Thang Siangh
Jan27, 2007 Nupa kici apasal leh azii in Jesu leh Pawlpi limciing hi, cin i gen khin hi. Tua ahih ciang iin Pasal in gumpa leh honpa bang iin azii khoi in puah ding hi. A zii in zong hemna leh poina neilo biakpiakna bang iin apumpi aap ding hi. Lungkim nii leh lungkimloh nii kilamdangsak lo ding hi. Hong henkhawm, Ki-itna khau hoih pen PASAL leh NUMEI HIHNA (Sex) ahi hi. Tua pen ama munah nazatsiam leh kilungsimneihna tampi sumaimang zel ding hi. Numei pawlkhat te in tua tawh apasal deek thei mawk uh hi. Khialhna lianmahmah khat palsat ahi hi.
Jesu in itna leh thumanna tawh Pawlpi a kepmah bang iin, pasal in azii keem iin zunin puah ding hi. A kisapna khempeuh huh ding hi.Neek leh dawn deidan lo ding hi. Alum leh lumkhawm ding aa, avot leh votkhawm ding hi. Zawlhel hunlai kihona kammal khumnono te khiamtuan lo ding hi.Pasal in Zii thuhilhna ding iin THATANG LEH KHUTTUM zang kei hen. Pasian piak LETSONG MANPHA PEN ahihlam phawk den tahen. Pasian mai-ah lungdam ko iin pahtawi zaw hen. Khutlum ngak sang iin Khasiangtho kinga leh buaina theng baih pen hi. Numei gilo te in apasal tusaisai hi. Tua te in velhthuak baih diak hi. Napal maisuah en masa in. Aheh laitak iin thu tampi donglua ken. Hehsa iin hong hona kam dawng ken. Nagennop a om leh ahehkap hun ciang iin damtak iin pulak in. Napasal sang aa kicianzaw nasak khat tawh tehkak iin ko kha kei in. Zawllui te kisaktheihpih iin sutsut se kei in. Mei-am namgimtui buah bang iin kitotna hong piangpah ding hi.Ki-itna tha hongpialo tangthu luui khempeuh suahkhia nawn kei in. Bangkuasung, Pawlpisung, midangtawh omkhopna munah, napasal in thugenna aneih leh ama gennop khin nailo iin huh ahihkeh khaktan se ken. Napasal phatphat se ken la, zong gensia kei in. Midang te muhna-ah, zawng mahmah iin hehpihhuai phial taleng, nupa kilungtuak iin ki-it peuh leng, ei aa iin leitung anuam hilel hi. Khat leh khat ki-itna kilah ding hanciam kul hi. Kaneulai iin, aaksa hulhuan kabawl uh hi. Ankuang kiimah kimtak iin katut khit uh ciang iin, kapan alu, akhebom(aleiphiat) , a awmguh(awmlang) a ciltang, cihteng khawng naupangte hong hawmsak hi. Tua zawh ciang iin kanu leh kapa, agilzial leh asin honghawm uh hi. Kanun,"Kei hongpia se ken, nangman ne in," cin paih kik hi. Kapan," Kua sungah khipi tang iin gahtuan ding hiam, a kibang iin ne ni" ci hi. Tua bang aa ki-it selua a kikhiatkhiat pen, ka sanggampa in, a duhlo sa iin," No duhlo nahih uleh ken duhmah ing e" cin, hong la ngiau khong hi. Tua ciang iin, kanu leh kapa hong ki-en iin, annemawh liang iin kanui uh hi. Innkuan ankuang ummkhop tua ni mah nuam kasa pen hi. Innkuannuam icih pen zawnna leh hauhna hang hilo hi, KI-ITNA hang hizaw hi. A galva pan iin Kham bang aa imuh pen akiangah i om ciang iin dalpeek bang bek hithei hi. bangmahlo aa imuh pawlkhat pen kician mahmah thei zel hi. Khamtak zong vokpi mai-ah kikoih leh man neilo zel hi. Dalpeek zong vanmanpha namkim iin kiseek thei hi. A neipa khuttawh kisai zaw hi. Thupha saang bangkua icih pen mipil, mithahaat hikhin lo hi. Pasian ompih bangkua pen Ngun leh Kham sang iin kicing zaw hi. Topa Jesu in, "Note sungah Vantunggam om" acih pen Pasian Khasiangtho tenna bangkua ahi hi. Thang Siangh Zogampalpi |
