UNITY lamkhianna ding lampi khat

UNITY lamkhiatna ding lampi:
By Tual Khan Suan 
Gamleivai (politics), biakna (religion), kampau leh mun leh mual zui a kibatlohna te hangin Zo minam te sungah UNITY pen a kilam kik zo nawnlo ding zah in sia khin hi. Gamleivai tawh kisai nasep zia, biakna vai tawh kisai na sepzia te ah kampau leh mun leh mual zui a kibatlohna te meiletin nei lua i hihman un i ngimna kitung thei lohi. Kibanglo i hihman in unity cih omthei ken teh, i kikhen ding mah hi cih thu meilet in nei leng thu manlo pi a hihi. A hangin leitung a om huih dik nuntakna nei khempeuh kibang kim linlian cih om lo a, kilam danna tampi te kawmkal ah UNITY kilam khia thei cih i tenna leitungin hong lak zo hi.

Innkuan, khua leh tui, kipawlna leh minam gam (nations-state) te puksia lo in a dinkip theihna ding a kisam thu bulpi pen khat in UNITY cih pen nial theih loh hi.Mihing te pen a tangtat nam hilo a, a hon a teng khawm nam i hihi. I paunak sungah " Ngasa in a tam manin sih lawh, mihing in a tam manin nuntak lawh" a kicih mah bangin mihing te pen khat guaka i tangtat sangin a hon in teng khawm leng nuntakna baih zaw bek thamlo in tampi tak hoihzaw pek hi. Hih thu meilet in leitung minam tuamtuam te'n a mau khantohna ding ngimna tawh kipawlna tuamtuam bawlin UNITY lamkhiat ding hanciam uh hi. Tua bang pawlpi tuamtuam te pen ngimna leh tupna tuam tek a hihman in lamkhiat zia kibang lo hi. Pawlpi kilam khiatzia siksanin pawl khat in UNITY ngah takpi uh a, pawl khat in ngah lo uh hi. Tua bang a pawl khatin UNITY a ngah lohna a hang pen tua pawlpi sunga om dongta (member) te kibatlohna te kibatsak zawhloh man hi zaw lo a, UNITY ngahna ding a kilam khiatzia thu hang leh tua kibatlohna te  theihpihna (recognition) kipiak tuah sangin kibatsak dimdiam ding a hanciamna hang te hi zaw hi. Cihnopna ah kibat kim dimdiam manin UNITY ngah ding hilo a, kibatloh hangin zong UNITY kilam thei veve hi cihna hi zaw hi.

 UNITY bangci lamkhiat ding

Zo minam (nation) te pen i tenna mun leh mual, kampau zui in namke (tribe) leh tua namke (tribe) sung pan behphung (clan) tampi om lai i hihmanin kilam danna tampi nei minam te i hihi. A diak in tua i kilamdanna te pen:
  1. Gam leivai(politics)
  2. Biakna (Religion)
  3. Lai leh kampau (literature and Language)
  4. Ngeina (Culture) te ah ki mu thei diak hi.
 1.Gamleivai (politics)

Gamleivai (politics) kipawlna pen thu meilet (policy) leh sepzia (programe) zui in kipawlna tampi a om hangin a tamzaw i ngimna pen i minam leh gam hoihzawkna ding mah hi tek hi. Minam leh gam tawh kisai i muhna zia kibang khin lo ahih manin i sepzia zong kilam dang pah hi. 1990 kum kawlgam kitelpi na ah Chin National League for Democracy (CNLD), Zomi National Congress (ZNC), Mara People's Party (MPP) leh party tuamtuam te in gam leh minam a ding na sep utna hangin pawl min tuamtuam tawh kitelna ah kidem tek hi. Tua bang party tuamtuam te thu meilet (policy) leh sepzia (programe) te kibang khinlo hi. Galvan tawi kipawlna lam en leng zong Chin National Front (CNF), Zomi Re-unification Organization(ZRO) leh min dang tuamtuam om ngeingai hi. Tua galvan tawi kipawlna khat leh khat en leng zong thu meilet leh sepzia kibang kim het lohi.

Ahizongin Party kipawlna tuamtuam te leh galvan tawi kipawlna tuamtuam te sungah kilam danna tampi a om mah bangin kibatna zong na om veve hi. A tawpna ah i tupna (goal) pen i gam leh minam a ding mah na hi veve hi. Tua hi a, gamlei vai sem makai te in i kibatlohna te leptuah a kibatsak sangin i kibatna te kaikhawm in na sepkhop theihna ding ngimna tawh 11th April,2004 kumin Chin National Front (CNF), Chin National League for  Democracy - Exile (CNLD/E), Mara People's Party/Liberated Areas (MPP/LA) and  Zomi National Congress /Liberated Areas (ZNC/LA), te makai in Political Affairs Committee of Chinland (PACC) hong phuan khia uh a, UNITY na lam khia uh hi.

  1. Biakna
Biakna zong i biak Pasian a kibang a hih hangin i biakzia leh i sanzia te kilam dang ahih manin pawlpi (denomination) tuamtuam tampi tak in i kikhen hi. A beisa hun in tua pawlpi tuamtuam te sungah UNITY kilam khialo bek thamlo in tuhun ciang zong tua bang in UNITY lamkhiatna ding malakna om nailo hi. Roman Catholic (RC) te sungah pen a paizia uh tawh kizui ( bulpi pan vaihawmna paizia zui in) vaihawmna khat peuh ah haksakna tam omlo a, UNITY a om tawh kibang lelhi. Baptist (Tuiphum) sungah zong makai masa te in UNITY na lam khia ngei uh hi. Tua in zogam sunga om Baptist pawlpi mi khem peuh convention khat sungah na luang khawm ngei uh a, tua in Zomi Baptist Convention (ZBC) ahihi.A hizong in zomi te kamsiat man i ci dinghiam 1995 kumciangin tua UNITY pen ki khen zak hi. Tua hun pan in a omsa UNITY kisia suk tektek a, a beisa hun a convention khat sunga om mi te tu hun in convention thum sungah i kikhen thang ta hi. R.C leh Baptist sunga om lo pawlpi (denomination) dangte khat leh khat zong UNITY om tuan lo hi. Pawlpi sungah vaihawmna noptuamna dingin sepzia zui in kipum khatna ding lampi a kigel hangin pawlpi (denomination) khat leh khat kikal ah UNITY lamkhiat na ding malakna om lo hi. I biakzia leh i sanzia leh bang zah takin a kilam dang phial zongin i biak Pasian khat hi a, tua kilam danna te kibat sak sawmna tawh UNITY lamkhiat ding sangin a omsa i kibatna bulphuh in UNITY i lam khiat ding a hihi.

  1. Lai leh kampau
 Zo minam te lai pen i pau awsuah zui a ki lemtuah a hih. I tenna mun leh muah zuiin i kampau , awsuah te kilam dan hi. I kampau leh i aw suah kilam dang ahihmanin i lai gelh zia zong kilam dang pah hi. I kampau leh awsuah te a mun leh mual zui in kilam dangna tampi a om hangin kibatna zong tampi ( Sia Khoi Lam Thang thesis zui in) om hi. Tua hi a, i kibatlohna te theihpihna (recognition) kipiak tuahna bulphuh in leh a om sa i kibatna te tungah UNITY lam khiat ding pen kisam hi.

  1. Ngeina
 I gensa mah bangin Zo minam sungah beh leh phung tampi om a hihmanin i paizia ki bang lohna zong tampi om pah hi. Beh khat leh khat pen sa hawm zu hawm zia a kipan nopna dahna ah vaihawm zia, gou leh gamh kiluah zia te kibang het lo hi. Khua sung khat a teng khawm nangawn beh leh phung kibatloh manin paizia kibang lo lai hi. Ahizongin  beh khat leh khat, phung khat leh khat te in tua i kibatlohna te theihpihna (recognition) kipia tuah tek hi. Tua a hihmanin beh khat phung khat i paizia te mangthang tuanlo hi. Beh khat leh khat, phung khat leh khat kikal ah a om sa UNITY a siasak thei ding thu te ah thukham (law) tawh thulai gen in mi khempeuh san theih dingin thu kitam kim sak hi. Tua hi a, i kibatlohna te zong  mangthang lo in leh thulai genna tawh UNITY kilam khia thei hi.

Thu khupna :

UNITY lamna ah a kibanglo te kibat sak sawmna in a om sa UNITY siasak zaw a, kibatlohna te theihpihna (recognition) kipiak tuahna in UNITY ngahna ding thapia zaw hi. Kibat kim dimdiam ciang bek in UNITY kingah hi lo a, kibatna om sunte tungah zong UNITY kilam thei hi.

Suanpi
Bangkok
Date: Sunday, December 26, 2004, 2:23 AM

By on

~ ~