Feb18,2007 Note: Nam =beh,khil,phung Nam leh minam kibanglo hi. Zo minam, Chin minam Nammin=Gualnam, sukte nam ect. Minam=Chin minam, Zo minam, Kawl minam. KI-UAPNA THUKHUN pen Zomi lawki-hun tawh kituak iin kilawm ngiaingiai mahmah hi. Ahi zong iin tua pen leitungdang tawh kizoploh hunlai ahi hi. Bangzah iin hoihse taleh ahunpai-zia tawh a kituah keileh, laih ding, puah ding hito zel hi. Ngeina hi ci'n puahngeikei mawk leng savun-umlui sung aa lenggahtui-thak thunmah bang ding hi. Christian Biakna leh Pupa te ki-uapna thukhun pen kituakthei taktak lo, lah kipaisiang taktaklo khat iin ki-om nimnum hi. Puahthakna upadi kician kikhunglo, omlo ahihman iin, minamdang te ngeina in hong huzaapzaw iin kipaipai lel hi.Ngeina aman ciang iin minam alang amangkhin ahi hi. Kampau aman ciang iin minambup amang ahi hi.
Tua ahihciang iin Christian-hun zui iin, ki-uapna puahphathuai kasa hi. Pupa Ngeina pen Lawki-hun tawh kitangaihmahmah hi. Si leh sa kizoppih sanggam honkhat ki-uapna ahihman iin, muhna toisak, minam itna zong toi-huamlua hi. Kiimleh paam tam gamla kimu lo hi. Beh-leh-nam bekmahtawh minsial iin lei kituantuan aa minam-bup aa ding khualna omnawnlo hi. Hih khang pen minmai-ah behmin suanhun hinawnlo hi. Gambup minam-bup khualhun ahi hi. Min mai-ah behmin suan pen khialhna omlo napi'n lungsim in ahuamkhak tawmlua ahihman iin minambup makai ding iin lungsim picing keileh kilawmsak hi. Hunlui ki-uapna Sanggamlam Numeilam Thalloh (sanggam khatna Sunghpi Zinkhak (sanggam nihna) Puu Tuitak (tanupi) Sungh sabawl Sawlla (tanu nihna) Nuphal Beh sabawl Veng thusa Beh thusa zawl Hih a tungaa bang iin ki-uap ihihman iin agalva aate kinakhel kullo zah hong suak mawk hi. Zomi te lawki-hun aa ngeina pen, amau-hun iin pauban omlo napi, tuhun gamlian, minam-lian leh miphunglun suahna ding leuleu nakpitak hong dongkholh leuleu hi.A namnam iin, akhil akhil iin, abawng abawng iin hong koih hi. Minamlian lungsim, gamlian lungsim hong paihkhiatsak ahihman iin beh khat leh khat kidem ki-elna tam iin gambuppi kithutuahna leh kikhual kikepna thakiam hi. Lampi-thak zon hun ahi hi. Khangthak Zomi te Ki-uapna ding Beh leh phung ki-uapna pan, khua leh tui ki-uapna-ah, khua leh tui ki-uapna pan gamleh minam ki-uapna-ah ih kalsuan ding hi. Nopna dahna ah sanggam uu leh nau pen paukullo iin kidelh lel hi. Ki-uapna pen, khuapi lian te Block iin kikhen iin khuaneu te pen khuabup vaihawmna hihsak huai hi. Sihhun aa ki-uapdan thu. Zomi te ih nat ciang iin, tanu te in suntawh zantawh giahden iin ki-ompih hi. Tuhun iin mipilgamah, dammawh geinai aa om kideihlo hi. A kilawhthei natna ahihleh Zato nangawn-ah kihawhsak lo hi. Cina anpiak-hun, zatuisut-hun leh kisilsak hun iin kidalna-tawh cina bawl uh hi. Agei-ah kual pihpih lo hi.Asih ciang iin avot-dei sungah seng pah uh hi. Ei kiangah tua bang tatak haksa hi. Ahi zong iin misi-luang sawtvei-lua tutpih pen lauhuai mahmah hi. Kawl te asih ciang iin singkuang sungah koihkhia pah iin, innmai-ah koih hi. Ei Zomi ten tua bang iin kihihnuam phalo hi. Ahih hang iin, siluang paihkhiat hun pen innteek dong lo iin, Hausa te leh Pawlpi siate kikup ding ahi hi. Nattom alauhuai pulnatna bang ahihleh manlang tak iin paih ding ahi hi. Natsau sih ngeina bang ahihkeh gamsi cih khawng zankhat or nikhat bang koih ding phamawhlo hi. Misi tungtangah hunzat pen ama Pawlpi in zang henla, sigui ding nasep tuamtuamte pen khangno nasep hileh, pawl kideidan omlo, beh leh phung deidan omlo khua leh tui ki-uapna suakpah lel hi. Meigong tagahte zong dongtang tuanlo hi. Kuakua sileh vengkhangno ten singkhuah khatciat, antang haikhatciat, ahihkeh a kipiazo bangbang dong uh hi. Ki-uapna pen azawng ahau kilamdang nawnlo hi. Khuasungah lukhat damlo lokho zolo a omleh Khangno ten nikhat vakhawhsak leh zoto pah aa, thazangtuam omlo hi. Mikang ten Unity is strength acih pen hi. Mimalte kipumkhat leh khuasung kipumkhat ahi hi. Khua khempeuh kipumkhat leh gamleh minam kipumkhat ahi hi. Minam kipumkhatna pen khuasungpan kipankhia ding hi. Tua ahih ciang iin, sanggam ki-uapna pan veng ki-uapna, veng ki-uapna pan khua leh tui ki-uapna, khua leh tui ki-uapna pan gamleh minam ki-uapna dong iin ih khantohna ding iin ngaihsunkhawm iin gelkhawm ni. (zopzop ding) Thang Siangh Zogampalpi | 
