Zomite bek hilo in, leitung minam tuamtuamte'n zong paunak, lakam leh thupil tampi tak na nei uh a, tuate pen mihingte nuntakna tungtawn pan kisin thu a hih manin, thu manpha vive a hihi. Tua paunak tampite pen thu kihilhna, thu ciaptehna leh a tuamtuam in kizang hi.
Kawl paunak a hi, "Pywe lan htung phiea khiin" a kici pen ei Zomi sungah ( a diak in Kawlgam lam a teng Zomite) ki zang kiaukiau thei hi. Na khat peuhpeuh sep khiat ding ngimna a om tak teh, a hanciamna hunsungin kihel lo na pi'n a lawhcin veve ding a theih a, min deih veve mite in tua nasepna ah tawm kihel pak uh a, a mau hanga lawhcin bang a suak sak mite genna in kinei hi. Angsung bek khual a, min hoih minpha bek a deihte genna in ki zang hi.
Tua ahih manin hih Kawl paunak kizatna i et ciangin Zomi sungah ah zat theihna ding mun tampi a om manin kizang theih zel ahihi. Mihing pen khat leh khat kibang hetlo i hihmanin pawlkhat in sem na pi'n mawhpuakna a la ngamlo a om tei hangin, pawlkhat in sem ngamlo in a thubek tawh min deih pawl ki om tawn tung thei hi. Mihingte ngeina khat zong hi a, khat leh khat i kibat lohna zong a hih manin tua pen a kidal khol thei ding thu namte a hi kei hi.
A zatna: Nidang lai in khua sung khat ah, khuasung makai (hausa lamte'n) khua zang bup in pawi bawl ding vai hawm uh hi. Khua sung mi khempeuh zong thalawp tek uh a, thu kikupna ( pawi bangci bawl ding) cihte pen kikupna nei zel uh hi. Tua bang hun laitak in, tua khua sungah mi thu vaihawm a zui nuam lo leh a ma vaihawmna lo peuh a nial thei mi khat om a, tua mi pen thu kikupna ah a kisap hang pai ngeilo in tuam om hi. Khuapihte lah pawi bawl ding lawp mahmah uh ahih manin pawipi pen a mah a kihel lohhangin a piang ding hita hi. Pawi kibawl hun taktak ciangin tua mi zong, mipi lutna kong kalai tak ah phek phah in na lam keii in, mipite na ki en sak ngeingai hi. Lam thei mawhlo a hihteh, pawisim mite in zong, muh nop sa uh a, va en ngeingai uh hi. Pawi pai mite'n a et tah teh, a mah zong ki min sial nuam mahmah a hih manin, hih pawi pen kei hanga mi a tam hi,kei hanga lawhcing hi, ci'n awng kawikawi hi. Pawi pianna ding vaihawm pawl ( khuasung makai) te tung na ngawn ah, hih pawi pen kei om kei leng mi tua zah in tam hong pai kenteh ci lai zaw sop hi. Pawi pianna dinga khuasung makaite thu kikupna khempeuh selcip in, pawi kibawl ni a, pawi piang pah tawh kibangin gen in, mi umsak zo theilai hi. Khuasung makai te'n bel a mai ah bangmah genlo in, " Pywi laan htung phea khin" ding mi zong kisam zel hi ci uhhi. Tua bang munte leh midangte vaihawmna zui utlo, angsung khualna leh min hoih deihna ngimna bek tawh mite sepsa khempeuh a ma sep a suaksak nuam mi a om ciangin hih paunak kizang thei zel hi.
Theih ding: Laisiangtho sung ah ei ma nuntakna tawh kituak thu tampi i sim khak theih bangin lai gelh mite laigelhna sungah zong, mimal cihnop tuam a om loh hangin, laisim mite nuntakna tawh kituak tampi om thei hi.
TKS
