Feb3,2007 Lawki-Pupa te Zat Ki-uapna leh Panmun Sehna Thukhun. Note: Sanggam-Bul leh teek, Sanggam-Phamawh, Tanu-tapa... cih bang iin atuamtuam in kilo thei hi. Eimun ciatah zatdan lawhdan kilamdang kha ding hi. Nalungsim mitkha tawh thubulphuh enkawm sa iin natelsiam in. Ei Zomi te pen Nopna-Dahna ah ki-uapdiak minam ihi hi. Ki-Uapna Thukhun kiptak iin kinei hi. A-hau azawng deidan omlo iin tua thukhun te in huamkha kim lel hi. Panmun kisehna om dimdiam ahihman iin a-hau te khengval theilo, azawng te lah tasam theilo hi. Ihpu ihpa te pen thukpil mahmah mawk uh hi. Panmun kisehna banah a-hau te pen apua pan iin a-uap tamzaw deuh aa, a-zawng te pen taangpi pan iin a-uap tawmzaw deuh hi. Hau leh zawngleh panmun kisehna zuih kul aa kuamah giautaulo tasam theilo hi.
Hih ngeina leh thukhun te pen Lawki-Pupa te khun ahihman iin Zuu leh Sakuang tawh kizui den hi. Abul leh adawn zui iin Zuhawm-Sahawm kihamphat uh hi. Gamtatna ah zong abul te liantat iin adawnlam te neutat zawdeuh pah hi. Sanggam or Phamawh Zonna Sanggam kizon ciang iin, Pasal-lam leh Numei-lam kikhaikim ding iin kizongsuk hi. Tua panmun te pen Nopna-Dahna munah awngkhongsak lo hi. Ahihtheih keileh amau-tang mikhat cialteitei kul hi.Ei-tang aa dingpa pen "Puakdawn" kici hi. Puakdawn te pen ei-tan tang Zuu leh Sa kipia hi. Pasal-lam pan Thalloh ahihkeileh Bangkuapi ... Hih pen Phungsung leh Bangkua-sung panmun lakah Van lianpen kisuan ahi hi. Nopna-Dahna leh Zumkong-Mangkong leh akisapna khempeuhah thuvanpi hi aa, sanggam te tang iin kikham tawntung hi. Tua ahih ciang iin innluahpipa kiseh hi. Unau sungaa lungpham ding muanpipen ahi hi. Ihpu ihpa te in tualgal do uh hi. Khatlehkhat phu kila uh hi. Asanggam te phu ala-ngam ding Uu-pipa sangaa muanhuai zaw omlo zel hi. Kolbulh-khauhen tuak a omleh sutt hi. Leiba alohzawh keileh lohsak hi. Zii leh Ta aleizawh keileh leisak hi. Innsia-losia te vaan in puahsak hi. Thusia-thupha hawmding gelding khempeuh, Thalloh or Bangkuapi lo iin kikhensat lo hi. Zinkhak, Sanggam nihna, Bangkuapi-zom. ..Amah pen Bangkuapi zom ahi hi. Sanggam- muanhuai khat kiman hi. Thallohpi van giklua ahihman iin, apuakpih ding iin " Zinkhak" kici sanggam nihna kikoih hi. Hilhding gending, thuzaksak ding aman vaan hi. Khual-leh-tual pan zin-leh-leeng hongpai te zintun sehsak hi. Tanupi, Tuitaak, or Haitawi Innsung Tanupi pen Mokhak te lakah a uu penmah kiseh hi. Bangkuapi-thoih ahihkeh Innsungpi-thoih ahihkeh Pusa-thoih ciang iin Siampipa' tuiphih ding zuu taksak ahihman iin "Tuitaak" kici hi. Tuulpipa tuiphihna haikeu tawisak ahihman iin, "Haitawi " zong kici hi. Amah pen Nopna-dahna nasep khempeuh vaihawmpi ahihman iin Managing Officer ahi hi. Sawlla, Tanu-nihna, Tanu-nauzaw. Tanupi tawh kibang iin seemkhawm uh hi. Mokhak te sungpan ahamlam mah kizong hi. IInnsungpi thoih ciang iin sagolhna ding sialsawlmam leh Nuhdo-song aa suan ding sawlsan- singtehbawk la ahihman iin Sawlla kici hi. Amah pen tuhun aa Worksuperviser tawh kibang hi. Hih tanu nih te in, innsung nasep khempeuh buplak ahihciang iin vangik mahmah hi. Sihna ah sawtpi dammawh ompih hi. Azun a eek siak uh hi. Innma-loma nusia iin giahpih den hi. Amaugel makai iin tanukhak te nasep hawmsak hi. Beh-sabawl,Sanggamb ul thumna Beh sungpan sanggam-muancing zawdeuh kiseh hi. Nopn-dahna sungah gangawh akul leh aman vaanpah hi. Thallohpipa vaihawmna tawh kituak iin sasem ahihkeh sa aat iin hawm hi. Thukhun zui aa sa asemtheih keileh a siam te cial ding hi. Zomi te ngeina sungah panmun zui aa sa kihawm te pen atheepdeuh, avodeuh ki-encik mahmah hi. Asa-san hoih a sak keileh kinolh thei hi. Sa-tanh anolh leh ama panmun zong anolh ahi hi. Deihsak leh deihsakloh pen sasemhoih leh hoihlo tungpan sittel uh hi. Tua ahih ciang iin sasem te siam kul hi. Beh-thusa, Sanggam lina Sanggam kinaipih pen lakpan kiteng hi. Innsung lai-aatpi khat ahi hi. Sanggam bul leh teek kisehna te ciamteh hi. Nopna-dahna ah ki-uapna sum, a kipaipih khuttawi khemeuh ciamteh hi. Leenglapai miphazah, sumngahzah, an,zuu,cikhum bawngnawi kipia khempeuh ciamteh hi. Zubeel gual in zuu leih hi. Niangtui zatna munah niangtui awm hi. Innlam ciang iin, innkim aa ninpa nahtak te tom iin puahsiang hi. Hih teng pen pasal-lam panmun kisehna ahi hi. Numei-lampan Sunghpi, Numei-lam pan bul khatna..Ih zi hong paikhiatna bangkua bulpen kizong hi. Numei-lam pan iin thukhupih a lianpen ahi hi. Ih zi sanggam upapen kiman hi. Sungh-sabawl. ......... ..Beh-sabawl tawh naseemkhawm hi Nuphal...... ......... .........ih zi sanggam sungpan kithutuakpih kizong hi.Amau nasep pen Zawl nasepmah tawh kibang hi. Ton-Zupinun ciang iin zawl leh nuphal in antawi piakhawm hi. Sih ciang iin nuphal te pen mipi heusung iin inntek tutpih ding iin kizang hi. Sigui khit ciang iin mipi sigal te pen, hanpai tawh, inn kiciahpih tawh kikhenthang ahihman iin, innteekah kuamah omlo hi. Paunak iin," si-nung" kici hi. Tua hunsung teng zawl leh nuphal in innteek te zupeng kiciampih iin,dah la-awi sutpih uh hi. Si nungah langot-lagualnuam sak luanluan khawng kideihlo hi. Zawl........ ......... ......... ..Zawl pen ih neulawm ahi khangual ki-itpih te kizong hi. (Tong) Ton ciang iin song kisuisak hi.Aman pawlzawn iin song pua hi. Zanthapai iin songnuai-ah Ailawngto uh hi. Sialngawng kipua sak hi. Hih sanggam bul-leh-teek panmun pen akhang khang in kikhel toto hi. Hih Ngeina pen Pupa Ngeina Lawki hun iin muibun mahmah hi. Khangmasa Zomi ki-uapna pen kician sinsen aa. Christian sung nangawnah kipaisiang theilo hi. Thang Siangh Zogampalpi | 
