Feb 5, 2007: By Thang Siangh Note: Pawi pen Zokam hilo hi. Kawlkam pan ih ngah hi. Mopawi cilo iin, Mopi, Mosagawh, kici hi. Sihpawi kici loin Si-phual kici zaw hi.khuado-pawi kici lo iin Khuado Lawm-anneek peuh kici zaw hi. TUALBIAKNA, SIALSAWM LAWM-ANNEEK, KHUADO LAWM-ANNEEK. Tualbawl kici Tual-Biakna. Zomi te in "khua" a saat uh ciang iin Siampi lo iin khuathak saat lo hi. Khuasiam kikhai masa iin khua kisaat hi. Khuasaat khit ciang iin zong kumsim in Khuasiam kikhai tawntung hi. Tua pen Tualbawl ahihkeh Tualbiakna kici hi.Ih pu ih pa te pen biakna-mi mahmah uh hi. Ngeina leh Thukham tawh om ngiungeu uh hi. Pasian-man atheihloh hang iin Pasian tawh kigamla lo uh hi. Tualbiakna ding aa kizang gan pen Innlusi iin andong iin tuatawh kilei hi. Sialsawm Lawm-anneek leh Tualbiak hun kizom tawntung hi. Khuasiam kikhai ahi hi.Khuami te cidamna ding, guahtui hoih iin, ankung te in gahlehpaak aneihna ding, khuasung kilemna ding iin kingen hi.
Zehtan thukham Tualbawl ni zingciang iin Zeh kitang hi.Leigil suaksak lo ding, lokuan lo ding cihna hi. Singno leh nuntakna-nei sinhing sihsuah lo ding hi.Misi zongkahlo ding hi. Gamlumna bawllo ding hi.A Zehphi a omleh hawk in lo leh ankung te susia ahihman iin abeiteng kilohsak hi. Tualbawl hihpha kik uh hi. Tualbawl-kha or Sialsawm khasung saman a omleh Sawngman kici hi. Sawngzuu lup iin, sawngsik iin laam uh hi. Tuapa asihciang iin zong sawngsik iin sawngzuu lup uh hi. Siampipa in tuiphih Sawngmanpa leh Khua leh tui daupaina ding, Khuasiam tungah ngen hi. Sawngman a om ciang iin Khuasiam lungkim hi, kumpha hi, ci'n ngaihsun uh hi. SIALSAWM LAWM-ANNEEK. Sialsawm hun pen Lopawi manhun hi tawntung hi. Lopawi pen guahtuiluan tawh kizui ahihman iin, kumkhat leh kumkhat kibang khollo hi. Ahih hang iin khangthak te in, kumpi-naseem te leh sangnaupang te kimhun , April kha kipatlam hih ding iin kikipsak hi. KHUADO LAWM-ANNEEK Khuado Lawm-anneek pen anlakkhit ciang iin kihih hi. Khawhsa teng kaihkhop manphet iin kibawl ahihman iin, zuu tawh sa tawh kidiah pikpeek iin kibawlzo hi. Khua khempeuh kibangkim lo hi. Kumpi-naseem te leh sangnaupang te aading ngaihsutna tawh October sangkhak ciang iin kibawl hi. Ih pu ih pa te in, Biakna leh Ngeina hualkhawm iin nakalsuan uh hi. Ahih khempeuh uh a biakna tawh kitukkalhsak lo uh hi. Asiam leh Abiakna mangngilh ngeilo uh hi. Lawm-anneek paidan pen Sialsawm Lawm-anneek mah bang ahi hi. Meilah-saatni. Khuado Lawm-anneek kiginni pen Meilah-saatni ahihkeh Daai-an bawlni, ahihkeh Tangho sukni, kici hi. Zununsung zatding meilah(taakcim) kipua hi. Tuilam kihah hi. Han kihah iin kha-sapna kinei hi. " A si kha, ahing kha, hong ciah un, zuu leh sa ne ding hi hang," ci'n lobuuk aa suangthu te satpai iin khasapna nei uh hi Khuai La Khuaihawi te in, Daai-an bawlni tak iin la uh hi. Khangno nungak tangval omsunsun kihawk iin khuamualah pai uh hi. Khuang, sialki, daktal, phiit tumkawmsa iin khuaikhau len uh hi. Meilah dee uh hi. Meitang diamdiam iin innlam zuan iin ciah uh hi. Avengzui iin kidem uh hi. Tua nitak pen zanthapai iin lam uh hi. Khangno te hun hoihmahmah kumkhat sung angak ahi hi. Khuai-ai te pen asih ciang iin, khuai in thu hunsak ahihman iin siluang tho in bawklo, kici hi. Kauhawl Pansikni or Nekpini zingsang tung iin, innsimah kau kihawl hi." Dawihang ciah o! Kauhang ciah o! Inndawisia ciah o, gamdawisia ciah o, na zun namsia ei, na ek namsia ei, na ni cing ei, na kha cing ei,nakhua zuan o!" ci'n tuga heiga tawi in, bangsak bangkhang saat iin kitomsa in notkhia hi. Kongbiang atun ciang iin atugatawh pheiden ek mawk hi. Thau neite in thautawh kap uh hi. Ih pu ih pa te in dawibia icihtei hang iin dawi hawlkhia thei mawk ahih man iin, amau lungsim sungah dawi sang iin agolzawkhat abia aa kinei hileh kilawm hi. lawm-an ne ding aa kikaikhopna Lawm-an pen abawng abawng iin, akhil akhil iin awmkhawm uh hi. Daai-an bawlni zingtung iin Uupipa or bangkuapipa anau inntuamsa te kiangah banhawh iin, thu zasak hi. Sanggam-laizom bangkuapi-khat bang omkhawm ahihman iin abucing simpian te nopci mahmah hi. Zing-an neekkhit ciang iin kikaikhawm iin, anneih bangbang tawi uh hi. Vok luangkhat luangnih bang kigo thei hi. Khuado-vok ci'n agulding kiseh uh hi. Ei Zomi te ngeina-ah Zozuu pen cikhum bawngnawi tang iin kizangh hi. Pawlkhat taak(khaih) hi. Pawlkhat kipengnek hi. Innkuan kim in naungeek dong iin tanh kipia hi. Anethei-nailo te'n angaih khat hawh hi. Naupang te bang atap (amin tang te) te kihawh(ama neek tang iin pia) sak hi. Anneek ciang iin asin-angoi kiciamkim sak uh hi. Anneek khit ciang iin, mokhak numei te, amau nualam ciatah ankhol iin hawh uh hi. Nungak tangval lawmngaih nei te, zawl-an, zawlsa, zawlzuu kikholhsak hi. A vakkhia te hong tunkim hun, khuamial philhphelh ciang iin,beelpei sungah vutluak iin, innlim laizangah meiphual seh iin, mei kivak hi. Khuang leh zam kipusuah iin lasak kipan uh hi. Sialsawm leh Khuado hunsung iin sanggam kingaihna la, nu leh pa te ngaihna la, uupipa pahtawina la, nungak tangval lawmngaihna zawlla khawng bebek kisa hi. Unau sanggam tengmah kikawi iin la kipaihpaih mai uh a, ki-itna leh sanggam ngaihna khangmahmah hi. Thang Ho leh Lian Do te hun iin Khuado omkhopna kinei khin hileh kilawm hi. Khuado ma in, Lian Do in sihsan hi. Thang Ho daihawh iin pai hi. Thang Ho in a nau ngaihna la, sut a, a. Do nalingling, do nalingling e, gual in kumkhua do nalingling e, b. Gual in kumkhua do nalingling e, LDo han(khan,than) ah nau bang vakap tang e..........ci hi. Mihing pen kikholhkhopna tam leh kiphawkna kingaihna zong lian hi. Sialsawm Lawm-anneek leh Khuado Lawm-anneek pen sanggam kimuhna kikaihkhopna hoihpen hi. Pakzat seemseemlo zaw iin, puahphat ding leh thupibawl kik ding hoih mahmah hi. Tuhun iin kitangpek iin omkhopna haksa mahmah hi. Sanggam a omkhawm liailiaite a kingai te ahi hi. Thang Siangh Zogampalpi | 
