February 20 ni Zomi Nam Ni hi
February 20 ni pen Zomi Nam Ni ahi hi. Hih ni hong piankhiatzia leh a deihnate i telna dingin British-te ukna pan suahtakna i khuat cil hun pan kipan i gen kul ding hi.
I theihsa bangin Zomite pen British-te hong khan ma-in namdangte ukna nuaiah ki-om ngei lo hi. British-te hong khan ciangin Kawlte gam la masa uh a, Rakhine leh Mon-te pen Kawlte uksa ahih manin Kawlte tawh uk khat suah hi. Hong nung lak Zomi, Kachin leh Shan gamte pen Burma Province sungah hong koih uh hangin Kawlte uksa kihi lo ahih mah bangin a tuamin hong uk suak uh hi. Tua ahih manin British ten hong nutsiat ding ciangin zong hong lak cil lai vua i dinmun ciat zuiin thu hong khen sawm uh hi.
Tua hi a, British ten suahtakna hong piakdan ding tawh kisaiin khamtung gam (Zomi/Chin, Kachin, Shan) leh zanggam (Burma proper) teng gawm khawmin khatvei thu-a suaktasak ding maw, a tuam ciatin suahtakna pia a, gam tuam ciat phutsak ding, ahih keileh khamtung gam teng siit laiin British kumpi mahin uk lai ding, cih pen deihteel theihna hong pia ciat hi.
Zomi ten suahtakna a tuama la thei kimlai 'Minam kim dinmun kikimna leh kum 10 khit cianga paikhiat kik theihna' thukhun bulphuhin Kachin, Shan, Kayah, Kayin leh Kawl-te tawh suahtakna lak khop leh gam khat phuhkhop (Union) pen Zomite ading zong limci veve sa-in thukim uh hi. Tua gam pen Union of Burma ci-in leh parliamentary democracy system tawh kivaipuak dingin zong thukim lai uh hi. Tua bang teng tawh 1948, January ni 4 niin suahtakna i ngah hi. (A kimin gen leng sau lua ding ahih mana kong tomkaih hi)
Hih teng zawh ciangin Zomite sungah buaina hon khat cian lai hi. Tua pen Vuamtu Maung leh Capt. Mang Tung Nung-te makaihna tawh 1948, February 19-22 sung Falam khua-ah Zogam bup minam khawmpi samin kingaihsun hi. Tua-ah Zogam MP teng (mi guk), Chin Hills Inquiry Commission member teng (mi thum), ukpite, hausate leh khawk tuamtuam pan tangmite kihel uh a, Burma President U Sao Swe Taik in zong hong uap hi.
Khawmpi-a vaihawmna-ah Burma thukhunpi in parliament, Upper House (Chamber of Nationalities or Lumyosuh Hluttaw) a Zogam (Chin Special Division) aiawh ding pen ukpite hi ding hi, ci-a a geel pen deih loin Zomi mipite teelkhiat ngiat tangmi puak zaw dingin khensat uh hi. Democracy system tawh kivaipuakna ta ding i hih manin Chin Hills Regulation Act zong phiat pah dingin khensat uh hi.
Khawmpi thu khensatnate in ukpite kimanna nei nawnlo suaksakin leh a phiatna hong suaksak pah hi. Hih in ukpite cimtakna leh democracy kivaipuakzia diktak Zogamah a kikhun theih nang zong kawk hi.
A tunga thute i et ciangin 1948, February 20 ni pen gam leh minam vaia Zomite lunggulhna teng tangtut khit theih 'Ni' a hihna hong lang hi. Suahtakna gim a nam pan kipana malak tohtohna teng tawh a thu kipeh ahi hi. Ukpite phiat theih ni ahih man beka Zomi Nam Ni ci-a kiphawkden leh ki-ai hi lo hi.
Tua hi a, 1948, February 20 ni pen Zomite lunggulhna teng tangtut khit theih ni ahih manin pahtawi ding leh phawkden ding hoihsa-in 1950, October 9 niin Zo Zum (Chin Affairs Council) in February 20 ni pen Zomi Nam Ni dingin kipsak ahi hi. Tua tawh kizuiin Zo Zum makaihna tawh official-in Zomi Nam Ni a khatvei kizatna 1951, February 20 niin Mindat khua-ah kibawl in, tua takah Kawlgam Prime Minister U Nu in zong hong uap hi.
Zomi Nam Ni vaia buainate 1948, February 20 ni pen Zomite lunggulhna teng tangtut khit theih ni, ci mah ta leng, Aung San kithahna leh Gen. Ne Win ii kumpi kahnate hangin i hamphatna teng kibuaksuah kik khin hi. Tua ahi zongin Zomi Nam Ni i neihna in Minam Khat i hihna hong lak veve ahih manin a manphatna kiam tuan lo hi.
Zomi Nam Ni in minam khat i hihna hong kipsak ahih mah bangin, i minam hong melhmang nuam leh ciampel Kawl makaite in Zomi Nam Ni melh ding hanciamin hih bangin panla tou nilouh uh hi. 1956 kumin Chin Affairs Minister Pu Za Hre Lian hun lai-in Zomi Nam Ni pen December ni 4 ni hihsak ding a sawm manin 1958 kum dong buai lawh hi. Revolutionary Council kumpi hun, 1966 kumin BSPP Party, Mindat Unit Organiser U Myint Thein in Zomi Nam Ni pen February ni 9 ni hihsak ding leh a min zong Chin Special Division Day cih dingin hanciam kik hi. Zogam in State a ngah zawh, 1975 kumin Chin State Council zum in February 20 ni pen Chin State Ni cih ding gingsak leuleu hi. 1981 kum panin Kawlgam kumpi in Zomi Nam Ni zat limlim phal nawn lo ta hi.
Ahi zongin tu dong kuama'n a ni khek zo tuan lo, kham zo tuan lo hi. Hih bangin Zomi Nam Ni in ze-etna tuamtuam tuaktuak mahleh leitungah Zomite a om sung cik mahin mang zo ngei nawnlo ding hi.
Zomi Nam Ni deihna leh i zatdan ding? 1. Zomi Nam Ni in minam khat i hihna hong kipsak hi. Mizoram in zong a state ngah ni dingin February ni 20 ni a teel se manin i minam ni thupisak seem hi. Tua hi a, Zo suan teng minam khat i hih mah bangin bang gam bang gamah om mah ta leng i minam ni i zat ciat ding hi.
2. Zomi Nam Ni in Zomite lunggulhna teng tangtut theihna dinga malakna teng khempeuh kawk hi. Tua ahih manin Zomi Nam Ni a zang mimal kimin Zomite lunggulhna teng a tangtung theih na'ng i hanciam ciat ding hi. Kawlte hong ukcipna hanga i gamvai i sai thei kei zongin, i minam kingakna khat hi ding ahi gam thumna tungte mi khawsuak hi dinga i seek i pattah kul ding hi.
3. Zomite lunggulhnate a tangtung theihna dinga malakna tuamtuam omte i pulakkhiat ding leh pahtawi taakte i pahtawi ni ding ahi hi.
4. Zomite lunggulhnate tangtut theihna dinga malakna-ah a kihel ngei teng phawkna leh nuntaakna a beilawhte suunna ni-in i zat ding hi.
Kikup ding: 1. 1948, February 19-22 a Zogam bup minam khawmpi-ah mipi 5000 kihel cih pen a man mah diam? Mi 1000 khawng hi zaw dinga ka upna kong pulak ngei khin hi. 2. Zomi Nam Ni pen ukpite phiatna phawkna ni bek ahi diam? 3. Zomi Nam Ni zatdan pen a tangthu gen bek tawh i hunsak diam? 4. Zomi Nam Ni pen Khuado pawi banga cultural day banga zat ding ahi diam?
"A suakta gam leh a khawsuak minam phuh zaha nasep thupi leh haksa om lo hi"
Zomi Nam Ni pahtawi nopna tawh,
J. Thang Lian Pau # Zolawkta Phone : +91-8802856178
| 
