By Thang Siangh Feb 22,2007 Nuntakna-nei ganhing atamzaw in nuntak-khuasakdan tuamtuam kinei ciat hi. Lungsim pumpi cidam khansauna dingin, nasephun, anneekhun, tawlngakhun, gualnophun leh kimawlhun, biakpiakna leh thungetnahun om hi. Tua gamtatna khempeuh in lungsim-pumpi cidamsak hi. Hoihtakin zatsiam ding kisam hi.Tuni iin gualnopna ahi Zolaam leh Zola i kikum ding hi. Arts kici gualnopnalam siamna omkeileh mihingte lungsimpilna thakiamin ganhingmah bang ding hi.Gualnopna in mihingte kizopna leh muhna tangzaisak hi. Theihtheihna khangsak hi. Gualnopnahun tamlualeh nuntakna palausak hi. Mihing hoihna leh manphatna kiamsak zel hi. Nuntaksung hunzatzia pen kokim dimdiamin ahunhunin zang leng vitamine hoihpen sangin lungsim pumpi cidamna piangsakzaw hi. Tua ahih ciang, Minam leh gam domtohna ding mimal nuntakna domtoh masak kul hi. Mikhemeuh in hunte kokim tak-a izatsiamleh Zogam pen nopci mahmah lel ding hi.
Zolaam leh Zola Ih pu ih pate in Gualnopna-lam siamna hoihmahmah na nei uh hi. Missionaries hong khan ciangin hong khaam uh hi. Biakna ilaihmanin ngeina laih ding hilo hi. Christian biakna tawh kituaklo, dawibiakna leh dawi la, gal-aihna galla khawng cihloh laih kulse lo hi. Europe mite awtawh a kisa khempeuh pen Christian la hituanlo hi. Christian ihihna tawh Europe aw bek zattheih zong hilo hi. Amau hong huzaap ahihman amau aw kikawm hibek hi. Israel-Jews cihte in amau la mah, amau awkaihmah tawh tu dongin Pasian nabia uh hi. Azenzen iin Jesu pen Tonzang Innpi bangkua-ah hong suak hileh, khuangleh zam tatin zola tawh kipahtawi ziahziah ding hi. Tua kacih ciangin zola leh khuanglehzam tawh biakna bawl ding hong hanthawn kahi kei hi. Tapidaw ihihmanin zola salo ding cih, khuang,zam dak, zangin laamlo ding cihpen kitheikhial mahmah hi. Zomi khempeuh in zang thei. Zomi ihhihleh zo-zawlla, nulehpa pahtawina la, sanggam itna, zawlla, gam leh minam itna la, Pasian minphatna la, Zo-aw tawh kisa thei hi. Khuang, zam tumtheih khempeuh zangin ut bangin kilaam thei hi.Tua te in Christian hihna susia lo hi. Tangvalno kahihlai, ABM sungah khangno in ka-om hi. Jesu suahna muakin zankim12:00 dong lasa thungenin ka om uh hi. Zan 12:00 lianin Jesu suak cih ki-umlai ahihmanin, tuahun lianin awngziazua iin thau kilawnziahziah hi. Tua zawh ciang khanghamlam leh naupangte ciah uh hi. Nungak-tangval teng Tedim labu tawi in khuavakdong hanciam uh hi. Khuavaknuam vantaw hongval ciangin, kagei-a zokhuang kitung zam aa katumleh kavekpi un ding khengkhangin kalaam kha uh hi. "Kei aading tam khangsuangpi" acih hia, nuamlua in nisuahdong ka kikhenzo kei uh hi. Pawlpi upa kaikhawmin nasiatakin thu hilh kathuak uh hi.Zokhuang cihkhawng, sialki, zam cihkhawng ei tumding hilo hi. Laam khawngpen lawkite aa hi hongci khong hi. Khuangkhawng daak khawng pen Christian in atumleh Christian aa hipah hi. Lawki in atumleh lawki aa hipah hi. Piano leh guitar pen Christian aaleh lawki aading ci'n atuam in kibawl lo hi. Ih pu ih pate in laam namtampi nei uh hi. Phiitlaam, sawnglaam, laamsai, daaklam, laamgui, cih bangin nakhen hi. Khuangtumdan zong,phiitkhuangtum, sawngkhuangtum, daakkhuangtum, cih bangmah ahi hi. Phiittum kawmin alaam ciangin phiitkhuangtum in kitumpah hi. Daaklam zong akhuangtumtawh kizui pah hi.Laamgui pen kitawl theilo hi. Sunlehzan tatsatlo-in kilaamzo hi.A laam khempeuh in lasakawm uh hi. Mihonpi gualnop theihna hibang ngeina kuamah kim in neilo hi. Pasalte in numeite liangkopan kawi hi. Numeite in pasalte kawngah kawi hi. Tua pen ki-itnaleh kipumkhatna limleh liim ahi hi. Thakphuang unla a omsa nelhsiah kei un. Pyidawngsuh ni leh Chin National day, khawngin Zomite' bangci-laam hiam ci'n ka-en thei zel hi. Laam tuamtuam hong laam uh hi. A tamzaw kiphuangtawm ahi hi. Thakphuan ahoih hangin, a omsa nelhsiahna ahihleh hoihlo hi. Ih pu ih pate neihsa kanin anuamzaw om iin ka um kei hi. Kawl huzaap in honglawh ahihmanin kikawi detdat pen haihuai peuhsa, ahihkeh hukvai lanvai cin peuh maizumlawh kha ihikha tam kaci hi. Ngeina pen namdangte huzaaptawh maizum ding hilo hi. Zomi pupate ahoihna, alimna, athupina athukna leh azaina mangthangsak lo in kepcing ding kilawmzaw hi. Ei sangin tamzaw thahaatzaw lianzaw ahihmanin pi-etlua tuan ken. a. Mim bang pianna gui in suut leng gua bang hin nan lawm sang e. b. Lawm leh gual in hong lel zongin mauki bang kivan leng e a. Pupa langlam lenkhuangleh sialki betloh iin tul keileh kilawm e b. Betloh in tul keileh kilawm sailoh in khuang keileh kilawm e. Zomite kaihkhopna-mun, Zo-minam tawh kisai hunzatna mun khempeuhah maizumpih ding Zo-ngeina omlo hi. Zola gen(suut in) Nakhuang tum in. Zo-zuu hawm inla na la sa in. Mi khempeuh omtheilo in hong laam ding uh hi. Christian ihihna tawh Zolaam ngamlo a om hiam//Zola sangamlo i om hiam?? Zomi in Zola sa keileh kua in sa ding hiam?? Zomi in zokhuang tumin laam keileh kua laam ding hiam.?? Zomi abawl kua hiam?? Gualnopna-lam siamna apia kua hiam.. Tua siamna tawh A-Piapa pahtawi theilo ding hiam? Minam ngeina lahni khempeuh ah zat ding hi. Thang Siangh. Zogampalpi. | 
