Khupson beh Sia G.K.Nang (Gin Khan Nang) in USA gama Evangelical Lai Siangtho sang minthang Fuller Theological Seminary, Pasadena, California pan in asawt loin Doctor of Philosophy (Ph.D.) ngah ding cih i zak ciangin ---- in Zomite hong laptohna hi, ci in lungdam lua in ka gen ding pak bang ka thei kei dek zawzen hi. ---- hoih hi. Halleluijah!
Leitungah midangte in sawtpi a kipanin a thuapthuapin doctorate a ngah uh hangin adiakin ei Zomi sungah lai Siangtho tawh Ph.D. ngah kitawm mahmah lai ahih manin Sia Nang hong ngah ding i angtang mahmah hi. Zomite Khristian i suah zawh kum 100 a cin tawh kituakin Sia Nang in a Ph.D. dessertation topic dingin "Zomi Christianity & Cultural Transformation," cih a beisa kum 100 sung Zomite Khristian i suahna hanga i nuntakzia a kilamdan'na thu leh i gama khanlawhna (revival) hong tunzia khawng a kimin laimai 300 pawl (approx) tawh a gelh hi a, zaknop bek hi loin laigelh siam khat ahih manin sim nuam mahmah lai ding hi. Aman abeisa kum 4-5 sung tawntung full scholarship ngahin azi leh tate Shillong khuapi-ah omsakin a sin tangtang hi a, manpha diak bang hi. Sia Nang pen Sia Khup Za Go zoma India lam pana Zolai (Tedim pau) gelh a siam pen khat hi a, tukum Zomi Writers' Award zong a sang ahi hi.
Tua banah Sia Nang pen Lamka gama Tedim kam paute lakah Bachelor of Theology (B.Th.) zo masa pen (CBA sunga Lai Siangtho degree ngah masa pen) hi. Aman Serampore College nuaia om CBCNEI sang hoih pen Eastern Theological College , Jorhat panin zo hi (early '70s). Tua zomin United Theological College , Bangalore panin Bachelor of Divinity (B.D.) zo hi (early '80s). Tua khit ciangin Baptist World Alliance panin Scholarship ngah in International Baptist Theological Seminary, Zurich, Switzerland panin Master of Theology (Th.M.) zo leuleu hi (early '90s). Tua a thesis topic ahih leh, "Evidences of Growth Among Zomi Baptist Churches in Indo-Burma," cih India leh Burma gam sunga Zomi Baptist Pawlpi Khanzia thu hi a, sim nuamin hoih mahmah hi.
Sia Nang in a beisa kum 40 sung tawntung adiakin India gam Zomite lakah hunbit Pawlpi na a sep sungin Tedim Labu khetna leh Lai Siangtho tei nasep tawh kisai tavuan lianpi ala den ahih banah Nipi Sang Laisim Bu tuamtuam tampi tei in khensak hi. Tua ahih manin hih bang i siate manphatna theikawmin ( i ngeina leh tangthute thei, English leh Zolai gelh siam) mailamah Zomi Literature tawh kisai nasepna thupi leh hoihzaw sem i neihzawhna dingin ma hong bung thei leh i ut uh a, tua dingin leitung mun tuamtuama om Zomi khangthak khempeuhin i septheih lamciat tawh panga i sepkhawm ding uh lunggulh huai mahmah hi. ---- in Zomite a mipum beka khangkhang hi loin pilna, ciimna leh thu tawh (lai tawh) zong a kipattah leh a khangto khawm dingin hong siam ta hen!
Lungdampihna lianpi tawh,
Dr.S. Neng Ngaih Lian
197 Upper Dock Street
Newport, NP20 1DA
United Kingdom
|
