Milim (puppet) tawh kibang CNF te Supreme Council
(Supreme Council is just a puppet of CNF)
Tual Khan Suan
Chin National Front (CNF) te'n a thakiamna pan un tha lak kikna ding'n bang ci bangin panla ding, bang lampi zui in bangci sep ding cih pen a makaite uh khuak keuna thupi pen ahihi. Banghang hiam cih leh, CNF a kiphuh cillai in Chin State buppi sunga minam khempeuh a huam ding ngimna tawh kiphuh a hihna zui in, Chin State sunga om kampau tuamtuam a zang minam tampi in zong tha pia uha, panpih tek hi. Tawlkhat khit ciangin Haka kampau minamte i kellu phum a hi angsung bek etna a neih det uh pen hong kilang khia a, CNF pen a mau a bek suahsak utna leh Chin State pen a mau bek uk ding cih lungsim hangin CNF sung mahmah ah Falam kampau minam leh Haka kampau minamte sungah kitel khialhna lianpi om ngei hi. Khangno makai thakte in Chin State pen Haka mite a ding leh minam kiliatsakna lungsim neih luatna hangin CNF pen kua mah in tha pia nawnlo in bei dekdek phial hi.
Tua bang hun lai takin CNF makai te'n zong Kawl ngian khat hong zang kik uh a, CNF pen mipi'n tha a piak kik theihna ding lampi hong zong kik uhhi. CNF sungah a lutlo, a pualam a mipi zahtak makaite sam in mun pia leng mipi in CNF pen thapia kik ding hi, cih muhna hong nei uhhi. (Hih munah pawl a lutlo mikhat pawlpi upa sem sak cih pen thuneihna taktak kipialo ding cihna a hihi. A lim bek a hihna kilang mahmah hi). Tua a hih manin CNF huang sunga omlo a mau zawh ding, mipi zahtak makai pawlkhat sam uh a, December 12-16,2011 sungin India-Burma gamgi mun khatah CNF in khawmpi lian nei hi. Tua khawmpi lian sungah CNF te i Supreme Council pen makai zahtak mi (21) tawh lam khia uhhi. Tua sungah CNF pawlmi a hilo pawlkhat, Dr. Za Hlei Thang (Falam Township), Pu Lian Uk (Halkha Township), Pu Kip Kho Lian (Tonzang Township), Thang Nang Lian Thang (Teddim Township), Pu Zo Tum Hmung (Thantlang Township), Pu Benjamin Turing (Matupi Township), Pu Thang Ning Kee (Mindat Township), Pu L. Chhangte (Mizo), leh Dr. Lian Hmung (Expert) te hi a, CNF pawlmi sung pan Pu Thomas Thang Nou (CNF), Pu Thang Yen (CNF), Pu H.C. Ral Hnin (CNF) te kihel hi. ( CNF Press release 1/2012)
Tua CNF te' Supreme Council pen a mau i gelna leh genna zui in gen kik leng, "CNF tawh kisai khempeuh ah thu neihna sang pen a nei ding leh CNF i kilam khiat zia ( Organization Structures) zui a vai (affairs) tuamtuam ah a encik leh a van ding lutang pen a hihi", ci uh hi. Tua bek hilo, CNF gamtatna khempeuh ah tavuan la ding hi a, mailam ah CNF paizia ding lamlak ding hi ci uhhi. (The supreme council of CNF will take all responsibilities for CNF's activities and guide for the future planning of CNF's affairs). Hih bang thu pen galvan tawi kipawlna khat sungah a om ngeilo thu khat a hih manin lungdam huai mahmah thu tawh kibang hi. A hizongin a taktak in tua bang mah a hi hiam?
Hih bang thu a om laitak in Kawlgam kumpi in Kawlgam kihelna ding a gelna zui in Kumpi leh CNF te kihona hong nei uhhi. Tua kihona sung ah, CNF in Kawl kumpi tungah a ngetna sung pan CNF in Tedim khuapi ah zum hon ding cih hong kihel kha hi. (Hih pen CNF tangthu sungah Chin State pen Haka te'n uk ding cih lungsim a om den, tu dong a om suak lai thu tungtawn ah Tedim uk zawhna ding ngimna a hihi.) CNF in Tedim ah zum hon ding pen a mun leh mual a teng khua nu leh khua pa te'n deihlo a hih manin nial uh a, Kawlgam kumpi U Thein Sein tungah zong deihlohna thu gen in lai gelh uhhi. Tua thu hangin Supreme council of CNF te'n February 22-24,2012 sungin USA gam sungah thu kikupna nei uh a, tua thukikupna ah Tedim a CNF te zum hong ding vai tawh kisai nakpi takin kikupna nei uhhi. Tua thu kikupna sung pan a thukimna om bangin tulaitaak a Chairman a sem Pu Dr. Za Hlei Thangin nimit February 23,2012 ni'n letmat thuh in " CNF in Tedim a zum hong ding vai pen, a mun leh mual a teng khua nu khua pa te deihna tawh kikelki in kisem lo ding hi" cin thusuah bawl hi. Hih thu suah pen CNF te i thu neihna sang pen nei a hi Supreme Council te bawl a hih manin CNF in zong zui leh zahtak ding in ki um pah hi.
A hizongin CNF te laihawm Lom 1,hawm 1 May 2012 sungah " CNF zum kihong ta ding" cih thulu nuai ah, Tedim ah zumtu ding pen Pu Hau Kang tavuan kipia hi, cih thu a suak kik hi. Hih lai hawm pen CNF te i media (info) leh publictiy pan a kihawm khia hi a, CNF te i policy tawh kisai kigelhna laihawm a hihi. Tua banah hih laihawm sunga om lai khempeuh CNF te i thukimna tawh kisuak sak a hihi.
CNF te'n Tedim a zum hon ding vaitawh kisai in CNF te Supreme Council thu suah leh CNF te policy tawh kituak a kisuah laihawm sunga thu nih pen kibanglo in, kikelki sinsen mawk hi. A hih leh hih thu nihte koi up huai zaw? CNF pen Supreme Council te lamlahna tawh a pai ding hi zaw maw? A hih kei leh Supreme Council pen CNF te'n nakphek khau tawh a deihna ua, a kaih ding hi zaw maw? CNF te i Central Committee leh Supreme Council in Chin State bup vai (affairs) ah kua thuneihna sang nei zaw ding?
A tawpna ah Supreme council pen CNF te'n mipi tung pan thapiakna a deih man ua, Kawl ngian zang a thu neihna neilo leh nuntakna neilo a kiphuh pawl a suak hi. CNF te'n a beisa a, gamtat siatna teng a mau bek in phu ngamlo uh a hih manin a phut pih ding maiphaw (mask) a kizang a suak hi. Tua ban ah, CNF te gen ut teng mipite san theih ding deihna tawh a mau zang a gen sak ding leh CNF te deihna bang a kampau, gamtang ding milim (puppet) din mun a hihi.
