PUPATE BIAK DAWI TUAMTUAM
By Thang Siangh
Lawki ih Pu ih Pate in Muhtheihlohkha khempeuh bia uh hi. Bia cih kammal pen Zokam thukzaw-in Khai ci uh hi. Khai cih ciangin Lungkimsak cihna hi. Kaneulai-in kapatawh sabengin innbukmuallam kapai uh hi. Innbukmual pen Hausapi bekin longam aa zahtak mahmah hi. Angaak om cih um uh hi. Amaul kalutphet un aakluisan khat leh zuha lui-in Khai masa hi. Omkhopna munte-ah naupangte gilkialin aukheukho thei uh hi. Naupangte nakhai masa un peuh cithei uh hi. Zahtakna sangin nawngkaisa aa lungkimsak hihtuak zaw hi.
Laisiangtho sungah Satan kici Dawimangpa pen ih Pu ih Pate'n Lungzai ci uh hi. Miliam leh Saliam a kido laitakin , Saliam gumzaw ding maw Miliam ci'n Pasian leh Lungzai kiho sak hi. Saliam in Mualah atuahleh mualah ne loplop, guamah atuahleh guamah ne loplop, Miliam mah gum ni, cisak hi. Dawi biate cin a kiminvawh hangin Pasian zong nakhahsuah tuanlo hi. Pasian biakna pen itna, zahtakna tawh kibia hi. Dawi pen kihtakna tawh na khatpeuh tawh Khai uh hi. Khai cih kammal zong thoih tawh kibang dektak hi. Dawithoih zong kici hi. Kumpi ulian khat kiangah deihkhat ih nget ciangin, thoih masa leeng hoih kici hi. Tua pen letsong khatpeuh tawh lungdamsak cihna hi. Innsungpi thoih Innsungpi pen mintuamtuam kivawh hi. Pusa thoih, Innsungpi thoih,Tong cih bangin kilo thei hi. Dawipi-thoih zong kici thei hi. Eihuang sungaa kikhawi vokpi bek kizang hi. Siapising kisui, alu cialthum kigeek khuamkhat inntualmong sialkongsak sanah kiphut hi. Tua pen Nuhdosong kici hi. Tanu-nihna ahi Sawlla in vokzawnna ding leh agolhna ding sialsawlmaam nih la hi.Luisung gelhauteh leh sawlsansing hiangbawk la hi. Gawdawnkui nih la-in Nuhdosongtawh phutkhawm aa, sawlbawk leh dawisa tultawh khilin Nuhdosong dawnah hen uh hi. Dawithoihsa pen Sanggambul leh teek tengmah ngeina bangin pia uh hi. Innteek naupangte pen taangngansih leh satui Baallei geiah kuang um sak hi. Sangawng-ne ci-in tanupi nihte leh thaloh, Zinkhak, Sungpi abulteng khatta kai-in sahul kuang umsak hi. Azingciangin Salu-suang kici hi. Nopnatawh kisaite ah khekleh kici hi. Salu pen innsungpi suutpi tungah kisuang hi. Dawithoihna sa kigo pen Siampipa bekin go thei hi. Tanupi Haitawi in anungzui aa, tuiphihna hai tawisak hi. Siampizu a kisapleh aman zu taaksak hi. Tua ahih ciangin Tuitaak zong kici hi. Siampipa pen dawithoih thei mawkte kicial lo hi. Pusathoihna aa kizang Siampipa pen Tuulpi kici aa, behkhatah khatciat kinei hi. Kongsang lingguikaih, Konglai, Ih Pu Ih Pate in bum leh aitawi cih nak up mahmah hi. Cina khat ahihleh, bum maw, gamdawi peh maw, inndawi maw ci-in namthum tawh hamtang hi.Tawh cih kammal pen tuhunin khiat kicikha ding hi.Dawi namtampi athoih hangin hoihtak sittel leeng dawila namkhat khawng mah alumletlet peuh himai uh hi. Bumlehna leh a pette khutsung panaa ngetkikna kammal vive ahi hi. Dawite leh cinate khemna ngentang hilel hi. Kongsang leh konglai pen gilsan cisa, Pumpina gim mahmahte hidiak hi. Uital khattawh thoih hi. Cinapa adinzawh leh a kawngah linggui khihin lupnapi panin kaikhia hi. " Bangsak aa ommi kihem un, bangkhang aa ommi kihem un, kongsak aa ommi kihem un kong khang aa mi kihem un, kuamah zakta hi keng kuamah kihta mi hi keng, Ni awi aa vak hing, kha awi aa vak hing, Keimah Gal Ngam tapi hi'ng" ci'n innka hong tun hi. Uital pen akamah vaimimkung petsakin hen hi. Aneel vaimimkung mahtawh hu hi. A eek tul zenzenleh buai ding ahihmanin. Lingguikhau mahvawhin kuah hi. Phuisam kawmkawmin cinapa kiimkotin laam hi. " Vanlaipan khuang a tum ee.. eee ee, Kanungah khim khua kazingsak, kamai ah taikhua kaval sak.. Tuipi luanglai katan aa.. a laiah ee.. temzungsan katawi..takah luang in kacihleh a luang aa... veiah luang in kacihleh a luang...Vanlai tapa pa ngam aa kamkei katung nung ee.. Kasep seemlah keng kabawl bawllah keng, ..ni awi aa vak hing , kha awi aa vak hing,.. kakhua awi aa vak hing ..katui awi aa vak hing,.. kapu awi aa vak hing, katu awi aa vak hing..Kapu-kapaa aa kipan dawisagui hing, siampigui hing" cihleh kitomsa -in a uikuahlai innka hong denna hi. Dawi bang kimuthei hileh kithaangthehzai keeileh kilawmphialmawk hi. Naangpeek hiamin temta-in bawl aa, adap dingin naangpeekmah bawl hi. Aisan ahawng metsa-in tawi aa cinapa taltungah naangpeekphahin aisan naangtemtawh tan hi. Aisan leemtan pen hoihtak hoihtak a kiphahsukleh aphun-ngah ci hi. Aphun angahleh kik tapa Zauhang tapa kabawl e," ci hi. Thumvei bang tua bangin hihzel hihzel hi. Cinapa pen ui-sisantui leh aitui dawnsak hi. Uisisan pen samahmah ahihmanin sihui nasepna nakpi kikhelsak thahaatsak hi. Aitui zong phuisam se takeileng natna tuamtuam damna ahi hi. A sisan dawn beklo-in abantawn leh a taltungah taat hi. Dipngekna neite ui si kidawnsak thei hi. Kongsak leh kongkhangah khuam singka phut hi. Singmaam phaitehtawh tuamin khautawh ahen khitciangin khuamtungah khung hi. Aisaleemte tulhiamtawh khil aa uilunakvangah phutin kongvangsanah suang hi. A uikam balin ciangtang khattawh khaak hi. Tua pen galvil dan aa Dawite kihtak ding aa kikoih ahi hi. A tatak hiam.. i thei kei hi. Thang Ho leh Lian Do galsim dingaa a pailai-in mite muhtheihlohna dingin Aipizungsan khim hi kici hi. Tua Aipizungsan pen agalte uilisuan in kaihkhiatsak ahihmanin galten muthei aa that uh hi, kici hi. Bumleh leh Kongsawltun Lawki-hunin bumhleeng -aileeng kici aa laumahmah uh hi. Phuisamna zang ahihmanin Dawitawhkop hi ci-in um hi. Dawithoihna khatpeuhah bumhleh lo-in omlo hi. Aakno-vokno neihsunsun tawh kisut uh hi. Voktawh athoih ciangin Kameitual hong saang aw ci hi. Aaktawh a kithoih ciangin, Kaluikhuang hong saang aw, cise hi. Kapikaang tan, kapivom tan, kaluikhuang tan, kameitual tan, cih bangin sam uh hi. Kapteel khua aateng kahihciang un, Dawisa siampute in hi bangin phuisam uh hi. Tunin Tun Thual suutna ka-vokno dawng ka-aaknodawng kakhimpizu kakhuaipizu tawh hong kuan ing ei...Kamei tual hong sang aw, kaluikhuang hong sang aw, kapikaang hong saang aw, kapivom hong sang aw, ..Ciangsawn aa suak in sa hong saang in, Lennupa aa suak in sa hong sang in, Thuamvum aa suak in sa hong sang in innbuk aa suak in sa hong sang in,..kasialtal hong sang in ka uital hong sang in kakhimpi zun hong tan ing kakhuaipi zun hong tan ing kaluikhuang tan hong tan ing, kapikang tan hong tan ing....hong tan ing hong tan ing..Ka aipizungsan tawh hong khim ing, kakhimpi tawh hong khim ing, ..Vanlai aa pa vanlai aa nu, sangsing dawnah hong leeng tacin, teuta vumah hong leeng tateh, tuisuk luang hong zui tateh, tuito luang hong zui tateh, singlumlet suang lumlet in hong pai tateh, khuaimu-in hong leeng tateh, pangpanin hong kai tateh, khuangphilit-in hong ham tateh...Dip aa pangpa sutning tai aa pangpa sut ning, khutguhtep sut ning, kheguhteep sut ning..sun aa tumpa sutning zan aa tumpa sut ning... Phei zang aa luaipa sutning banzang aa luaipa sut ning, .. kasut sutlah lo hing kabawllah lo hing, cin voklu, uilu, aaklu agawh khatpeuh lutawh cinapa Hm Hm Hm cin tah zel dokzel hi Cinapa aitui dawnsak hi. Tua khit ciangin bumleh kipan leuleu hi. Aitawi kalehna kalehna aitawi kalehna.. Kolnu aitawi kalehna, kalehna aitawi kalehna, Thahdo aitawi kalehna, kalehna aitawi kalehna, Lusuang aitawi kalehna kalehna aitawi kalehna, Gal Ngam aitawi kalehna, kalehna aitawi kalehna , bumleeng kalhna ,..tuisuk luang aa bawlpa sut ning tuito luang aa bawlpa sut ning, sunkimh aa bawlpa sutning zankim aa bawlpa sut ning , khutguhteep sutning kheguhteep sutnign..cipei aa bawlpa sutning, zagam aa bawlpa sut ning,.. kasut sutlah lo hing kabawl bawllah lo hing, thalawh bang hen ling khei bang hen kaciai..... acih khit ciangin phuuu cin taitehtui phih hi. Dawithoihna kizang Na te pen, Innkhawi ganhing khat pepeuh, aisa, ngasa, aikam, aipawlteh,linggui, phaiteh, zu, taiiteh, ailaivom, aisan, aibungbu, sutzo, khimpi, cih khawng ahi hi. Tuhun Kawl-zatuisiate vanzat teng nahimawk hi. Zomi ih Pu ih Pate in zatui ahihlam bang hunin namukhia uh hiam..? Dawihilh hiding hiam? Dawibiak a kipat aa kipan a kizangpah ahihleh bel, advance mahmah ding hi. Uisi pen gilsan leh cisa kithuah aadingin hoih kici hi. Kongsang athoih ciangin uisi leh aitui dawnsak hi. Aaksi, voksi kidawnsak ngeilo hi. Tuhun MBBS zote-in zatui phawktawm theilo uh hi. Taanglai siampite pen Medical Doctor te sangin saangza kasa hi. Gilgumna abawl ciangin sing phih hi. Phuisam kawmkawm leh adamna van zang kawmkawmin kibawl uh hi. Upna leh lungkimna in sisan malh sak aa, natna tampi damsak hi. Lungmuanna guanin damna zatui pia lai ahihmanin tua sangaa hoih zaw cina bawlna omlo hi. Tuhun siavuan siama pawlkhat in cinate tawng ziahziah thei uh hi. Tua pen natna behlapna gutui hoih mahmah ahi hi. Dammawhte thapiakna leh maitaina in zatuihoihte tawh a haatna kikim hi. Sisan tha haatsak lungsim malhsak ahihman , natna lungnote in silel mahmah hi. Tua laitakin lungno thahna abuak sawnsawn ciangin natna damzo ahi hi. Thu kan seemseem lehang ih Pu ih Pate guhpil mahmah hi. | 
