Zomite sungah Pasian thu a hong tun zawh a kipat in zong
biakna tawh kisai kipawlna te ah zong i minam min a hi, "Zomi" zat
pen khum kisa in kizang tangtang hi. Pasian nasem makaite leh mipi ten zong
minam vai leh Politics vailua cih bangin kisang hetlo hi. I minam sungah Pasian
thu tawh hong makaih masa Pu Sukte Hau Go in zong i minam min pen biakna
kipawlna ah zong zat theih a hihna hong lah khiatna ding Zogam bup tuiphum
kipawlna pen " Zomi Baptist Convention, ZBC" cih min na phuak hi. Tua
tawh kizom in " Zomi Theological College, ZTC" cih a hizongin,
"Zomi Christian Literature Society,ZCLS" cih a hizongin kiphuh khia
hi. Hih bangin minam min zatna pen Politik vai hetlo leh, Politik sepna ding
ngimna khat zong a omlo a, i lungsim takpi leh lungsim siangtho taka i minam
itna leh i minam min ngaihsa leh i zatteh khum i sak zawk man a hihna i mu hi.
A hizongin, gamdang tung Zomi te sungah minam itna hong
khang i cidiam, a hih kei leh biakna makaite sungah muh dan hong kikhel i ci
zaw hiam, i minam min tawh biakna pawlpi min i phuahna hangin pawlpi sung
peuhah buaina piang thei mawk hi. Pawlkhat in i pawlpi min dingin
"Zomi" cih kamma zanglo pen minam a itlo bangin a mu pawl a om
bangin, pawlpi min pen minam min tapsak na hangin biakna pen Pasian thu tawh
kituak lo banga a mu pawl zong om leuleu mawk hi. A beisa a "Zomi"
cih min vawh a pawlpi khat sungah a kithu tuak mahmah mitampi omna pawlpi
sungah ah "Zomi" pen politik vai lua hi cih paulap in zat nawnlohna
hangin pawlpi sungah kiphelkhapna piang hi. Tua mah bangin, Pawlpi min dingin
"Zomi" a kizang nailo pawlpi pawlkhat sungah zong "Zomi" cih
kammal pen in pawlpi min tapsak sawmna hangin buaina piang veve hi.
Pasian thu-um Zomite sungah i minam min a hi,
"Zomi" kammal in i pawlpi min i tapsakna leh i tapsaklohna hangin
pawlsungah kikhenkhapna om mawk thei hi. Tua bangin i pawlpi sungah thubuai a
om tak ciangin pawlpi makai sia leh upate tung panin "Zomi" kammal
pen Politik vaiin kimu mawk thei hi. Makai pawlkhat bangin "Zomi" cih
kammal a deiha thugenmite leh a deihlo a a nialte pen Politik asem (
Nyaingangyi tama) bangin mu uh a hih manin a mau ngaihsutna gen mawk thei hi. A
taktak in Pasian thu-um Zomite pen i ngeina ah mintap a thupi sak minam khat i
hih manin mi leh kipawlna khatpeuh min i phuah ding ciangin zong i minam min
tapsak ding a kideih masa pen a hihi. "Zomi" cih kammal tawh kipawlna
min leh pawlpi min phuah pen Politik ( Nyaingangyi) vai khat zong kihel hetlo
a, i ngeina a hih mintap vai a hihna kiphawk khollo mawk hi. I minam min mah
ngaih kisa tek leh khum a kisak man hi zaw pen hi.
Tual Khan Suan
12/19/2014
