By Tual Khan suan
Tulai tak Kawlgam thu neihna a sut khia galkap kumpi i Prime Minister a hi ngei General Khin Nyunt in August 30,2003 ni’n a gen, galkap kumpi i “Disciplined democracy” lam khiatna ding lamlak (Road Map) kalbi (step) sagih zui in, Kawlgam sungah tukum 2010 in kitelna bawl ding cih galkap thuneite gen i thei tek sa a hihi. Tua kitelna ah kidem ding (me kuang lui ding) in Kawlgam sunga Political Parties ( 42) bangin thu neite tungah register nei khin uh hi.(www.irrawaddy.org) Tua sungah Zomi (Chin) minam pawlkhat ki hel in, me (vote) zon bang kipan phial ta hi. Pawl khat leuleu in Zomi min peuh mah tawh kitelna ah kihel lo ding, a kihel te Zomi tungah ciampel a hihi cih bangin a gen zong om hi. Pawl khat te’n lah ei i kihel loh hangin galkap te’n sem veve ding a hih teh, a sungah lut in kihel leng hoih zaw hi ci uhhi.
Thu nung tawm:
Tulai tak a, Kawlgam sunga teng minamte pen tanglai pek pan in a mau minam ciat in kumpi, Ukpi leh vaihawmna a tuamtek in nei uh a, tulai taka Kawlgam bang in gamkhat ah om khawmlo uh hi. Mangkang gamkek te’n Kawlgam hong luhsuah uh ciangin Arakan, Mon, Karen leh Kawl (Burman) minam teng i tenna munteng pen Proper Burma ci’n mangkang kumpi in direct in uk hi. Tua banah a mau leh a mau a ki-uk gam a hi,Shan, Kachin leh Chin (Zomi) mite tenna mun teng pen a mau gam sunga om Sawbwa, Duwa, leh Ukpi te tungtawn in uk uh hi. Karenni (Kayah) gam pen Mangkang kumpi in uk lo a, Kawlgam in suahtakna a ngah 1948 kum dong a suakta gam in a om uhhi. Tu a bangin kumpi khat vaihawmna nuai ah om lo uh hi.
Tua bang a om minamte pen Aung San in suahtakna ngahna ding tawh kisai in mualtung mite a zol ciangin 1947 kum in thukimna laipi kibawl hi. Aung San in Kawlgam suahtakna ngah khit ciangin Kawlgam lam khiat ding zia gelna leh lamlahna (7) te zong tua hun lai a, Anti-Fascist People's Freedom League (AFPFL) in thu kimpih hi. 1947 May khat 24 ni a, AFPFL khawmpi sungah a kithu kim Kawlgam lam khiat ding zia thu bulphuh (14) sunga khen (1)na ah “ Kawlgam a kilam na sung ah (a) Proper Burma (b) Shan gam, ( c ) Karenni ( Kayah) gamte ( d) Chin mualtung gam teng ki hel ding kici hi. Tua ban ah Kawl pau tawh kibanglo minamte in zong a mau leh a mau state ah om nuam ung a cih uh leh kiphal ding hi” ci’n na gel uh hi. Minam khempeuh liangko kikim ding cih thu bulphuh a kilam sawm a hihi.
Kawlgam buaina thu:
Tulai tak Kawlgam sunga hih zah a buaina pen minam khat leh khat kikal a piang gal hilo a, gam lam khiat zia leh gam uk zia ding tawh kisai a kigelh thu khunpi hoih lohna hang a piang buai na a hihi. Hih thu khunpi hangin minam khat leh khat kitel khialhna piang sak hi. Aung San a ki thah khit ciangin AFPFL in U Chan Htun Kawlgam thu khunpi na gelh sak uh a, Kawlgam sung a teng minam te thukimna bulphuh a hi Pinlong thuguipi pan lam na pial khiat pih pah in Kawlgam zong Federal state suak nawnlo in, Unitary states a suah sak hi. Kawl pau tawh kibanglo minamte in state tuam in a om uh hangin a mau state sung thu neihna nei lo in, a dang lai a Proper Burma a kici Kawlmite tenna i innlim khat a bel suak sak hi.
1947 kum a kigelh thu khunpi (Constitution) puah phatna ding in mualtung mite na hanciam den hi. 1961 kum in mualtung makai khempeuh in Shan gam Taunggyi khuapi ah khawmpi khat sam uh a, tua ah thu khunpi puahna ding munte kikupna nei uh hi. Tua pen 1947 kum a Pinlong thukimna tawh kituak a Kawlgam thu khunpi gelh kik ding hanciamna hi na pi, Galkap Ulian Ne Win in gam mite khem in “gam kikek zakna ding vaihawmna” cih min vawh in thu neihna sut khia hi.
Galkap Ulian Ne Win in gam a uk zawh kum (12) cin zawh 1974 kum in Party khat bek om theihna bulphuh in “Burma Socialist Program Party” phut khia in gam bup thu khunpi ding gelh kik hi. Tua thu khunpi hangin Kawlgam pen democracy gim a nam pan ciaiciai khempeuh mit sak dikdek hi. BSPP makaihna tawh kigelh thu khunpi zui in gambup ah kiteelna bawl uh a, a hizong in tua kiteelna pen deih telna hilo a, thu kimpihna lakna dan bek a hihi. Gam lam khiat zia zong bulpi pan vaihawmna (centralization system) tawh pai a, a mun leh mual a thu nei mite in zong bulpi pan thu za masa lo in bang mah sem theilo uh hi. Col. Khen Za Moong in Yangon a kibawl “ Zomi Seminar 2005” sunga a thu genna zui in en leng, BSPP (Mahsahlah party) in a mat mite i innkuan pihte a ding an nek tui dawn huhna piak sim loh, minam a ding bang mah a sep theihlohna ki mu thei hi. Tua hun lai in Col. Khen Za Moong pen Chin State bup sunga Party lutangpi ( Chairman) a hihi.
1988 kum Ne Win a kitawp khit cianga a kah thak galkap kumpi te in zong National Convention pan a gelh uh Kawlgam bup thu khunpi ding 2008 kum in gam mite tungah galhiam zangin kipsakna nei uh a, a mau genna ah gam mi 92% in thu kim hi ci uh hi. Tua ban ah 2010 kum in Kawlgam sungah kiteelna kinei ding hi ci uh hi. A taktak in, Gambup thu khunpi (Constitution) pen kitelna pan a mipi deih teelcing palai te bek in gelh thei, puah thei hi a, mipi deihloh mi gilote makaihna tawh kigelh tawh vaihawmna pen a thu man ngeilo hi. 2010 kitelna ah kidem ding Chin National Party pan Chairman pa a hi, Zam Cin Pao (Zozam) in April 19,2010 a New Delhi pan a kibawl Mizzama Media tawh a interview na ah, “1990 kitelna tawh kisai in Kawlgam mite’n sun mang kiman kha hi ci’n a hizongin, Htutdaw a galkap 25% kihel ding tawh kisai a genna ah, 75% a ne ding a kilawm te’n i nek kul hi cih bangin, thu khunpi pen a sung pan lut in puah ding tampi om hi cih a gen ban ah, a mah leh a mah pen minam it leh politician kici hi”.
2008 kum a kigelh thukhunpi lim tak in en kik leng, mipi te gamtat theihna ding hi vet lo hi. 2008 thukhunpi gelhna ding in mipi nopsakna ding a gen ding mite kisang lo ban ah, galkap kumpi in zong dot ding in ngaihsun vetlo hi. Mipi nopsakna ding a sem ding mite kisamlo a, galkap kumpi deihna nial lo ding mite bek kisam hi. Democracy min a puak sak uh hangin, Article 1 (7) leh (39) na sungah “gam kivai puahna pen Disciplined Democracy” ci ngiat uhhi. “Discipline” cih khit nung sang thu neihna pen a tung lam pan hong pai ding cih lahna ahihi. Pate in a tate tungah ukna a neih tawh kibang hi. 2008 kum thukhunpi gam vaihawmna pen Article (16)na sung Presidential system hi a, gam bup President a sem ding pen Article (59) sungah “Galkap tawh kisai theihna leh muhna nei ding” ci a hih manin galkap sung pan a hilo mipi lam pan sep theihna ding om lo hi. Tua banah President thu neihna tawh kisai in, “President pen gam bup ah thu nei pen a hih banah, kumpi vaihawmna ah zong thu neihna sang pen a nei pen a hihi” ci lai hi. Tua ahih man in 2008 thu khunpi pen Kawlgam sungah gam mite galkap kumpi’n sal leh sila in kum tampi a zat theihna ding ngimna bek a hihi.
2010 gambup kiteelna a kidem nuam mi khenkhatte genna a hi, “2008 thu khunpi pen sabuai tungah thu kikum in puah ding hi” ci uh hi. A pua tham in en pak leng kilawm mahmah hi. A kikhak ciplo a, kong kihong hi leh hi thei kha mah ding hi. Thu khunpi puahna ding tawh kisain 2008 thu khunpi in a genna ah Aritle 436 na ah “khen khat bek puahna ding a hi zongin Htutdaw ( Parliament) in 75% val in thu kimna kisam hi” ci’n kigelh hi. A taktak in tua Htutdaw (Parliament) sung ah Chapter 4 Article (74), (141), (109) te ah, “ Galkap sunga pan in 25% kihel ding hi” ci hi. Thu leh la khat puahnopna nei leng, mipi lam pan kitel 75% bek hi a, galkap sung pan 25% in thu kim ngei kei leh bang mah sep theih om nawn lo ding hi. A hi theilo thu a kigelh a hihi.
Tua bang a kong kikhak cip sungah lut in na sep a sawm te’n zong sem thei lo ding hi. Septheihna ding dong lampi kihong tuanlo ding hi. Tua a hih manin 2008 kum kawlgam thu khunpi zui a, kibawl sawm kiteelna pen mipi te a dingin thupha sangin ciamsiatna/ hamsiatna a hi zaw kha ding hiam ci’n ka ngaih sun hi.
