Feb 17,2007 Note; Han= than, khan, san cih bang iin kilamdang hi. Misi te aading aa innlak in agawh ganpum pen sagual-go cilo iin siguina kici hi. Misi te kha tawh kihopih thei te pen mangmu or kamsang cilo iin vankah kici hi.Hanken acih ciang iin misi aading ngimna tawh a kigo ganpum leh van tuamtuam khempeuh gennuam ahi hi. Kuasah acihleh ganpum bek gen ahi hi. Dammawh-hawh kicilo iin dammawh-veh kici se hi. Zomi te isih ciang iin kilimbawl lua ihihman iin namdang te in hong theikhial uh hi. Misi adeihlua bang iin hong ngaihsun ngiau khong hi. Missionaries kimkhat in, Zomi te, lamto leh misi zuak leng hong lei ding hi, naci ngei uh hi. Zomi te ki-itna pen cikh mahmah hi. Ki-itna pen laknuam pusuahnuam mahmah hi. Zomi te ki-uapna thukhun hoih icih pen ki-itna tungtawn aa kikhung ahihman ahi hi. Sih ciang leh dongdan-hun ciang iin ki-itna lahkhiat theihna hun-hoihpen ahi hi.
Amau kilah-dan te Tanu te siluangpham ahi hi. Dammawh asih-gim aa kipan tanu te leh sanggam-bul teng in giahpih uh hi. Innteek zing-an nitak-an huansak iin amautawh nekhawmpah hi. Cina tutpih iin asap-khempeuh hihsak hi. Tuhun aa specialnurse ih kawmtawh kibang ahi hi. Asih ciang iin misiluang sawp hi. An a neekciang iin misi-lawnna khut sillo iin ne uh hi. Itlo atan ding lauman hizen hi. Misi-luang kikoih laiteng puanzawn iin lupih uh hi. Tuhun khang ten zangzo kei mawk ni mate. Misi-gui apibawl nop ciang iin, kha khatsung siluang kikoih iin, tho in abawhlohna ding iin tanu te in cing-thapai mawk hi. Tua bangmah tawh phunlo taulo iin anne thei lel uh hi. Tua bektawh manlo hi. Zingsang khuavak ciang iin, uu aw tho in, khuavak cin kap uh hi. Anneek-hun atun ciang iin, tho in, anne ni , ci'n kap uh hi. Luphun ciang iin, tun luphun ihmut hun lumni, ci'n lumpan se zen uh hi. Hih sang aa acikzaw akhaupai theizaw ding iin, ih lahtheih ding bang omlai hiam!!!!!!. Misi kigui dan. Lawki-hau te asih ciang iin,zupinungmah hilel hi.Vai lian mahmah hi. Hanken ding zong masa hi. Zuusa uh hi. Si-innteek bek buailo iin sanggam-bul teng zong vanlian mahmah ciat hi. Innlak sanggam ten zong meipum leh vok zang iin siguina (sivuina) nei uh hi. Lang'khet-ni Nopna zunun kigin-ni pen Innbawl-ni kici hi. Sih ciang iin Lang'khet-ni kici hi. Lang'khet-ni iin misi-lapna ding Lang' bawl uh hi. Misi-lapna pen Lang kici aa cina puakna ahihkeh misi puakna pen Taal kici hi. Gamsi te leh Zato aa si te Taal tawh kipua hi. Akha in Taal kai iin zuak thei hi. Tua Taal apaihna te gamsungah tuahsia-thei ci'n ki-um ahihman iin kilau mahmah hi. Lang'khet-ni iin si-lapna ding Lang bawl uh hi. Taanglai iin misi pen buuk lamsak iin , dintan khawng sang iin singkal kidawhsak hi. Tua tungah misi kisial hi. Langkhet-ni in han kipuahkhol hi. Hihneih Innbawl mah bang iin innka-khuam te leh tangban te kikhosak hi. Sih-tuitawi cin tuitawi ding nungak-4 khawng kicial hi. Tanu-khak teng in zanzuu ding zuu guang uh hi. Innsung dim iin zanzuu kine hi. Langkhetni zan pen dahla sa lo iin Galla,Sala, Tonla vive sa uh hi. Sai-ai te in Sai-zuu saibeelpi tawh kiluup hi. Zingsang khuavak madeuh iin si-zanpusuah uh hi. A tongnailo te kiangah "Sai aw e saimang aw e, nalet pal bang hanpih cia,..Nalet pal bang hanpih ta cia hawkguam nau bang sial ing e," cin sailatawh pusuah hi. A Tong sa te in. " Katong khuang aw sangzawm aw e, kahan khuang aw thang zawm e, ..Tonkhuang leh han khuang thuang e mual ii hem aa thangnah e.. tua asak keileh, Tong ii suan tong leleu e, hang ii sua hang leleu e,.. Tong ii suan leh hang ii suan aw khuakhang ciau bang pel mawng e. ci uh hi. Si pusuah ciang iin Si-pusuah pen zingsna khuavakma khatvei kipusuah hi. Tua pen zan-pusuah kici hi. Mizawng te in hihzo lo hi. Sun ciang iin khatvei kipusuah leuleu hi. Tua pen nitak sigui dong kilaampih hi. Innka-taangah si-pusuah ngak iin thautawh a uap khemeuh kigingsa iin na om uh hi. Mipi te leh sigal khempeuh in bikha-ap lam mitsuan dimdiam uh hi. Innsung aa naseem panmun-la te pen pusuaknuam-lua kisa iin vanpi-ging bang iin lumdimdim bek hi. Hong paikhiat ding petmah ciang iin pasal khat minsial iin,akap-aluupteng samto zakzak iin hong taikhia uh hi. Bikha aa kikhai zam leh inntual-kiu aa kikhai zam te zong innsung aa khuangtumpa tawh kituak iin nadawntuah ciakpah ngengngang keii hi. Bikha hongsuahphei phet iin thautawi khemeuh in lawnpah ziahziah hi. Amasa penin, Daak khuangtumpa, leh daaktum mi-3 hongpai masa hi. Tua zomah mikhon khaupesi bawm bang iin misi pen akap-nupihon tawh hong kiluaiphei neunau hi. Tua zomah, pasal khat in teipak hiam khat ataklamah tawi iin aveilamah siallum tawisa iin hong pusuak hi. Tua zomah pasal khat in a lutungah vamul sawnkai adim-a kisuang khu iin namsau pakzekzak khat leksa iin hong thuap leuleu hi. Tua khit ciang iin sialki-tumpa in thuap leuleu hi. Misi nungah inntek pasal teng lukun ngilhngelh iin maimual ngingeiisa iin zui uh hi. Daaktum te leh misi in, songpi kiimkot pah liailiai uh hi. Songpi sagihvei kiimkot uh hi. Khuangmai aa namlek te leh lamgui te in tuangdungkiimah inntual mongmongah kualpempam iin laam hi. Tonla bekbek kisa masa hi. Tua khit ciang iin galla leh sala kisut hi. Tua khit ciang iin Dahla ngaihnono kisa hi. Sigui-hun hong tun ciang. Siguikuan or paikhiatna ding hun ciang iin la laih leuleu hi. Tua pen sa-nolh, sanolhna kici hi. Tua pen khuang nawhmahmah iin kitum aa lasak zong nawhmahmah uh hi. Tua sanolh hun iin numei kihel nawnlo in pasal bekmah laam hi. A la pen adawn leh abul kibang hi. Abulte sangmah bang iin adawn in dawngkik zel hi. Sanolhna la a.Ngawk e ngawk e sangawk e ngawk e ..b. Ngawk e ngawk e sangawk e ngawk e a. Gial e gial e sagial e gial e b. Gial e gial e sagial e gial e.. a. Buai e buai e sabuai e buai e...b. Buai e buai e sabuai e buai e. a. Nial e nial e siahnial e nial e b. Nial e nial e siahnial e nial e Phual e phual e vaphual e phual e b. Phual e phual e vaphual e phual e. a. Za e za e saza e za e. b. Za e za e saza e za e Galman saman leh hihneisa tongsa te bek innah sanolh thei uh hi. Si apaikhitna ding iin la laihleuleu uh hi. Pasal khangham te paikhiatna a. Kawltei bunglet nadeihleh ngalpa-lian sial bang sun aw.. b. Ngalpa nasut zawh ciang in e nadeih bel ang aa sia aw... Akhuang sanma lasak kawmkawm iin paikhiatpih uh hi. Misi pen numei khangham ahihleh a. Za e za e saza e za e...b. Za e za e saza e za e ....a la tawpma iin paikhiatpih hi. Pasal khat kitom in thaulawn hi. Misi pen naupang khangdawnglai ahihleh a. Kavon tem bang nadeihleh kuangkung aa sial vahawl aw, b. Kuangkung siallah hawlzo ing e tem bang kadeih sui laang e. a. Kavon tem bang nadeih leh zangta vamat sak veh aw. b. Zangta namat zawh ciang aa e nadeih bel paai bang kuah aw. a. Dallum sawnkai nadeihleh kasuih bang sui kaleu aw.. b. Kasuih bang sui kalau aw e kavah bang vak kaleu aw. Misi paikhiatpih ding iin tanu thahaat te kiteel in kisut kawmkawm in kaikhia hi. Misisa nangawn paikhiat ding kiphal kikeuhlo laimawk hi. Kongpua atun ciang iin lasak tawlngapan hi. Sanggam bulte pen amau bulte ciat utawh kiciahpih uh hi. Siguite tunkikma in innteek pen hawmsawh mahmah hi.Khanglui ten khindailua agen ciang iin Sinung tawh kibang cithei hi. Innteekte pen thakhat iin hawmsuah lua ahihman iin Zawl leh Nuphal te in tutpiah iin zupeng kiciampih hi. Beh-thusa leh Veng-thusa zong peng-op uh hi. Ih pu ih pa te thukhun te kicing diudeu mahmah hi. Sinungah Dahla ahiphial zong iin langot kisa ngeilo hi. Inntek te ihmut dong tutpih uh hi. Innteek ihmusip aa anaksiat azak uh ciang iin kangtak iin ciahkhia uh hi. Nopna-munah aninih-ni pen kheklen-ni kici hi. Sihna-ah Khandal-ni kici hi. Hanah tanu te pai-in siluang hoihtak vakoih uh hi.Zuu leh an vapuak uh hi. Hoihtak iin avilkhit uh ciang iin ciahkik uh hi. Sanggam-bul teng nithum dong paithei uh hi. Nithum-ni pen Hansak (khansak) kici hi. Sihsung aa kisa Dahla tuamtuam. a. Napai veh aw tun leh kazua lengvanah mun muang veh aw. b. Keizong simlei aa tullo dia tuangtun muang zaw vevang e. a. Zangpeh mimkhau tongnaza nam vonkop aw ih tun vaivut suak aw e. b. Tuang non tunkal ngaklang e kankong suahkal ngak lang e.. a. Naa lawmlawm e naa sang e kawi-ang tan nalawmlawm e b. Kawi tan ma bang a pan masa sinlai hiam bang haat sang e a. Sumtual tulsing nun eng nuai ah, lia leh taang ih kim nam aw. b. En en ing ei ngaihmel lah mu tuam lo a, ih tung sunni tum aw e a. Vailo kuan ing khuamualah khawl ing ngaih kangaknan sunni tum tah e b. En en ing e ngaihmel lah mu tuamlo a, khuamual tuanglam tamtawn aa hei ngelngel e. a. Thei bang sen inn, bawh-al aa zin tong kadot gualkhan na khup aw ci e, b. Gualkhan nau bang kakhuplahna kahenluat simlei mual sang sangzaw e. a. Tung thangvanah si vangkhua ah, lungmuan damtui luangci e, b. Hingteng lung aa ngilhna ding in,sisa ten dawndawn ci e. a. Gamleng guikhau kaman zaw diam situi kadawn zaw diam aw b. Khang litui gam bang mang hen aw von Hau mah ngai ta zawng e. a. Thuumthuum hal aa tuahloh ding aw ih tong nem pam khong aw e. b. Mel aa muhloh thang nen huihkhi sokkhau bang kimanmawh e a. Thuumthuum lo leng cin leh katuai ngaihsial lo bang om leng e b. Ngaihsial lo bang ih om zong a, sinlai zangva bang apil ten khua angaai ci ding aw e. a. Kangaih aw e ngaihno aw e, phualva tuikheh no aw e b. Phualva tuikheh tungmu vanlai um bang khuaikhial zo ing e. a. Lung kazuan damtui in tai aw kasial zang huihkhin len aw. b. Lungzuang galkhua kadakdak nanlennang bang huang buang ing e. a. Zangkhen khawlciang kasai thei hiam ken hong sai dih ve vang e b. Sisa ten sai nawnlo ding aw lia nun pat bang sai ing e. a. Seino in sanggah hing e puvon in cialtham zawt e. b. Puvon sawmsial gawhsimna aw phualmul tuklu aa khu e a. Sawmsial gawh ka simna aw e si dumpuan aa tunn aw e b. Si dumpuan iin tunn ing e vaitho tan mang bang bawm e. a. Ka sawmsial ka ngaizawm aw e kavon Niang kangai zawm e b. Ka sawmsial sul aa hei thei a, von Niang mah ngai tazawng e. a. Taikhua val ven zangni suak e zang sawmsial zong heina bansam nau bang hong kap ding aw e b. Pahtang cialtham kigawi e kun, nunnop tanglaam ihi buang zong pupa saumang luumsak e. Ih pu ih pa te in Biakna leh Ngeina kilawm kituak tak iin zang thei uh hi. Zomi ahihna te aman kiamsak kikeuhlo hi. Tuhun ciang iin Pupa Biakna pan Christian sung ih lut ciang iin Ngeina zong tampi ihlaih hong kul mawk hi. Laihhuai om ahihtei hang iin laihhuailoh kepcing huai zong om iin ka-um hi.Ngeina mangcip leh Minam hihna zong pengtoto hi. Tua ahih ciang iin bangmunte paikhiat ding, bangmun te kepcing ding cih Biakna leh Ngeina thulu tawh suttoh lai ding iin lamen ni. Thang Siangh Zogampalpi | 
