Janury 27,2007 Khangno te pen hongpai ding hunah gam leh minam makai ding te vive ahi hi. Amau te thuhilhna leh pattahna-mun hoih pen, laisin-sang, biakinn leh innkuansung ahi hi. Tua sang-3 lakah innkuan kipattahna hoih in muibun pen hi. Leitungah langlutsia thupi pen NU leh PA te ahi uh hi. Amau sung aa piang tanu tapa te pen pattah ding iin Pasian in, asehsa ahi hi. Laisiangtho sungah, " Ta te thuhilhna ciang koihkhong kei in" ci ngiat hi. Tua pen satsat ding cihna hilo hi. Thuhilh tawlnga lo ding, cihna hizaw hi.
Banghun iin Hilh Kipan ding Naupang te pattah hun ding pen Kamsang te tungtawn iin Pasian in ahilhna-ah, ANU sungpan kipan ding cingiau khong hi. Naupaii aa kipan anu in khamtheih lenggahzuu tang ding hi. KHAMTHEIH cih pen tuahunlai iin ZUU longal tamlua lo hi. Tuhun iin, beng, kanza, zanah,tuibuuk aa kipan pumpi susia thei tam mahmah hi. Lamdulh aa si, cih te pen cinasa aa suak hipah lel hi. Anu neek asia-apha tawh pumpi, lungtang, khuak kilamto ahih man iin hemna poina khempeuh pen NU KAMSUNG AA LUT an te hang ahi hi. Nupa sisan kituaklo te zong ta te deih banglo thei hi. Tua ahih ciang iin ta te pattahna pen, NU GILSUNG pan kipan ding hi. Naungeek hi cin Daii-ngaihsut kei in. Naungeek asuah aa kipan iin pumpikim tawh hong pusuak ahi hi. Zaktheihna, duhtheihna, deihtheihna tawh hong taikhia ahi hi. Suakkhinphet iin nawi kitah iin dawnpah khitkhit hi. Deih aneih ciang iin akhut-akhe kisat iin kahsa iin hong ngen hi. Napau khempeuh za hi. Tua ahih ciang iin kamdam kamkhum zang iin hopih ding kisam hi. Hamsia pausia, tomlawh phuisamna kammal te ama bil sungah lutngei kei leh hoih pen hi. Naupang te ki-etna ding limlang hoihpen anu apa ngeina leh gamtat-luheek ahi hi. Amuh azak khempeuh ngeina iin hong khanpih ding uh hi. Pau thei kei tah cin, ageinai leh amuhna ah akhelkhel iin nupa kinohna bawl ding hilo hi. Tanglai ihpu ihpa te ngeina thucinn te pen Pasian' thu tawh a kikalvalh lua omlo hi. Pasian bang hiam cih atheihloh man bek ahi hi. Lawki te zong dawibiak simloh amau thuhilhna te hoih tak iin khansuah pih leh mihoih suahna cing mahmah hi. Gamtat-hoih khempeuh kibangkim lel hi. Khangmasa te pen na khempeuh ah kidopsiam mahmah uh hi. Inndei kinei tuamzo lo ahih man iin, nupa kinohna ding tawm mahmah hi. Naupang te ihmutkhit kingak hi. Meivak omlo khuamialpi sung nangawnah kidawm lua kisa iin puan-kikhuhsa iin kino lai zen uh hi. Bang hang hiam cih leh, tua bang thu te hang iin anu apa enthawl thei uh hi. Anu apa zahtakna thakiam sak hi. Pa-lam leh nu-lam cih omlo. Ei Zomi te in, piannagui zui iin tanu tapa min kivawh hi. Khangsimna iin kinei hi. Tapa-upa pen, pasal-lam apu kitam sak hi. Numei uu pen pasal-lam api kitam sak hi. Tapa-nihna pen numei-lam apu kipia aa, numei ahihleh api kipia hi. Tua bang iin tanu tapa hau te in, pianpih sanggam upa-lampan pansuk iin, pasal-lam leh numei-lam hawmsak hi. Pawlkhat te in amau-lam ciat paksak iin, pumgup iin khennih suah thei uh hi. Khangsimna hibek aa deidan ding nam hilo hi. Nupa pawlkhat a kitot uh ciang iin ata te pawlkai iin nu-lam leh pa-lam om thei hi. Tua pen a omloh theihna ding iin kidophuai mahmah hi. Ta te pen minpi tawh ho lo iin, minno phuak iin ho ding ahi hi. Ta te mai-ah naminpi utawh kisam kei un. Tapmin tawh kamsia iin kihopih kei un. Kei pen kanu leh kapa'n " Thangneu" hongci uh hi. Ka u numei te'n katapmin tawh "Song Cin Thang " hongci uh hi. Kum-4 kaphak laitak iin, kalawmpa khat in, "Lawm namin bang?" hongci hi. Ken, " Song Cin Thang" kacih kik leh, kanu'n," bang e ci kik sin" hong cih ciang iin a khial hi ning ci'n, "Thangneu" kaci hi. Hong kigen keileh "Song Cin Thang" aa kingaihsun kahimai hi. Ei min tang tappu-tappi te zong zahtak ding kilawm hi. Ei luang hong phamdingzah aa kinai te bek min kitangsak ahi hi. Innkuansungah guptuam-paihtuam, nu-lam leh pa-lam om omsak lo ding hi Nu leh pa te in, khat-leh-khat ki-itna, kizahtakpiakna ta te musak den ding hi. Anih un aminpi tawh kiho lala lo ding hi. Sanggam itna, veng-leh-paam tungah thumanna, khua-leh-tui khualna pen neutung iin pantah ding uh hi. Neutunga hong kihilh thu kimangngilh theilo hi. Kapa hong thuhilh pawlkhat," Vengte maiguidawng in gawlkan iin lampi-ah hongzam leh sik kei in, amau huangsunglamah heikiksak in. Amau huangsung lamah tem, tu vankhat pepeuh kinuasia namuhleh tawm ken, zongkik iin mu lel ding hi. Gan in huan-an aneeksak leh hawlsak in," ci'n hong hilh hi. Tua pen tudong iin kangeina suak lel hi. Veng-leh-pam tawh kizopna hoih leh midang te neihsa zahtakna ahi hi. Gam leh minam tungaa cihtakna pen innkuan sungpan kipan hi. Hunmanna leh hun-zatsiamna ding pattahna. Pasian in mikhempeuh tungah nai-24 hong pia hi. Tua hun azekksiam te pen, mipil, mithupi, mihau, minuamsa suak kim hi. Zawnna ngauna icih pen hong kipia hunneihsun ihzat siam loh man ahi hi. Khanglui ten nai neilo ahih man iin aakkhuan zui in naseem uh hi. Zingsol nitaksol en iin hun ciamteh uh hi. Ei khangah Alarm-Clock tawh na ih seem hi. Naungeek te hunman bangci theih thei ding hiam? Hun zeksiamna bangci hilh ding ihi hiam? Ngaihsut iin kinei khalo ahih man bek hi. Naungeek te pen pattahna a ol pen ahi hi. Zingan (Nawi) piakhun, sun-an piakhun, nitak-an piakhun hunmaan tak in pe lehang tua hun atun ciang anduh iin hong kap pah ding hi. Ihmut hun zong tuamah bang ahi hi. Zingsang thawhhun zong hunmaan tak iin phong leteh agol dong iin hong zongsang pah ding hi. Sangkahthei gual hong phaktoh ciang iin thawhhun,annekhun, sangpaihun kisekhsak in. Sangkhak ni iin nasepna munah kikholhpih in. Kimawlhun leh nitak ihmuthun guang iin zingsang thobaih sak in. " Tho un, tho un, ta te, the in hong khuannelh khaleh na-ma suang zo lo ding nahi uh," kanu'n hong ci thei hi. Naupang te pen kum-10 aphakma iin ih muapzawh keileh kum-10 khit ciang iin kizo nawn lo hi. Kaiilua ta hi. A tawntung iin mitmeisuan iin khahsuahloh ding thupi hi. Tuama teng nazawh nakleh agollam zong gennop pah hi. Kawlgam zin kalawm mikang khat in, " Kawlgamah naseem omlo, niangtuisai- ah nai-3 bang tu uh. nasep neilo tutsa aa kiho mitamzaw? Bangci nuntak ahi tam?" cin lamdangsa mahmah hi. Hun amawkna iin kilalthangsak hi. Amanphatna kitheilo hi. Tua ahih ciang iin hong pianglai ding naupang te HUNMAANNA leh HUNZATSIAMNA nasiatak iin hilh leng Zogam nosuah zo pan ding hi. Khat thalawhsa ngak iin innkuanbup in hunneihsun ih mawk beisak pen dahhuai mahmah hi. Pilnalam pattahna PILNA IN NGUN LEH KHAM SANG IIN MANPHAZAW AA tua ahih ciang iin zong in la, mu in la, nakha mansuah kei in" kici hi. Tua ahih ciang iin ahihzawh laiteng ta te deidan lo iin pilna-sang kahsak ding thupi hi. Ei Zomi nulehpa te in, numei pen kineuseh lua kha ahih man iin, tua in Zominam buppi khantohna hong zekaiisak hi. "Nauluai avei khut in, leitung uk hi" Hih in numei te panmun thupi mahmah ahih hong theisak hi. Naupang te in anu nawitui leh anglum tawh khangkhia ahih man iin anu huzaap tam ngahzaw hi. Nupil nei ten pilna tam ngah, pilna neilo nu-nei ta ten tawm ngahpah hi. Minambup leh gambup khantoh ding ideih leh pasal sang iin numei te pilna guathuai zaw hi. Bang hang hiam cih leh, mailam minam leh gam makai ding naupang te pen nu-anglum leh huzaap tawh akhangkhia vive ngentang ahi hi. Ei akhangto nailo gam te-ah naucing siate pen laitann tawm teng kizang hi. US Childcare Center aa naseem sia te pen Phd khawng vive kizang hi. Ei gamah tua bang sang kineizo lo hi. Anu bekmah pattahsa ahi hi. Naupang te in pilna leh huzaaphoih angahna ding iin, numei te pilna guat ding kisam pi pen hi. Inn-nupi ten pilna hong nei le uh, livingstandard hongsang pah ding hi. Nuntak khuasakzia hong picing ding hi. Sianthona leh cidamna lam hong khual thei ding hi. Kizem kizepna hong etlawm ding hi.Ih kuang ih keu hong siangtho ding hi. Alim a-al zaw an hongbawl thei zaw ding hi. Kalkhat khit kalkhat Zomi te khantohna hong kisott toto ding hi. A hang ngiatnguat Zomi pen Zogampalpi pak bang iin hong pakpalh lihliah ding hi. Gam leh Minam, Zomi napuahnop leh, ta-numei te pilna guan in. Thakhat iin kikhangto ding hi. Thang Siangh Zogampalpi | 
