Khemna maw, deihsakna. 2010 Kitelna in Zomite bang hong pia ding? By Tual Khan Suan Thupatna: Galkap kumpi deihna bang a kigelh Kawlgam bup thukhunpi a thak a hi, May 2008 kum a kikipsak na zui in 2010 ciangin kawlgam sungah gambup kitelna (general election) a thak bawl ding cih thu a hihi. Tua thukhunpi a thak Article 59 (F) na sungah gamdang mitawh kiteeng peuhmah kitelna ah kidem sakloh ding cih om a hih manin Kawlgam mi a hi zongin Daw Aung San Suu Kyi pen kitelna ah kihel theilo ding in kibawl hi. ( Phawk ding: 1990 kum kitelna ah zong Daw Aung San Suu Kyi pen MP dingin kidem lo hi.) Hih lai gelh pa in a hong tung ding 2010 kum ciangin Kawlgam ah Galkap kumpi makaihna tawh kibawl ding gambup kitelna ah Zomite in kihel ding leh kihel loh ding kuamah hanthotna tawh kigelh hilo hi. Tua banah a kihel ding leh a kidem ding mimalte kona, totna leh gensiat ut man a hih loh banah, a kihel utlo leh a kidem utlo mite dinmun zong khialhi/ man hi a ci nuam hi lo hi. A beisa thu: (Background) 1974 kum pan Mahsahlah party thukhunpi zui a ki-ukna gammi te'n cimtaak lua mahmah a hih manin 1988 kum in Kawlgam bup ah lungphona sosang mahmah a Mahsahlah Party makaipi pa Gen. Ne Win kitawp in a ma tang ding in U Sein Lwin July 26,1988 (ni 18 sung) kikoih pak hi. U Sein Lwin in makaipi a sep sung sawt hetlo hi mah leh, mitam that lua a hih manin "Yangon sa sem pa (butcher of Rangoon) cih ciang dongin a min siat ciangin, mipi zahtak ding ci'n Dr. Maung Maung makai sak in kha thum sungin Kawlgam ah gambup kitelna neih ding gelsak uh hi. Kitelna om ding galkapte'n a kamciam uh ciangin a tua hun lai tak a, kawlgam sung a mipi zahtak mi (4) a hi, 1)Daw Aung San Suu Kyi, 2) U Aung Gyi, 3) U Tin Oo leh 4) U Nu (PM masa pen) teng kikum in, Mahsahlah Party i tel kitelna encik mite ( Election Commission) sang zo lo uh hi. A maute'n ( mi-4) Mahsahlah Party sung a mite a kihel lo in, onghu vaihawm pawl (interim administrations) phut khia in, tuate makaihna sung ah Democracy lampi a zuan ding kitelna neih ding ngen uh hi. Tua bang thu bialbual teng tawh Kawlgam ah galkapte in September 18,1988 in gambup thu neihna sut khia uh hi. (NB-Political Analysis pawl khat in tua hun lai in mi 4 teng in tua bang thu ngenlo in, election commission ding te sang lel le uh, Kawlgam sungah galkap te'n Aana sut lo kha ding hi, ci uh hi.) Galkapte'n thu neihna a sut uh ciangin kitel hun ding pen hong zia kai to suak pah hi. Tua hun lai a Brig.Gen Khin Nyunt in September 24,1988 ni a, a gen na zui in cileng; Gam sungah thukham leh thupiak te a kip/ kizuih caiangin kitelna kinei ding a, galkap te in a zo party te tungah gambup thuneihna a banban in ( systematically) ap ding hi".A hizongin a banban in, cih kammal in hun sawtpi huam hi.Kuamah (galkap Ulian te'n) in a hun ding gen siang utlo hi. Galkapte gam uk ding a hih lohna uh Kawlgam galkap te'n zong tel mahmah uh a hih manin mipi muh khialh ding utlo uh a, kammal hoih thei pen ding leh mipi san theih ding in thu gen uh hi. Galkap Mangpi Gen. Saw Maung in September 23,1988 ni in " Galkapte in mi tawmcik tawh ma a kipang pen gam ukna sawt let sawmlo a hih man hi a, tua hun tomcik sungin galkapte nasep ding pen siamsinna, cidamna leh social services a kitang sam teng bek hi ding a, hun sawt a ding nasepna pen kitelna pan a kah kumpi te in sem ding hi ci'n" gam bup zak dingin gen hi. Tua ban ah March 27,1989 galkap te' ni (Tatmadaw Day) in a Gen.Saw Maung in a thu gen na khat ah, "gam sung a daih ciangin kitelna kinei ding a, mipi teelna pan a kah palaite in kumpi phut in gam mipi hoihna ding hong sem ding hi. Galkapte a hih leh galkap na sep leh mawhpuakna sem kik ding in galkap huang sungah pai kik ding hi.(we will return to the barracks and continue to relentlessly to carry out our original duties..) ci'n gen lai hi. A hizongin tua kammalte tu ni ciang dong tangtung nailo hi. 1989 May 31 ni in galkap kumpi in gambup kitelna thu khun (electoral Law) ding gelh uh a, kitel khit ciangin a ngah party te'n Pyithu Htutdaw bang ci sap ding leh bang power (thuneihna) te nei ding cih hello uh hi. Thu neihna a lak cil lai ua, a kampau uh thu neihna ap ding cih kammal pen a gen dan uh damdam in hong kikhel hi. 1989 June 9 ni a, a (43) veina SLORC press conferences ah Gen.Saw Mawng thu genna ah, " Kitelna a man khit teh thuneihna ki- ap pah theilo ding hi. Thukhunpi tawh kizui in kumpi (government) phuan masa in, tua hi kei leh kumpi pen a tha zawng khaal kumpi suak ding hi" ci'n kammal na laih pian ta hi. Galkap te in a cil lai bang lo in thuneihna ap pah ding a hamsatna phawk kik uh hi. Human Rights Watch-Asia (1990) te reportna ah, "Galkapte kamciam masa a hi, thuneihna ap pah ding tawh kikelki in, galkap te'n thukhunpi gelh masak ding leh tua pen mipi tawh kipsak ding lam hong gen zaw uh hi." Tua ban ah Gen.Saw Maung in a genna ah "Galkapte pen thukhunpi gelh ding hilo hi. Kitelna pan a ngah mipi taangmi te'n gelh ding a, tua thukhun mipi deihna bangin a kikipsak khit teh galkapte'n thu neihna thukhunpi tawh kizui in ap ding hi" ci a thu luan zia uh lamdang ta hi. Tua bek hilo in, SLORC i 1/90 declaration sungah " kitelna pan a ngah taangmi palai te'n thukhun gelh thei bek ding hi" cin galkapte kihel lohna ding na gen to kawikawi uh hi. Gambup kitelna ding thukham tawh kisai in parties te'n zong sang thei tek a hih manin 1990 kum May kha 27 ni in kawlgam bup huam in kitelna kinei hi. Buaina neuneu pawl khat simloh tua kitelna pen lawhcing leh hoih lel hi ci'n enkhiatu (observer) te'n gen uhi. May kha 27, 1990 kum a, Kawlgam bup kitelna ah National League for Democracy (NLD) party in National Assembly (Pyithu Hluttaw) a tu ding mipi palai tangmi panmun (seat) 485 kikoih sung pan (392) in zo sitset uh a, gambuppi a panmun (seat) om zah tawh tuat in 80.80% in a lum a let in zo uh hi. 1974 kum Burma Socialist Programe Party (BSPP) in zong a min uh khek in National Unity Party (NUP) tawh kitelna ah kidem uh a, panmun (seat) (10) khat ngah uh a, gam buppi a tawh teh in 2.06% ngah uh hi. 1990 May 27 ni a gambup kitelna a party te ngah zah a nuai a bangin a tom in a nuai a bang a hihi.
Kitelna ah a gualzo party te tungah thuneihna ap utlo uh a hih manin gambup thukhunpi gelh in, tua tawh kizui in thuneihna ki ap thei pan ding ci'n galkap te mipi te khem to zel uh hi. Thu khunpi gelh ding tawh kisai in zong, galkapte thu neihna neilo a cih sa uh a hih hangin SLORC in 1992 May 28 ni a Order No.9/92 zui in, National convention sam in makai dingin in galkap sung pan mah seh uh hi. A mau kamciam sa zong zui lo in, na sem uh a, National convention pan in gambup thukhunpi ding a mau hoihsak bangin gelh uh hi. Tua hun pan a kipan a kigelh gambup thukhunpi pen 2008 May in zo siang uh a, gammi te thagum tawh thukim sak uh hi. Tua thukhunpi sungah mipi in deihin deih ta kei leh, tel kul hetlo in Pyithu Hlutdaw palai i 25% pen galkapte pan hi ding hi. Galkap deih kaih thukhunpi zui in 2010 kitelna thak zong bawl ding cih tawh mipi te khem sawm lai uh hi. Tua thukhunpi pen 1974 kum a Mahsahlah Party i thukhunpi tawh kigamla hetlo hi. 2010 kitelna ah Zomite'n mapang a kitel ding cih zong ngaihsutna khat om hi. A hizongin na kihel in na kihel kei zongin galkapte'n hong hel khin hi. Mipi palai dingin kidemin hong kitel cing zongin mipite a ding leh mipite deihna na sem thei tuan kei ding hi. A ut a nasem mi leh a utlo pi a kisemsak pen kibang lo hi. Galkap te thukhun omsa leh a mau cih bang bek in na sep ding a hihi. Ding a cih uh leh na din kul ding a, tu a cih uh leh na tut a kul ding hi. Mahsahlah kumpi in kawlgam sung kum (26) sung bang a uk na sungah Zogam pan mipi palai te in Zomi a ding bang mah sem thei tuanlo uh hi. Galkapte'n I Zomi palai te hong khem ding uh a, Zomi palai te'n Zomi na na khem sawn ding hi. Thuman tawh nasepna om lo in, khemna vive tawh hong hi ding hi. Mipi deihna bang in nasep hilo ding a, gam ukte deihna bek kibul phuh ding hi. Tua a hih manin UDHR article 21 (3) " kumpite thuneihna pen gammi te tung pan kipan in kibulphuh hi hen!" a cih pen kizang theilo ding hi. Khemna Numbat 1. March 27,1989 galkap te' ni (Tatmadaw Day) in a Gen.Saw Maung in a thu gen:"gam sung a daih ciangin kitelna kinei ding a, mipi teelna pan a kah palaite in kumpi phut in gam mipi hoihna ding hong sem ding hi. Galkapte a hih leh galkap na sep leh mawhpuakna sem kik ding in galkap huang sungah pai kik ding hi.(we will return to the barracks and continue to relentlessly to carry out our original duties..) 1990 kum May 27 ni-in, Galkap kumpi te ukna sung mah pan kitelna kinei a, Kawlgam mite'n zong a mau deih miteng hong tel uh a, NLD in a lum a let in zo sitset hi. Galkapte gelna bangin NUP in a ngah loh ciangin kitelna gah thukim ding ut nawnlo uh hi. A mau gen mah a mau mah in nial uh hi. Khemna Numbat 2. "Galkapte pen thukhunpi gelh ding hilo hi. Kitelna pan a ngah mipi taangmi te'n gelh ding a, tua thukhun mipi deihna bangin a kikipsak khit teh galkapte'n thu neihna thukhunpi tawh kizui in ap ding hi" Ge. Saw Maun. Mipi deih palai taangmi te'n thukhunpi a gelh theihna ding uh lampi honsak utlo uh hi. Tua bek hilo in a mau nasep a hih loh lam thei kilkel sa in 1993 kum pan in Kawlgam thukhunpi gelhna ding National convention kipan uh a, tua pan in galkap deih lak palai miteng in a mau deih bangin thukhunpi gelh uh hi. Tua pen 2008 May kha in gambup ah mipi thu kimsak uh hi. Khemna Numbat 3. 2010 kiltelna pen a lau huai mahmah galkapte khemna a hihi. 1990 kum May 27 ni a kitelna pen thu man tawh kitelna hi a, mipi te deihna a maan in kingah hi. 2010 kitel ciangin mipi deih tengin a ngah leh zong , ngah lo ding, galkapte deih tengin a ngah kei leh zong ngah ding hi. 2010 kitelna ding pen "kiteelna (Election)" hi lo a, "deih teelna (Selection)" a hihi. Tua ahih manin a ngah ut khempeuh in mipi deih ding hanciam sangin galkapte deih ding hanciam zaw ding hi. Tua hi a, a ngah te'n in zong mipi mai en nawnlo ding a, galkapte mai bek en in, a lungkimna ding bek uh sem ding uh hi. Na mipi te a ding na sem thei kei ding a, galkap te a ding na sem thei bek ding hi. 2010 kum kawlgam ah kiteelna ding pen " Ngia in, tuu vun silhna ding" lampi kipatna a hihi. Date: August 24,2009 (Note: Hih pen ka revise man nailoh hangin a Kawlgam kitelna ah kuang lui sawmte a dingin etkik ding deihna tawh kong khak kik hi. |
A pahtawi Taak Pastor
-
October kha sungin biakna sungah makai, a diakdiak in Kha thu tawh kisai
lamhilh mite (spiritual leaders) pahtawina leh limbawlna in kinei hi. USA
gam sung...
3 months ago
