Hillsong United (Church) nitum kuan
"What a beautiful name", "Shout to the Lord", cih late na zak ciang; Stage light color tuamtuam zangin hun thak (huihnunzia) music (contemporary music) kitum ziahziah na muh ciang, "Hillsong United" (Church) na mitkha ah hong luai kha ding hi.
1983 kum in Australia gam Sydney khuapi ah Brian Houston in pawlpi belh omlo saptuam (a non-denominational church) pawlpi neu khat tawh a pat khiat Hillsong Church pen kum 30-40 sungin leitung gam tuamtuam gam (30) kim ah biak inn kibehlap in khangto uhhi. (Global Campus nei uhhi). US gam sungah pawlpi masa pen 2010 kum in New York City (NYC) ah nei uh a, Carl Lentz in Pastor sem hi. (US gam sunga khuapi lian San Francisco, Atlanta, Kansas City cihte ah pawlpi hon beh uhhi.).
Hun thak biakpiak zia (contemporary worship style) in khangnote bek hilo, mipi tampi huup a hih manin gamkang bangin kipehzak baih hi. Denomination tuamtuam (Baptist, Pentecostal, RCM cihte) dong ah hun thak biakpiak zia kilawh hi. Hunthak biakpiak zia pen paizia ngeina (tradition) cih bang omlo in, mikim in a mau lungsim a om dandan in biakna pia thei a hih manin, suahtakna a lunggulh mihing te in, sannop leh pomnop sa baih mahmah uhhi. A kikhawm cil mite in zong, "hih mun ding mah hi- I found home" cih bangin a cil lam teng ci kha pah liang thei uhhi.
Pawlpi khantohna ding ci'n, pawlpi min pen "Branding name" kisam cih Brian Houston in a gel ciangin "Hills Christian Life Centre" pan in "Hillsong United" cih min tawh minsel (branding name) zang uhhi. Gamsung ah mipi theih (celebrity) mite zanga mi zol ding (celebrity appeal) hanciam uh a, biak inn sung mi tunpih sawm uhhi. Pastor a semte zong mipi theih kisam (celebrity) hih ding hanciam uh a, Justin Bieber cih tawh pawl tawh kilim thuah mahmah uhhi. NYC a Hillsong biak inn a Pastor a sem Carl Lentz in celebrity mite tawh kithuah, a mah zong thu gen siam leh mihup (charismatic) mahmah a hih main media leh mipi theih pastor (celebrity pastor) cih ding khop in min dawk hi.
A hizongin, hih a nuai a thute hangin a minthang pastor (celebrity pastor) a hi Carl Lentz leh Brian Houston te in Hillsong United (Church) makaih zo nawnlo uhhi.
1. Gamtat siatna leh lungsim siatna (infidelity and moral failures): Minthang khinta uh a hih manin a mau cih peuhpeuh pen style suak mawk hi. Mipi in zong a mau gamtat zia,luhek zia leh kampau zia peuh "hoih sa" mawk dinmun ah om uhhi. Gamtat luhek ah khial uh, nek leh dawn ah khial uh, lungsim ngaihsutna ah khial uh a, numei pasal vai ah zong gamta khial uhhi. A mau duhhop, huaihamna lungsim pen mipi in a thukim pih dingin gen zo uhhi.
2. Makaih zia lawhsapna (Leadership Failures): Local pawlpi (local church) pen a mau i sum zonna business neihsa bangin koih uh a, pawlpi metna ding (a mau mimal metna ding a gelsak leh a semzo ding mite bek (company a ding a sem zo mite bek nasep piak bangin) makai panmun len sak uhhi. Sumbawlna vaihawm zia (business world admintration) zang uh a, Company ki-uk zia (corporate leadership) tawh kalsuan in, Pastors te in a mau deih bangin (Company CEO bangin) panmun la uhhi. A seppih (or) a nuai a sem mite pen pau ngamlo dingin kamhum uhhi.
3. Sum le pai zekna manlo (Financial misconducts): Mipi (pawlpi) mite citpiakna (donation), sawm-ah-khat (tithe) tawh pawlpi sungah sum lutte pen Local Pastor in a mah pen Chief financial officer hi pah a hih manin a ma deihna bangin zek hi. A ma mimal vanzat ding (personal property), inn le lo, mawtaw leh silh le ten ding leina ding a hong kipia hi, ci'n zang ziauziau uhhi. Cimawh meigong tagah pawlpi mite in Pasian itna tawh a khua-ul lung in a tha lawh sa uh sumpi leh sawm-ah khat pen Local Pastor in noptak in, tui zat in zang hithiat hi. Sydney a Hillsong biak inn a pawlpi mi khat bangin "Ka pastor pa (Brian Houston) i khat vei khual zin a, a sum zat khempeuh ke'n kum (10) ka thalawh khiat zah sangin tam zaw lai hi" ci zen hi. Pasian gam a ding paulap in huhna ki ngen a, mipite in "a neih sunsun – bilbah,tau, nai ci leh a silhlai na ngawn uh" hong piak khiat te uh a zatna manlo suak hi. Mipite sum tungah met dawk (exploitation) hi ci uhhi.
Kum 2020 kum in New York City (NYC) a Hillsong Campus ah a minthang mahmah Pastor Carl Lentz pen Australian gam Sydney khuapi a bulpi pan in kihawl khia hi. Pastor sem dingin cingtaak nawnlo sa uhhi. Tua tawh kizom in, mipi te in zong Pastor Carl Lentz gamtatna manlo- gamtat siatna leh lungsim siatna- mu khia ta uha hih manin a kikhopna uh nusia sia uh a, pawlpi kiam mang hi.
Kum 2022 kum leuleu ciangin Hillsong United (church) a phut khiat pan Pastor Brian Houston pen "numei pasal vai, sum le pai vai, makaih zia manlouh vai" cih bangin a manlohna pawlpi mi in mu khia a hih manin Pastor sepna pan a tawp dingin deih uhhi. A mah zong kisuang a hih manin a panmun pen in tawpna (resignation) ngen in khawl hi. A ma i gamtat khialhna leh lungsim khialhna pen kumpi thukhun om bangin a ma'n mai phu toto hi.
Tua thuteng tawh kizom to in, a beisa a Hillsong Global Campus a om pawlpi- Phoenix, Las Vegas, Kansas City, Atlanta, San Francisco khua a om Hillsong pawlpite in zong bulpi pan pusuak san uhhi. A mau leh a mau, eg. Story Church cih bangin tuam din uhhi.
December 28, 2025
