Feb14,2007 Note: Tong, cih kammal zatdan pen Tongte, tong uh, cih bang iin kizang hi. Tonzo acih ciang iin Tongte uap dingaa pai cihna hi. Tongzo kici lo hi.Tonzo cih ciang iin Ton siim ding aa pai cihna hi. Tong or Ton Zunun or Zupi-nung. Tangthu sungah Dahpa ni-sagih zuunung ahihman iin akhuang dolhzo hi , ci'n kigen hi. Thang Ho leh Lian Do te unau zong "tong" hi ci'n Ton-la iin kisa hi. Mizo leh Chin State sung-a om Zomi te in zong Khuang-chawi naci uh hi. Ton-zunun pen Zomi lawki-hun aa khang kidemna sungah a thupi pen tawpna ahi hi. Khankhat iin nihvei kitong thei hi. Amasa iin sialkhat go hi. A kik ciang iin sialtal khat leh sialpi khat go hi. Tua pen SIALKOP GO or SIAL- KOPGAWH kici hi.Tatdan a kibanglian kei zong iin Ton-zunun pen Zomi-nam khempeuh in neikim uh hi. Zo-suan khempeuh in buuk (tuibuuk) ateepmah bang ahi hi.
Hihneihna pen aakmit-etna hi aa, Ton-sialkopgawh pen Khahualna ci uh hi. Khanglui ten asepkhat pepeuh pen mungtup omlo iin seemmawk lo uh hi. Sihnung nangawn iin a kha uh nupakop asuahlaina ding tupna ahi hi. Zi leh pasal hihna pen kipsak khosak mahmah hi.Tuhun khangthak te tawh kikhailua zen hi. Nupa tungtangah zong ih pu ih pa te dinmun pen Pasianthu tawh ki-aihual mahmah hi. Ih pu ih pa te tungah diknathu ahilhhilh Kha pen Pasian kha longal adang hilo ding hi. Puan kikhuh bang himawk leh ahonkhiat ciang iin Jesu nanui seisaileh kilawmsak mawk ing. Atheihloh uh hang iin Pasian-kha tawh ton taktak uh hi. Hih zununna pen gualnopna mawk hilo hi. Kiginkholhna Ni-8 sung tawntung zuunung ding ahihman iin, nasiatak iin kiguankuak kul hi. Kumpha-to uh hi. Tuk-anlaak khit ciang iin tuktung ahoihleh sawmngam pan uh hi. Thallohpa or bangkuapi tawh kikum masa hi. A kingaapleh zinkhak leh sunghpipa tawh kiho uh hi. Tua nihte zong a kingaapleh khensat iin a niiding sehpah hi. Sagual-go ding te kibeng. Ton ciang iin inntek bek in gango lo hi. Sagual-go ding kibeng hi.Beng cihpen sawl cihna ahi hi.Kammal zatdan nangawn amunmunah khense uh hi.Bulleh-teek teng banah sanggam leh tanu-khak lakah deihdeuh leh kilawm asakteng beng uh hi.Sagual-go ten nungzui nei uh hi. Amau bulleh-teek ciat in zui ahihman iin khuabup iin bangkha(ciamkha) thei hi. Kha-3 sap iin zunun-sung kizang ding taiteh kideng hi. Ahun atun ciang iin zuu pen geii (cik or cil) mahmah hi.Taitehdeng cihpen zuu sa cihna hi. Zuu sa cihpen zuu-bawl, zuu suaksak cihna hi. Misam-tuitawi Gualnopna pen khangham bek in picinzo lo hi. Khangno kihello iin nasep kizo lo hi. Khangham te in vaihawm-lam si aa khangno te in seem hi. Khangham leh khangno kithuahdan siam leng pawlsung, khuasung, gamleh minam thahaat iin khangto ding hi. Ih pu ih pa te in, khangno te panna ding mun geelsak uh hi. Amau-mun zui iin mapang ahihman iin vai-khempeuh nopci hi. Innteek gamlumh-suah ding iin tuitawi-misam khangno nungak leh tangval kihelhkim iin 30 pan 40 bang cial uh hi. Tuitawi cih ciang iin zuleihna ding tui, sahuana ding tui dipsak ahihman iin, nungak te pen Tuitawi minvawh uh hi. Misam cihpen khual-kohding a omleh tangval te kipaisak ahihman iin, misam kici ahi hi. Misam-tuitawi te in kha-3 sap iin zunun-sung zatding sing ek uh hi. Ehsa iin gamsungah akeu ding iin koih uh hi. Tuitawi te in inntek te taiteh denpih zel uh hi. Amau nasep-ding poimawh dang a omkeh, khuangleh zam tat aa laam ding lasak ding nasep lianpen ahi hi. Zawl in sialgawhna ding sialkhau heek hi. Inntual laizang aa kiphut ding songsui cial hi.Tua song pen gawhsimna hipah hi. Songka khat leh meipum agawhzah behlap iin songmaam kiphutthuah hi. Tanu te in tonsung khom ding meilah-saat or meilah-pua uh hi. Ton-hunsung kalsuanzia. Ni-8 sungteng zuu nung ding ahi hi. Nisim sepding vai-khempeuh sehkholhsa ahi hi. Nasepna zui iin a ni te minvawh dimdiam hi. Innbawl ni. Pansik ni Sapi ni Sagual gawh ni Tanu-sagual gawh ni. Taangpi antawi piak ni. Tanu antawi piak ni. Zawl leh nuphal antawi piak ni. Innbawl ni. Tong te inn pen nigiatsung mipi-khawlna leh gualnopna ding ahihman iin alauhuai zumleh hiam khempeuh kihemsiang hi. Kangmei-patau omlohna ding iin ninpa-nahtak kiphiat siang hi. Innkhuam khempeuh kisukip hi. Innka tuangdung, tangban te hoihtak iin kihen hi. Innka te akho ding iin zawltungah kiptak iin kitep hi.Tuinak kipuah hi. Um leh beel kisam khempeuh kaihkhopsa iin koih uh hi. Gan-gawhding te innnuai-ah khum uh hi. Tuitawi te in sing-ehkeu nawn uh hi. Pasal te in meiphual sehding singluang pua uh hi. Teektat te leh tanu te'n innsung kisam khempeuh vaankhawm uh hi. Teektat cihpen beh sung aa sanggam nungak leh tangval laaite gennopna hi.Zawlpa in a sialkhau-heek hong koih hi. A kisam khempeuh kimsak dipdep hi. (a) Khau vasat khau vasat aw zawl Thang aw khau vasat aw, (b) Zawl Thang aw khau vasat sial khihna di, kakhuasik zang ei zawl e... Nasep khempeuh azawh uh ciang iin zuu-mahtawh kikhimpah uh hi. Tua nitak iin Tonh-la mah sa pah uh hi.hi teng pen Innbawl ni nasep ahi hi. Innbawl cihpen Christian ten kigin ni icih pen ahi hi. Pansik ni Pansik-ni iin lawigawh ci'n voktal khat kigo hi. Khuangsua kici thallohpa leh ama nungzui bullehteek teng in sagual-go uh hi. Thallohpa in meipum agawhleh songmam khat kiphutthuah thei hi. Meipum cihpen bawng tungsiah ganlian genna ahi hi. Innsungpi thoihna vokpi khat leh voktal khat go uh hi. Innsungpi pen pawlkhat in bangkuapi thoih zong ci thei hi. Dawipi thoih aci zong om hi. Pusa thoih zong kici hi. Nupi pawlkhat ten Pusa thoih ding acih tang iin Tong ding peuh ci thei uh hi. Tong cih pen Innsungpi thoih tawh kibang hi. Inntual-kiu sialkong sakah alu cialnih aa kigeek Nuhdo song kiphut hi.Tua song tungah innsungpi thoihna-sa anamkim kila iin, akhil khit ciang iin sialsawl-hiang leh sawlsan-hiangbawk tawh henkhawm iin suang uh hi. Ton-sialgawhdan Sun nikai-hun pawl in song leh gawton kiphut khin hi.Nitum-madeuh khanglui sialhawl-hun iin sial kigo hi. Tua sialgawh lap ding iin khuazang in huansak inntual-kiim dim iin na omkhol zo hi.Sial go ding pen misam te lakpan tangval thahaat kiteng hi. Sialgawh pen tangval te ahang leh athahaat kidemna-mun ahi hi. Sial pen khihsa iin khum ngeilo hi. Sial pen sialkongah siah iin tuun uh hi. Songlamah kaii iin song tungah khau vial uh hi. Sialtal kitom kawm iin kongpua-lam taii ding iin hanciam hi. Tangval te in songphung atunna ding iin hanciam uh hi. Tua bang aa ahaatzaw kituh aa a kitom sungteng uh mipi'n muhnopsa mahmah uh hi. Tua bang iin tawlpi-khat kimawlpih uh hi.Sial pen gimmahmah ta hi. Sialkhau len te lah tawl hi. Sial pen henton iin bikha-mai san suangphah gei-ah sial hi. Tuulpi, Phungsung Siampipa. Beh sungah Tuulpi khatciat kinei hi. Sialgawh-hun sung iin innsungah Tuulpipa kigingsa iin om hi. Tuulpipa pen siampi-puan silh iin vaphualmul totkawmsa in sialtei khat tawi iin hong pusuak hi. Sial kisialpai mai-ah angngatsa iin ding iin, phuisam nemnem kawm iin taiteh-tui buak iin ateipi tawh asut khit ciang iin, nungheilo iin innsunglam zuan iin paidildel hi. Amau-hun iin et ding pawidang tamlo hi. Sialgawh-et pen kinasia ngaihsut mahmah hi. Khanglui te'n mitam agen ciang iin "sialgawh en bang" cithei uh hi.A ciah uh ciang iin nungak te in tangval-hoih amuh uh, tangval te in nungak-hoih amuh uh kikum in bakvaat bang uh hi. Sialgawh-man ciang iin kuamah ciahlo hi. Tuulpipa hong pusuah kingaak hi. A tatdan khempeuh teltak iin encik hi. Tuulpipa in, gawhsimna-lim ahi, among bepiteh-hing tuitawh akkeng kipia aa kizem puanzaa-kaang tawh aliangkhuh hi. Mu-khasiik leh akgia-sawnkai totsa iin taiteh-uum khat leh teipak-hiam khat tawi in hong pusuak hi. Siampipa mai-ah Tanupipa or Haitawipa in makaih hi. Tuulpipa bikha hong suah ciang iin mi-khempeuh in khutbeng iin awng uh hi. Hentonsa aa suangphahlam nga aa alum, sial angngatsa iin taiteh-tui theh zeuhzeuh iin phuisam hi. Sial-taklam avokdawt te' sun ziau in innsunglamah tumkik hi.Tuulpipa in, sial asutma iin si leh hoihlo hi. Sialngawng ki-aatlo hi.Innsungpi- thoihna bangmah iin kigo hi. Phaitam-tualah misam leh tuitawi kibuphual hi. Innka kidawhsak iin ni-8 sung tawntung anneekna leh tawlngakna, gualnopna-mun ahi hi. Nasep-silbawl dang a om keileh la sa iin khuang leh zam-ging kitawlnga sak lo hi. Tanu te in innsungpi luah iin suntawh zantawh lumziahziah uh hi. Song te in songnuai-ah zanthapai iin ailawng-to uh hi. Ailawng-to cihpen ailawng lasa cihna ahi hi. Damtak iin vei ngiai ngiai iin sa uh hi. Sapi ni Pansik-ni zingciang zingsang-tung iin zuu beel-6 kiluup aa, songnuai aate kine sak hi. Vaihun pawl in beelgol mahmah 5 kiluup leuleu hi. Sialzu-meh ci'n vok khat kigo hi. Tongngei teng hawmsak hi. Phungdelh-zuu leh puu te zutawi Sapi-ni iin Pansik-ni aa kigo sialsa kihawm pan hi. Phungdelh-zuu kici beh-nautang te delhna leh Puu te guan zuu khempeuh kigualkhawm hi. Puu te in amau innkuanzah zuu tawi in zanzuu in kizang hi. Tua ni iin puu te tanh sa-ngawng kipuasak hi. Tua ni in Puu te makai iin songpi kimkotah tuangdung zui iin bikhalap dongah kual pempam iin laam uh hi.Innka-dawnah meiphual kisep hi. Laam aman ciang iin meiphual tuanmit uh hi. Tua ciang iin Puu te hun abei ahi hi. Taangpi sagual gawh ni. Sagual pen agol theithei kidem hi. Tua ni iin Zinkhak, Sunghpi, Puu, Beh-sabawl, Sungh-sabawl, Zawl leh nuphal in sagual go uh hi. Taangpi sagual-gawh khempeuh ago te in aphei tutphah uh hi.Sagual kigo te sehthum suah iin Tong te, Zinkhak, leh Khuangsua hawmsak hi.Amau ngah te amau bul leh teek hawmsak kik ahihman iin zong val tuanlo hi. Amau san uh amau bul ciat nahawmsawn zel ahihman iin innmi tam huamkha mahmah hi. Sa ago khempeuh in zuu beelpi nihta luup-a, Innsung leh innliimah khen hi. A zuu pengnek uh hi. Abul teng in sakuang umm masa a zuu kileepsak hi. Thusa te in sagual-go te kiangah sangoi-tumkhat ta ngen aa, beh-papi te tawh kuang um iin nekhawm uh hi. Khuangkhuh ni Khuangkhuh-ni pen Zinkhak-ni zong kici hi.Tua pen taangpi sagawh-ni tawh kituak hi. Puu-nautaang leh beh-nautaang teng in sagual go hi. Zawl leh nuphal in zong go hi. Zuu kiguang khempeuh bikhalaap pan pan iin abul zawdeuh te zuu gual masa hi. Nitak-lam iin Zinkhakpa or Sanggam-nihna in sa-solgep leh sing sawh iin, taangngansih tawh lomkhawm hi. Innkiim aa laam-en te bak kawikawi hi. Nitum-kuan iin meiphual tuan iin "khuangkhau kitat" ci'n khuangtum tawlnga uh hi.Tua aa kipan iin zam leh khuang kitat nawnlo hi. Tanu gawh-ni sun-thapai iin zehtang uh hi.Zam leh khuang kitatlo cihpen gingsaklo ci nuam hi. Tanu gawh-ni Pansik-ni aa kipan Tanu sagual gawh-ni dong pen a ni-4 ni ahi hi. Zubeelpi nihta guang iin taak uh hi.Taaksa iin sialkipi tawh kihawm hi.Sa-sungkua thau tawh siallu zuut iin innsungpi baallei suutpi tungah suang hi. Tua ni iin zehtang uh hi.Jews, mikang te bang hileh 'Observes the sabbath' ci ding uh hi. Biakna leh ngeina pen kikhenlo iin tonkhawm ngiatngiat hi. Ei Zopau iin zehtang kici hi. Khuangkhup-ni ci'n khuang leh zam kigingsak lo hi. Nitum ciang iin khuang leh zam gingkik thei hi. Laisiangtho nisehdan tawh kibang lua hi. Nitumkhat pan nitumkhat dong cin laisiangtho in gen ngiat hi.Ih pu ih pa ten tua pen koipan angah ahi tam???? Taangpi antawi piak ni. Sialsawl-hiang bawkkhat, luisunggelhau- hiang khat leh sa bak-3 khawng tuultawh khil inhenkop hi. Zingtung iin gawton tungah suang hi. Tangngansih leh sasolgep sawhsa iin pua uh hi. Misam-tuitawi ten amau kham ding khenkhia iin kibak iin ciakziazua uh hi. Hizah aa nuam ngeina pen mi-namdang te lakah omlo thei mai ding hi. Antawi-pia khempeuh in zubeel golmahmah nihta guang uh hi. Tanu antawi piak ni. Antawi piakdan kibangkim hi. Tangngansih leh sasolgep tawh satui tawh khamtak iin ne uh hi. Zawl leh Nuphal antawi piak ni. Zawl leh Nuphal antawi piakni pen pawlkhat ten taitehpho te antawi piak ni aci zong om hi. Aneeksa taiteh te phokik iin zuu mah iin bawl kik hi. Zawl leh nuphal in taiteh atuisuuk in phosak hi. Zehtanna Pasik-ni aa kipan ni-10 sung Tong-nupa te in zehtang uh hi. Kongpua pial lo hi. Mikhual zintungsak lo hi. Akha bei mateng khuang leh zam kigingsak lo hi. Zehphi a om leh luang in sawng ci uh hi. Kidawm mahmah uh hi. Sianhong Salu khatpeuh tawh sian kihong thei hi. Gamsa-lu khat innah tunpih aazuu nung uh hi. Tua pen sianhong kici hi. Khua khempeuh tatdan kibangkim lo ding hi. Hih pen Saizang-ta ngeina ahi hi. Dahpa khan iin ni-7 zuunung ci'n kigen hi. A khuang dolh ahihman apholeh ni in la ci uh hi. Tua khuang pen deihpeuh ngetna in kizangthei hileh kilawm hi. Sia khat thuhilhna ah US visa ngetna ding iin Dahpa khuang lunggulh nangawn omtuak hi. (a) Tulaitak iin bang kangai hiam, Dahpa khuang tawi ngai ing e,, (b) Dahpa aw na khuang hong tum veh aw khuakiim daiteng tho sak aw. Zomi te tangthu sungah Thang Ho leh Lian Do thu kinak gen pen hi. Sawtlua keileh kilawm hi. Amau unau pen tagah kiphong hau mahmah ahihman iin Ton-zupi nung uh hi. Amau akhoi a Nii pen Tonzo in vapai hi kici hi. Tagah kiphong Thang Ho leh Lian Do tangthu pen Zomi te kihehnepna leh kihanthotna pipen ahi hi. (a) Thang Ho Lian Do a nun kuangpi'n khup nuai aa siatlei suak kasa aw e (b) Siatlei suak al bang adahman aa Geeltui ah ni bang alun a khuakhang phaipi pak abang aw e (a) Thang Ho aw naidial hong khim veh aw Niinu tual-ah tang hong laam veh aw.. (b) Tang laam ding kamel alawm lo e, katamgual kai aa kazak aw e (a) Thang Ho leh Lian Do in e akhawh sawmtang thang aii e (b) Akhawh sawmtang thang aii e alam sawmsial lian go e Nukik-nei, unau-tagah nihte pen a uu vaphual iin leeng hi. Anau pen nuamsa iin "Tong" hi kici hi. A tonh zo ding iin a uu vaphual pen sam hi, ci'n tangthu sungah kigen hi.Tua phawkna in, Tong khempeuh in, vaphual antah gawton tungah koih uh hi. Tua ahih ciang iin Ton Zupinun pen Zomi hihna kiciamtehna Lim khat ahi hi. Amau hun iin Dawibia ahihman iin dawibiak ngeinatawh tonpah hilel hi. Dawibiak ngeina kihelse loin Zomi te ngeina tonh-pawi ci'n puahto leng zong pianglel leh kilawm kasa hi. Ukpi-ngeina adeihlo tang-mipil Song Thei tong ngei hi. Tuulpi or Siampi zanglo hi. Phuisam in sial sunsak lo hi. Zoptoh lai ding... Thang Siangh Zogampalpi | 
