A pahtawi Taak Pastor

A pahtawi taak Pastor

October kha sungin biakna sungah makai, a diakdiak in Kha thu tawh kisai lamhilh mite (spiritual leaders) pahtawina leh limbawlna in kinei hi. USA gam sungah a tamzaw pawlpi leh biak innte in October kha kal nihna nipi ni (second Sunday of October) pen “Pastor/ Minister Appreciation” nipi in zang uhhi. Pawlpi pawlkhat leh biak inn pawlkhat in bel October kha sung, a mau lem ni pen a zang zong om a, October kha bup pen Pastor/Minister appreciation kha in a zang zong om hi.

“Nang pen a om khinkhian nam (introvert) na hi a, a hi zaizai nam (extrovert) na hi zongin, pawlpi leh biak inn sungah panmun leh sepna nei in, na om in (or) na om kei zongin, na pastor/ minister te na pakta in na pakta kei zongin (na deihna om thei, na deihlohna zong om thei), nang kha thu tawh kisai in an hong vaak Pastor te tungah na kipahna na lah ding kilawm hi.

Khat veivei pawlpi/ biak inn sungah Pastor te thu hilhna pen “a thu gen tha ngah ke’ng; thu gen ding pen kithawi masa buanglo a; thu gen siam kei tak eh” cih bangin gen behna (comment) piak pen baih lam mahmah hi. Tua bang hun tak ciangin “eite mihing i hih bangin, a mau zong mihing a hihna uh” kiphawk saklo thei hi. Tua nipi kal bup sungah a mau tuah khak nate, a phutkhak thute uh kimuh sak khalo thei hi.

Pastor sem mite zong zia tuamtuam pan hong pai uh a hihi. (Pastors come in all sizes). Pawlkhat pen a “thagol- thaneu, kum tam- kum tawm, mel hoih- mel hoihlo, kam tam- kam tawm, lungduai-lungtom” cih bangin mihing pianzia ngeina (personalities) tuamtuam nei tek ding uhhi. Mihing hihna lahna hi a, khat leh khat kibang sinsen cih om theilo a hih manin “ki bat sak sawm ding zong hi” hi.

Pastor te pen kha-an hong vak mite hi a, tua kha-an a ne kha mite in a maute tungah bangci bangin kipahna lak kik thei ding cih ngaih sut theihna kisam hi. Kipahna lah khiat na ding lampi tuamtuam om ding hi. Tua sung pan in;

1.      Thapiak na (encourage your pastor): Nang ma i (nang mah kha-an hong pia) pastor zong mihing mah a hih bangin thanem hun, lungkiat hun, tawp nop hun om lua hi. An hong pia khat a hih bangin a ma phut laitak hamsatna te hong gen ding hamsa sa thei hi. A hi zongin, Laisiangtho tang (verse) khak na, message tawh tha piakna cihte a ngah uh ciangin a tha uh dim kik baih tuam hi. Tua ban-ah Pastor te nasepna- a diak in biak inn vai cihte ah, huhna hong nget ma un, kipia khia in vahuhna in zong a maute tha dim sak mahmah hi.

2.      Mipi mai ah a khengval in phat lua lawmlawm kei in (show restraint when praising your pastor) – Na Pastor te phatlo ding, pahtawi lo ding cihna lam hilo hi. Mipi leh lengla (guest) te mai khong ah a khengval lua in na phat gawp ciangin na pastors te a dingin nuamlo zaw thei hi. Tua bek hilo, mipi leh lengla te in na pastor te tungah lam-etna sangpi nei kha thei uhhi. Tua bang in a ki pumphat gawp ciangin in Pastor te in (i) A mau leh a mau a hi gawp, a lian gawp bangin ki ngaihsun khial thei hi. (ii) A sepna khempeuh uh a mau a dingin minla (credit) in Pasian min thanna hi sak khalo thei hi. Kipahna leh pahtawina pen a ciangtan khat tawh a mau (pastor) te zak ding ciang in gen hiauhiau lel ding hoih hi.

3.      Thuhilhna kupbehna (feedback) piakna: Pulpit tung pan in Thuhilh (preacher) te in Pasian kammal gen uhhi. A za a ngai mite in tua thuhilhna tung tawn in thangahna gen kik thei a, Preacher in zong tua a kigen kik te zakik leh hoih hi. Preacher te zong mihing hi a, gim leh tawl nei thei uh a, a hoih pen dingin a kigin uh na ngawn khat veivei deih bang zolo thei hi. Pastor in Pasian kammal hawmsawn, gen khia leh hilh ding a, thu ngai mite in tua tungtawn in a mau ngaihsutna (thought) kupbehna (feedback) piakna pen pawlpi sung cidam na hi.

4.      A lialua khuttawi pia kei in (Don’t give lavish gift): Pumpi ci leh sa tawh om na leitung ah mihingte in a lialua neih le lam a deihlo omlo hi. A hizongin tuate deih luatna leh lunggulh luatna in thuman lampi pan in lampial khiatna ding paing sak thei hi. Pastor te khuttawi a lialua (lavish gift) piak loh ding cih tak ciangin, a khengval lua kilawmlo cihna hi zaw hi. A lialua khuttawi (lavish gift) piakna leh ngahna in kiphat sakna, kiliat sakna lungsim piang sak dingin a keep (thau ginna ding a, a puak masa) hoih penpen suak thei hi.

5.      Thu nget sak in (Pray for your pastor): Leitung ci leh sa ah an hong vaak mite pen vaak a om mite sangin cidamna, tha hatna cihte kinap sap zaw a hih bangin, Kha an a vaak Pastor te zong mipi te sangin Kha sungah cidamna, tha hatna kisam zaw uh a hih manin thu na ngetsak ding kisam hi. Khasiangtho sathau nilhna kisam tawntung, Khasiangtho lamlahna, ompihna kisam tawntung uhhi. Thu nget sakna pen a maute Kha a ding an na piak kikna hoih pen a hihi.

Bang ci bangin Pastor te pahtawi ding, kipahna lak khia ding cih a kigen tak ciangin, kua bang mite pahtawi tak pha deuh hiam, kipahna lah khiat ding kilawm pha deuh hiam cih mite lungsim ah om thei hi. Hih thu pen a hi thei ding mah a hihi. Khua hun kikhelkhel a hih manin “a man leh a manlo cih bek hi nawnlo in, a phellang man- a phellang manlo” thu leh sepzia zong tampi om kawikawi a hih man a hihi. Hih a nuai a kigelh thute tawh kapteh (tehkak) in “pahtawi taak, pah tawi taaklo” cih pen nang mah leh no mau in na gel tawh thei ding uhhi.

1.      Sathau kinilh/ a ki-ap zo Pastor (an anointed Pastor): Pasian sapna a ngah taktak cihna a hihi. Sathau kinilh cih a kigen teh, “Pasian sathau nilh hiam? a beh a phung teng nilh hiam” ci’n ciamnuih gen zong om kha thei hi. Sathau nilhna ban-ah a ki-ap zo Pastor pen Pasian tawh kop a sathau kinilh hi ding hi.

2.      Thuman hang tak a tangko Pastor (boldness to proclaim truth): Pasian kammal deih kaih lo in, Laisiangtho in “hi a cih te, a hi a tangko, hilo hi a cihte hilo a tangko” mi kisam hi. Laisiangtho in “tual thahna hoihlo a cih pen, kua kua (kumpi pa a hi phial zongin) a that leh hoihlo hi” ci’n a hem gen/ a sim gen bek hilo in a tangko khia mi pen pahtawi tak hi.

3.      Gamtatna ah min siatlohna (integrity of character): Pahtawina, kipahna lah khiatna pen vantung gam thu tawh direct in kisai pah samlo hi. Mite a dingin limpha leh etteh taak cing hihna, gamtatna ah min siatna nei lo mite pen zahtak tham cing, etteh tham cing hi. A seppih mite siatna ding a sim geelgeel lo mi, a upate a gensia leh a langpan lo mi, a pawlpi mite tawh a kitawng lo mi, pulpit tung pan thautang a lawnlawn lo mi cih bangte pen zahtak tham cing uhi. A ma angsung ding leh a panmun (pastor) sepna a kipna dingin pawlpi mite leh makaite sungah kilemna a om kimlai, khen nih khen thum a suah lo mite pen mite in zuih taak cing sa zaw hi.

4.      Cimna leh theihna (wisdom and understanding):- Pilna leh ciimna pen Topa sungah om hi a, Topa a zong mite in nei hi. Pilna leh ciimna nei cih mite pen Topa tawh a kizom den mite cihna a hihi. Theihna (understanding) pen nisim in Pasian hong piak pilna leh ciimna zang in zonna, kanna pan a theihna hi a, mihingte thu (theih ngei nailoh thute) zong a hunlap a kan leh a zong mite in zahtak leh pahtawi tham cing uhhi.

5.      Pasian kammal tungah dinbelna (Diligence on the Word): Pasian kammal pen thuman hi a, thu thuman tungah a dingkip, tua thuman zonna ah a bel mite pen pahtawi leh zahtak tham cing hi. Pasian thu, Laisiangtho bulphuh a din kipna a thupi a hihi. (Laisiangtho deih kaih a khiatna pen a tuam a hihi.)

6.      Thu ngetna a thahat nuntakna (A strong prayer life): Thu ngetna pen Pasian tawh kizopna ding a huih dikna (breath) a hi manin thu ngetna a thahat mite pen Pasian tawh kizopna ah cidam cihna a hihi. Pasian tawh kizopna hoih a nei mite pen Pasian in muang hi. (Hih mun a, thu ngetna pen “lamka bom a thu ngetna nam, biak inn sungah mipi tamna ta ta a, aw ngaih buabua tawh thu ngetna nam hilo hi.)

7.      Kiniam khiatna leh nasem lungtang (humility and a servant’s heart): Vantung Kumpi tokhom a tu pa, i Topa Jesu mahmah kiniam khiat tawm a hih manin a ma nung nui mite, a ma nasem mite pen kiniam khiat ding pen limpha lahna a hihi. Nasem lungtang nei in, mite a ding service piak nopna lungsim in thupha bawlna a hihi. (Pastor pen pawlpi leh biak inn sungah ukna aanna nei CEO hilo a, Boss lungsim, Manager lungsim neih pen hoihlo hi.)

8.      Khentel theihna (Discernment): A hoih a phellang, a hoihlo a phellang a omna leitung ah hih manin tua sunga a hoih leh a hoih lo khentel theihna neih ding kisam hi. Pawlpi sung, biak inn sung ah zong “thu hoih leh thu hoihlo” zong Pastor te tungah tampi kitun thei hi. Thu man leh thuman lo zong tampi kitun thei hi. Tua khempeuh pen khentel theihna a nei mite pen mi picing leh pahtawi taak cing a hihi.

9.      Kiptak a dinna (Steadfastness): Ei gen bek man, ei thulo peuhmah thu a lutsak lo, thu simlo cihna a zat ding hilo a, thu man leh thu manlo- thu hoih leh thu hoihlo kikal a om sim in, a man lam, a hoih lam ah din kipna cihna a hihi. A lang khat in gen/mut leh hoi zel, tua khit teh a lang lam in a gen kik teh hoi kik leuleuh cih bang dinmun a om mite pen zahtakna bei a, pahtawi taak cinglo kisa hi. Pasian thuman tungah kiptak in a ding mite pen kizahtak in pahtawi tak cing kisa hi.

10.  Lamlahna leh muh kholhna (Direction and vision): Lamlahna neihna dingin phut khak thu, tuah khak thu leh sin khak thu kisam hi. (learning experiences). Mailam ah bangci bangin dinmun tung sak ut, hi sak ut cih gel kholhna nei in Pasian tungah ap na a nei mite lawhcing a hih manin pahtawi taak cing kisa hi. (Ka panmun tawh kituak in lamlahna leh muh kholhna ka neih kul ding a hih teh, ci’n a hilo, a manlo pen len tentan in dihpih, paipih sawm mawk khak loh ding kisam hi.)

October 28, 2024

 

References

1.      Appreciating your pastor. (2012, October 29). Our Daily Journey. https://ourdailyjourney.beta.ourdailybread.org/news-for-you/appreciating-your-pastor/

2.      Loudermilk, M. (2021, July 16). The value of a pastor – more to life. More to Life. https://www.moretolifetoday.net/the-value-of-a-pastor/

 

 

Thu tamkimlo namte

Thu tamkim lo namte

Types of Injustice

 

"That's NOT fair expresses a feeling that frequently leads to conflict".

"Hih bel thuman kei tak ei, cih thuakna leh genkhiatna in buaina tun zelzel den hi."

 

A tunga kammal pen naupang khat na ngawn kam pan in kiza thei hi. Thuman, thu tanna (fairness) cih pen sangkah pilna (formal education) leh siamsinna pan sinkul tektek hilo in, mihing pianpih sia le pha theihna (moral sense of right and wrong) hang hizaw cih a kimuhna a hihi.

 

Thu tam kimna (justice), thu tanna (fairness) a omlohna, a kimuh lohna tawh kisai in thu thuk kan pilna nei mite in a laigil ngaihsakna (foci of attention) a nuai thute pansan in et ding kisam hi ci uhhi.

Populism in Democracy a susia zo diam?

Kammal khiatna:

Populism = Mi honpite a metna ding bek a nasem ding ngimna:

Democracy = Mi a tamzawte deihna tawh na sem dingin, a tawmzaw mite deihna zahtak, thupi sim sak ding ngimna

A kilamdanna = Populism ah mi a tawmzaw, a thanem zaw mite kinawl khin, kizo thawh a; Democracy ah a tawmzaw, a thanem zaw mite humbit (protect), kipanpih hi.

Kitelna (election) pan in telcing Kumpi in “ko pen mi a tamzaw deihna tawh telcing hi ungin, vai pen ko deih bangbang a hihi” cih bang in ukna thu neihna (executive power) a zang ziauziau thunei (Kumpi) na phawk kha hiam? Gentehna in, India gam ah Bharatiya Janata Party (BJP) party pen kitelna (election) pan in telcing a ngah party hi a, a langpang (oppose) party thanem a hih manin gambup vai pen a mau a tamzawte bek i metna (a diak in Hindu biakna bia mite bek) dingin a sepna uh na muh teh, man na sa mah hiam?

Tua bang a thupiang pen gamkhat sung bek a piang thu hilo hi. Khuasung, tualsung kipawlna (community organization), Upna bulphuh kipawlna (Faith based organization) cihte ah zong tua bangin “a bawng tamtam, a bawng cingcing in, a mau deihna ah thu a suk kaih, a to kaih uh na muh ciangin kisam thu khat om na sa hiam?

Thu neihna iplah (power hunger) mi khat in “a tamzaw mi honpi in kitelna pan a tel cing a hih na bek paulap in” a ma’ deih bangtek in pawlsung vai, khuasung vai, gamsung vai suk hei to hei ut ziau thei hi. A omsa thute, paizia leh ngeina cih peuhmawh awlmawh nawnlo in, “a tamzaw mi honpi in deih hi” cih paulap in Democracy pen a lang (50%) zangin kiphelh khia uhhi. A tha khauh makai (strong leader) leh a muilim makai (effective leader) lunggulhna hangin makai khat in a omsa thukhunte, paiziate leh ngeinate zuilo in a sep hangin, mipite in “hi ta hen! Hi ta hen!” ci’n khutbet khum lai hi. Tua bangin “sep khiatna (a hoih ding deihan hiven) bek” a ki ultung sak luatna hangin “mi hontam ukna (majoritarianism) leh makai khatbek i ukna (authoritarianism) lam ah lehlut pih sawmsawm hun hong tung kik hi.

Democracy kici bang hiam?

Mi tampi tak in democracy ukna paizia kici pen “a tamzaw thu neihna” ci in kigen khial ziau thei hi. A khial hilo na pi, man khin lo hi. A kicingin kigen kimlo cihna a hihi. A kicingin a gen hi leng, Democracy pen “a tamzaw deihna tawh ukna paizia kibawl a, a tawmzaw mite deihna kihum (protect)” vaihawmna paizia a hihi. A kitel zaw in genciat theihna dingin thunung thuma (concept) nam (4) tawh gen kul hi. Tua thunung thuma nam (4)te pen (i) Mipi palai zatna thu guipi (republican principles) (ii) Mipi huamkimna (democracy) (iii) Thukhunpi zuihna (constitutionalism) leh (iv) Suahtakna thu guipi (liberalism) a hihi.

Mipi Palai zatna thu guipi (Republican principles) paizia kici in “gam mipite pen thu neihna sang pen a nei mite hi a, a maute thu kimpihna (legitimacy) bek tawh gam uk kumpi ding kiphut khia thei ding” cih a hihi. Tua thu guipi (principles) pen gam tampite i thu khunpi (constitution) sungah “gam bup thu neihna pen mipite neihsa a hihi” cih a hizongin, “gam uk kumpite in mipite phalna (consent) bek tawh ukna thuneihna a nei a hihi” cih a hi zongin kigelh hi. Ukna thu neihna a zang ding mite pen mipite phalna or deihna tawh kitel khia Palai/Taangmi a hih teitei ding cihna a hihi.

Mipi huam kimna (Democracy) paizia bulpi kici pen, “gam mipi khempeuh in tan kikimna leh mipi khempeuh huam kimna” bulphuh a hihi. Gan hing khempeuh tan kikim a, a hi zongin khe li nei ganhing teng bek an kipia ding hi cih a hi zongin; mihing khempeuh tanh kikim a, cikang/vunkang nei miteng bek inn kipia ding hi cih bang om theilo hi. Tan kikimna leh huamkimna (inclusiveness) pen Democracy paizia a dingin a khuampi khat a hihi. Vaihawmna leh thu khensatna khatpeuh a kineih ciangin a masa in mipi a tamzaw deihna zui a kikhensat ding hi mah ta leh, a nihna ah mi buppi (a tawmzaw te zong) huamkim na ding en a gel leh malakna neih ding a hihi. Ukna, vaihawmna, gelna, malakna dingte a paizia zuihna leh thu khenzum a paizia zuihna pen kibanglo hi. Gentehna in mi a tamzaw i deihna tawh khialhna nei (guilty) mi 10 khah khia in, khialna neilo mi khat gawtna piak ding cih thute pen thu khenzum paizia hi a, ukna leh vaihawmna paizia kibawl khit ciang a, tua zui a sepzia ding thu hi pan hi.

Thu khunpi zuihna (Constitutionalism) paizia kici pen, “gam sung gam pua, pawl sung pawl pua kilam khiat zia, pianziate gelh khiatna hi a, sun kal zan kal a lumlet theihloh ding a, a kip ding a kigel a hih manin puahphatna leh behlapna ciang cihloh pumkhekna (replace) ding hamsa hi. A vailam a (horizontal) khenna zong kici “thu neihna khenkhiatna (separation of power) leh thu neihna bukkimna (check and balance of power)” cihte pen gii nei a kibawl kilam zia leh pianzia a hihi. Khenna pawlkhat pen a dunglam (vertical) khenna zong kici a, “gam bup thuneihna (national level), gamke thu neihna (regional level), tualsung thuneihna (local level)” cih bangin etkai theihna (jurisdiction) pen a dawldawl, a thuapthuap in kikhen hi. Tua bangin kikhenna pen gambup leh kipawlna bulkip zawkna ding leh muilim (effective) zawkna dingin a zungpi ahihi.

Suahtakna thu guipi (liberalism) paizia kici pen “mi khatpeuh in gam leh minam nasepna, biakna nasepna leh a dang nasepna khatpeuh a ma mimal utna lieliau in kihel thei ding hi. Tua kihelna pen thusiah (terms) kibang tungah kingah ding” cih thu guipi pomna a hihi. Hih thu guipi deihna in, “mimal khat i suahtakna pen daitak in nuamsa hithiat thei ding (peaceful enjoyment of individual independence)” hi ci’n zong kigen thei hi. Mihing a min piang khempeuh in a kisut theilo hamphatna (inalienable rights) neitek a hihna kipsak na in gam uk kumpite in mimal khat i suahtakna suksiat sak lo ding, khak tansak lo ding cih ahihi. Hih mun ah, mimal kim in zong mimal i suahtakna sungah nopsakna dingin mimal dang khat i suahtakna suk siat saklo, khak tan saklo ding kisam hi.

Populism kici bang hiam?

Ukna thuneihna a nei mite hepkhiatna ding a hi zongin, a ahih kei leh, ukna thuneihna a nei laitak mite in a mau ukna a letkip suak zawhna dingin a hizongin a tha khauh makai (a strong leader) leh a muilim makai (an effective leader) pawlkhat in mi honpi luankhopna (mass movement) pansan in Populism paizia zang uhhi. Hih thu paizia in “democracy thak suak sak ding, makai ding mi thak sem sak ding, thu meilet (policies) thakte tawh kalsuan ding” cih kamciam pia in awng uhhi. A makaite in mipi, nautang a ding a gen a sa bangin pau uh a, “a mau lam leh ei lamte” cih panmun ah gii khen in thu gen uhhi. Tua bek hilo in, makai pawlkhat in muahmawh thu (conspiracy theory) zangin mipi sosang sak uh a, mipil misiamte muan lahna (distrust of experts), nampi lungsim ultung sakna leh minam dangte- a pualam mite (outsiders) muh siatna dingin thu phuang uhhi. Hih a nuai a thute en in sittel leng Populism kicing zaw in ki lungngai thei ding hi.

Populism kalsuan zia in mipi nautang tampi huam kha zaw phial mah leh ukna vaihawmna neusek hi. (Populism may increase representativeness but undermine governance)

Mipi nautang mainawtna (Populist mobilization) ah makaih zia pen mimal tungah kilim ngak lua (personalistic leader) a hih manin party bup bulphuhzia (institutionalization) pan lampial khia thei hi. Mimal bulphuh luatna hangin, tua mi in thuneihna a hong ngah tak ciang, mailam kalsuan zia ding thukhun gelna ah lunglut nawnlo uh a, party dangte in thukhun gelna, thusunna cihte thu sim nawnlo in nawl khin sak uhhi. Ngeina paizia, sepzia bawlzia leh thuciin thusiah cihte awlmawh nawnlo in, mi hontam zawkna (popular voice) pen a man pen in sang uhhi. Mi hon tamzaw in hoih sakna a hih nak leh pom ding zuih ding cih bangin koih uh a, a tawmzaw mite’ muhna le sanna awlmawh nawnlo uh a hih manin kilang neihna piang sak hi. “Ei, mipite (we, the people)” cih kammal in a mau lam a pang miteng bek huam sak uh a, a mau tawh a kithuah lo mite pen huamsak zolo uhhi.

Ukna paizia (Bureaucracy) leh nasepna ah zuih ding thumeilette (policies) peuhmah awlmawh nawnlo in sem in bawl uhhi. Thukhun, ngeina paizia leh thu meilette zuih omlo in nasem a hih manin mipi kisapna leh mipi ukna ah muilim (effective) zo nawnlo hi. Gam sung vaihawmna, pawlsung vaihawmna ah ukna hoih (good governance) pia zo nawnlo hi. Sep leh bawl, ma lakna khempeuh a vaipuak sanna (accountability) ding semlo uhhi.

Populism in semkhiatna bek ultung sak in, sepzia le bawlzia nawl khin hi. (Populism empowers executives over legislatures).

Democracy ukna paizia ah mi khatpeuh in thuneihna a zat khialh (abuse) lohna dingin thukhun leh paizia kician bawl khiatna, pansanna pen a lo theilo a hihi. Thu bulphuh thu guipite a mualsuah zawhna dingin thukhun leh paizia dante bulkip takin bawl ding kisam hi. Mi honpi tawh lomluanna (populist movement) makai pawlkhat in pianzia ngeina thu bulphuh, thu guipite phiat in thukhun leh paizia thak tawh lumlet gawp ding sawm thei uhhi. Tua bangin na a sep tak uh ciangin, ukna thu neihna a khengval a zatna, a mau pawl a hilo mite pampaihna, suahtakna thu paipite nuaisiahna lampi a tawntawn uh hi a, kitelna na ngawn ah tamkim leh thuman (free and fair) omlo a kitelna ding gel khia uhhi. Mitam thu paulap in thu khun tungah tuang thei uhhi. Thuciin thusiah (merits) cih bang om sak nawnlo uh a, a lui khempeuh a hoihlo bangin mu sak uhhi.

Democracy leh populism in mipi tawh vaihawmna tuaktuak hi a, ki-valak mahmah na ciang khat nei na pi’n kibang kim taktak khinlo hi. Democracy in mipi deih palai tawh vaihawmna, ki-ukna leh paizia a hihna zui in thuneihna (power) zong a kibuk tuah (check and balance) dingin kilamzia kiptak nei hi. Tua ban-ah a tawmzaw mipite zong a kihuam khak, a kihum (protect) na dingin thukhun leh paizia kiptawh na sepna a hihi. Populism in mi honpi tawh mainawtna a hih mah bangin mi a tamzaw in a thukim leh hoih a sak nak leh kuamah awlmawh nawnlo; thukhun leh paizia ngeina, sepzia cihte peuhmah awlmawh nawnlo hi. Mi hon a tamzaw metna ding bek en in mainawt in sem hi. Mimal a tawmzaw, a thanem zaw mite aw ngaihna, zakna dingin bil dawh nawnlo hi. Thu neihna ngah hun sungin a omsa thuteng, paizia leh thukhun teng lumlet mang uh hi.

Khuahun khantohna zui in na khempeuh a manlang pen (high speed) vive tawh nasep hun a hih manin, mi khatbek i vaihawmna leh thu khensat ziau theihna pen khangthak pawlkhat in deihzaw mawkmawk thei hi. Tua bangin mi khat bek lutang dinmun ah dinna tawh nasepna ah lawhcin zawkna zong om tham mah hi. Committee or Board tawh thu kikup a paizia tawh gel in nasep sangin makai khat bek lutang mun ah ding vilvel a sep ziauziau pen muilimna (effectiveness) bangin kimu hi. Tua bangin a kisepna mun khempeuh a makaihzia pen mimal bulphuh makaihna (personalistic leadership) hi a, makaite in mi a tamzawte’ i mitmei bek veng uh a hih manin mi a tawmzawte aw (voice) kiza zolo a, a maute deihna leh metna dingin thu kigel ngeilo hi. Thukhun leh paizia cih omlo a hih manin a thazawm mite a dingin kidalna ding lampi om theilo hi. Populism pen mihon a tamzawte a dingin hoih a, mi a tawmzaw leh a thazawm mite a dingin hoihlo hi. Democracy pen mi a tamzawte a dingin hoih a, a tawmzaw leh a thazawm mite a dingin zong hoih lai hi.

February 16, 2024

Kipawlna pianzia leh ki makaihzia (The Nature of Organizations and Its leadership)

Hih mun ah “Kipawlna” cih kammal kizang i khiatna pen English a “Organization” kammal pen a gen nuam i hihi. Hih “Kipawlna- Organization” sungah “gam le minam vai, Kumpi ukna vai tawh kisai kipawlna (Governmental Organization), Sum met ngahna ding tawh kisai kipawlna (Business and Commerce), tualsung mipi phattuam na ding kipawlna (Community Organization), Biakna thu tawh kipawlna (Religious Organization)” dong huam hi. Tua hi a, kipawlna (organization) in sum met ngahna ding kipawlna (Profit organization) leh sum met ngahna ding hilo kipawlna (Nonprofit Organization) in khenpi nih in kikhen thei hi. 

Sum met ngahna ding kipawlna (Profit Organization) pan in i gen ut deuh a hih leh sumzonna pianzia leh ki makaih zia (Business leadership) hi a, sum met ngahna ding hilo kipawlna (Nonprofit Organization) sung pan in i gen ut deih a hih leh biakna pianzia leh kima kaihzia (Religious Leadership) a hihi. 

Hih kipawlna pianzia nam nihte i kilamzia (structures), kisapna (needs) leh tupna le ngimna (goals and purposes) tel theihna in, hun tom leh hun sau ah kipawlna (organization) i matutna dingin a kisam mahmah a hihi. Sum metna ngahna ding kipawlna (Profit Organization) leh sum metna ngahna ding hilo kipawlna (nonprofit organization) nampi nihte in a mau i sepsawmna (missions), a deihsak leh a tup uh mipite (target audience) leh buaina vensakna sepzia (problem solving strategies) a tuam tuak in nei uhhi. Pianzia kilam danna, ngimna kibatlohna, sepzia tuam tawh sepna leh paizia ngeina tuam neihna hangin makaih zia leh vaihawm zia pen tuam tuak a hihi.

Tupna (Purposes)

Sum met ngahna ding kipawlna (profit organization) in a mau kipawlna zui-in tupna tuamtuam a neih tek uh hangin mipi vanzangte (consumers) tungah a mau van bawlte (products) zuak in sum met ngah ding cih pen a vekpi a tupna kibang bulpi (primary goal) hi pen hi. Kipawlna (Company/Business) a nei mite (owners) leh a neikhawm (shareholders) mite a dingin sum le pai, neih le lam ah metna ding, punna dingin ngimna kician (clear financial goals) tawh kipan, kiphuh khia a hihi. Tua a hih manin vanzang mite (consumers) i duh theih ding, deih thei ding vante (products) leh sepna (services) bulphuh ding bawlkhiat (develop) ding masak hi. Gualzawhna, matutna leh mualsuahna (success) pen sum leh pai, neih le lam metna, punna tawh kiteh kipawlna a hihi. 

A langlam ah sum met ngahna ding hilo kipawlna (nonprofit organization) a hih leh, sum le pai metna, punna ding sangin kha thu vai (spiritual), tualsung vai (social issues), kim le kiang vai (environment) ah kilam danna, khanlawhna leh kepcingna a omna ding pen tup bulpi (primarily goal) in nei uhhi. Mihing nuntakna a kisam leitung nate (material needs) a hi, an nek (food), tui dawn (water), inn leh lo, siam sinna cihte mikim in ngah theihna ding leh mihingte sihnung vai (spiritual) ah lungmuanna ngah theihna ding na sep ding, piak zawh ding pen ngimna phungpi in koih zaw uhhi. Sih le hin kikal a thute vive zong a hih manin mikim in a ngahna ding, a neihna ding sepna leh vaihawmna a hihi. A sem, a bawl mite a dingin thalakna (motivate) mahmah thu hi na pi’n, lawhcihna, matutna leh mualsuahna (success) pen mit a muh theih sum le pai, neih leh lam tawh kiteh lo hi.

Sum le Pai (Funding)

Kipawlna - metna ding kipawlna (profit organization), metna ding hilo kipawlna (nonprofit organization) peuhmah in a tupna (mission) a mualsuah zawh na a nasepna ah sum zonna – sum tha kisam hi. Metna ngahna ding kipawlnate (profit organization) kipatna ding sumbul pen Bank, sum leitawi lakna leh sum tuh mi (investors) mite leh vante (products) zuakna pan in ngah thei hi. Metna ngahna ding hilo kipawlna (nonprofit organization) ciangin sum hawm (grants), sum kaihkhopna (fundraising), piakkhopna (donation) tungtawn in sum lut a hih manin kum sim in sum gelna (budget) kibang denlo hi. Nonprofit Organization in a ngah uh sumte a kizatna ah mawhpuakna lakna leh selsim omlohna (accountability and transparency) limtak in zui uh a, a tupna uh tunna dingin a kizat ding bek masak uhhi. 

Mipi kibatlohna (Diversity of Audience)

Metna ding kipawlna (profit organization) in a mau vante lei in metna a piangsak thei ding mipite tawh kizopna a hoih ding gelna nei uhhi. A mau metna ding a piangsak lo mipite pen awlmawh lua lo, kitheih mawhbawl lel uh hi. Metna ding a hilo kipawlna (nonprofit organization) leuleu ciangin a mau sepna pen mikim in phattuamna a ngah ding gelna nei uhi. Kuamah nawl khin theih omlo in, mikim kisap na a kicingsak thei ding nasep a sem uh hi.

Kipawlzia ngeina (Organizational Culture)

Kipawlna i tupna (mission) kibat lohin kipawlna sungah paizia ngeina kilam dang sak hi. Metna ding kipawlna (profit organization) in sum le pai, neih le lam ah metna ding, punna ding tupna nei a hihna zui in nasem mite sepsiamna bulphuh hi. Company leh business i hun tom (short term) leh hun sau (long term) ah metna leh punna a ngah na dingin nasem mite zat ding leh tha piakna pen nakpi tak in ngim (focus) hi. Metna ding hilo kipawlna (nonprofit organization) in tualsung mipi bulphuh (community oriented) zaw a hih manin sum leh pai ah metna leh punna ding tampi a om kei zongin mipi nuntakna ah kisam van le nate ngahna dingin sunglut in na sem hi.

Zum nasemte (Staffs)

Metna ding kipawlna (profit organization) a zum nasem mite pen thaman leh sum kipia a kicial nasemte hi a, nitha- khasum tam ngah zaw thei hi. Nasep khiatna (productivity) zui in thaman kipia a hihi. Metna ding a hilo kipawlna (nonprofit organization) a hih leh, sum leh thaman piakloh kipum piak nasem (volunteer staff) tungah kilim ngak zaw hi. Kipum piak a nasem mite veina leh supna hangin kipawlna i tupna a tangtunna ding a kisam sum pia mite (donor) in mailam ah a piak khiatna uh kilam dang hi. 

Makaih zia (Leadership)

Metna ding kipawlna (Profit organization) leh Metna ding hilo kipawlna (nonprofit organization) nampi nih kikal ah a pianzia, a tupna, a kilam zia cihte hoih tak in khentel siamna in makaih zia zong a kibat lohna mu thei pah ding hi.

Metna ding kipawlna (profit organization) ah vaihawm makaite nasep zia pen vengsiang (clear) mahmah hi. A hangin, tua kipawlna (company, business) pen mi khat bek i neih a hi a, mi pawlkhat i neih khop (corporation) a hi phial zongin makaite i vaipuak lianpen a hih leh, sum leh pai ah metna leh punna ngah ding hi a, tua metna te pen tua company/business nei mite tungah hawm kik ding a hihi. Hih company/business a panmun len mite pen makai bek hilo uh a, a mau metna leh punna ngahte pen a mau tan/neih ding a hih manin metna bulphuh (profit oriented) makaihna zang a neite (owners) zong hipah uhhi. Makaite, company le business nei mite i bulphuh thupi pen a hih leh a mau kipawlna pan in sum leh pai, neih le lam tampi met sak ding, pun sak ding a hihi. Tua a hih manin makaih zia pen tua metna leh punna a pia thei ding, thu khensatna leh sepna ah a tang-tai (straight-forward) penpen dingin tung-nuai (top-down) kizopna leh makaih zia zatnop pen suak hi. Thupiak (command) piakna a luansuk mengmeng theihna dingin galkap sung ki-ukna nam leh Chief Executive Officer (CEO) panmun makaih zia zatnop pen hi. 

Metna ding a hilo kipawlna (nonprofit organization) sungah makaite i vaipuak lian pen a hih leh “a mau mimal metna leh punna ding hilo, kipawlna i tupna mualsuah zawhna dingin” vaihawmna leh sepna a hih manin Boards (or) Committees tawh nasep pelmawh kul hi. Hih kipawlna nam pen mipi metna leh punna dingin tupna leh ngimna (goals and purposes) nei a hih manin mimal khat leh mi khenkhat bek in aituam neih theih hilo hi. Metna leh punna dingin nasem lo a kicih tak ciangin mimal leh mi khenkhatte metna leh punna ding a gen bek hi a, kipawlna i tupna leh ngimna sep khiat zawhna dingin sum le pai kisapna a phawklo hilo hi. Kipawlna pen tupna leh ngimna bulphuh a nasem hi zaw a hih manin Boards (or) Committees meeting na ah sum le paai vai bek hilo in mipite nuntakna a lamsang ding leh sawtpi a khom ding khantohna cih bangin thulu tangzai pipite in munla zaw hi. Tua a hih manin makaih zia pen tangtai-suak (straight-forward) lo a, vialkawi (complex) zaw den hi. Vanzang mite (consumers) te kitangsap kibang kimlo a hih manin thu khensatna pen mi tampi kikup kul leh kidot (consult) kul a hih manin liangko kim vaihawmna (parallel leadership) bek in tupna leh ngimna (mission) lawhcinna piangsak thei hi. Tung-nuai (top-down) paizia zatna CEO tawh vaihawmna lemlo a, Director makaihna lemzaw hi.

Kipawlna pianzia telsiam lohna hangin a kituaklo pi kimakaih zia tawh tua kipawlna kibulh tuah kha thei hi. Makaihzia pen a kibulhna kipawlna i pianzia tawh a kituah kei leh kilem hetlo a, a kituah leh lah a hoihlo om lo hi. Makaih zia hoihlo kici pen a kibulh tuahna kipawlna (tem le paii) a kituak loh man na hi gige thei hi. 

January 15, 2024