USA gam Tennessee state Nashville khua a teng Pa Awn Sian Pau leh Nu Man Lam Niang te i tapa upa pen Tg. Tual Suan Tuang in tuni (May 14, 2010) ni in, Vanderbilt University pan in Master of Arts (Economics) sangpi tak tawh hong zo hi. Amah, Tg. Tuang in M.A degree pen Graduate Program in Economic Development ah Most Outstanding Thesis Award (2010) hong ngah lai hi. Amah pen Kawlgam ah Ngal Bual khua ah suak a,a mah i siamsinna leh matutnate a tom in hih a nuai ah kong gelh suk hi.
Sangkahna: Lai tan Basic Education Primary School (B.E.P.S) Tungzang Tanlang- Tan IV
Basic Education Middle Scholl (B.E M. S) Tuithang Tan V Basic Education High Scholl (B.E.H.S ) Tedim Tan VI No. 6. B.E.H.S Botatawng Township ,Yangon,: Tan VII-Tan X
Pasian thupha tawh Kawlgam ah Tan sawm a sim lai tak in USA pai theihna ding lampi kihong a hih manin Kawlgam pan Tan sawm lai vuan manlo in USA ah pai hi. USA a tun ciangin Tan sawm kum khat sin kik hi
Hillsboro High School, Nashville, Tennessee : Tan X-Tan XII
Amah,Tg Tuangin Kawlgam pan pai a hih hangin Mikang lai zo mahmah a hih manin USA a tun khit High School a kah sung mah in hih a nuai a bang in pahtawina leh kihelna nei hi.
1. Vanderbilt Summer Science Collaboration ah ah kha khat sung kihel in khapi tung ah a kah, Rick Chapel tung pan Science thu tampi sinna nei hi.
2. Pahtawina (Award): Physics Award
Spreadshee/Microsoft Excel Award
ESL Keyboard award
Tg Tuang pen lai kiva mahmah leh lai pilna thupi a sa mi a hih bangin USA gamah zong High School hoih tak in zo hi. Tua bek hilo in, a mah in a hong piangsak Pa Pasian zong mang ngilh lo a hih manin High School a zawh ciangin College zopna ding pen Christian sang mah zong pah hi. Tua bangin sang a zon ciangin Nashville a Christian University min thang khat ahi, Lipscomb University ah lut theihna (entrance) hamsa hetlo in ngah pah hi. Tua university pan in Bachelor of Science in Computer Engineering pen 2008 in sang tak tawh hong zo hi. A en utte in hih a nuai ha link ah na mek un.
Tg. Tuang pen Pasian in thupha a piak mah bangin a mah zong hanciamna nei mi hoih khat a hih manin B.Sc a zawh khit ciangin lungkim zo nailo in Master zop ding gelna nei to pah hi. Master zopna ding sang a zong ciangin, sang hoih leh sang minthang mahmah a hi Vanderbilt University ut pen a hih manin lut theihna ding a nget ciangin hamsatna om hetlo in lut theih pah hi. Topa in Zomi te a sanna lam ah hong pito hi. Pasian min thang ta hen.
Vanderbilt University pan Master of Arts (M.A) pen Economics major sin ding in 2008 mah in lut kik theih pah hi. Amah pen sangnau pang a hihna theih den mi khat a hih manin a sin lai pilna leh siamnate nusia in gualnopna ah hun a mawk bei sak mi hilo hi. Tua a hih manin a mah,Tg. Tuang in tu ni (May 14, 2010) in Vanderbilt University (www.vanderbilt.edu ) pan in Master of Arts (M.A) –Economics pen sang pi tak in hong zo hi.
Tg. Tuang i Master of Arts (M.A) –Economics a thesis pen: "Maternal Education and Children's Educational and Health Outcomes" hi. (Theih huai: Thesis sungah kigelh te khempeuh pen Kawlgam sung pan a thute (data) hi'n Kawlgam mite adingin ethuai thu a hihi. Pahtawina (Award): Graduate Program in Economics Development (GPED) ah Most Outstanding Thesis Award (2010)
Tg. Tuang pen Pilna sinna lam ah Zomite sungah etteh tak mahmah khat a hihi. A mah in Master of Arts(M.A) a ngah khit teh, a sang zaw pilna sin beh ding gelna nei lai hi. Master sanga a sang zaw pilna a hi, Doctor of Philosophy (Ph.D ) sin na ding sang a zon teh USA gam sunga sang minthang thum a hi, George Washington University, Washington D.C, North Carolina State University, Raleigh, North Carolina leh American University, Washington D.C te in sin theihna dingin lut theihna ngah hi. Tua sung pan American University,Washington D.C ah kum khat US $ 430000.00 bei ding pen full funding ngah lai a hih manin tua sang ah kah ding khensatna nei hi. Hih sum bei ding pen sang pan in lai zuizawhna leh kum thum sung pen amahkhan (guarantee) a hihi. Tua kum thum sung in Ph.D program course khempeuh pen a kisin zo thei ding hi a, dissertation pen man lang leh zekia tawh kisai in kum khat pan kum nih bang sawt theih lai hi. Tg Tuang pen 1984 kum in suak hi a, Pasian huhna tawh gual suakna a neih toh leh a ma kum (kum 30) a phak ciangin Ph.D ngah ding lam-etna om hi.. Hih bang in Zomite minam dangte sungah hong tawi sang i Pasian hoih hi.
A mah,Tg Tuang pen Thalmual khua pan Buansing beh Pu Thang Khua Tual leh Pi Ngai Ciang te tupa a hihi.
Tg. Tuang in Master of Arts (M.A) a hong zawh lungdam kohna ah, a mah Tg. Tuang i pianna nu, Nu Man Lam Niang in lungdam lua a hih manin, " Ka gen ding tampi om in, a hih hangin tua sung pan in, Ka mang ka sak leh ka tak a na hihi" ci'n a lungdamna thu gen hi.
Tg. Tuang pan Pa Awn Sian Pau in Tg.Tuang in M.A ngahna lunglam kohna ah a lungdam na thu genna pen Zomi khempeuh a ding in thupi hi. A ma genna ah, "Tg. Tuang in tuni ciang dong ka thu kam khat bek hong nial ngeilo hi, ci hi".
Thu puak
Tual Khan Suan,
Zomi International Network (Zonet)
|
