Laizom u leh naute, Oklahoma State a kibawl 2007 Zomi Nam Ni dawnna pawipi ah Zinmangpi Dr. Chin Khua Khai' thugente anuai ah hong suaksak ungh. Thusapi Zomi Innkuan Oklahoma = = = = = = = = = = = = = = = = = 2007 Zomi Nam Ni Zomi Innkuan Oklahoma Tulsa, OK, U.S.A. Ngeina le Biakna Dr. Chin Khua Khai Tuni in U.S.America gam Oklahoma State, Tulsa khuapi aa om Zomi-te in a (59) cin'na ih Zomi Nam Ni pawipi ih bawl theih manin kipaak hang. Hih pawipi ah thugen ding khat aa nongteel nong sap manun kipak mahmah ingh. Kei saang aa thuthei zaw le a kilawm zaw mi tampi a om kawmkal ah, kei penpen nong seh uh le nong sap manun tua nong sapna uh pahtawina in ka ten'na Los Angeles pan hanciam takin hong pai hi ingh.
Tu nitak aa gen ding aa hong kipia thulu pen "Ngeina le Biakna" cih thulu hi. Hih ih thulu pen teelsiam hong sa ingh. Kikup taak mahmah thu hi. Adiak in muntuam gamtuam atung Zomi-te in minam thupi mahmah khat ih hihna leh ih Zo ngeina hoihte bangci kepcing ding cih leh minam dangte kiang ah bangci in hawmsawn thei ding cihte gengen aa ih kikupkup ding thupi hi. Ih pu ih pate Tibet gam nisuahna lam, Sengam nitumna lam pan na lal in Kawlgam lam nazuan uh aa Zogun dung ah nateeng uh hi. Tua pan nitumna lam nazuan in Kawlzaang dung ah nateeng hi. Tua pan mualtung lam nazuan in tu laitak aa Zogam ih cihna ah nateeng uh aa tuni dong kiteenglai hi. Ih Zogam pan khualzin gamvak, pilna sin le sum zong hong tam semsem ciang Kawlzaang le khuapite kizuankik hi. Tuma kum 50 kiim pawl in Zomi Yangon ah a teeng inn 10 khongbek phak tuak hi. Mandalay bang ah omlophial hihtuak hi. Tu'n ahih le Yangon, Mandalay le Mogok aa kipan khuapi tuamtuam ah Zomi a innkuan kuan aa teeng simzawh nonlohphial hita hi. Tua ciangbek hilo in ih gamveeng le leitung mun tuamtuam ah kipaikhia in kiteengta hi. Eiteng bang cileeng leitung bup aa mikhem peuh ii a ut mahmahna gam a hi USA ah kiteeng himawk hi. Zomi-American- te kihi maita hi. Hi cibang aa munkhat pan munkhat ah peem aa ih omna sung ah ih buaipih khat pen ih Ngeina hi. Mundang gamdang ih tunteh ei Ngeina ahilo Ngeina dangkhat sung ah ih luttakteh, kibawlphat (adjust) akul tampi hong om ahih manin kibuai mahmah gige hi. 1. Ngeihna le Biakna ih cih bang hiam Mi tampi in ih pu le pate pan aa ih luahsuk khuang le sialki tum aa ih laam, ih zunek, gal-aih sa-aih, ton le zu-nun le beh phung u le nau kizop dan pawlkhatteng Ngeina sa uhhi. Atatak in Ngeina (Culture) pen a zaipi hi. Mipilte'n mikhat a suak khiatlian aa kipan a kiim a paam (environment) tawh kizopna ding aa a kilak aa akikham lei (bridge) hi ci uh hi. Tua hi aa, Ngeina (culture) pen a khiatna (definition) a tuamtuam pia uh aa, a gen nop uh kibang kimlel hi. Atom in ci leeng "ih neihkhop nuntak kalsuan zia (shared total way of life)" hi ci uh hi. Minam khat, mi honkhat, pawlkhat, innkuan khat in a kibang a aneih khop le ih letkip ih zia ih tong khempeuh Ngeina ci uh hi. Tua ahih manin Ngeina ih cih ciang, ih pau ih ham aa kipan, ih biaknate dong in kihel hi. Biakna ih cih pen muhtheih muhtheihloh ei saang aa avaanglian zaw aa ih up khat beel in, bia in thoih in, upzia le kalsuan zia (system of belief) khung aa ih zuih pen biakna ci uh hi. Biakna (religion) pen Ngeina (culture) ii khenkhat in kingaihsun hi. Ngeina pen ih pianpih ih nu gil sung pan ih suak khoppih hilo aa, ih sintawm hi. Biak na zong ih nu gil sung pan ih suahpih hilo aa, ih teel tawm hi. Ngeina pen a hun a mun le khantohna zui in kikhel hi. Biakna pen kikhel themthum cih om khollo hi. Ngeina pen ih kiim ih paam tawh kizopna hi aa biakna pen mihonkhat ahihkei le mimal le a biakpa tawh kizopna hi. Biakna in Ngeina kikhel sak thei aa, a thahat mahmah na khat hi. 2. Zomi te pen Ngeina hoih mahmah le manpha mahmah a nei minam te hi hang Zomite pen Ngeina hoih mahmah anei mite hihang. Tua bang ka cih ciang ih Ngeina khempeuh avek in hoih hi ka cihna hilo hi. Ahoihlo zong pawl khat om hi. Ngeina kician le Ngeina hoih anei mite hihang. Tuateng avek in genkhin manlo ding ih hihteh ih tel theihpak dingin khat le nih hong gen nuam ingh. Ih beh ih phung sung kizopna, sung le pu, tanu tapa kizopna pen ahoih mahmah Ngeina khat hi. Ih nop ih dah ciang ih beh ih phung ih u ih nau tawh ki-uap kihuai in nuamkhawm dahkhawm hihang. Thu le la khat a om ciang ih beh ih phung ih u ih nauteng in hong kuppih hong van pih pahlian hi. Hih in ki-itna khangsak, hong kinaisak semsem hi. Ni tumna lam gamte ah mimal kithupisak (individual oriented) in kalsuan uh aa ei ii ki-uap kihuai dan neilo uhhi. Hih ih beh le phung u le nau sung kizop dan pen ih mansuahkhak ding dah huai hi. A dang khat gen lai leeng, Zomin le min phuak dan pen Leitungbup aa anei a omlophial hi. Eibek ii neih, a hoih khia mahmah khat hi. Naupang khat hong suahphet in a min ngah ding khat kivawh hi. Ih pu ih pi, ih u le nau sung ah ih it ih ngaih khat min pia hihang. Min mal khat sim in khiatna nei in kiphuak hi. A min masa in a min ngah pa tawh kizopna hong lak hi. A min lai le a tawpna in a min tam pa hiam, a ma nu le pa hiam khat ii a nuntak sung, a khan sung thu gen hi. Ih nop ih dah, ih gualzawh ih thungahte min in kiphuak hi. Tua min ih etphet in min ngah pa a hihkei le min neite taangthu, a khan thu ding ki mu thei pahlian hi. Tua ahih manin min khong phengphuak aa, ei min ngeina ahi lopi tawh laih ziauziau cih pen ngeina hoih hilo hi. Hi ci bang dan ih Ngeina a hoih tam pi om hi. 3. A hun le a mun zui in Ngeina kikhel (Cultural change, transformation) hi Ih pu ih pate'n Dawi nathoih in, pusha pasha nabia uhhi. Dawithoih biakna cih sak hihang. Pu le pate hun in biakna le ngeina pen kikhenlua khollo, kihualkhawm dimdiam hi. Hun khat ciang Saangmangte hong tung in Christian upna hong puak uh hi. Laisim saang hong honsak hi. Zato lam tawh kisai hong pattah uh hi. Ha na khat pen dawithoih tawh kibawl nonlo in, habot in zatang anek takteh a ngaihsutna hong kilamdang in a Ngeina hon khat hong kikhel pahlian hi. A muhzia, a khua ngaihsutzia tampi hong kilamdangpah uhhi. Japan gal hong tun khitteh, ih khuakhak zia le khuamuh zia (worldview) hon khat hong kikhel leuleu in, sum zon paai zon kihan ciam in, mi namdangte lak ah kihel in ih omteh ih Ngeina hon khat hong kikhel leuleu hi. Ih puansilh dan, ih pau ih hamdan hong kikhel hi. An um le keuphel tawh ih annek pen, kuang le hai, sikkeu cih te kizang hi. Dialkaih pan in bombitom, bombi tual cihte kizang hi. Hun khatteh Kawlte'n hong thuzawh pian hiam kawlpuan le kawlpau khong kinakzat mahmah hi. Ih Zomin hoih mahmah khong Kawlmin ngaih hiulo tawh a khel zanzan bang ki-om hi. Pawl khatte bangin Zomi pen minam thupi mahmah ahih lam theilo uh in, Zomi a kicih ding bang a zum mahmah om uhhi. Zomi-te Yangon ih tunteh Khamtung aa ih zat Ngeina pawlkhat kinusia aa, pawlkhat zat theihlo in hong om hi. Yangon aa teeng ei mite sihvuina khat a video enkha ingh. Innteek thugen na ah, "Ih Ngeina ah hi ci bang ding hi. Ahi zong a mun tawh kizui in ih Ngeina bang zui aa sep ding piang theilo ahih manin, a thu in ciapteh ding hibek ding aa, a mun le hun zui aa gamtat ding hiding hi" ci in gen hi. Hi bang a mun a hun le khantohna tungtawn aa kikhelna pen "cultural changes" kici hi. 1970 kiim pawl in kha khanlawhnapi khat hong tung in, tua in ih lungsim puak zia le ih khua ngaihsutzia, ih khuakhakzia honpi khat hong khel leuleu hi. Pasian thupha san lam ah ih ngaihsut zia khat hong kikhel in, gualzo ding, hauding pilding cih lam ah kikalsuan hi. Ni dang aa gal-aih sa-aihteng minphuak aa ih neih pen tu'n Pasian min phatna lungdamna min kiphuak hi. Nidang in galmat samat ki-ai aa, tu hunteh tan 10 onna, degree ngahna, thupha sannate lungdam kohpawi kibawl hi. Zu tang'in niangtui kizang hi. Hite khempeuh pen Ngeina kikhel nahi hi. Eiteng bang ci leeng, ih pianna gam tawh a kigamlakhia mahmah Leitung mong khat ahi America gam kitung hi. A om sunsun teng ih kikhaihkhop pen za-kiim kipha hi. Hi bang aa minam dang sung ih tunteh, ih kim ih paam in hong deep in, ih pau ih ham, ih nikten puansilh, ih nek ihdawn hong kilamdang hi. Ni dang aa keuphal le an um tawh vaimim le gataam an kine pen, tu'n sikkeuka tawh pongmoh le thawbat kiphial keeita hi. Ni dang aa dialkaih kiteeng pen, tun bel suit tawh necktie tawh ki-om zizekbek hi. A mun a hun le khantohna zui in Ngeina kikhelkhel hi. Tua bang aa a mun a hun le khantohna tawh kizui aa ih Ngeina a kikhel teh ih Zomi hihna a kikhel hia leh? Zomi mah kihi veve hi. Lawmte khat in ko minamdang zi neite a mangthang hita ungh hong ci hi. Ka dawnkikna ah, Zomi hi ingh na cih laiteng Ngeina bang zah in kikhel in minam dang zi nei mah taleeng mangthang cih omlo hi. Zomi kihi veve hi. Zomi ih hihna ding in dialkaih teeng ding kullo hi. Coat le necktice tawh Zomi kihi theilua hi. Ih Zo Ngeina hong kikhel ding aa, mangkang ngeina bang in nungta phial taleeng, Zomi in ih ut nakle Zomi kihiden ding hi. Ameica gam Tulsa khuapi aa om Zomi-te in Zo Ngeina tawh Zomi Nam Ni bawl uh hi. Tua in bang hong phawk sak hiam cih leh American Culture sung ah Zomi subculture tawh kinungta in kigamtaang cihna hi. Tu lai tak aa hi lai mun aa ih zat Zo subculture pen ei a tungthak khangkhatna (first generation) le a zomkhang te (second generation) ciang khong hong kizang ding aa, khangthum na pawl ciangbel a tuam khat hong hita ding hi. Tua hun ciang Zomi ih hihna bangci kep cing ding ihhi hiam? 4. Ih Ngeina Hoih te Bang ci Kepding Ngeina hoihlote laih in a hoihzaw Ngeina ih pom theih ding kisam hi. Ih tua cih man in Zomi ih hihna bei tuanlo ding aa, Zomi-te khantohna hong piang zaw ding hi. Vangik a suaklel, khantohna a om khollo, lah ih paihpak theihloh hon khat pen beisak ding kisam hi. Ngeina hoihte ih kepcing ding, ih ta ih tute ih hilh ding kisam hi. America ih tun le Khamtung aa ih beh ih phung ih tanaute tawh ki-om nonlo a hih ciang, hi lai ah beh le phung, tanu, sung le pu in ei mau le eimau kimattawm ding kisam hi. Zomi society ih phuat ding ki sam hi. Ih tanu le ih tapate gawmding kisam ding hi. Kuakua cilo in, ih beh ih phung, ih pu ih pi ding, ih tanu aa diang dingin kiguattawm ding kisam hi. Khamtung aa ko tuabeh no tuabeh ih cihte bei sak in, beh khat phung khat in ih om ding hong kisam ding hi. Tua cih leeng ih Ngeina hoih khat keemcing thei ding hihang. Ih kampau pen thupi mahmah ahih mahbang, ih naupangte Zopau tawh paupih aa hilh tangtang ding kisam ding sa ing. Tua ka cih hang ko inn sung bang haksa ka sak mahmah uh khat hi. Ka omna uh Riverside ah Mungnote in a tate Tedim Labu sung sakpihden hi. Ih Zopau a kepcingna, tate tung ah a hawmsawn hiden in thupi sa ingh. Nau min ih phuak ciang Zomi mah zang ngiat aa ih phuak ding hong hanthawn ing. Min hoih min manpha mahmah pen theihngeilo min khong tawh laih huai sake'ng. Zomi dang khat in ih min a muhphet in ka Zomi pih hiveh a nacih theih ding kisam hi. Dr. Do Kham bang, Google web ah pai in a min khenleeng, a hihkei le Kawlgam sung Pasian nasepna tawh kisai thu khat khensukleeng, a lai-atteng hong kigual sukpah daudau hi. Amah athei ngeilo mi khat in zong tua min a muhphet in ka mipih hiveh ci in na-angtang mahmahpah ding hi. Albert khong cipong lecin kua gam pan aa Albert hiam hong kicilel ding hi. Zomin pen Zomi khempeuh in thei pahlian hihang. Ih tate khang le khang sawnsawn ah Zomi ka hihi acih theihna dingun Zomi-te hoihna, a thupina, ih Ngeina hoihte gen pihpih ding kisam hi. Zomi ahih lam uh atheihden ding le, Zomi hihna a kipah pih ding uh kisam hi. Ko Zomi-te mi thupi hi ungh ci aa aphawkden ding uh kisam hi. Nu le pate'n ih tate ih ki-itsak mahmah ding thupi hi. Pasian itna le kihtak zahtakna ih neihsak ding thu pi hi. Pasian it in, nang hong it le, leitung bangbang in a kikhel zong in, ki-itna in hong pumkhat sakden ding hi. Moses pen Pharo kumpi inn sung ah khangkhia aa Egypt pilnateng asin zenzen hang, a nu khut sung ah khang hi. A nu in nang Jew minam nahi ci in hilhden hi. Anungta Pasian thu muamden hi. Moses agol ciang a lungtang sung ah Jews mi ahihna neuseklo in, a nungta Pasian bia ahihna maizum hetlo bek thamlo in, tua upna nuntakpih hi. Tuni in ih tate Zomi thupite ih hihna muam in, anung ta Pasian abia mite ih hihna a sung ah teengsak in, nu le pate ki-itsak leeng, Zomi mangthang ngeilo bek thamlo in, ih tuntunna, ih paipaina, ih sep ih bawl ah dau pai in, gualheu in, mite en' mahmahte suak ding hihang. Theocracy ci aa biakna in aa makaih gamte ah Ngeina le Biakna khenhak hi. Gentehna in Israel mite Ngeina ih cih pen a biakna aa thukhunteng hi pahlel hi. Gamdang tampi ah ahih le biakna vai le ngeina vaite thu tuamtuak in kikoih hi. Tuni in ei hi lai a om Zomi-te'n ih Zo Ngeina bang in Zomi Nam Ni bawl in, thungetna tawh ih pat pen thupi sa mahmah ingh. Biakna maan in hong khangto sak, lam maan ah hong makaih hi. Biakna manlo ih pomkhak le siatna hong tunpih ding hi. 6. A Tawpna ah Paunak 3:6 na ah "na sep na bawlna khempeuh ah Pasian phawk masa in" ci hi. ZomiNam Ni ih bawl aa, Zomi-te suahtakna ding ih gen aa, bang khat pepeuh ih seem zongin, Pasian phawk masa leeng, Pasian in hong kalsuanpih le ih omomna ah a gualzo mahmah minamte, thupha ngah mite hiding hihang. Anungta Pasian in Tulsa aa om Zomi-te le Leitung mun tuamtuam a om Zomi khempeuh tung ah tu le atawntung in thupha hong pia hen. | 
