Tual Khan Suan (Suanpi)
A zatna: : I it mahmah leh i muan mahmah mite’n i siatna ding hong bawl thei a hih man in kidop ding zia thu genna in kizang hi.
I nuntakna sungah i sung thu khempeuh a tel pen ei mah ki hi a, tua zom ah ei tawh kinai pen mite a hihi. Nisim a i om khoppih, i lup khoppih mite’n i lungsim puakzia, i hoihna leh i hoih lohna khempeuh midang te sangin hong tel zaw uh hi. I tha hatna a hi a, i tha nemna a hizongin ei hong tel mite in hong zo thei bek hi.Laisiangtho sungah a thahat Samson a kici tangval pa pen a gal Palestian mi thahat te sangin a mah tawh kinai pen, a thanemna leh a thahatna thei nungak khat in baihtak in zo hi.
Mihingte in khat veivei i hoihna kiphat sak pih in muan leh suan, tha hatna in i zang kha thei hi. Mel hoih te in a mel hoihna, sum leh pai hau te in a hauhna, leh thatang hatte in tha tang muangin gualzawhna i zong kha thei hi. A hih hangin tua bang i kiphat sak pih nate pen i tha nemna pen hi thei hi. “ Sik pen sik bek mah in zo hi” a kicih bangin mel hoihna pen mel hoihna mah in zo a, hauhsakna pen hauhsakna mah in zo hi. Hauhsakna kiphat sak pih mite hauhsakna mah vanzat in ki susia thei bek hi.
Gamsung ah sa nam kii (horn) nei sung pan sazuk pa i kii pen a kilawm pen leh a hoih pen a hihi. A pumpi a gol pen ganhing nam a hih loh hangin a kii hoih manin min ngah hi. A mah ( sa zuk pa) in zong hoih sa in gamsung ah tui a nek ciangin a mah leh a mah ki en in kiphat sakna in nei hi kici hi. Ahizong in tui a nek lai takin a kiang pan a mah a that ding humpi/ sahang hong pai a, gam sungah a tai ciangin a kii hangin khau gui ah awk hi. Humpi/sahang in hamsatna om lo in man in ne zo hi kici hi. A kiphat sak pih, a hoihna in a mah sihna suak hi. Tua bangin Absalom a kici tangval pa zong a gal te’n a delh lai tak in a ma kiphatsak pih a sam (hair) hangin sing hiang dawn ah kikhai a, a gal te’n nuamtak in that zo hi. I kiphat sak pih hoihna, hauhna leh pilna te in i nuntakna ah sihna hong pia thei hi.
Nidang lai hun in i pu leh pa te in a sam uh metlo in a sau teh a dek lam ah tum uhhi. Lusei ( tu hun a Mizo) te in a sam uh a lu zang ah tum uh a, Zomi te in a dek lam ah cih bangin sam tum zia na nei uh hi. Tu hun a film stars te bangin sam bawl zia tuamtuam cih bang omlo a, pianpih sam ( lamm sam ci phial ni) pen a kihawi suak a hihi. Sam hoih nei, sam sau nei te in kiphat sak pih uh hi. Hausa Phungkhothang ( a min a man kei leh a thei te’n a man hong gen un) pen Meitei Leeng ( Hausa) pa’n man in thong ( jail) ah koih in a thah ding ciangin a sam tum at tan in a zi kiang ah khak hi. Tua bangin pasal sam hoih te’n a sam sauna, hoihna te na kiphat sak pih mahmah uh hi. Tua hun lai in Zomi te pen sa leh gal beng/vai in kuan thei zel uh a, a gal lelh uh teh, gal te’n a sam uh tawh khai in that uh hi.
Mihing te nuntakna sungah i kiphatsak pih i hoihna leh i nuntak zia hong tel pen te pen ei a ding a lau huai dinmun hong puak te hi thei hi. I gal te sangin i kinai pih i lawm te pen a lau huai pen hi thei zaw hi. I tha hatna leh thanemna pen a gamla a om i galte in hong tel sangin i kiang a om i lawmte in hong tel zaw pekpek hi. Tua ahih manin hih thu a tel mahmah i pu leh pa te in a gamla a om i galte sangin i muan leh suan pen i lawm te in ei hong siasak thei zaw a hih man in i gamtatna ah kidop ding zia thu a gen uh ciangin “ dek lam tuk tum zong gal suak thei” hi ci’n thu na kihilh uh hi.
June 29, 2007 (Friday)
A zatna: : I it mahmah leh i muan mahmah mite’n i siatna ding hong bawl thei a hih man in kidop ding zia thu genna in kizang hi.
I nuntakna sungah i sung thu khempeuh a tel pen ei mah ki hi a, tua zom ah ei tawh kinai pen mite a hihi. Nisim a i om khoppih, i lup khoppih mite’n i lungsim puakzia, i hoihna leh i hoih lohna khempeuh midang te sangin hong tel zaw uh hi. I tha hatna a hi a, i tha nemna a hizongin ei hong tel mite in hong zo thei bek hi.Laisiangtho sungah a thahat Samson a kici tangval pa pen a gal Palestian mi thahat te sangin a mah tawh kinai pen, a thanemna leh a thahatna thei nungak khat in baihtak in zo hi.
Mihingte in khat veivei i hoihna kiphat sak pih in muan leh suan, tha hatna in i zang kha thei hi. Mel hoih te in a mel hoihna, sum leh pai hau te in a hauhna, leh thatang hatte in tha tang muangin gualzawhna i zong kha thei hi. A hih hangin tua bang i kiphat sak pih nate pen i tha nemna pen hi thei hi. “ Sik pen sik bek mah in zo hi” a kicih bangin mel hoihna pen mel hoihna mah in zo a, hauhsakna pen hauhsakna mah in zo hi. Hauhsakna kiphat sak pih mite hauhsakna mah vanzat in ki susia thei bek hi.
Gamsung ah sa nam kii (horn) nei sung pan sazuk pa i kii pen a kilawm pen leh a hoih pen a hihi. A pumpi a gol pen ganhing nam a hih loh hangin a kii hoih manin min ngah hi. A mah ( sa zuk pa) in zong hoih sa in gamsung ah tui a nek ciangin a mah leh a mah ki en in kiphat sakna in nei hi kici hi. Ahizong in tui a nek lai takin a kiang pan a mah a that ding humpi/ sahang hong pai a, gam sungah a tai ciangin a kii hangin khau gui ah awk hi. Humpi/sahang in hamsatna om lo in man in ne zo hi kici hi. A kiphat sak pih, a hoihna in a mah sihna suak hi. Tua bangin Absalom a kici tangval pa zong a gal te’n a delh lai tak in a ma kiphatsak pih a sam (hair) hangin sing hiang dawn ah kikhai a, a gal te’n nuamtak in that zo hi. I kiphat sak pih hoihna, hauhna leh pilna te in i nuntakna ah sihna hong pia thei hi.
Nidang lai hun in i pu leh pa te in a sam uh metlo in a sau teh a dek lam ah tum uhhi. Lusei ( tu hun a Mizo) te in a sam uh a lu zang ah tum uh a, Zomi te in a dek lam ah cih bangin sam tum zia na nei uh hi. Tu hun a film stars te bangin sam bawl zia tuamtuam cih bang omlo a, pianpih sam ( lamm sam ci phial ni) pen a kihawi suak a hihi. Sam hoih nei, sam sau nei te in kiphat sak pih uh hi. Hausa Phungkhothang ( a min a man kei leh a thei te’n a man hong gen un) pen Meitei Leeng ( Hausa) pa’n man in thong ( jail) ah koih in a thah ding ciangin a sam tum at tan in a zi kiang ah khak hi. Tua bangin pasal sam hoih te’n a sam sauna, hoihna te na kiphat sak pih mahmah uh hi. Tua hun lai in Zomi te pen sa leh gal beng/vai in kuan thei zel uh a, a gal lelh uh teh, gal te’n a sam uh tawh khai in that uh hi.
Mihing te nuntakna sungah i kiphatsak pih i hoihna leh i nuntak zia hong tel pen te pen ei a ding a lau huai dinmun hong puak te hi thei hi. I gal te sangin i kinai pih i lawm te pen a lau huai pen hi thei zaw hi. I tha hatna leh thanemna pen a gamla a om i galte in hong tel sangin i kiang a om i lawmte in hong tel zaw pekpek hi. Tua ahih manin hih thu a tel mahmah i pu leh pa te in a gamla a om i galte sangin i muan leh suan pen i lawm te in ei hong siasak thei zaw a hih man in i gamtatna ah kidop ding zia thu a gen uh ciangin “ dek lam tuk tum zong gal suak thei” hi ci’n thu na kihilh uh hi.
June 29, 2007 (Friday)
