Open letter to Chin Students Association ( Shillong,INDIA)

Tual Khan Suan
180 Wallace Road,#R21
Nashvillet , TN 37211
USA .
Tel: +;1-615-715-5147

Chin Students Association
Shillong , INDIA

Date: October 26,2007

A Thu: : Kammal “Chin” tawh kisai lung himawhna genna:

Chin Students Association (Shillong) ah panmun len makai khempeuh leh pawlmi (members) khempeuh zahtakna lianpi tawh na khut tak lam tek uh ka hong len masa hi. Chin Students Association ( Shillong) i makaihna in i Zo ngeina a hi, “ Khuado pawi” na bawlna uh ka theih ciangin Zo ngeina kepcing leh lapsang ding a lunggulh siamsinte na hih lam uh ka thei a, nuamna leh kipahna tampi ka nei hi.

India gam Shillong khuapi ah Zo ngeina “Khuado pawi” bawlna ah a siim ding sapna lai ZoNet or zomi@yahoogroups. com pan ka sim khak ciangin ka lungsim sungah “Nopna leh lung hi mawhna” thu nih hong lut hi. Tua thu nihte hangin hih lai a hong gelh ka hihi.

Leitung gamgi in Zomi te tenna mun leh mual a hong khen hangin i lungsim sungah Zomite kikhenna leh kideidanna om hetlo in minam khat i hihna leh unau sanggam khat i hihlam i kitheihna ka muh takteh ka lungsim sungah “Nopna” om hi. Muntuam gamtuam ah i om uh hangin a kipai khia theilo i Zomi hihna leh i minam ngeinate kepcing ding leh lapsang ding na hanciamna uh ka muhna hangin ka lungdam semsem lai hi. A mun leh mual zui in min leh puam tuamtuam tawh minam dangte’n hong sap hang hita leh, ei leh ei i kisap hang hi ta leh i ngeina in minam khat i hihna hong kithei sakkik hi.Hih bangin i Zo ngeina sungah minam khat i hihna i kitheih bangin mailam ah minam dangte hong sapna leh ei leh ei i kisapna min tuamtuamte nusia in i minam min lianpen a hi ZOMI sungah i kigawm kikna ding lampi om hi, cih ka lam-en hi.

“Khuado pawi” bawl ding a innteekna la makaite leh pawi siim dinga hong pai mipi te pen Kawlgam sunga om Zomi te tawh laigui zom unau sanggam khat dingin koih ka hih manin kipawlna min pen “Zomi Students Association” cilo in, “Chin Students Association” minvawh in sapna lai hong pai takteh minam dangte in Zo ngeina“Khuado pawi” hong bawl sak uh hiam cih ngaihsun in ka “lung himawh” hi. Tua bek hilo in, Pau leh ham kibang, beh leh phung kibang leh ngeina kibang vive hi napi unau laigui kizom kimlai “Min leh puam” vai tawh kikhen khapna ding hanciamna hiam? cih ka ngaih sunsun hi.

“Chin” leh “Zomi” kikal ah koi pen khial a, koi pen man hiam? cih pen hih munah gen ding kisam kasa nawn kei a, India leh Burma gamsung a teng laigui kizom unau sanggam khat teng minam khat sungah kipum khatna ding deihna bek ka nei hi.Kei pen Burma gam sunga teng Zomi ka hih manin ka thugen pen kawlgam sunga om Zomi te muhzia hong kawk zaw ding hi. Burma gam sunga teng Zomite pen mangkang gamkekte Zogam a hong tun hun mapek un, a mau leh a mau Zomi na kici khin zo uh hi. Mangkang gamkekte in kawlgam hong lak zawh uh ciangin India gam tawh kikawmna ding lampi zong uh a, Zogam zong hong la uhhi. Zogam ah Mangkang te hong tun uh ciangin Kawlmite tawh hong kithuah to uh a, Kawlmi te in Zomi te pen “Chin” ci ung a cih uh teh mangkangte in zong “Chin” cih kammal tawh Zomi te hong ciamteh pah uh hi. Tua kammal pen Zomi te min dingin leitung ah lai in a kiciaptehna masa pen hi a, kumpi zum khempeuh ah tua kammal kizang to suaksuak hi. A zenzen in mangkangte in Zomite hong dong hi le uh “Chin” cih kammal pen kizang lo ding hi. “Chin” cih kammal pen kawl mite tung pan mangkang te’n a ngah uh hi a, minam dangte hong phuahsak min a hihi. Minam dangte hong phuah sak min pen i minam min hilo a hih teh i minam min mah tawh leitung in a hong ciaptehna ding deihna in Kawlgam sunga Zomi political party lianpen a hi Zomi National Congress, ZNC in “ Chin” pan in “Zomi” ah minam min khek ding cih thu meilet (policy) khat in nei uh hi.Tua mah tawh kizui in Kawlgam sunga teng Zomi te in “Chin” kideih lo a hih manin suakta tak a ei leh ei min kilawh theihna mun khempeuh ah “Zomi” mah kizang den hi. Gentehna in 1953 kum a hong piang khia a hi Zomi Baptist Convention,ZBC cih a hizong, Zomi Theological College ,ZTC cih te ah Zomi cih kammal ki zang den hi.
India gamsung leh Burma gam sunga teng unau sanggam te kipum khatna ding deihna tawh nasem den a hi, phamsa Pu Dr. Vumson Suantak in zong “ Chin” min tawh minam kipum khat zolo ding mu a hih manin “Zo” na zang zaw a, i minam vai, ngeina vai khempeuh a gelhna laibu “Zo History” cih min na pia hi.A mah in “Zo” a zatna dingin pen a mawkmawk a, a zang hilo a, minam pi khat suahna dingin minam dangte hong minvawhna min sangin ei leh ei i kisapna min mah tawh hi leh piang zo bek ding hi cih muhna na nei khin zo hi.

Zomi te sungah mipil masa lah hi, Zolai khantohna ding maphu pi pen lah ah phamsa Pu Khup Za Go in “Chin” cih kammal sangin “Zomi” cih kammal mah i pu leh pate’ ki minlawhna masa hi zaw hi cih na mu hi.Amah in Pasian a ding na a sep bek hilo in, Zomi te a ding na tampi sem khia hi. A mahin ( Sia Khup Za Go) in a ma nuntak sungin na tampi a sepna pan Zomi te a dinga sem khial a kisak mahmah leh a kisik mahmah thu khat om hi. Tua pen, “ Chin Baptist Association (CBA)” min vawh ding laitak in “ Chin” sangin “Zomi” cih a na zat khak loh pen a dam sunga a kisik pen thu khat a hihna a ma sih nung ciangin mipite in i za kha pan hi.

Thu tawpna dingin, Zomi te leitung ah minam picing khat i hihna dingin i makai masa te nasep hoihte kemcing to in, leh i makai masate sepkhialhna munte ah sinlai (lesson) la in, khangthak makaite in Zomi khempeuh Zomi sungah i kipum khat theihna ding leh i na sepnate ah Zomite a ding nasem khial kisa a i kisik kik lohna ding limpha taka ngaihsut ding ka hong hanthon hi.


Zomi sungah itna leh Zahtakna tawh,
Tual Khan Suan