Rev. G.K.Nang
Khanlawhna i cih pen gam tuamtuamah na tung kawikawi-in, a tunna munmunah haksatna tawh kikop toto hi. Ahi zongin haksatna leh pai khialhna a om hangin a tamzaw-ah Pawlpi mite in phattuam pihin, kha lam leh sa lamah khantohpih hi cih kimu thei hi. Zogamah khanlawhna hong lutte leh Pawlpite sanzia hih a nuai bangin en dih ni.
1946 leh 1948 kumin Mizogam panin gammial nasepna ding ci-in Lai Siangtho, Labu leh puansilh nikten akipan van tuamtuam kaikhawmin Champhai a om Evan. Pu Robuanga makaihna tawh na hong sem uh hi. Aizawlah Synod makaite in a van ngahte uh bawmah thunin hoih takin apna leh khahkhiatna thupi tak a neih khit uh ciangin mihing in liangah zawngin khua khat pan khua khatah pai-in “Gospel Dak” kici hi. A tuntunna-ah khanlawhna nakpi takin tungin mipite in lawppih mahmah hi. Tua bangin bawm 300 val Kawlgamah Champhai pan Ciau gun kanin paipih uh hi. A khatveina pen Hualngo gam leh Tedim uk sungah kipuak a, a nihveina pen Zahau gamah kipuak hi. Tedim gam sunga a tunna khuate pen Singlei, Gawsing, Mualnuam, Mualnuam Khuatung, Keizang cih bang ahi hi. Tua hun lai-in Keizang khua-ah Tapidaw mi 270 bang om a, khua dangte-ah cihtak om nai lo hi kici hi. Zomite in Lusei pau sim thei lo ahih manin phattuampih lo hi. Tua banah Lusei pau zuakna bangin a ngaihsun pawl om ahih manin a deih lo, a sanglo khua zong om hi. Khanlawhna tunna munah mite limin lamin diang uh ahih manin “Limsang Movement” kici hi.
Tedim a om Sangmang F.O.Nelson in tua thu a zak ciangin deih loin, na nial hi. Khatvei Hualngo lam panin sawltak pawl khat Sangmangpa kiangah va hawh uh a, Sangmangpa in “No milimte in Sawltak Paul thu na zui kei uh hi, ci-in a gen leh sawltakte in nang Sangmangpa in na zui kei zaw ci uh hi. Bang hiam ka zuih lohna ci-in Nelson in a dot ciangin, “Kha Siangtho nasepna na deih kei hi” ci uh hi kici hi. Khalkha a om Robert G. Johnson in zong na nialin Dawi nasepna hi ci hi. Khat vei ZBC khopppi-ah Johnson in thu gena, “Milim paizia hoih lo hi, pau theih loh hoih lo hi, khuang hanga lam hi. Kha Siangtho nasepna hi lo hi,” ci-in deihtakin thu gen hi. Mite in a thugen a zui pah ding sa-in kuamah a lam om nawn lo ding, khuang zong tum ngam nawn lo ding sa hi. Ahi zongin tawpna ding la a sak uh ciangin ama sangin khuang naktum zaw-in a lam mi tamzaw a, “Sangmangpa in zuau thu teng gen hi,” cihsan uh hi kici hi. Tua ahih manin Robert Johnson in ZBC leh BBC ah report lim takin pia-in laimai 30 val dimin gelh hi. 1963 ZBC khoppi-ah kikupna nei uh a, hih bangin thukimna bawl uh hi.
1) Mizogam pan hong pai Limsang paizia pen Tuiphum Pawlpite upzia, paizia leh ngeina tawh kituak lo ahih manin kideih lo hi. Deih lo bek hi loin nakpi takin do ding, beisak ding hi.
2) Tuiphum Siate leh Upate in amau khawk sung leh khua tekah a mite uh hoih takin kemcing ding a kuamah in khuang tum lo ding, solfa man bek zangin la sa ding, lengkhawm aw kaih tawh kuamah in la sa lo ding, kua mah lamsak lo ding hi.
Hih banga thukham a om ciangin Hualngo lamte khua 12 val in Mizogam Presbyterian Pawlpi zop ding ngen uh hi. Ahi zongin Synod in ZBC makaite tawh gamgi kikhen ahih manin tua susia dingin sang ngam lo uh hi. Tua ciangin Tahan a Methodist Pawlpi zom uh hi. Zahau lamte zong khua 20 val ZBC pan taikhia-in Presbyterian din’ uh hi. Synod in Rev. Lalthanga missionary dingin sawl a, ahi zongin kumpi in missionary teng a hawl khiat ciangin 1966 kumin amah zong Mizogamah ciah kik hi.
Hih hun pawl (1960-1970) mahin TBA gam sungah gupna thu a gen zong na om hi. Sia Thang Za Kam in gupna thu a san’ ciangin gupna thu genin vak kawikawi hi. Kha nasepna zong ngah hi kici hi. Cinate thungetsakin damna a ngah zong om a, mailam thu ding zong gen thei (vision) hi kici hi. Amah pen Tedim Kim Pawlpite (TKBC) huhsia sem hi a, tua banga a pai ciangin “Upna tuam pai” ci-in TBA in hawlkhia hi. A hawlkhiat ciangin amah a deih mi pawl khat tawh “Thang Za Kam Tuiphum Pawlpi” kici phuan uh hi. Sia Tun Za Kap (Gamngai) in zong pianthakna gupna thu na sang thei a, gupna thu genin vak kawikawi hi. A pa siampi zong piangthak sakin, a khua vuah khanlawhna zong tung hi. Amah pen a kihawl khiat ma-in Independent Church of Burma (ICB) ah lutin tua Pawlpi in ordination pia-in a pension dong mah sem hi.
Kum 1970 khit ciangin Zogamah khan’lawhna hong tung hi. Lamka panin sanggam EBC Pawlpite in Lai Siangtho, Labu akipan niikten puansilh kaikhawmin “Gospel Dak” hong puaksuk uh hi. Mi tampi in phattuamna ngah napin, deih zahin kizeel zo lo hi. Ahi zongin khanlawhna pen 1946 hun lai-a Limsang Pawl mah bangin kingaihsun a, Tuiphum Pawlpi in na sang thei lo uh hi. Makaite na hawlkhia uh a, na langpan uh hi. Tua hangin Pawlpi tuamtuam EBC, AG, UPC, CJC cih bang tampi tak Zomite sungah hong piang hi. Khanlawhna tawh kisai-in Tuiphum Pawlpi makai masate in “Upna Paikhial hi” ci-in na hemkhia zel uh hi. Tua pen Zato Siavuante nasepzia ahi hi. Siavuante in mihing pumpi tungah natna hiam, a hoihlo na khat a om ciangin mun dang a lawhkhak lohna dingin at khia-in pai khia a, pumpi tung na dangte in damna ngah hi a cih bangin a hoih lote pai khia ding, a dangte lawhsak lo ding cih dan na zui uh hi. Khanlawhna in upna lam hi taleh Pawlpi paizia akipan biakpiakzia-ah kikhelna piangsak hi. Hih kikhel nopna lohna pen a lamkhak pen ahi hi. Pai ngeina zia, hih ngeina zia a kikhel ding haksa kisa hi. Tua akikheel ciangin a paikhial kisa kha thei hi. Khanlawhna meetpih dingin a man (prize) piak kul hi. Man pia loin khanlawhna kingah thei lo hi.
Ahi zongin kum 1990 khit ciangin khanlawhna thu pen kinial thei lo, kido thei nawn loin Pasian hehpihna hang tawh tuiphum e, phum lo e, cih om nawn loin Zomite sungah hong kizelh hi. Tua pen Pasian Kha Siangtho nasepna leh hehpihna hi zaw ding hi ka ci hi. Kha Siangtho nasepna pen mihing in dal zo lo a, do i sawm hangin kido zo lo hi. A hoih leh hoih lo ciang Lai Siangtho pan enin khensiam ding kisam bek a, Kha Siangtho nasepna i nial khak ding dah huai hi. A beisa hunah Tuiphum Pawlpi in kha khan’lawhna na nial ahih manin i phattuam pih ding bangin kiphattuam pih lo hi. Aizawl a Prof. B.Lalthangliana in “Gospel Dak pen a ngahte in aphattuam pih loh hangin a pia khiate in phattuampih mahmah hi, bang hang hiam cih leh a pia mite sungah khan’lawhna tung hi” ci hi. Mizogam khanlawhna-ah Pastorte, Siate mah in makaih hi. Rev. Liangkhaia leh Rev. Chhawna cihte pawl pen makai-in pang zaw uh hi. Pastor Chhawna in vision mu thei a, a vision muhte laibu-in bawl uh a, “Chhawna Inlarna” kici hi. Tua thute pen tu dongin tungtung lai hi a ci zong om hi. Vision hoih ka cihna hi lo hi. Pastorte kipiak khiat zia leh khanlawhna sungah a kizatzia uh ka genna hi.
Thukhupna dingin Khanlawhna hangin Zomite khuamuhna hong khang hi. Gospel vakna panin khua khat leh khat thu kizakna omin, khuapi khuata thu kiza-in kisang thei hi. Khanlawhna hangin khualzin gamvak tamin, i muh ngei loh, i pai ngei lohna gam America nangawn kitung hi. Gamdang hih zahin a kitunna zong khanlawhna hang hi kici thei ding hi. Zogamah Lawki a bei theihna zong khanlawhna hang hi kici thei hi. Tua ahih manin khanlawhna nasepna pen minam sungah a bei lohna dingin lungsim takpi tawh ki-apin thunget toh zel ding kisam hi. Zomite sungah khanlawhna mei kuang om den ta hen. Topa in thupha hong pia ta hen. Amen.
