Kong it mipihte,
Thului hoih mahmah khat hong khahkhia ing. Hih thului pen Rev. Dr. Simon Pau Khan En in Yangon Chin Catholic Fellowship-te' Ruby Jubilee Commemorative Magazine(1968-2008) sung-aa,"Reconciliation amongst the Chin Christians" cih Manglai-in a gelh laimai 294-299 pan ka teikhiat ahi hi. Zomi khempeuh in simta peuh leh cih deihsak ka hih manin hong puak ka hi hi.
Itna leh deihsakna tawh,
Mr. Suang Khen Pau ====================== Zomi Khristiante Sungah Kilemkikna (Reconciliation amongst the Chin Christians) By Rev. Dr. Pau Khan En
Mihingte' teenna leitung in kilamdanna leh kibatlohnte in zem hi. Minam kibatlohna, melpuak kibatlohna leh kampau kibatlohnate pianpih hi a, uttawmthu-in kikhel theilo hi. Sumlepaii zonzia, gam kimakaihzia ahihkeileh thungaihsutna-thupomzia cihte pen mihingte bawltawm thu hi-in, mihingte' utthu leh khensatna zui-in kikhel thei hi. Hih kibatlohnate leh kilamdanna tuamtuamte ih bulphuh luat ciangin kimuhdahna, ki-etsatna, kikhenkhapna leh kibawlsiatnate tamveipi a pian banah ih mihing nuntakna sungah kilemna nading leh kithuhual nading khaktan tawntung hi. Khel theihloh ding pianpih nate a kikhelsawm tak ciangin a dahhuai thu ahi hi. Khel theihloh pianpih nate khel a kisawm ciangin siatna leh hemna tampi piangthei hi. A lang khatah,mihingte' khantoh nadingaa a kikhel thei thu pawlkhat a kikhel loh ciangin zong kiamsukna leh manthanna piang leuleu hi. Hih munsan takah tualnuntak nading-a thukhungsiam Reinhold Niebuhr' thungetna ih pawk ding kisam hi:
Maw Topa, a kikhel theilo thute ka sansiam theih nadingin lungduaina hong guan inla; a kikhel thei thute khel theih nadingin hansanna hong guan in; hih thunihte ka khentel theih nadingin nopna hong pia tapeuh in.
A tung-a ih gen thute siksanin Zomi Khristiante' nuntak-khuasakzia ih lungngaih kik ciang ih Zogam nuntakna a ginat zawk thei nadingin kikhelna a kisap lam mite in mu-aa a lunggulh ciang bekin ih kilamdannate kitelsiamna-in nei in, khel theih ding thu tampi ih neih lam ih kimutheipan ding hi. Kum zakhat bang a khangham Zomi Khristiante in a beisa thute enkik aa, kilemkikna leh kipumkhatna tawh ih mailam ding ih lamphat ding kisam hi. Tua bang ngimna tawh Zomi Khristiante hong kitamkhamsak bang thu hi a, bangci leng ih kitapna meimate damkik theih ding, cih thu, hih thului sungah kisung ding hi.
A. Zomi Khristiante' Thu Sittelna (Diagnosis of Chin Christian Society)
Zomi Khristiante hong kitamsak thu masa khat in ih tual lungsim (localism) ahi hi. Thu tuamtuam hangin Zomite mun tuamtuam leh khuata tuamtuam ah kithehthangin teeng uh hi. Tua manin amaute in makai tuamtuam leh ngeina tuamtuam neiciat uh hi.Tua khuate ah pau leh ham tuamtuam zong piangpah hi.Kizop-kivanna hamsa ahih manin khua khat leh khua khat mi tuampisuak uh hi. Kidemna tuamtuamte in zong mikhual hong tangsak hi. Tual lungsim neihna hong khang semsem aa, Khristian a suahkhit ciang nangawn un tua in kikhenna piangsak hi.Tual lungsim, kual lungsim, leh huang lungsim neihnate in Zomi Khristiante lakah a kigenkhialo hong kitamkhamsak lungsimte ahi hi.
Hong kitamsak thu nihna in ih pawl lungsim neihna (denominationalism) ahi hi.Khristian biakna ah a kikhelkhit uh ciang nangawnun Khristian pawl tuamtuamin kikhenlai uh aa, RC pawlpi, Tuiphum pawlpi, Methodist pawlpi, Presbyterian pawlpi, SDA pawlpi, leh AG pawlpi ci-in kikhenlai uhhi. A tual lungsim uh pawl lungsim in behlap lai ahih manin kitapkhap loh nading thu omlo hi. Khua-le-tui sungah Pawlpi tuamtuam hihna in hong khenkham ahih manin ih tual nuntakna ah kipumkhat ding baihlo hi.
Hong kitamsak thu thumna in ih Pasian' thusandan ahi hi.1970 kimin khanlawhna Zogam ah limsang upna lim pua in, pawlpi sungah hong lut hi. Tua manin Zomi Khristiante sungah pianthakna hong lang mahmah hi. Theihloh kalin ih buahpih thu in tangtawng pek-a omsa thu nih hi ngel aa, diktansakna (Justification)leh sianthona (sanctification) thu ahi hi. Khanlawhna a sang mite in diktansakna, Jesuh Khrih' hotkhiatna thu bulphuhin, alangkhat-ate in sianthona bulphuh uh hi. Hih thu nihte' deihna theikahlo bek dom lo-in zong kikumngeibek lo uh hi. Hih bang-a Pasian thu sandan hong thuklut zek ciangin pawlpi sung khat-a om tektek hi napi'n updan-sandan kituakte kihothei-in a kituaklote kihothei lo uh hi. Limsang upna hong khanna in zong pawlpi kitapna a piangsak thumung khat ahi hi. Tua banga limsang upna a zuite in a pawlpi nusia lo-in lawpna tawh biakpiakna ultungsak uh hi.Tua manin limsang RC, limsang Tuiphum, leh limsang Methodist cih bangin ih nei hi. Kilam danna in thu-uppi (doctrine) hang hilo-in thuzuihdan (practical) hi zaw aa, a laingek sangin a hawng hi zaw hi.
Hih a tung-a ih gen thuli ahilo kikhenkhapna a piangsak thu tuamtuam leh la tuamtuam om ngellai ding hi. Lai-gelhpa in, " Zomi Khristiante hong kitamsak hih thuli teng bek hi," ci bikbek lo hi. Laisimte in ngaihsun pha in, a ettehtak Khristian kipawlna, koinonia a pian nadingin hong khaktan thute zon behaa kipumkhat nopna lungsim ih neih ding kong hantawn nuam hi. Hih bang-a hong kitamsak thute ngaihsun kawmin kitapkhapna a damsak thei zatui pawl khat kong pulaaknuam hi.
B. A Kikhenkham Zomi Khristiante Aadingin Damna Zatui (Quest of Remedy for the Divided Chin Christian Society)
A kikhenkham Zomi Khristiante adingin damna zatui masa pen in kilemkikna ahi hi. Khristian pawlpi in a kilemkik kipawlkhopna hi a, Jesuh Khrih zong tua kilemkikna phut dingin leitungah hong pai ahi hi (2 Cor. 5:11-21). Khristian lungdamna laingeek in a tunglam leh a pheilam kilemkikna ahi hi. A tunglam ih cih ciangin Pasian leh mihingte' kilemkikna hi a, a pheilam ih cih ciangin mihing leh mihingte' kilemkikna ahi hi. Hih kilemkikna bawl dingin singlamteh tungah eite' mawhlawh tawi-in Jesuh Khrih a si ahi hi. Tua hi a, lungdamna thu leh singlamteh hong puak thupha in kilemkikna ahi hi. Kum zanih sungah a lutta Zomite aadingin hih kilemna thu in, thulian khat ahi hi. A kitamkham leh a kikhenkhia Zomi Khristiante aadingin kilemkik nasep in kum zalom 21st sungah damna zatui bang ahihna kong hawmsawn nuam hi.
1. Lai Siangtho Thuk Theihzawkna (Deeper Understanding of the Bible)
Lai siangtho in Tothum Pasian' thu hong hilh hi. Khristiante in namthum pawlkhat Pasian ih bia hi. Leitung Pawlpi (universal-catholic) in van tuamtuam a nei Khrih'pumpi khat hi, ci-in Lai siangtho in hong hilhlai hi(1Cor. 12). Lai Siangtho pen kipumkhatna leh kilemkikna laibu ahih manin Khristiante in kilemkik theih nadingin ih sintel ding ahi hi. Pawl tuamtuamte'(denominations) ngeina leh tatziate Leitung Pawlpi' ngeina leh tatzia tawh tehkaakin thuk takin ih sinding kisam hi. Thu-ummi tampi takin Lai siangtho' hong hilh ngeina leh tatziate sangin amau pawlpi leh updan thute ultung sakin Lai siangtho leh sawltakte' hong hilh thulelate sangin bulphuh zaw uh ahih manin a kisamlo kitelkhialnate leh kitapkhapna tuamtuamte a piang ahi hi. Ngeina leh tatzia tuamtuamte ahi RC ngeina, Tuiphum ngeina, Presbyterian ngeina leh Methodist ngeinate Lai siangtho' hong hilh ngeina leh tatzia tungtawnin ih sintel ding kisam hi. Lai Siangtho' hong hilh ngeina leh tatziate a masa-in koih aa, ei pawlpite' aa a nihna-ah kong in hileng Lai siangtho ih theihdan hong kibang pan ding aa, tua in kilemkikna zungpi hong hipah ding hi. Lai siangtho in kilemkikna laibu ahih manin Zomi Khristiante Lai siangtho ah ciahkik dih ni.
2. Khristian Theology Thu Telzawkna (Better Understanding of Christian Theology)
Leitung Pawlpi (Catholic Church) 1054 kumin hong kitam aa, RC pawlpi leh Orthodox pawlpi hong piankhiat-aa kipanin pawl tuamtuamte hong piangkhia ahi hi. Hih kikhenkhap ma-in Nicence Thupum (Nicence Creed) ci-in upna pulaakna AD 324 kumin Leitung Pawlpi in na neikhin aa, Khristian khempeuh ii a neihkhop uh upna pulaakna ahi hi. Tua Nicence Thupum sungah Pawlpi ih cih pen pumkhat (one), siangtho (holy), leitung bup huam (catholic) leh sawltakte tawh kizom (apostolic) ci-in ki-um hi. Hih thulite a nengtawn-in sut ding cileng laimai hong huamzek ding hi. A kidawk mahmah thu khat in Pawlpi ih cih pen pumkhat hi takpi-a, Khrih' pumpi sungah pumkhat hihna in kua pawl, kua pawl cilo-in pawlpi khempeuh in ih kepcin ding ahi hi. Hih tang tawng pek pan-aa a omsa kipumkhatna ih neihtheihkik nadingin Zomi Khristiante in Pasian' thuthuk ih sinzek ding kisam hi. Khristian upna bulpite leh laingilte ih pawlpi ciatciat ah ahi zongin, ih kipawlna tekah ahi zongin ih sinding kisam hi. Tua bangin Khristian upna laingilte, ih neihkhop, Khristian thupomte ih sinkhop, theih nadingin a kibang laibu sung panin ei munsan ciatciat-ah a bul panin ih sinkhop ding a kisam ahi hi.
3. Pawl Dangte tungah Lungsim Hoih Neihna (A New Attitude towards other Denominations)
Zomi Khristiante sungah kilemkikna a omtheih nadingin pawl dangte tungah lungsim hoih leh muhna dik ih neihding kisampha mahmah hi. Khrih sungah unau-sanggam khat ih hihna, Khrih nungzui tekmah ih hihna hangin khat-le-khat kithupisim-aa lungsim kongkhakte ih kihon ding kisam hi. Hih laimun-ah laigelhpa in kilemkik nading leh kipumkhat theih nadingin RC pawlpi tungah a lungdamna thu leh thupi a sakna thu a pholaak nuam hi. RC pawlpi in, "RC pawlpi lo-in gupkhiatna kingahlo-extra-ecclesiam nulla salus)" cih thu bullet mahmah ngei uh aa, kum za tampi tua upna tawh kalsuan uh hi. Ahi zongin Vatican Council Nihna (1961-1965) sungah Pope John Paul XXIII in tua upna satkhamin RC ahilo Khristian dangte (Protestant Christians) pen a kikhenkhia sanggamte (separated brethren) ci-in thu-umkhial (heretics) in hong ngaihsun nawn kiuhkeuh lo uhhi. 1995 kum ciangin Pope John Paul II in RC pawlpi khempeuh ah a laihawmna sungah 'Amaute pumkhat a suah nangun-Ut Unum Sint)' cih bulphuh aa, RC pawlpi ahilo pawl dangte tawh kitelsiam na nei-a: Pasian' umlote (atheist) bangin ngaihsut nawn het lo-in, Khrih' nungzui Khristian taktak-aa ngaihsut ding limgen pah mahmah hi. Hih bang thute pen kipumkhat nading leh kilemkik theih nadingin a tawsawn mualsuangpite hi a, RC pawlpi' matutna lianpi khat ahi hi. Lungsim kipiakna (openess) pen kilemkik theih nadingin Khristian pawlpi sungah a kisam pha mahmah thu hi a, tua in khatlekhat kisansiamna leh kithupisimna piangsak hi. Khristiante' kipumkhat nadingin mun tuamtuam leh gam tuamtaum-aa mite' hanciamna leh a bawl uh thuhoihte ih etteh ding zong kisam hi. Pawl dangdangte tungah lungsim kipiak theih nadingin khat-le-khat kitelkhialhna leh kitelkhial theih nadingaa amanlopi-a kigensiatna thute (misinformation) khempeuh ih paikhia ta ding hi. Khristiante in pawl dangte' tangthu dik leh upna mante kipumkhatnopna lungsim tawh ih sin takpi ding hi. Kipumkhatna leh kilemkikna zingni hong suah khit mah bangin kimawhsakna leh kigensiatna hunte zong kum zalom 20th hunin beikhinta hi. Kipumkhatna hun sungah tu laitak ih nuntak mah bangin kideidannate pelin, Pasian' lenggah huanah na ih sepkhop theih nading a thukzaw leh a zaizawin ih kizopsawm ding hi. Kilemkik nading leh kihotuah theih nadingin eite in kikupkhopna hunpi sungah ih lutkhin zo aa, kilangpan hunte ih paisankhinta hi.
4. A Thukzaw-in Pawlpi Khat-le-khat Kizop Ding Kisam (The Quest for a Deeper Inter-church Relationship)
Kilemkikna ih cih pen a taktakin ngaihsut thu bek hi lo a, ih nuntakna leh khat-le-khat ih kizopna sungah ih zatpah ding thu ahi hi. Kim-le-pam ih nuntakna sungah a taksuak ding ahi hi.Tua thu pen Lai siangtho sungah na om aa, Pasian leh mihingte' kizopna sungah taksuak takpi in, tangthu sung-aa om pawlpite' nuntakna ah na kilang hi.
Hih kilemkikna Zomi Khristiante in a nuntakna sungvuah a neih takpi ding kisam hi.Tua bangin kipumkhat theih nadingin a phualphual-a a ki-uktawm pawlpi pan a lianzaw kipawlna dongah program tuamtuamte ih bawl ding kisam hi. Biakpiak khopna, sinkhopna, conference neihkhopna, seminar neihkhopnate ih kizopna a thukzawk nadingin ih neikhawm ding hi. Ih tual nuntak-khantoh nadingin pilna lamah, cidamna lamah, khantohna a tuamtuamah na ih semkhawm ding-aa, tua in ih kimlepaam-a thupiangte leh ih kisap nate hong theisak ding hi. Khristian biakna ih cih pen zuih kul biakna ahih manin itna, daihna, kilemkikna, leh kimaisaknate ih nisim nuntakna sungah ih bawlkhawm takpi ding hi. Khristian biakna in sepna tawh itna a lakkhia biakna hi aa, ngaihsunsun cih ciang bek hilo-in sep takpi hong kal biakna ahi hi.
Thukhupna
Khristian pawl tuamtuamte sungah kibatlohna tampi takmah a dil a sai-in om hi. Kipumbatna ahilo kipumkhatna Zomi Khristiante sungah ih neih nading ih hanciam ding hi. Ahang in Khristian biakna in kipumbat biakna hilo-in kipumkhat a hanciam den biakna hi zaw hi. Ama pumpi dinga Pawlpi a phut Jesuh Khrih in koici bang-a biakpiakna pia ding, bang thukhun nei ding cih aneng atawngin hong hilh zenzenlo hi. Hihte pen pawlpi tuamtuamte in tangpek Sawltakte' hun aa kipanin a bawltawm uh zuih-ngeina (tradition) hi zaw hi. Jesuh Khrih in ahih leh lungdamna thu laingek ahi itna, kipumkhatna leh gamthak nasepnate zuih-ngeina dingin hong bawlsak bek hi. Zomi Khristiante adingin a kibanglo zuih-ngeinate bulphuhluat loh ding hun hita hi. Pawl dangte Khrih' nungzui Khristiante mah ahih lam thei-in sangsiam-aa ih thupi sim ding ahi hi. Zomi Khristiante nungta khawmin, sinkhawm-a, khangto khawmin, a tawpna-ah minam leh Pasian aading sepkhawm ding uh hi. Bang hang hiam cihleh amaute in To khatbek, Upna khatbek, Tuiphumna khatbek leh Lai Siangtho khatbek a nei uh hi. Hih in kilemkikna man hi a, Zomite' tual nuntakna sungah Pasian' gam ih phuh nadingin kum zalom 21st sungah hong tou thulian pen khat ahi hi.
(Hih thului pen Rev. Dr. Simon Pau Khan En in Yangon Chin Catholic Fellowship (YCCF)te' Ruby Jubilee Commemorative Magazine(1968-2008) sung-aa,"Reconciliation amongst the Chin Christians" cih Manglai-in a gelh laimai 294-299 pan a ka tei ahi hi. Zomi khempeuh in simta peuh leh cih deihsak ka hih manin hong puak ka hi hi. Mr. Suang Khen Pau) ---------
|
