"Vantung lampi Pawl hi kei, Jesu hi"
Tual Khan Suan
" Ni tawp ni ciang, Topa in
A phual hong zap siang ding a
A sii a tak hong khen ding,
Ei patauh kul kei"
Sakkik: Mipawl khat te'n pawl thu lung buai pih
Kei hih thu ah, lung muang ing
Vantung lampi pawl hi kei
Jesu hi.
La mal bupin ka thei kim loh hangin leh, la phuak mi ka theih loh hangin hih la hoih ka sa mahmah hi.
1980 kum kim pawl in, Zogam ah biakna pawlpi hong tam mahmah hun in, hih la ka za ngei hi. Laphuak mi i lungsim sungah bang om ding hiam, ci'n ka ngaih sut ciangin, " Pasian biakna pawlpi kikhen in vantung gam tunna ding, pawlpi a sa kha om hi", ci'n mu leh ki lawm ka sa hi. Pasian thu ki gen mahmah leh, ki um mahmah tek a, pawlpi tampi tak zong piang hi. Pawlpi min tuamtuam kiphuak a, gamdang pan Missionaries te hong puak pawlpi min ban ah, tualsuak pawlpi zong tampi tak i gam ah om hi. Tua pawlpi tuamtuamte hangin, i gam a ding hoihna pawlkhat a om bangin, siatna zong hon khat mah hong keng veve hi.
I minamte tawntung sihna lam zuan a, a pai ding kimlai, i kipelh theihna dingin a nungta Pasian thu hong puak sangmangte tungah i lungdamna bei ngeilo ding hi. A maute hong puak thupha hangin eite in nuntak tawntungna i ngah thei hi. Tua lampi man leh nuntak tawntungna ngah na ding lampi hong hilh manun mitam pi takin tua lampi i zui thei hi.
Zogam sungah thu um masa mite in zong a kihilh tawntung nuntakna lampi na zui uh a, siatna tampi tawh kipelh uh hi. Tua nuntak tawntungna ngahna dingin pawlpi a hih lohna leh, Jesu bek lampi a hihna na thei uh hi.Tua Jesu nung na zui nak uh leh, tawntung sihna tawh kipelh ding cihna a hihi. Jesu sialsa lampi tungah a pai mite in lampi man a zui a hihi. Thu um masa mite in zong Jesu sialna lampi a zuih lai teng uh kim leh pam a om siatna tawh kipelh uhhi.
A beisa hun pan a kipan Zomi te in Pasian thu sungah tha ngah in i lawp mahmah uh hi. Piak khiatna zong i hanciam tek hi. Pianthakna zong thupi i sa a, thu um mi kibeh lapna ding deihna tawh, cialpi i bawl zelzel hi. Piangthak mitampi tak zong kibeh lap a hih manin lungdamna lianpi i nei hi.Pasian thu sungah kipattah i hih manin, i gam i lei in zong thupha tampi ngah i cih i tel tek hi. Pasian a ding nasem mite hangin minam bup in thupha tampi i sanna a suak hi.
Vantung gam zuan a i pai laitak in lampi man a hi Jesu i zuih lai teng siatna i tuak kei hi. A hizongin hun kilaih zel a, Pasian thu gen mi pawlkhat ( mi khempeuh hilo), lampi man a hi Jesu pan in pai ding sangin, pawlpi tawn a pai ding cih a hong bulphuh tak uh ciangin thu um mitampi sungah siatna namkim tawh i kidaih pah hi. Tuate sungah thu um mite kikhen thangna, pawl kikhenna cihte a kipan thu tampi hong nung zuihhi. Thu um mite leh thu hilh mite in " Pawlpi min", " paizia, sepzia (practices) thute a thupi pen mun ah kigen a hih manin i lampi zuih kikhial kha hi. Pawlpi min ahi, A-Z laimal tawh kigelh khia pen thupi kisa lua kha thei a hih manin lampi hong sial sakpa Jesu i phawk kei thei hi.
Tua a hih manin Pasian thu genna pulpit tungah, thu hilh mite in "Vantung gam tunna ding pen, "hih" pawlpi bek hi" cih a hi zongin, " tua pawlpi ah na lut kei leh, gupna ngah kei niteh" cih a hizongin kigen thei mawkmawk hi. Pawlpi tawn a, vantunga gam tun ding thu ki hilh pen " pai khialna" leh " hilh khialhna" taktak hi a, Pasian hong lah thute tawh zong kituak nawnlo hi. Thu um mite zong a tel/thei khial sak suak hi a, tua mawhna thaman pen a ki thuak ding a hihi.
Pawlpi pen thupi kei a ci ka hi kei hi. Pawlpi pen thu um mite kilawm tatna, kithuah khopna a hih manin a thupi mahmah hi. A hizongin, vantung gam tunna dingin ngimna a nei thu um mite in, Jesu a zuih kei leh, tua pawlpi in a thupi nawn kei hi. Tua a hih manin Jesu a zui Pasian pawlpi khempeuh pen vantung gam tun theihna lampi vive a hihi. Vantung gam tung nuam thu um mite in " pawlpi min" sangin " Jesu" lampi a koih ding pen lampi man pen a hihi.
November 15,2011
