NASHVILLE: MUSIC CITY
(November 25-29, 2010)
Rev. Dr. J.M. Ngul Khan Pau
November 25 zingsang Fort Lauderdale vanlengtual dong Sia Vung En Thang leh a zi Nu Lian Cing in hong kha uh a, Pa Ai Mung zong “mangpha” hong ci ding leh ama huhna tawh kibawl Lengtong Pauno in a sak Ka Zua Ngaih VCD hong pia dingin hong pai hi. Khawlkhawm nuam mahmah lai napi hun in hong ngaklo ahih manin ka lenkhiat hun uh hong tungpah a, “mangpha” ci in ka kikhen uh hi. Hih banga kikhen ding hamsa i sak hun ciang sawltak Paul leh Ephesa upate kimangpha khakna ka phawk kikkik hi (Sawl 20:36-37 “Paul in hih bangin a kam vaikhak a man khit ciangin a vekpi-un khukdin' uh a, Paul in thu a ngen hi. Amaute a kikhen dingin mangpha a kikhak uh ciangin khatlekhat kilen kikawi-in a kap uh hi”).
Nashville vanlengtual ka tun uh ciang Zomi Christian Church Chairman Pa Pau Za Gen, Secretary Pa Tual Khan Suan leh upate pawlkhat in mawtaw nih tawh hong na dawn uh hi. Sunnung gilkial hun tawh kituak ahih manin Chinese Buffet ah hong lutpih uh a, komau duh leh deih ciat gilvun kikang pian ciatin ka ne uh hi. Nashville khuapi music city a kicih mah bangin vanlengtual leh sumbukte ah music ging ziahziah tawntung hi. Tua bek hiloin a khuahun lum lualo, vot lualo, mualsang lua cih zong omlo, kham pian zang pian cih bangin nuam mahmah hi. A khuapi mun leh mual nopna sangin a sunga teng Zomi te tawh i kimuh ciangin nuamzaw lai hi. A taktak in ci leng khua nuam i cih a sungah teng mite hang na hi gige a, mite hoih lohna khua peuhpeuh nuam kici thei lo hi.
Zintunna ding Pawlpite'n hong sehsak uh Pa Pau Za Gen leh Nu Cing Suan Hau te inn ah ka kiphual uh hi. Gim pian ka hih manun sunnung lam vakkhia loin ka tawlnga suak uh hi. Nashville Zomi Innkuan te saina tawh Zomi state tuamtuam pan hong pai bawlung (tuukpeng) kidemna tua ni sun khua in om a, nitak nai 11:00 dong mah hun nuamtakin zang uh hi. Ka zintunna uh Nu Hau pen kizen mahmah, annhuan siam, siangtho sitsetin van khawng koih dimdiam hi. I nek ding hong deihsak lua ahih manin meh nam tampi annek simin hong lui a, zindo a siam ngiat innkuan ahi uh hi.
November 26 nitak 7:00-9:30 dong biak kikhopna kinei a, sianu Dim Hau Cing in hun honna Lai Siangtho a sim zawh ciangin thungetna hong nei hi. Late 128:1-6 sung siksanin thugenna Lai Siangtho sinna cih bang pianin ka nei hi. Hih Late 128 sung pen Judah mite'n taanglai a kipan tuni dongin kitenna munah a sim tawntung uh innkuan thu ahi hi. I simsuk ciangin a thupi mahmah khat kimulo thei hi. Hih sungah a gen thupi penpen ahih leh “Pa” khat in Innkuan Nuam leh Minam Thupha Ngah ahih theihna dingin tavuan a neihna kician mahmah hi. Lai Siangtho sungah “pa” cih kammal 852 vei kizang a, “nu” cih kammal 245 vei kizang hi. Tua hang mah in zong pate'n tavuan innsung leh gamsungah nei cih phawk mahmah ding ahi hi. Ka thugenna a tomin hih a nuai bang hi:
1. Pa leh a hoih gamtatna (Aneu 1)
• Pa in Topa zahtakna tawh gamta hi.
• Pa in Topa thumang hi.
• Pa in tua hangin thupha ngah hi.
2. Pa leh a khut nasep gah (Aneu 2)
• Na khut nasep gah na ne ding hi.
• Nang adingin lungdamna hi ding hi.
• Na mavang ding hi.
3. Pa leh Innkuan sung thupha (Aneu 3-4)
• Na zi a gahpha mahmah leenggui tawh kibang ding hi.
• Na zi gahphatna na innsung hi ding hi.
• Na tate olive no dawng hilhhelh tawh kibang ding hi.
• Na sabuai (dawhkan) kiim ah tukhawm ding uh hi.
4. Pa leh Gambup (Minam) thupha (Aneu 5-6)
• Gambup thupha Zion panin hong kipan hi.
• Gambup thupha Jerusalem nopsakna ah om hi.
• Gambup thupha tute khang i muh ciang kitel hi.
November 27 nitak lam 3:00-5:00 sung nupi leh papite kikhenin hun kizang hi. Ka zi Dimnu in nupite tawh hun zangin, ke'n papite tawh hun ka zang hi. Tua banga hun a kituamzat ciangin naupangte zak dinga i deihloh thusim kigen hi. Tua lai a thu kigente hilai ah hong kisuaksak theilo hi. Puannuai thu zong siangtakin kigen hi.
Tua bangin hun a kizat zawh ciangin pawlpi buppi nitak ann ne dingin Chinese Buffet ah kipai ngeingai hi. Duh zahzah leh duh bangbang nek ding ahih manin naupangte nangawnin amau duh leh deih mah kideklo in la ziahziah uh hi. Dimnu tawh ka gen theih zel khat uh ahih leh i khua lama papi lokho annhai mahmahte hih lai-ah lutsak leng a zuakte sum mah si-in teh ka ci thei zel uh hi. Kei tawh kisai bang khangmoi lai ann duh mahmah hun sungin duh zah nek ding zong kingah lo hi. Tu'n duh bangbang nek theih hun ciangin cidamna hangin nek ngam loh hun hong hi leuleu hi. Tua nitak 7:30–9:30 dong biakpiakna ah Pa Cin Za Suan in hun hon thungetna hong neihsak a, Dimnu in “Tate Pattahzia” cih thu gen hi. Nu leh pa te'n phattuampih dingin kilamen hi.
November 28 zinglam in Nashville ka phak masak lai a ka zintunna Pa Sian Khan Pau leh a zi Nu Cing Ngaih Nem te innah thungetsakna leh thupha piakna ka nei uh hi. Tua zawh ciangin Rev. Pau Khan Lian leh a zi Nu Ruth Dim Biak Lun te'n amau inn ah sun ann lim mahmah tawh hong vaak uh hi. Amau innkuan adingin thupha piakna leh amau lunggulhna bangin Pasian nasepna a khang a khang a kizom paisuak ding thungetsakna ka nei uh hi.
Nitaklam nai 2:00-4:30 sung Zomi Christian Church kikhopna Christ's Church kici building dawl sagih sungah nam tuamtuam leh pau tuamtuam kikhopna ding mun tampi a kibawl biakinnpi ah ka kikhawm uh hi. Tua ah Sia Pau Lian in la hong makaih a, phatna la pawlkhat a kisak zawh ciangin mipi Pasian tungah ki-apna kinei ziahziah hi. Thugenna hun ko nupa in Pulpit tungah ding khawmin “Nupa Nuntakna a nuamzaw a i zat theihna ding” cih siksanin thusinsakna ka nei uh hi. Nu leh pa te kilawp bek hilo in nungak leh tangval te adingin zong thusin kholhna suak hi. Manpha ka sa uh a, a kihel mi kim in zong manpha sa dingin ka lamen uh hi. Tua biak piakna a kizawh ciangin Pawlpi in a vaihawm uh Pizza leh dawn theih kine ngeingai hi.
Tua zawh ciang biak kikhopna nai 6:00-7:30 sung kinei kik a, makaite deihna bangin innsung thu lam vive kigen ahih manin tua kikhopna ah “Abraham Innsung pan i sin ding” cih thulu zangin thugenna ka nei hi. Abraham innsung panin nu leh pa te'n sin ding thu lian mahmah nam guk om hi:
1. Abraham Innsung: Biakna tau bawlna innsung (Piancil 12:7, 8; 13:4; 18).
2. Abraham Innsung: Sawm ah khat piakna innsung (Piancil 14:18-20).
3. Abraham Innsung: Pasian deihna zong masa innsung (Pian 13:8-13, 14:13-24, 15:1).
4. Abraham Innsung: Pasian zintunna innsung (Pian 18:1-8, Heb 13:1-2).
5. Abraham Innsung: Midangte adingin thungen innsung (Pian 18:16-33).
6. Abraham Innsung: A hoih penpen Pasian a pia innsung (Pian 22:1-14).
Tutung Florida leh Nashville khualzinna tawh kisai ka tapa uh Toshi Mang kiangah, “Zomi te tawh kisai nang muhna ah bang thupi nasa pen hiam?” ka cih leh, “Amau inn a thungetsak ding a lunggulhna uh thupi ka sa pen hi,” ci-in hong dawng hi. I innsungah thungetna i deih laiteng tua inn adingin lametna kongpi kihong lai hi cih ka phawk hi. Tua ciangin Zomi tamna peuhpeuh ah khangnote zong Zokam mah na pau hamtang uh hi. Tate'n Mikangpau tawh nu leh pa a hopih uh zongin nu leh pa in Zokam mah tawh a dawng teitei innsung ah Zomi te leh pau itna om hi. Nashville Zomi te nasep hahkat lua uh ahih manin ihmut hun zong a deihzah uh ngahlo uh hi. Tua bek hilo in inn ah annhuan ding om tuanlo ahih manun Mikangte mah bangin restaurant panin a lim nono lei in ne khawm diamdiam uh hi. Sia Tual Khan Suan in a mawtaw thak liklek tawh Nashville vanleng tual dong hong kha hi.
Thungetna tawh hong huh den leh itna letsong hong pia Nashville Zomi te tungah lungdamna lian mahmah hi. Topa in a zah tampi in thupha hong piaksak hen. //
* * *
