Feb 11,2007 Tualgal-do hun Hih ngeina leh la kisa te pen Tualgal-do hun, Phu kilaak-hun tawh kizom ahi hi. Ih pu ih pa te khua khatleh-khat na kido uh hi. Phu kila iin kithatthat uh hi. Galmanlo te pasal kician iin kisimlo hi. Galman te in aiipah uh hi. Angawng tan iin khuamualah suang uh hi. Tua te gamlapi pan hilo hi. Khuaveng khuapam pau kithei vive ngentangmah hilel khong hi. Kapa in laplai ahihman iin tangthu bang iin honggenpih zel hi. Kapa pen pasalno ahih laitak iin, apii in, " Ka tu aw, gal namatleh guntui tawi ning, tua tawh sahuan iin zuleih ning," cin hanthawn ngei hi. Kapa'n gal-mantakpi aa, tua ciang iin la dawngkhat apii paih hi. (a) Kapisei tawh ciam ing e kani-nu tawh lal nathahleh khang-guntui tawi ning ci. (b) Khang-guntui tawi khuasuakmual nakhum zuk am, tang laithah-lu khuamuah ah, alvan bawm....naci hi. Hih la pen khangthak awkaihtawh sak ding hilo hi. Khanglui ailawng-la awkaihtawh sak ding ahi hi.
Kapa' galmat laitak iin khangno-lai ahihman iin, pawlkhat in thusimlo hi. Amah'n la tawh kaapkik aa, (a) Ih khuamualah lailu kasuan nun ameng nam vel veh aw, (b) Anun dawnglai palbang kaban paal ahul kha ding aw e...ci hi. Amau-hun iin galman-saman thei te zahtak pia uh hi. Zukhum pen leepsak uh hi. Sakuang uumsak uh hi. Mikang te hong khan ciang iin Phu-kilakna beisak hi. Ahih hang iin khangthak te sungah tua lungtang mangtuanlo hi. Kawlgam in Independant ngah aa kipan Chin State makai-ulian kineitoto hi. Ih gam leh ih minam aading iin naseemthei khatbeek omlo hi. Tua pen Ei leh ei kihaza nasepna khat peuh kithukimpih cih omlo hi. Tedim puah ding iin kithawileh mualpang aa ten su-nawngkai iin kidinkhawl hi. Falam puah ding iin kithawileh mualpangkhat aa ten su-nang iin dinkhawl sak. Haka puahnuam iin kithawileh mualpangkhat aa ten sunang zel iin Chin State khantohna ding kuamah gamtang theilo hi. Tu-mahmah iin zong Ciau pan aa motor-lam kito ding pen kiheikhia iin Southern Chinhill tungsak leuleu hi. Tuhun aa gamthu alawp makai te zong kua ih muangngam ding hiam?? Biakna-sung pawlpi tuamtuam en leng minam nusia aa midang beel ki-om den hi. Cimnuai aa piang theihgegu Kawlsuan peuh ki-ut se hi. Pau theilo pi iin Mizo-suan peuh ki-uut se hi.Tua bang mi te pen Utong kimlai va-aak aa kibawl ahi hi. Ei leh ei ki-it keileng kuan hong it ding hiam. Ih minam puahkei leng kuan puah ding hiam.. Saatkham aa neekding ngaihsun lo iin atang tuh in la, akung suan iin agah ne in. Tua hileh nasuan nakhak te leh gamleh minambup phungpha iin agah hong luunzo pan ding hi. Mipilgam te ah makaikhat nasepsa pen susialo iin puahto pah hi. Ei Chin State sungah susia-lo iin khat in namkhat-tek hong seem khia leh Chin State sung pen nasia mahmah khin ding hi. Galkap khutsung bekah zong tampi Chin State ciuciau lel kipuahzo khin ding hi. Tuhun khangno ten kideidanna leh kisuksiatna lungsim apaihzawh keileh Chin pen Independantgam ih suak zong iin thongsung aa kikhum khat pen thongdang a kipuak tawh kibang lel ding hi.Phu-kilak ngeina lungsim ih paii-laiteng, kikhangkhia ngeilo ding hi. Bangci lakkhiat ding, alakkhiatna ding hiam bang zang ding, cih nasiatak iin zon kul hi. Hihneih la kici Gal-la, sa-la. (a) A kaap athang tazawm aw e a aii athang tazawm aw,...(b) A kaap in zuu leh sa lawh aa, a aii lawi bang thang zaw ee. (a) Lal in phawng lal in phawng e, Zolei ah lal in phawng e...(b) Ngaih aw natai masa aw ee keiman nung ciang dal nang e.. (a) Lal in veelveel lal in veelveel e, hia lonawl aa lal in veel e..(b) Lal kanawhna'n kapheiphung tawl e, siallum khaina'n kabanzal kham(kha) ee.. (a) Kalal aw e kalal Taangtui aw kadaai hiangah lii bang cing nah e..(b) Kadaihiangah lii bang cingnah e sanmei tawi iin kakhualum nah ee. (a) Kalal aw e kalal taangtui aw kadaai hiangah lii bang cingnah e..(b) Lenmual kaaizo e sumu aitawi zil tana ung e.. (a) Kalal hong sang, khuakim kado, sakciangah lal hong sang e..(b) A thang(sang) khempeuh nongsak aaleh vausawl bang hong bal aw e.. (a) Kado lummei bang zing aw ee giising bang heuzo aw e..(b) Giising bang heu si-batphu zong, khua-lehlam aa kawlciang kang bang tom aw e (a) A si batphu kazon nin e, sa-kamkei bang hang ing e..(b) Zanglei aa ta, sumlu maaipa tang in siam bang met ing ee. (a) Bang vel ing e bang vel ing e dallum iin khai bang vel e, (b) Dallum iin khai bang vel ing e sawnteel in paai bang vel e. (a) Dallum khai khat aa kakhai aw khainih khai thum bang siang e..(b) Sawntel tankhat aa katan aw tannih tan thum bang siang e.. (a) Lal that ing lal hang that ing ngalliam ing e, pupa khuasuak mualnenah ning tuidiang e..(b) Pupa khua khuasuak mualnenah ning tui diang e, gual aw non awi tanam aw.. (a) Dolal pal bang kananna di kabanzal aw gia bang hawmthawng e..(b) Kabanzal aw gia bang hawm thawng e, luntawi phualngo te lah muanglah'ng ee.. Laamlaa peuhmah veinguainguai iin kisa lo hi. Vuakmanman in kisa ngiamngiam hi. Nawhlua-leh naupang-suah zel hi. Tawldam tak leh gualnuamzo khop aa sak ding ahi hi. Hih te pen hun-beisa Lawki-ngeina ahih hang iin, manthansak ding hilo hi. Africa mi te in tuma kum zatampi lai aa angeina te uh zongkik kankik in kineihtawm iin ciamteh uh hi. Sa-la tuamtuam akik ciang zom ni. Thang Siangh | 
