- 2012 May kha sungin Chin National Front (CNF) leh Kawlgam vaihawmte kihona thu i za a lungdamna pihna tawh i lungnop mahmah laitak in, Kawlgam sungah mi tampi theih Zomi National Congress (ZNC) in Kawlgam thu neite phalna ngah zo lo cih i zak kik ciangin dah huai mahmah hi. Khat lam a te adingin nuam mahmah laitak in khat lam a te dingin dah huai mahmah thu khat hong suak hi. Hih thu nihte pen a kituak kha mawkmawk zong hi thei a, zong a kigel khol sa zong hi thei hi.
- Kawl gam sungah galkap makaihna leh deihna tawh kituak a kibawl thukhunpi zui in kitelna ah kidem thei ding party din theihna ding Zomi National Congress (ZNC) phalna kipia lo cih thu a za khempeuh in lamdang i satek hi. ZNC party in phalna a ngahlohna hang Kawlgam kumpi thuneihte paulap pen " Kawlgam sungah Zomi cih minam omlo hi cih" a hih tak ciangin party khat kikhak tan hinawnlo a, minam khat ki maimang sak nuam a hi gige hi. ZNC party kideihlohna hang hiam, kikhak tan nopna hang hiam tawh Zomi cih minam omlo cih pen a hang kician omlo a kipaulak thu leh kinialna a hihi.
- ZNC in a bei sa in kumpi theihpihna tawh kitelna ngah lut ngei khinhi. 1988 kum ciangin Kawlgam sungah galkap mangte in thuneihna hong lak uh a, a hizongin gammite deihna zui in 1990 kum May 27 ni in gambup kitelna kibawl ngei khin hi. Tua kitelna sungah kidem dingin Zomi National Congress (ZNC) zong hih galkapte phalna mah tawh lut theihna nei ngei khin hi. Kawlgam sungah minam khat bangin Kawlgam hoihna ding natampi chem ngei khin hi. 1990 kum kitelna ah, ZNC party min tawh constituency (panmu) (4) ah kidem a, mun (2) ngah a hih manin a buppi a et in 50% mun ngah suak hi.
- Zomi minam omlo cih pen Zomi nam beisak nop man hi. Kawl minam pi lungsim a nei a, Kawlmi bek in Kawlgam uk ding cih ngaihsutna a nei Thakin Ba Sein i nungzui a hi, galkap mang Bo Ne Win in 1962 kum in Kawlgam thu neihna hong lak a kipan " Kawl minampi lungsim" bek hong vawh hi. Gambup ah minam neite ngeina leh lai kisin theih nawnlo in, Kawllai leh Kawl ngeina bek hong phungvuh uh hi. " Lei valhna hangin minam maimang lo a, mi valhna hangin minam maimang hi" cih Kawl paunak tel mahmah uh ahih manin, Kawlgam sungah minam neuneute valhtum theihna ding ngimna vive tawh na hong sem uh hi.
- Mahsahlah (Burma Socialist Party) hun lai in zong Zomi cih minam man thatna ding na gel ngei uh hi. I gam sungah Zomi leh Zo State zat ding pen India a Mizo tawh ki tel khial ding cih paulap in hong kiphallo ngei hi kici hi. (Pu Vum Son's Zo History). A hizongin India gam leh Kawlgam sunga minam om veve a hi, Naga te zong Kawlgam sungah Party min, gam leh mun leh mual kipia hi. Tulai tak a Kawlgam sunga Naga minamte mun leh mual zong Mangkang hun lai Chin Hills Regulation Acts huam sunga om ngei khat a hihi.
- Zomi leh Chin kibat loh manin Kawlgam thuneite in ZNC party registration pialo hi. Mi pawlkhat te in Zomi leh Chin kibang hi hang ci'n gen uh a, ei sung mahmah ah zong a kibang mah in kisang lel hi. A hizongin kumpi leh thunei te in kibang in mulo uh a hih manin minam tuam tuak kisuak hi. A zenzen in Zomi leh Chin kibang in kumpi thunei te'n a sang thei hileh, " Kawlgam sungah Zomi minam omlo hi" cilo ding uh hi. Tua a hih manin Zomi cih minam omlo cih paulap in ZNC party registration a hong piak loh uh pen ei sung mahmah ah zong a kibang lo i hihna hong langsak uh a, mailam ah Zomi cih minam a om na hong kitheihpihna ding kalbi khat hong suak hi.
- Kawlgam sungah om minam 135 or 101 a kici minam te pen i etkik ciangin a tam zaw minam (nation) hihna a kim in nei hilo hi. Ei minam (Zomi) sunga om beh min peuh kumpi in a ut bangin gelh/kaikhawm in minam a cih uh a hihi. Hih pen Kawl mite in Zomi sungah " khenzak a ukna (divide and rule) a neihna uh hi a, Zomi a dingin a dah huai mahmah thu a hihi. Tua bek hilo in, minam 135 or 101 om hi ci'n a gen uh hangin tua minam min zangin matpongtin ( ID) pialo kawikawi uhi. Tua hi a, Kawlgam ah minam om khempeuh minam in sim tuanlo uhhi.
- ZNC in tulai tak Kawlgam kumpi vaihawmna nuai ah party registration a ngah loh hangin Zomi taisan ding kilawm lo hi. Zomi cih minam a om man a, ZNC a ding hi a, na tampi sem zo khin hi. Zomi cih leitungbup theihpih dingin hong tawisang khin hi. ZNC in party sangin minam thupi sak zaw khinzo hi. Zomite party thahat pen a hi ZNC pen minam min mah hong let ding thupi hi.
Lungdam
TKS
