Mihing Hamphatnate Khuavannuai Tangkona

Mihing Hamphatnate Khuavannuai Tangkona

(Universal Declaration of Human Rights )

A tei khia: Tual Khan Suan

Proof-reading: Rev. Khup Za Go

1948 December 10 ni in United Nations General Assembly in France gam Paris khuapi ah Mihing hamphatnate khuavannuai tangkona (UDHR) thuguipite pulakna leh kipsakna nei uhhi. Tua thuguipite tangkonna laimal a kicingin a nung ah kikoih hi.

Mihingte khang tangthu a kiciamteh ding hih thuguipite tangkona a kineih khit ciangin United Nations General Assembly (UNGA) in UN kipawlna kihel gam khempeuh tungah hih tangkona sunga kigelh laimalte a mau gamtek a mipite in a theih leh a telna ding, kideidanna om hetlo in a mau ukna nuai a om gammite in, siamsinna sang leh mun khempeuh ah a kihawm zakna ding, kihilhna ding, a kimuh theihna ding takna ding leh a khiatna te hilhcianna dingin ngetna nei hi

Thu Honna (Preamble)

Mihing a min piang khempeuh in a luahsuk pianpih vaang, a ki susia theilo hamphatnate a kikim in nei ciat hi, cih kisansak na pen leitung ah suahtakna, thuman thutanna leh kilemna, daihna i bulpi a hih man a hi zongin;

Mihing in a ngah ciat uh tua hamphatnate kithusim sak lohna leh kisimmawh sakna hangin mihing lungsim ngaihsutna kisia sakin siahuai tak a gamtatna dong tun thei a hihna hang a hizongin, Mihing kithupi sakna leitung ah, mihingte in ii upna leh ngaihsutna bang pulakkhiat theihna, lauhna patauhna pan suaktakna, cihmawhna pan suahtakna pen mikim in a lunggulh lianpen a hihna pulak khin ta a hih man a hizongin;

Mihing khat in haksatna tuak in, cimawh bei dongin, cih na’ng dang om nawnlo a hih manin ki-uk cipna leh kinencipna langpan a kinawk a kul ciang nangawn in mihing khat in a ngah hamphatnate pen thukhun ngeina bangin kepsak, hutsak ding kisapna hang a hizongin;

Gam khat leh gam khat sanggam bang a kizopna mainawtsak ding pen a bulpi pen a kisapna hang a hi zongin;

UN pawlmite khempeuh in mihing ngah hamphatna bulpite a kipan mihing khat in a neih vaang leh manphatna, numei leh pasal in a kikim hamphatna ngah hi cih Thubulpi sungah kipsak pha kik uh a, a tang zaizaw suahtakna sungah a buppi-a khantoh na ding, nuntak manphazaw tawh nuntak zawh na’ng hanciamna ding thuciamna nei khitna hang a hi zongin;

Kumpi gamte in zong UNO tawh mapang khawmin gam khempeuhah suahtakna thubulpite leh mihing hamphatnate zuih ding, zahtak ciat ding thute mainawtsak ding kam ciam khinzo uh a hih man a hizongin,

Hih kamciamna a tangtun kim zawh na dingin kuamah peuh in suahtakna thute leh hamphatnate pha tak a, a theih kim ciat ding uh a kisam thupi pen a suak hi.

Tua a hih man in, mikim in ahi zongin, minam sung a kipawlna khempeuh in a hizongin hih Tangkona pen lungsim sungah vom tawntungin, hih hamphatnate leh suahtakna thute in, a mainawt nadingin kihilh in ahi zongin, lai tawh kisinsak in ahi zongin, a mainawt zawh na’ng lampi sial in a hi zongin, gamkhat sungah hi taleh, leitung bupah hita leh a hanciam dingin, UN tawh kipawl gam mite sungah a hi zongin, amau ukna nuai a om gam mite sungah a hi zongin, leitungbup huam a man nei takin, a kizuih, a kisan na dingin kumpi gam khempeuh leh mihing khempeuh in malakna a neih ciat dingun tu in UNO Gambup Khawmpi in Hih Mihing Hamphatnate Khuavannuai Tangkona thu hong pulak hi.

Thugui 1. ( Article 1)

Mihing a min piang khempeuh a suah tung limlimin a suakta sa-a piang hi a, hamphatna leh vaang a kikim ciat ngah uhhi. Thu lungngaih theihna leh a sia a pha khen theihna thupha ngah uh a, sanggam khat hihna lungsim tawh khat leh khat a gamtat ciat ding uh ahi hi.

Thugui 2. (Article 2)

Mi khempeuh in minam hang, meel pianzia hang, numei-pasal hihna hang, kampau hang, biakna hang, gam sung ki-ukna hang leh sandan kibat lohna hang, gammi hihna leh suahna khanna kibat lohna hang, neih leh lam hang, pianna leitang leh za lian za neu hang khatpeuh paulap in kideidanna om peuhmah loin hih Tangkona sung a kigen hamphatna leh suahtakna khempeuh ngah kim hi. Tua bek hi loin, mikhat i a tenna gam in, a suakta gam hita leh, gam khat vaihawmna sungah a ki-uk lai hi ta leh, a mau leh amau a ki-uk tuam nailo gam hi ta leh, kumpi gam sungah ki-ukna ciangtan nei khat sungah a om hita leh, tua thute paulamin kideidanna om thei lo ding hi.

Thugui 3. (Article 3)

Mi kim in a ma nuntak theih na ding, a ma suahtak na ding leh a ma lungnopna ding hamphatna ngah hi.

Thugui 4. (Article 4)

Kua mahmah sila in kinei thei lo ding a, mi khat le khat sila bangin kibawl theilo ding hi. Sila neihna leh sila vai a sumbawlna peuhmah kikhaam hi.

Thugui 5. (Article 5)

Kuamah kigawt bawl, mulkimhuai taka kibawlsiat, mihing bang a ki-en lo, kineu seekna leh kigawtna phal hilo hi.

Thugui 6.( Article 6)

Mikim in Thukhun maiah mihing ngeina bang a mun khempeuh ah ki-et ding hamphatna ngah hi.

Thugui 7. (Article 7)

Mi khempeuh Thukhun mai ah a kiza kim ciat hi a, kideidanna omlo in thukhun i hutna leh kepna nuai ah kibang a, ki-et ding thu ngah ciat hi. Hih Tangkona palsat a kideidanna ahi zongin, kideidan nang a kihan thotna ahi zongin a om zenzen leh mikim in thukhun i hutna leh kepna a kibang ngah theih na’ng thu ngah ciat hi.

Thugui 8.( Article 8)

Thukhunpi ahih kei leh, thu bullet in a piak hamphatna bulpite palsatna khatpeuh a om tak ciangin a kituah pih thukhen zum pen in phatak a, zaangna dopna tawh a hut nang mi kim in hamphatna ngah hi.

Thugui 9. (Article 9)

Kuamah upmawh thu tawh kimatna, thong kikhiatna leh gamdangah kihawlkhiatna pen ngeina hilo hi.

Thugui 10. (Article 10)

Mi kim in a ma ngah hamphatna leh a ma mawhpuaknate khensatna ding leh, a mah a kihekna hangin thu khensatna neihna mun-ah, guptuam paihtuam a nei hetlo thukhen zum in mipi mai ah a kilawm a kituak in thu a sit hamtang ding pen kicingin hamphatna ngah kim ciat hi.

Thugui 11.(Article 11)

(1) Khialhna bawl hi ci-a mikhat a kingawh peuhmah leh tangpi theih in a thu kisit ding a, ngeina bangin amah leh amah a kihut khit ciangin, thukhun tawh kituakin khial mah hi, a kicih ma tengin tua mi pen a khiallo bangin ngaihsut ding a hihi.

(2) Mikhat pen khial hi a kicih laitak hun a leitungbup thukhun leh gambup khat thukhun sung a khialna a, kiciamteh lo thute ah, na sep ding seplohna a hih keileh sep khialhkhaknate pansan le paulap in a nung ciangin mawh hi cih theih na’ng thu om lo hi. Mawhna a bawl laitaka gawt na’ng ngeina zah sang a, a gikzaw gawtna zong piak theih hi lo hi.

Thugui 12.(Articles 12)

Mi khatpeuh i mimal thusim, innkuan sung thu, inn vai lo vai leh lai kikhak vaite ah thuman lopi in kikausi phum mawk ding ngeina hilo a, ki min siatsak mawkmawk theih zong hilo hi. Tua bang a, thuman lo pi tawh kikausi phumna leh ki min siatsakna hangin mi khempeuh in thukhun i hutna ngah thei hi.

Thugui 13. (Article 13)

(1) Mikim in a ma gam sungah suakta tak in munkhat pan mun khat-ah lal kawikawi thei a, mun khat peuhpeuhah ten theih na’ng hamphatna ngah hi.

(2) Mikim in a ut nak leh a ma tenna gam nangawn ki hel in, gam khat peuhpeuh ah zin khiat theihna, leh ciakkik theihna ding hamphatna ngah hi.

Thugui 14.(Article 14)

(1) Mikim in bawlsiatna tawh a kipelh theih nangin gam dang khat peuhpeuhah buk theihna ding leh a kisam huhna ngahna ding hamphatna ngah hi.

(2) Minam leh gamvai sepna hang tawh kisai lo-a khialhna, UN’ ngimna leh thubulpite tawh kituaklo-a sepna hang a khialhna a hih leh hih hamphatna pen paulap thei lo ding hi.

Thugui 15.( Article 15)

(1) Mikim in kumpi khat ukna gam sungah gammi suah theihna hamphatna ngah ciat hi.

(2) Gammi suahna pen diklo tak in kiphiat sak ziau thei lo ding a, gammi khat pan gam dang mi khat ah a laih nop leh laih theihna zong kuamah in nial thei lo hi.

Thugui 16.(Article 16)

(1) A khangcing khin numei leh pasal pen minam, gammi hihna, leh biaknate hangin zi leh pasal-a kineih ding kikhaam theilo a, innkuan khat suang a kipat theih na’ng hamphatna ngah uhhi.

(2) Kitenna pen nupa ding mite i mimal utna leh thukimna ngiat bek tawh kibawl ding hi.

(3) Innkuan i cih in minam khat hihna sungah leitung ngeina leh a kip tualsung kipawlna khenneu khat a hih manin, Kumpi leh tualsung kipawlna in a hut ding ahi hi.

Thugui 17. ( Article 17)

(1) Mi kim in neihsa khat peuhpeuh ama aipeng in nei tuam thei a, mi dang tawh kipawlin zong nei khawm thei hi.

(2) Kuama i neihsa lamsa, thu kician om lopi-in, diktat lo takin mawk suhsak theih hilo hi.

Thugui 18. (Article 18)

Mi kim in thu ngaihsut theihna, thu khentat theihna leh biakna tawh kisai suahtakna ngah hi. Hih suahtakna in biakna leh upna khek theihna zong huam a, biakna le upna tawh kisai thuhilhna, zuihna, paaina leh zehtanna zong tangpi tangta mai-ah sep theih bawl theihna ding thu a ngah ban-ah, a simtham in a mah guak in bawl theihna leh mi dangte tawh kipawlkhawm in a hi zongin sep theihna ding suahtakna zong huam hi.

Thugui 19. (Article 19)

Mi kim in a ma deih bang ngaihsut theihna leh ama hoihsak bang a pulak theih na ding suahtakna ngah hi. Hih suahtakna sungah kinawngkai sak selo a, mi dang’ thu san theihna ahi zongin, gamgi ciangtan omlo in thu kizakna khat peuhpeuh tungtawn in mi dangte ngaihsutna leh thu khat peuhpeuh zon theihna, ngah theihna ban-ah, amahmah in tua thute hawmkhiat theihna zong huam hi.

Thugui 20. (Article 20)

(1) Mi kim in suakta takin thu dam tawh khawmpi vaihawm theihna leh kipawlna bawl theihna hamphatna ngah ciat hi.

(2) Mi khat pen kipawlna khat peuhah kihel hamtang ding hi cih teitei theih hilo hi.

Thugui 21. (Article 21)

(1) Mi kim in ama gam kumpi i vaihawmna ah a ma mimal in ahi zongin, suakta tak a kiteel mite zangin ahi zongin kikum theihna hamphatna ngah hi.

(2) Mi kim in a mau gam sung kumpi nasepna-ah mi dangte mah bang in a sep theihna ding hamphatna ngah hi.

(3) Mipite’ deihna pen kumpi i thuneihna in bulphuh tawntung ding hi. Tua pen a man tak leh a hun lianlian a leitung bupah kiza kim a kizang kiteelna tungtawn in a sim tham a vote khiatna, leh tua mah tawh a kibang suakta tak a vote khiat ngeina khat zang a kiteelna tawh ki-en ding hi.

Thugui 22. (Article 22)

Leitung mihing khat hihna tawh mi kim in lungmuang tak a nuntak theih na’ng hamphatna ngah hi. Tua pen mihing khat a hihna tawh kisai suakta tak a, a khantoh na ding leh vaang a ngah nadingin a lo theilo a kisam nek leh dawn, sum leh pai, tualsung kipawlna leh ngeina tawh kisai hamphatnate pen ama kumpi-gam i neih leh lam pan ahi zong, kipawlna paizia tawh kituakin gam khat i hanciamna leh gam tuamtuam kipawl khawm a na sepna tawh ahi zongin a tangtun sakna ding hamphatna ngah hi.

Thugui 23. (Article 23)

(1) Mi kim in nasep na a neih na’ng, a mau sep nopna lam teel theih na’ng, nasepna tawh kisai mun hoih leh thudik a hih na’ng, nasepna pan kimawk tawpsak ziauziau theihna pan kihut theih na’ng hamphatna ngah hi.

(2) Mi kim in kideidanna omlo in na sep kibang sepna pan in a kikim khasum ngah na’ng hamphatna ngah hi.

(3) Nasep nei mi kim in amah leh a innkuan pihte tawh mihing ngeina bangin, a kilawm a kituak vaang a neih nading leh a kisapna zui-in tangpi kihutna a ngah behlap theih nading hamphatna ngah hi.

(4) Mikim in amau metna leh noptuamna a hutna dingin sumbawl kipawlna phuan theihna leh pawlmi suah theih nading hamphatna ngah hi.

Thugui 24. (Article 24)

Mi kim in nasep hunsung a kilawm ciang nai ciangtanna leh a hunhun a khasum tawh a khuan ngah a, tawlngak hun leh tawldam hun ngah na’ng hamphatna ngah hi.

Thugui 25. (Article 25)

(1) Mi kim in amah leh a innkuanpihte’ cidam nading leh nopsak nading a kisam khempeuh, annek tuidawn, puansilh nikten, tenna giahna, zatui zaha kikepna leh lungnop nading a kisam tuamtuam dongin ngah theih na’ng hamphatna ngah hi. Tua banah, nasep neih lohna, cidam lohna, sepzawh bawlzawhlohna, meigonna, tek leh guaina akipan ama thu a hilo haksatna khat peuhpeuh a tuah hun nangawn in kikep zawh nading hamphatna ngah hi.

(2) Nupi leh naupangte in a vou zaw in kikepna leh kihutna ding hamphatna ngah hi. Nupa ngeina sung pan a suak hita leh, nupa ngeina bang a kitenglo sung pan a suak hita leh, nausuak khempeuh in a kibang in kep leh khoi ding hamphatna ngah ciat uhhi.

Thugui 26. (Article 26)

(1) Mi kim in pilna zon theih na’ng hamphatna ngah hi. Kibul patna sang leh a bulpi siamsinna sang ciang peuhmah a sap omlo in kahsak ding ahi hi. Kibul patna sang ciang pen kuamah peuh pello in kah hamtang ding hi. Set lam siamsinna leh kivaakna ding siamsinna pen mi khempeuh in a ngah kim na’ng kivaihawm ding a, a sang zaw siamsinna zong amau theihna leh siamna tawh kituakin mi kim in a ngah theih nangin kivaihawm ding hi.

(2) Siamsinna in mihing khat a cingtaak a, a khantoh na’ng, suahtakna bulpi leh mihing hamphatna bulpite in a mainawt na’ng in ngimna nei ding hi. Tua banah, Leitung kumpi tuamtuam sungah biakna leh minam vai kikal ah khat leh khat lungsim kimuhna, lungduaina leh kilawmtatna in mai nawt a, kilemna a om zawh na dingin UNO i sepna leh bawlnate mainawt na’ng hanciam ding hi.

(3) Nu leh pate in tate tungah bang pilna nam guan ding hiam, cih thu tawh kisai in, khentat theih na’ng hamphatna ngah masa uhhi.

Thugui 27. (Article 27)

(1) Mi kim in a kim a pam a om tualsung, gamsung a om ngeina leh tatdan zuih theih na’ng, khutsiam pilna sungah gualnopna ding leh science pilna pan kingah mainawtna leh metnate kihawm in ngahna ding hamphatna ngah hi.

(2) Mi kim in lai tawh kisai, khutsiam pilna tawh kisai, science pilna tawh kisai in ama’ bawlkhiatna pan noptuamna leh minphatna a ngah dingte phatak a hutsak ding hamphatna ngah hi.

Thugui 28 (Article 28)

Mi kim in gam sung leh leitungbup ah hih Tangkona sung a kigen suahtakna leh hamphatna a kicing takin a ngah theih nading hamphatna ngah hi.

Thugui 29 (Article 29)

(1) Mi kim in mihing khat a hihna pen suakta tak leh cingtaak taka a khangcin zawh na’ngin ama omna gam sungah vaipuakna nei hi.

(2) Mi kim in a ma’ suahtakna leh hamphatnate zat na’ng, ngah na’ng tawh kisai-in, mi dangte i suahtakna leh hamphatna te zahtaksak ding a, democracy thuguipi zui a vaihawmna tawh kilawm kituak in a sia a pha khentel a gamtat ding, tangpi tangta in lungnop daihna a ngahna ding leh khuasung gamsung ah nopsakna a om na dingin thukhun phalna a om ciang bek in gamtat ding a hihi.

 (3) Hih suahtakna leh hamphatna thute pen UNO’ ngimna leh thubulpite  tawh ki-elpuak in bang thu bangla ah zat ding hilo hi.

Thugui 30 (Article 30)

Hih Tangkona sungah thu khat peuhpeuh pen hih sunga kigen suahtaknate leh hamphatnate suksiat nopna lungsim tawh Kumpi khat in ahi zongin, mi pawlkhat in ahi zongin, mi mal khat in ahi zongin na sem a, gamtat na’ng in bangmah deihkaih tawm ding hilo hi.

Revised on 03-25-2019.