Pasian Thu leh Mihing Hamphatna Episode 2

Pasian Thu leh Mihing Hamphatna Episode 2

Zolab Podcast pan in hong muak ing. Zolab Podcast pen Apple podcast, Google podcast, Spotify podcast, Youtube channel, FB page ah kikhah hi. Zolab Podcast pan thu kigente hoih sa in na deih leh subscribe na bawl sak in.

Tuni a i gen ding thu pen “Pasian Thu leh Mihing Hamphatna thulu, Episode 2 hi ding hi. Mihing hamphatna leh Pasian thu kituahna, Mihing hamphatna thu in Pasian thu laigi a bulphuhna Laisiangtho pansan in gen sawm ding hihang.

December 10,1948 kum a UN General Assembly in a “Universal Declaration of Human Rights- UDHR” a kipsak thu sungah thukhilte in Laisiangtho sunga om Pasian thu a enkak in a kituahna genkhawm leng ut hang.

UDHR Thukhil 1.

Mihing a min piang khempeuh a suah tung limlim in a suakta sa a piang hi a, vaang leh hamphatna a kikim in nei ciat uhhi. Thu lungngaih theihna leh a sia a pha khen theihna thupha ngah uh a, sanggam khat hihna lungsim tawh khat leh khat a gamtat ciat ding uh ahi hi.

(Genesis 1:26-27)

Mihing in vaang leh hamphatna kikim nei ciat a hih manin kua-mah in vaang lian zaw, vaang neuzaw; hamphatna lian zaw, hamphatna tawm zaw cih om tuanlo hi. A kikim a hih manin, a kikimlo a, a ngah a om leh (ahkl) a kikhak tansak man hi ding ding. “Vaang lianzaw, neu zaw” cih tawh kisai in “Thu ngen dam thei, vaang nei ngait” cih mihing lam pan ki-om sak thei hi. Damsakna tawh kisai in Luke 7:50 sunga Jesu in, “Na upna in hong damask khinta hi” ci hi. Nang damna ding na Upna kisam cihna a hihi. Hih mun a, “Pasian vangliatna a ngah” “Pasian in a zat zawk” mi bel om mah in teh. Tua pen “Pasian vangliatna” bek hi a, tua a kizang mipa, minu in “vaang” hi zenzen lo hi. Pasian in a nasepna ah a zat zawk deuh mi tuam om cihna a hihi.

Piancilna 1:26-27 sungah “ Eite lim leh meel sun in mihing bawl ni, ei tawh kibang sak ni” ci in mihing a bawl a hihi. Hih laisiangtho mun sungah mihing pen Pasian i lim leh mel suun a kibawl a hih manin, Pasian i sehkhen khat cih theih ding hi phial hi. Mihing pen Pasian lim leh mel sun a hih manin, a pha gelna (moral status) pen Pasian in thupi koih hi. Thupha gelna nei a mihing kibawl a hih mah bangin thu ngaihsut theihna, suahtakna, sia leh pha khinkhai theihna, itna neihna cih bangin a nei kimtek ding I hihi. Lamkhat pan in gen leng, Pasian in mihingte a ma lim leh meel sung a hong bawl tek, or mihing khempeuh in Pasian lim leh meel sun tek I hih manin “mihing khempeuh tanh kikimna” cih thu guipi pen hih pan kipan a hihi kici hi. Cih nopna ah kuamah in Pasian lim leh meel pen midang khatpeuh sangin tam neihzaw dingin kibawl hilo hi, cihna a hihi.

Mihing pen vaang leh hamphatna kikim neitek a hong kibawl a hih manin, sia leh pha khinkhai theihna zong a kikimte in kinei pah takteh, khat leh khat pen unau lungsim nei ki-et tek ding kilawm hi. Galati 5:13-14 sungah “Na suahtakna pen itna neihna ding hi a, Nang mah bangin na vengte na it ding hi cih a hihi.

Mihing khempeuh pen a suakta tek i hih manin i suahtakna pen hoih tak in i zat siam tek ding kisam hi. Hih mun ah Suahtakna pen “nang ma nuntakna ding a hoih zaw ding leh midangte a dingin a hoih zaw ding ngimna bek hi ding hi. Nang mimal suaktakna pen, “nang ma khut zak khak ciang bek huam sak ding” kilawm hi. Na khut zan a, na batphak na ciang a kheng val leh midangte suahtakna na hekkhak sak, na suksiat sak ding na hihi. Lam khat pan in nang mimal suahtakna pen midangte huang sung vasawk kha lo ding hi. Tua pen “suaktakna” i bulpi ngimna a hihi. Na kim leh kiang a om mite het kha, midangte huang sungteng va nawk gawp a, gamtat kampauna pen midangte suahtakna a palsia (violation) na hih manin “suaktakna” zatna lam man hi nawnlo hi. Laisiangtho Galati 5:15 sungah “gamsa bangin khat leh khat kiphuai in kipet kha leng, vek pi in kisiat lawh hi” cih kammal pen midangte siatna ding gel loh ding a deihna a hihi.

Suahtakna, Vaang leh tanh kikimna pen mihing a min piang khempeuh tungah a kikimtek in a hong kipia sa a hihi. Bang hanghiam cihte mihing pen Pasian lim leh mel sun ding a hong kibawl a hih man a hihi. Sawttak Paul in Galatine mite tungah “rights-hamphatna” kici pen mihing mimal in a hanciam thu tawh a ngah hilo a hihna hong phawk sak kik a, a hizongin tua hamphatna pen Pasian hong piak sa, ordain khit a hihna hong gen kik hi. Paul in Pasian hong piak suahtakna pen mimal in a mau ut bangin gamtakna ding a license a hong piak hilo a, “midangte itna ding leh Pasianna sepna ding” a suahtakna hong piak a hihi ci hi.

A huamkim in cileng, Mihing Hamphatna pen Pasian in mihingte hong it man a hong piak a hih bangin, mihing khat leh khat zong tua hamphatna tawh ki-itna ding a deihna a hihi.

UDHR Thukhil 2.

1.        Mi khempeuh in minam hang, meel pianzia hang, numei-pasal hihna hang, kampau hang, biakna hang, gam sung ki-ukna hang leh sandan kibat lohna hang, gammi hihna leh suahna khanna kibat lohna hang, neih leh lam hang, pianna leitang leh za lian za neu hang khatpeuh paulap in kideidanna om peuhmah loin hih Tangkona sung a kigen hamphatna leh suahtakna khempeuh ngah kim hi.

2.      Tua bek hi loin, mikhat i a tenna gam in, a suakta gam hita leh, gam khat vaihawmna sungah a ki-uk lai hi ta leh, a mau leh amau a ki-uk tuam nailo gam hi ta leh, kumpi gam sungah ki-ukna ciangtan nei khat sungah a om hita leh, tua thute paulamin kideidanna om thei lo ding hi.

Exodus 23:2-9

2.Siatna a bawl dingin mihon na zui kei ding uh hi. Thutang a hei khia dingin mi honpi nung zui-in thu neihna-ah teci na pang kei ding uh hi. 3. Ama thu neihna-ah mizawngpa na langneih kei ding uh hi. *4“Na langneih mite' bawngtal ahi a, a la ahi zongin a gammang na tuah uh leh ama kiangah na hawlkik ding uh hi. 5Nangmah a hong mudahpa' la a van tawh a puk na muh leh a la tawh amah na nusia kei ding a, tua la phot toh ding na huh ding hi. *6“Ama thu neihna-ah mizawngpa a thutang kimlai na lelsak kei ding uh hi. 7A manlopi-a mi mawhsak ding panin kikem un la, a dikpa leh thumanpa that kei un. Bang hang hiam cih leh a gilo mi ka khah kei ding hi. 8Sumgolh na la kei ding uh hi. Bang hang hiam cih leh sumgolh in uliante' mit tawsak a, thuman mite' thu heikhiatsak hi. *9“Khualmi na nengniam kei ding uh hi. Khualmi' lungsim na thei uh hi. Bang hang hiam cih leh note zong Egypt gamah khualmi na hi ngei uh hi

Hih Laisiangtho kammal sungah “bang ci bangin thutanna (justice) ki kemcing, kibawl, kizong ding cih Pasian in Isarael tungah thu na gen hi. Tua thutanna (Justice) hangin gam sungah a teng mite leh khual mite a dingin bitna leh lungmuanna a omna ding ngimna a hihi. Tua bangin gamsung ah thutanna kisep suahna ding, kikepcingna dingin numei pasal, mivom mikang, biakna leh sanna, na khatpeuh kilamna omlo in kisem vek ding hi. Mikhat peuh pen midang khat tungah thutang leh diktatna a zat ding thu guipi a hihi. Tua bangin hih mun a UDHR thukhil 2, (1) na sungah zong mihing te tungah thu tanna a om theihna dingin kuamah deidanna omlo in kisem ding, ngah kim thei ding cihna a hihi.

Tua banah “ Tua bek hi loin, mikhat i a tenna gam in, a suakta gam hita leh, gam khat vaihawmna sungah a ki-uk lai hi ta leh, a mau leh amau a ki-uk tuam nailo gam hi ta leh, kumpi gam sungah ki-ukna ciangtan nei khat sungah a om hita leh, tua thute paulamin kideidanna om thei lo ding hi”.

Galati 3:26-28: “26 Khrih Jesuh tawh na kipawl manun note khempeuh Pasian' tate na suahtheihna uh pen na upna hang uh ahi hi. 27Khrih sungah a kiphum note in Khrih' pianzia a nei khinta na hi uh hi. 28Tua ahih manin Jew mi leh Gentail mi, sila leh sila a hilo, numei leh pasal cih bangin kideidanna om nawnlo a, note khempeuh Khrih tawh na kipawlna hangun pawlkhat hi-in, a kibangkim na hi uh hi.

Sawl tak Paul in, “Zeisu sungah mi khempeuh kipum khat in, mi khempeuh tan kikimna a genna hi a, nakpi tak in ultung sak mahmah hi. (Kikimna leh kibatna) Tua pen “bang upna leh biakna” cih hituanlo a, Jews biakna leh Jews minam a hilo biakna sung zong a huam a hihi. Tu hun kammal in gen leng, minam kideidanlo, biakna kideidanlo in mikim in tankikim hi hang, Pasian upna leh zonna ah zong a pianzia pan a et in maipha a ngah zaw ding cih bang mi omtuanlo cihna a hihi.

Mihing pianzia ah mimal khat leh khat kikal pan in mikhat peuh in midang khatpeuh sangin dinmun sangzaw tuam neih hi cih a hizongin, minam khat in minam dang khatpeuh sangin nampi zaw hi cih ding a hizongin “pianzia” pansan in kilam danna om vet lo hi. Minam hihna, neih leh lam, pilna siamna cih te akipan in mi hing pianzia ah a dinmun sangzaw a ngah ding mi om hetlo hi. Mihing khempeuh “guak tang” vive in a piang khia i hihi. Tua hi a, mihing pian khit a kingan leitung nate pansan in mihing kideidanna cihte omlo in mihing khempeuh pen suahtakna, hamphatna ah tan kikim ngah tek ding kilawm a hihi.

UDHR Thukhil 3.

Mi kim in a ma nuntak theih na ding, a ma suahtak na ding leh a ma lungnopna ding hamphatna ngah hi.

Luke 4: 16-19 - 16Tua ciangin ama khan'na Nazareth khua-ah Jesuh pai a, Sabbath ni ciangin a paingei bangin kikhopna inn-ah a pai hi. Lai Siangtho a sim dingin amah ding a, 17a nget bangin a sim dingin kamsang Isaiah Lai Siangtho bu a kipia hi. A laibu lemin a simnopna mun a zon' ciangin a nuai-a bangin a kigelhna mun mu-in a sim hi. Tua munah, 18“Gimna a thuak mite tungah Lungdamna Thu a hilh dingin Topa in kei hong sehkhin ahih manin keima sungah Topa' kha hong om hi.

“Sal in a kimante tungah suahtakna thu a gen ding, mittawte in khua a muhkik theihna ding, a kinengniamte a suaktasak ding leh 19Topa in a mite a hotkhiat ding kum a pulak dingin kei hong sawl hi,” ci-in a kigelh hi

Jesu in a nasep a kipat ding tak ciangin Khasiangtho Vangliatna a ma tungah tung a, hih Isaiah 61 sung a simna a hihi. Hih mun ah Jesu in “mi zawngte, a kiman mite leh a kinengcip mite” a ding a veina, tua bang a om mite in suahtakna a ngahna ding a deihna, mi khempeuhte tua bang mun pan suahtak sak nopna nakpi tak in gen hi. “Nuntak theihna ding” in mat leh hen pan kipelh in, simmawh nencipna tawh kipelh ding kisam hi.

Mihing khat i nuntakna ding kikhaktan sakloh ding, ( nuntakna ding a kisam nasep silbawl te a kipan, an leh tui ngahna ding dong ah), suahtakna zong kisuk siat saklo ding, kidal leh kikhak tan saklo in bang ah mi kim in lungnopna ngah theihna ding a thupi a hihi.

Jesu in a Ministry a kipat a kipan in mihing khat i nuntakna (life), zalenna/suahtakna (liberty) leh bitna (security) pen thupi tak in na koih hi. Tua hi a, Jesu pianma a kipan in Jews mi sunga zong tua bang mite a ding in a kikim hamphatna a om theihna dingin na masak mahmah hi. Jesu in A kinengcip mite a masak na pen midangte sangin a maute a manpha zaw cihna lam hilo a, a maute pen thutanna tawh kisai in a panpih ding, a huh ding mi omlo a hih man hi zaw hi.

Thu-um mi (Christian) mi khat in Topa Jesu hong lamlahna bangin mi cimawhte, a kinengcip mite lam ah thu man leh thutang a om theihna dingin panpih in, hut a kep cing kilawm hi. Tua bangin hi leh mi kim in suahpih nuntakna sungah suahtakna leh lungnopna, bitna ngah kim ciat ding hi.

Date 07/06/2020

--

Mihing Hamphatna thu Laisiangtho pansan a etna

Mihing hamphatna thu Laisiangtho pansan a etna.

(A biblical view of human rights)

Mihing Hamphatna (Human Rights) tawh kisai a kigen tak ciangin, mi pawlkhat in Pasian thu tawh kituaklo, (Pasian thu tawh) ki-elpuak ci’n a sang leh a gen om thei hi. Tua ciangbek hilo in, Mihing hamphatna i cih pen Pasian umlo mite’ gamtatna ding bang danin koih in kigen a hih manin, Mihing hamphatna (Human Rights) a lamsang (promote) leh a sinsak (advocate) mite pen Pasian thu-um lo bangin a kimuh theihna dingin thu kigen hi. Tua hi a, hih thutawh kisai in Pasian kammal Laisiangtho tawh kituahna a neih leh a neih loh et theihna dingin thu gen leng i ut hi. Kituak maw, kituak lo cih pen a thu a za leh a ngai mite i khensat dingin koih ding hi hang!

Mihing Hamphatna (Human rights) tawh kisai i gen ma-in, i telsiang masak ding thu khat om hi. Tua thu in kizopna (Relationship) a hihi. Tua kizopna pen:

1.    Pasian leh mihing kizopna: (God-Man Relationship): Pasian leh Mihing kikal pen tung leh nuai kizopna (Vertical Relationship) a hihi. Pasian cih, (Pasian) gen pen “a man pen” hi a, mihing in “ukna neilo in, Pasian cihcih zuih ding” a hihi. Church (Saptuam) tangthu hun masa lam in, Pasian leh mihing kikal pen milai (Medium) om bangin kisang hi. Tua Milai (medium) ding pen Priest te in kikoih hi. Tu hun in zong tua bang a zang om lai kha ding hi. A hizongin mipawl khat in thumuhna thak hong neihna tawh kiton in, mikhempeuh in Siampi zaa ngah cihna tawh Pasian tawh kizopna pen direct in kizop theihna hi cih hi. Mawhmai sakna ding, lungdam koih hun ah, Pasian mai ei mahmah in direct in kizong thei ci’n kisang ta hi.Tua pen tung leh nuai kizopna (vertical relationship) mah hilai hi.

2.    Mihing leh mihing kizopna ( Man-Man relationship): Pasian in mihing a bawl in a MA lim le mel suun in hong bawltek a hih manin “a nampi zaw, a nam neu zaw” cih bang omlo in a kikim tek a hong bawl a hihi. Tua hangin mihing leh mihing kizopna pen “tung le nuai kizopna (vertical relationship) hilo a, vei le tak kizopna (horizontal relationship) a hih ding pen a pelmawh a hihi.

Hih mun ah telkhialh loh ding thu khat om a, “Pawlpi/Saptuam sung vaihawmna tawh kisai pen Pasian leh mihing kikal vai bek hi khinlo a, mihing leh mihing kikal vai zong tampi omhi cih phawk ding kisam hi. Pasian kiang pan bek in sawlna (order) thu mang in mihingte pen kikum khawm a vaihawm ding a hihi.

Mihing pen a kibawl (created) a hih bangin Pasian tawh teh theih hilo hi. Tua hangin, Pasian in a bawlsa mite tungah “thu neihna sang pen (supreme power) a neih ding pen a ngeina a hihi. Pasian in mihing pen Pasian lim leh bel (image) su’n lian a, a bawl a hih manin mihing ngah ding a Pasian hong piak rights pen pung in khang ding, leitung zang ding leh ganhingte tungah ukna nei ding cih a hihi. Laisingtho Piancilna 1:26-27 sungah “i lim leh mel sun in mihing bawl ni” ci a hih manin mihing in a mah a bawlpa kiangah “deih ngetna- Demand” neih theihna ding rights omlo hi. A hizongin Pasian bawlsa mihing leh mihing pen, “a pumpi a lianzaw, a neuzaw, a sangzaw, a tomzaw, a pilzaw, a haizaw, a hauzaw, a zawngzaw” cih a om hangin Pasian mai ah kuamah tungnung zaw tuanlo in tanh kikim vive i hihi. Mihing khat in mihing dang khat tungah a mah leh a mah Pasian dinmun a kikoih in, mite a vikgawp ding pen kuamah in tanvo nei tuamlo hi. A kibawl vive mihing i hihna siksan in mihing khat leh khat pen tanh kikim a kizop ding a kilawm thu a hihi. Tua a hih manin Mihing leh mihing kizopna pen vei leh tak kizopna/ tamkim kizopna (Horizontal Relationship) mah hoih pen leh dik pen hi.

Pasian leh mihing kizopna pen tung leh nuai kizopna (Vertical Relationship) a hih manin Laisiangtho zui in gen leng mihing in Pasian tungah deihna (demand) bawlna dingin “rights” neilo hi. Pasian in hi a cih leh hi, hilo a cih leh hilo hi.Bang hang hiam cih leh, Pasian in mihing pen ngimna omsa a, a bawl a hih manin a neih ding a koihsa thu om khin hi. Pasian ngimna a om sa thute sung pan a lang (half) bang pen mihing nuntakna ah phattuamna a pia ding thute hi a, a lang (half) pen mihing nuntakna ah thutanna (Justice) a om theihna ding thute a hihi.

Mihing leh mihing kikal kizopna pen vei le tak kizopna (horizontal relationship) a hih man in, mihing khat leh khat kikal ah mi khempeuh in a kikim in hamphatna (rights) nei ciat hi. (Hih pen mihing leh mihing kizopna thu a hihi) Cihnopna ah Pasian in gelna neisa a mihing khempeuh in ngah ding hamphatna hong piakte ( pung in khang ding, leitung ah suakta tak in nungta ding leh singkung lopa leh ganhingte tung uknna nei ding) cihte pen mihing khat leh mihing khat kisuk siatna a om ciangin i ngah ding a omsa/ hong kipiasa thu pen i ngen thei tek hi. Bang hang hiam cihleh mihing khempeuh pen Pasian lim leh mel sun a hong kibawl vive i hihi. (Hih mun ah, mihing khat leh khat mihing khat bangin kisan ding hamsa i sak manin buaina kipan a hihi.)

Pasian in mihingte a ma lim leh mel sun in hong bawl na zui-in, a kipiangsak khempeuh (all creations) sung pan in mihingin man nei (worth) leh manpha (value) zaw hi. Pasian lim le mel sun a kibawl mihing i hih manin mi khempeuh in mihing nuntakna tawh a kikhenkhia theilo ding manphatna, vang i neitek hi. Mihing manphatna leh vangte kepbit theihna ding, mihing khat leh khat kisuksiat sak lohna ding pen hamphatna (rights) leh mawhpuak (obligations) a hihi. Tua rights pen ngah ding a i kilawm man a kingah hilo a, thalawh zawh man a kingah zong hilo, pil man siamman, mivom mikang man zong hilo, “Pasian lim leh mel” i sut man a hihi. Pasian lim le mel sun a kiluah suk, khanggui kizom mihing i hih manin “hoihna, manphatna leh mawhna, hoihlohna” zong a kiluah suk suak i hihi. (Theih ding: Luahsuk mawhna kici pen hih tawh kibang hi a, mawhna kiluah suk a hih manin hoihna, manphatna rights zong kiluah suk suak ahihi.)

Mi tampi in a san zawh nailoh hangin mihing hamphatna (human rights) kici pen Laisiangtho bulphuh a kipankhia, kimu khia thu a hihi. Suak leh sal a kikhawina (Slavery) beina ding a hanciam mi te’n “Pasian lim leh mel sun in mi khempeuh a kibang in kibawl hi a, mivomte (Silate) zong mihing mah hi; Pasian bawl sa mah a hi uhhi, ci’n LST pansan uhhi. Numei tankikimna ding a mapang leh a sem mite’n zong “numeite pen Pasian bawl hi cin LST pansan uhhi. Naupang nasep sawlna (Child Labor) beina ding a sem mite in “Naupangte pen Pasian bawl hi” ci’n LST pansan hi. Nautolhna (Abortion) a langpan mite in zong nautui/nauta te zong Pasian bawl hi cin LST pansan uhhi. Hih thute khempeuh pen Pasian thu tawh kituak cih ciangbek hilo in, LST sungah a om vive thute a hihi.

(Thuhilhna 12:13 sunga kigelh bangin) Pasian in Mihing a bawlna a thu bulpi pen in Pasian zahtak ding leh a MA thupiakna manna hihi. Pasian leh Mihing kikal a kizopna, a pianzia limlim pen Pasian in mihing a bawl a hih manin Pasian thu zuih ding bek hi a, mihing in Pasian mai-ah rights neilo hi. Tua hangin, tung leh nuai kizopna (vertical relationship) a ci i hihi. Pasian in a bawlsa mihingte omzia, gamtatzia ding pen a MA deihna bangin gelna a neihsa a hihi. Mihingte ut leh utloh tawh nial vual/theih hilo hi. A hizongin mihingte leikiak pianzia (the nature of human being) kilam danna hangin sandan kilamdang, deihsak zawk leh nawlkhin zawk, gimneih zawk cihte bulphuh in thu pom in na kisem kha pahpah hi.

Pasian in mihingte a bawlna a hang leh a kibawl mihingte in a omsa Pasian gelna a tangtun sakna dingin mihing hamphatna leh mawhpuakna (rights and obligations) tawh a nuai a bangin i etkak ding hi.

1.    Mihing hamphatna pen Pasian hong piaksa nuntakzia hi. (Human rights as our God-given lifestyle)

a)    Nupa suahna (marriage) Piancilna 2:24. Numei leh Pasal lung kituak in pumkhat suak in innkuan suan theihna pen Pasian gelna omsa, mihingte nuntakzia ding a hihi.  Pasian in mihing a bawlcil a kipan in mihingte pen a pung ding, a khang ding, a ci (seed) kibeh lap ding ngimna leh gelna omsa a hong bawl a hihi. Innkuan suak in, suah le khak nei a pung ding, khang ding cih tak ciangin “numei leh pasal kigawm a pumkhat suak ding (ahih kei leh) a ci (seed) a po thei ding innkuan bawl ding” cihna a hihi. Innkuan khat sungah suan leh khak nei ding (Psalm 127:5) sunga “thal lawng dim a thaltang nei mi in guallel lo ding a maizum lo ding hi cih bangin, mihing pen punna ding Pasian deihna a hihi. Citang (seed) a po theilo ding a innkuan bawlna, (a hih keileh) nu leh nu kitenna, pa leh pa kitenna pen Pasian in mihing punna ding, khanna ding a, a MA gelna omsa hilo a hih manin khialhna, mawhna a hihi. (Theihding- Rights pen mihing a ding a Pasian gelna omsa a hih manin Pasian gelsa thu tawh kituaklo thu pen rights kici theilo hi.)

b)    Nasep theihna ding- Opportunity to work (2 Thessalonians 3:10). Mi khempeuh in nasem ding, nasem lo mite an kine sak kei hen kici hi. Mi khempeuh in nasep theihna ding, nuntakna zonna ding, nasep thaman ngahna ding a kikim in neiciat hi cihna a hihi. Mihing bitna leh hoihna ding a kikhaktan kei nak leh mi khempeuh in nuntakna zonna ding nasep theihna pen Pasian gelna omsa thu a hihi. Piancilna 2: 15 sungah “Topa Pasian in mihing pen Eden huan sung kho in a kem dingin” koih (tavuan pia) hi. Mihing a kipiansak cil a kipan in, “om mawkmawk a an ne ding” a hong kipiangsak hilo a, nasem a nek leh tak zong ding pen Pasian sawlna thu leh Pasian gelna omsa thu ahihi.

c)    Bitna leh hihna kepbit na dingin pawlphuhna: To be part of a group for safety and identity (Gamlak vakna 33:54). Minam tawh kizui in leitang luah ding, minam tam ten, gol ngah ding, minam neuten neu ngah ding” cih pen mihingte nuntakna ah bitna leh lungmuanna ngahna ding ngimna a hihi. Mihing nuntakna ah bitna leh muanna a om na ding; mihing a hilo Pasian bawlsa nate (creations) tungah ukna leh thuneihna neihna dingin pangkhawm a kidalna dingin kipawlkhop theihna ding Pasian gelna omsa a hihi. Minam liante in zong minam neute deep manglo ding, zawhthoh bawllo ding hi a, minam neute in zong a mau minam ngeina leh hihna kepbit theihna ding pen Pasian deihna a hihi.

2.    Mihing Hamphatna pen Pasian hong piak thutanna hi. (Human rights as our God-defined Justice)

Pasian pen a thuman, a thutang Pasian a hih bangin a bawlsa mihingte zong a ma bangin lungsim thuman leh thutang nei dingin hong deih, hong pantah leh hong sawl hi. Pasian i lim leh mel sun a mihing kibawl a hih bang lian in, Pasian i thumanna leh a thutanna a kilangsak dingin hong bawlpa Pasian in mihingte deih hi. Laisiangtho in Pasian i thuman leh thutang a hihna a hong lahkhiatna pen mihingte i khotang hinkhua vai ah a diklo a i nuntak ciangin, mimal i sanna leh thukhun i lamlahna tungtawn pan kitelkhia thei hi.

Mimal i sandan pen kibukkim/kikhai kim khin den zolo a hih manin thuman leh thutang a om theihna dingin mihing khat leh khat kikal ah siatna a om lohna dingin zuih ding thupaipi kisam hi. Mikhempeuh a ding a kitam kim leh kibuk kim thu paipi pen mihing nuntakna ah thukhun (Law) ki ci hi.

Thukhun tawh kisai in tamkim thukhun (just law) leh tamkimlo thukhun (unjust law) cih nam nih tawh kisai in Martin Luther King i genna dik kasak mahmah ah, “tamkim thukhun leh tamkimlo thukhun bang ci tehtak ding? Tamkim thukhun pen mihingte nuntakna ah zuih ding a mihing gelh paiziate hi a, Pasian thukhun (or) Pasian in mihing a piak sia leh pha (moral law) in a umcih thukhunte a hihi. Tamkimlo thukhun i cih pen sia leh pha theihna (moral law) tawh kituak lo bek hilo in mihing gelh leikiak thutawh kileh bulh a, tawntung thute tungah a kilam khialo thukhunte a hihi. Mihing khat i mimal hihna a lamsang limlim thukhun pen tamkim thukhun ahihi. Mihing khat i mimal hihna a niamkiat sak limlim tamkimlo thukhun a hihi. Kikhen tuamna in mimal hihna siasak leh kha nuntakna nawngkai sak a hih manin tamkimlo hi”.

Pasian i kammal tung panin Pasian thutanna leh thudikna kimu hi. Hamphatna (Rights) pen thutanna tawh kitawi khai thei hi. Banghang hiam cihleh, hamphatna (Rights) a tamzaw pen mi khatpeuh bawlsia, genthei sak (victim) lohna ding ngimna a hihi. Pasian kammal Laisiangtho sungah zong mikhat peuh bawlsiatna thuaksak loh ding a kigen na hih a nuai a bangin i mu thei hi.

a)    Mi na that kei ding hi. (Exodus 20:13)

b)    Mi na suam kei ding hi / Na gu kei ding hi. (Exodus 20:15)

c)    Mi ko in na sim mawh kei ding hi. (Matthew 5:22):

d)    Sila khawilo ding, Mi pimang/kaimang lo ding hi. (Exodus 21:16)

e)    Angkawm in na khial kei ding hi. (Exodus 20:14)

f)     Zuau phuak in, mi na khem kei ding hi. (Exodus 20:16)

g)    Na nu leh na pa na simmawh kei ding hi. (Exodus 20:12)

h)    Sumbawlna ah zuau khemna na zang kei ding hi. (Proverbs 16:11)

i)     Pemta, meigong tagah mite na simmawh/ na bawlsia kei ding hi. (Deuteronomy 14:29; 24:17)

j)     Thatang hatna tawh numei na buan/ na sual kei ding hi. (Deuteronomy 22:25-27)

k)    Pasian bia ding, maipha zon ding na daal kei ding hi. (John 2:11-12)

l)     Cimawh mite khialhna leh kisapna na huh ding hi. (Exodus 22:2-3)

m)  Mawhna maisak ding na nial kei ding hi. (Matthew 18:22)

n)    Bitna ding zong mite gambelhna na nial kei ding hi. (Leviticus 19:34)

Hih a tunga thuman, thutanna khempeuh pen mi khat a ding in hamphatna (rights) a hih manin mawhna pawlkhat hangin tua hamphatnate (rights) kisia thei hi. Tua khialhna pawlkhat pen i gensa bangin mi thahna, gukna, simmawh nuaisiahna, pimang (kidnap) na, angkawmna, khemna, nu leh pa simmawhna, simtatna (cheat), mi cimawhte nawlkhinna, numei sualna, Pasian biak inn pen sum zonna a ding zatna, mi khat va langpanna, mi khat huat giegiua na, gamdang mite a kilawmlo a bawlna cih bangte a hihi. Laisiangtho Isaiah 30:18 na ah “Topa pen a thutang Pasian (just GOD) hi a, mikhempeuh zong a thutang ding a deih hi”.

3.    Mihing hamphatna pen Pasian piak hehpihna hi. (Human Rights as God-ordained Mercy)

Hamphatna (Rights) tawh kisai in Laisiangtho sungah kigelh thu in “bang ngen (demand) ding i hiam” cih hong khollo zaw hi. Tua sangin, Pasian hong gen thu in bel, “bang thute ah bangci bangin mawhpuakna la ding (Responsibilities)” cih hong gen zaw hi. Pasian in ka thupiakte na zuih uh leh, “tua nate, hih nate” na ngah ding uh hi cizaw hi. Pasian pen a thu tang leh a thu dik ciang bek hilo a, mihingte tungah hong piak hehpihna (mercy) ciang dong hong nei/gen hi. Pasian hong piak hamphatna (rights) pen mawhpuakna (responsibilities) tawh kizui pah hi. Pasian in hehpihna a hong piak bangin ei mihingte khat leh khat zong kihehpih ding hong hilh, hong gen hi. Hehpihna neihna ah, tua i neih hehpihna pen midangte tungah kilat sak ding zia zong hong genna mun tampi ah i mu hi.

a)    Paikhiatna 23:4 sungah “midangte neihsa sutlo in pia kik in”. Midangte neih leh lamte, a neipa tungah a tunkik na dingin piak kik ding a kisapna ahihi.

b)    Paikhiatna 23:5 sungah “midangte kisapna huh in”. Hehpihna nei mite midangte huhna ding leh kisapna a neih hun un huhna piakna tawh lah khiat ding hong hilh hi.

c)    Thuhilhkikna 24:19 sungah “a kisam mite anpia inla, vak in”. Meigong tagah, cimawh dongtuak mite pen mihing khat leh khat ki-itna bulphuh in huhna piak ding hong hilh i.

d)    Thuhilhkikna 24:17 sungah: “midangte bitna dingin na nuntakna zangin”. Midangte supthuakhna ding, siatna tuahna ding bawl ding hong phallo hi. Mi khat i nuntakna ah bitna leh lungmuanna a omna dingin a kisap leh ei ma pumpi ciangdong pia khia a zat ding hong gen hi.  

Pasian in mihingte khat leh khat kikal ah thumanna leh thutanna zuih ding a deih bangin, khat leh khat hehpihna lungsim neih ding deihna a hihi.

Pasian leh mihing kizopna (God-Man Relationship) pen mi kim leh Pasian kikal a kizang ding hi a, tung leh nuai kizopna (Vertical Relationship) a hih manin Pasian deihna leh Pasian gen pen a thutawp, a man pen hi pah hi.

Mihing leh mihing kizopna (Man-Man Relationship) pen Pasian mainuai ah mikim tanh kikim vive i hih manin vei leh tak kizopna (Horizontal Relationship) a hih manin mihing nuntakna ah thuman thutanna (justice) a kizat theihna ding leh khat leh khat kihehpihna a om theihna ding ngimna neih ding a hihi. Tua pen Pasian in mihingte a dinga gelna a neihsa hamphatna, thuman thutanna leh hehpihna a hihi.

Date: June 30,2020

References:

1.    Universal Declaration of Human Rights.

2.    Holy Bible.

3.    McAfee, Lauren and Michael. “The Bible's Impact on Human Rights.” ChristianityToday.com, Christianity Today, 28 June 2019,

4.    “What Is a Biblical View of Human Rights?” CompellingTruth.org,