding a,
thukhun pen mi khempeuh a dingin kidalna lum leh teii a hih ding a hihi. Mi
khatpeuh pen upmawh thu tawh kimin sia sak, ki min daisak mawkmawk ding hilo
hi. Tua bek hilo, mi khatpeuh zong muahmawh thu tawh a kingawh leh a thu kician
a kitheih mateng in ngawh a om mi (the accused) pen min siat sakna ding pan
thukhun in a hut ding a hihi. Ukna nei khat or Mi zahtak makai khat i gen
mawkmawk na bek bulphuh a thu tawpna khup bawl pah ding hilo a, thukhun zui a sittel
ding a hihi. Tua a hih manin thukhun encik ding mi pen ukna leh vaihawmna a len
panmun nei mite sung pan a hihlo ding a kul/poimoh banah, kuamah huzaapna a
thuak lo thukhen mang a om ding kisam hi. Ukna leh vaihawmna nei Uliante in
thukhen mang tawh a sepkhop tak ciangin a mau deihna lamah thu kai tawntung thei
uh a hih manin a lang lamte a dingin thutang (justice) om thei nawnlo hi.
Thukhenna pen Ukna nei mite in a mau deihna bangin huzaap in sawk theilo ding
hi. Ukna leh vaihawmna a nei Kumpi ulian, makaite in a mau sep theihna leh thu
khenna a gawm khopna ah thu maan, thu taang kimu khia ngeilo dinga, ukna nei
mite pen a tawntungin man den ding uhhi. A thupi pen in thukhenna pen ukna nei
makaite in nei khawm kei leh thu taang tawh vai kihawm thei bek hi. Ukna nei
makaite cih bangbang tawh paina zong om nawnlo ding hi. Thuneihna pen ukna nei
leh makai mite in a khengval in zang kha thei a, zongsatna in nei thei lai hi.
I zongsatna khat peuh pen a khiallo in kisang kha thei lai hi.
5. Ki khaikimna leh
mi a tawm zawte hutna pen Democracy paizia vaihawmna sungah a zungpi khat a
hihi. Ki khaikimnna a om loh ciangin a sem mite sepna khempeuh a hoih deihna hi
ci uh a, a hoih dingin kisang a hih manin a siatna leh thanemna kimu khia
theilo hi. Kitelna tawh makai khekna or teelna a om ngei lohna kipawlna leh gam
ah makaipi te in thu neihna a khengval a zat pen zongsang ta uh a hih manin a
mau sep khempeuh a man pen, a hoih pen leh khialhna omlo in koih uhhi. Tua bek
hilo makai pi khat bek in ukna a neih tak ciangin, mihing’ huaihamna lungsim
tawh na kisem a hih manin a khaktan thei ding omlo hi. Democracy paizia
vaihawmna ah tua bang a om lohna ding ( a tawm zawkna ding) in makaite’ thu
neihna kihawm (power sharing) kinei a hih manin sep leh bawl kitheih pih tek hi.
I nisim kipawlna ah zong kipawlna a hoih zawkna dingin makai vaihawm pawl (
Executive Members) ci in kikoih dimdiam hi. Khat bek in thu neihna or khat bek
thu neihsakna pen a huaiham mihingte a dingin lau huai a, kisiatna (corrupt)
baih mahmah a hih manin supna tam zaw hi.
Mi pawlkhat in
Democracy hi ven, a tamzaw thu tawh kalsuanna a kizuih ding hi cih paulap in
thu pen “mittaw sial khau let” thei mawk hi. Democracy paizia ah mipi or tangpi
tangta in a siangtho kitelna pan a teel, a gualzo pen in ukna leh vaihawmna a
let ding mah a hihi. A hizongin a tawmzaw mite deihna leh mailam vai pen
tuatcil sak in neusek sak ding cih pen khial hi (Majority rules, minority right).
A hangin democracy paizia thumengte (elements) ahi, mihing khat leh khat ki zaa
kimna, thukhun mai ah a kikim hamphatna neihna cihte tawh kikalh hi. Democracy paizia
thumengte (elements) nawl khin a, a tamzaw in zo a hih teh, a tawmzaw mite’n
zuih hamtang kul ding cih pen democracy hilo a, mihon ukna (mob rule) a hihi. A
tawmzaw mite pen thukhun tawh kituak a hutna leh kepna piak ding hi a, a mau a
ding a thu hoih la hoih, a kilawm a kituak a ngaihsut sak ding a hihi. Tua hi
kei leh, mimal a a tamzaw, beh leh phung pha mite leh mihon a kicing zaw mite
in a tawmzaw mite pen zawhthoh bawlna leh thagum hatna zang a ukna suak ding
hi. Gamlak thukhun (the jungle’s law) bangin a tha hathat, a ci phapha in a
zawhna mun pen mihing a piang sia leh pha ngaihsutna nei mite a dingin hoihlo
hi.
Democracy paizia in muh dan leh
ngaihsutna tuamtuam te khinkhai ding thupi sak hi. Nang muhna lam pan a et in
khial hetlo hi na pi’n, na kimai ngat pih na langkhat a om mite etna lam panin
zong a maute na man veve thei uhhi. Mihing in a mau deih khempeuh ngah khin
ding, nei khin ding cih pen a tangtung thei thu hilo a, midangte tawh
kihawmtuah (compromise) na pen nisim in neih siam kisam hi. “Gip zong leh khuai
zong” bangin mi kim in a mau metna dingah midangte supna a hilo a vaihawm siam
ding thupi hi. Pasian in mihing khempeuh a ma lim leh mel sun a, a bawl tek a
hih manin tua mihingte pen khat leh khat a ki zaa kim tek a hihi. Mi khat pen
khat sangin vaanglian zaw cih peuh mah omlo a, a kikim a Pasian hong bawl a
hihi. Tua mihingte pen khat leh khat ki-itna bulphuh a kikhual theihna ding
zong Pasian in a deihpen thu a hihi. Topa Jesu in zong “Nang na ki-it bangin na
veng, (mi dangte) na it in Matt 22:39)” ci’n thupiak hong nutsiat hi. Tua bang
a khat leh khat kikhualna zung kip kha in, a gah suah theihna dingin leitung
vaihawmna leh ki-ukna nam tuamtuamte sung pan in Democracy paizia pen a hoih
pen hilai phot hi. Mihing ki zaa kimna tawh khat leh khat ki-itna ding Pasian
in a deih pen a hih manin tua thu a pianna ding vaihawm zia a om sak pen Pasian
mah a hihi. Tua a hih manin Pasian deihna pen Democracy paizia in tangtung sak
a hih manin Democracy paizia leh vaihawmzia ah Pasian zong lungkim mahmah ding
hi.
Date March 28, 2019
Etkakna (
Citation)
