March2,2007 Lawki ih pu ih pate in Muhtheihlo kha khempeuh bia uh hi. Laisiangtho sungah Satan kici Dawimangpa pen Khanglui mite'n Lungzai ci uh hi.Miliam leh saliam a kido laitakin, "saliam gumzaw ding maw miliam " ci'n Pathian leh Lungzai kiho hi. "Saliam in mualah atuahleh mualah ne loplop, guamah atuahleh guamah ne loplop, miliam in mualah atuah leh Pathian tai hen, Lungzai tai hen ci, miliam mah gum ni," ci uh hi. Dawibiate ci'n kiminvawh ahih hangin, Pasian zong nakhahsuah tuanlo hi.
Innsungpi.. Innsungpi pen atuamtuam in kilo hi. Tong cihleh innsungpi thoih a kibangin ngaihsun uh hi. Pusa thoih, innsungpi thoih, kici a, nupite in tua kammal tangin tong ding cithei uh hi. Dawipi-thoih zong ci uh hi.Ei huang sunga kikhawi vokpi bek kizang thei hi. Kongsang..Tuhun aa gilsan leh cisanatte thoihna ahi hi. Uital bek kizang thei hi. Gam leh alawm.. Gamnat kici nattun leh cisanat lungmawk cih khawng ahi hi. Vok, aak khatpeuh tawh kithoih hi. Huandawi, sumtawng-dawi, lo-dawi, gun-dawi minvawh in kithoih mun pen uh hi.Gampi-buuk lamin tua lai-ah biakna vabawl hi. Vanzatte pen, ai-laivom, aisan, ai-bungbu, khimpi, sutzo cihkhawng ahi hi. Tuhun Kawl-zatuisiate vanzat teng nahi mawk hi. Zomi khangluite in tua zatui ahihlam bang hunin namu khia uh hiam? Dawi hilh hiding hiam? Dawi biak a kipat aa kizangpah ahihleh bel advance mahmah ding hi. Ui-si pen gilsan leh cisa kithuah aadingin hoih kici hi. Kongsang athoihteh uisi leh aitui dawnsak hi. Aaksi voksi kidawnsak ngeilo hi. Tuhun MBBS ong ten zatui phuaktawm theilo uh hi. Tanglai siampite pen Medical doctor te sangin sangzaw kasa hi. Gilgumna amut ciangin, singphih hi. Phuisam kawmleh adamna van zangkawmkawmin kibawl uh hi. Upna leh lungkimna in sisan malhsak aa, natna tampi damsak hi. Lungmuanna guanin damna zatui pialai ahihmanin tua sang-a hoihzaw cina bawlna omlo hi. Tuhun siavuan siama pawlkhat in cinate tawngziahziah thei uh hi. Tua pen natna behlapna gutui hoihmahmah ahi hi. Dammawhte thapiakna, maitaina in zatui hoihte tawh ahaatna kikim hi. Sisan haatsak, lungsim tha malhsak ahihman, natna lungnote in silel mahmah hi. Tua laitakin lungno thahna abuak sawnsawn ciangin natna damzo ahi hi. Dawi biakna nasepdan khempeuh akik aadingin koih ni. Thang Siangh Zogampalpi | 
