Innteekte a deihlo lengla:
- I Zo paunak sungah, “Mual khawl masa; tui nak ngak masa” ci'h a om mah bangin, koi mun koi mual ah i om zongin, innteek cih na om den hi. Mun thak mual thak i tun ciangin tua inn teek mite gamtat zia, lu hei zia, nuntak zia leh vaihawm zia i zuih theih kei leh, a omsa te tawh kituaklo ding cih pen kitel sa thu a hihi. Tua hang a kipan buaina leh thu buai zong mual khawl masa mite mawhna hilo zaw thei hi. Mihingte nuntakna ah tua bang thu buai (or) buaina a om theih zel man in, mikangte in zong, “Rome ah na om leh Rome mite bangin gamtang in” ci'n thupil na gen uhhi. A tung thak mite in Rome mite bangin gamtat sawm masa lo in, a mau deihna bangin Rome mite kawikaih sawm leh, tua ah buaina kipan pah ding hi.
- I paunak dang khat sungah “Innteek nuam leh khawl mun nuam ah mi khawl hi” kici leuleu hi. Innteek in “note hong vak dah un”, a cih loh bangin khawlmun in zong “note hong khawl kei un” cilo hi. Khawlmun a khawl ding mi leh lengla ding mi kiteltuam lo hi. Khawl mun pen mi khempeuh a ding kibawl a hih bangin, mi khempeuh ( a gim a tawl khempeuh) khawl thei ding hi. Innteekte in zong lengla khempeuh a zindo ding a tavuan a hihi. Innteekte in inntek hoih a suah ding, lengla a hoih thei pen in do uh a, mi khempeuh a kibangin lengla do ding ngaihsun masa hi. A hizongin lengla mite leh khawlmun a khawl mite in, inntekte thusim lo in leh a khawlna khawl mun nopna bek deih in, a mah deihna bang in a sep sawm tak teh, buaina or thu buai kipan pah hi.
- I paunak khat sung leuleu ah, “ Thu hoih in kong biang kanlo, thu sia in mual kua khuum” kici hi. Mihingte pen ei inn ah innteekte ki hi pah hi. Lengla hong vak ciangin innteekte hoihna ding sangin siatna ding ngimna tawh thusia hong puak lut tak uh teh, leh innsung khat ah innteek mite' hong lengla do zia, sepzia bawlzia, i gen siat tak teh, buaina kipan pah hi.
- Lengla leh innteek kikal a buaina a piangsak sung pan a thupi pen khat in, lengla mite'n inntekte a buluh sawm tak teh, innteek teng a hawl khiat sawm tak teh buaina lianpi piang hi. Lengla in innteekte neih leh lam deih gawhna, en'na leh huaihamna lungsim nei a hih manin innteekte lengla do siamna teng, a leh lam in zat sak hi. Innteekte lengla do hanciamna a hi, lenglate sungtang sakna pen inntakte hawl khiat ding kipatna suaksak thei uhhi. Hih bang hanga a piang buaina pen mun tuamtuam, ( innkuan sung, khosung, minam sung) te ah ki mu thei hi.
- Thupi dang khat lai ah, innteek te innkuan sungah a phengphi mi khat belhbawm in tua innkuan sungah siatna thu i tut tak teh zong buaina tampi piangsak hi. Innkuan sung vaihawmna a lungkimlo mi (a phengpi mi) te khut zat in om in innteekte vai tawk buai thei hi. Tua hang a piang buaina pen innteekte hang peuh kisa thei a, vensak sawm lo in ki om thei hi. I deihloh innteekte kiangah lengla a va paina in buaina vengsak lo a,ki pan sak zaw hi.
I Zo paunak sunga, “Zindo lengla do siam” ding pen kilim gen mahmah hi. Bang hang? Lengla kidona in siatna bei sak a, ki-itna, kilemna piangsak hi. A ki-itlo mite ki-it sak hi. Khat leh khat lungsim kitel siamna piangsak hi. Zomite in khut khial ban khial a om khak uh ciangin khat leh khat lengla kikhah in, kilemna thu gen uh hi.
Khat leh khat ki-itna leh, kilemna a pianna ding, a kipna dingin lengla mite zong, inntekte siatna ding puak loh ding, innteekte tungah ul tung tuang sawm lo in, innteekte zia tawh i gamtat ding cihte tampi kisam banah, inntekte in zong ki innteek saklo in, lengla mi khempeuh nopsak na dingin a zindo ding kisam ding hi.
