A beisa hun a leitungah
ukcippi (dictator) a hi ngei dang khat mah ahi, Adolf Hitler in zong gambup
thuneihna a ngahna dingin a sutkhiat theihna ding in mipite thukimpihna kisam a
hih manin paulap leh thang-antah (scapegoat) na nei ngei hi. Germany gamsung mite
zawnna leh ngaunate pen pemta a om Jews mite hang hi ci'n a gentak ciangin mi
zawng leh mi genthei, thu saupi a sulzuihlo mite in um mahmah a hih manin mipi
pahtakna ngah mahmah ngei hi. Jews minamte in i gamsung hauhna teng hong suhsak,
hong laksak uh a hih manin a gamnei mite pen a maute nasem kileh suah hi cih
bangin paulap kician mahmah na nei a hih manin Jews minam tampi thah ding pen
gammi ten awikai lo lel uhhi.
Thuneihna a deih a ukcippi
kivaihawmna tawh a kalsuan mite in a paulapte uh i et ciangin "a piang taktak thu ( facts)"
vive hi bilbel hi. Tua hang mahin mipi te'n um leh sang thei baih a hih manin
paulap kician suak baih mahmah hi. Kawlgam sungah General Ne Win in gambup
thuneihna a sut khiat ding laitak in zong Kawlgam sungah gamvai dinmun pen dai
hetlo in a kitawkk hethat laitak hi bilbel hi. Tua mah bangin Germany a Adolf
Hitler paulap hun lai mahin zong Jews mite in Germany gamsung ah sum lei sum zuakna
leh huahsakna tampi dep (control) zo mahmah khin uhhi. Gamsung khuahun i et ciangin
a maute paulap ding pen a piang taktak thu hi mawk a hih ciangin nial luatna ding
omlo tawh kibang hi. Mi a tamzaw thamin zong thuman mah sa kha uhhi. Mi a
tamzaw in thukim pih a hih manin tua banga paulap a zang makaite pen mipi in
tawsawn (support) zaw lai uhhi. Thusau ngaihsun leh thu paidan thei pawlkhat in
mansa lo in a nial mite pen makaite leh mipi a tamzaw in khial sa uh a,
mawhsakna thuak zawsop lai uhhi. Paulap zanglo a, paidan man tawh vaihawm a ut
mite in "khial zaw" cihna lehngah zawsop hi. Bang hang hiam cih lep
paulap hoih a hih manin mipite mit humcip zo mawk hi.
Hih bangin a paulap zonna
pen minam dang sung bek a kimu thei hilo a, ei Zomite sung mahmah ah zong kimu
theihi. I khotang hinkhua (social life), gamvai tawh kisai nasepna (political
life), biakna vai tawh kisai nasepna (religious life) te ah zong tampi kimu
theihi. Mi pawlkhat in tua bang paulap a kizatna pen ei mimal nuntakna hong
hetkhak lam kiphawk khollo thei hi. A taktak in mimal nuntakna ah paulap zang
thei mite leh tua banga paulap zatna hang a thapia leh a thuak khate nuntakna
pen tampi takin hong hetkek thei ahih lam kikhonung phawk pan thei hi.
I nisim nuntakna en kik
taktak leng mi tampi tak in paulap kizang kha pahpah hi. I na sepna mun ah a
hizongin, lawm leh gual tawh kithuahna mun ah a hizongin, a tawpna ah innkuan
sung mahmah ah zong kizang thei hi. Na khat peuh i sep khialh, i bawl khialh a
om ciangin leh, ei tungah hong kimawh saktheih nun ding tak ciangin "a
hang" ding khat tawh kinial hamtang thei hi. I utna, i utlohna a om tak
teh zong "a hang" khat mah kibawl tawm thei hi. I lawm leh gual te'n
ei theihzah, ei siamzah a hong phak lohna dingun zong "a hang" khat
zongin kiselsim thei hi. Tuate i et kik tak ciangin ei gualzawhna ding vive
ngaihsutna a hihi. Nisim nuntakna ah zong thuneihna leh gualzawhna lunggulhna
hang tawh "paulap" kizong den a hihi.
I minam sung leh gamvai
ki-ukna lam en leng zong panmun leh min ngahna ding utna tampi om zelna pi'n
tuate pen mi theih ding lau i hih manin genkhiat kingamlo a tua panmun ngah
theihna dingin thudangte i ban gen thei hi. I minam leh gam i kisap thu leh la
te thei leh mu na pi'n, "Tua teng ka
ka sep theihna dingin panmun hoih khat ka ngah kul hi", cih sangsik
in, "Panmun thupi masa kei"
cih peuh tawh thu kigen thei hi. I deihna pen gello in a geii teng ki zulzul
zaw thei hi. A taktak in mihing pianzia ah thuneihna (power) nei ki ut tek a
hih manin, a thunei pen hih ding kilunggulh tek hi. Tua thuneihna (power/authority)
ngahna dingin lampi tampi tak tawh kihan ciam a hihi. Pawlkhat in thu dam, la
dam tawh gen in mite zawh ding hanciam uh a, kitelna tawh panmun ngah ding
lampi tawn uhhi. Pawlkhat leuleu in thagum hat thu zangin sing khuah suangtum
manin kipei uhhi. Lampi tawt a kibat loh hangin a kibang pen in thuneihna ngah
ding leh paulap zat a hihi. "Minam leh gam na it uh leh" cih paulak
ki zang tuaktuak hi. Thu dam la dam tawh thu neihna a ngah sawm te a hi zongin,
sing khuah suangtum tawi in thuneihna ngah sawmte a hi zong mipite muhna ah
panmun deih a kimuh ding utlo tuaktuak a hih manin " minam leh gam"
cih paulak kizang a, tua tawh mipite tungah kigen hi. ( I phawk ding khat ah panmun ngahlo in
minam leh gam a ding hi ta leh, midang te leh ei mimal a ding zong kisem theilo
a hih manin panmun ngah ding leh panmun len hoih a om ding kisam hi)
A siahuai mahmah khat ah
minam makai khat in thuneihna khah utlo (power corrupted leader) a hih manin
mipite'n a ma thuneihna pen a santheihna dingin "i gam leh mipite picing nailo hi, makai muanhuai kisam lai hi,
kalsuan vaihawm zia kician naikei" cih tawh mipi te khimm thei hi.
Mipi te'n zong makai dangin na a sem theilo ding bangin leh "a mah bangbang midang a omlo
ding" dan in kituat kha mawk hi. I gam vaihawm zia a tua bangin hong
kithun leh kihilh lua i hih manin makai khek ding leh midang makaihna zuih ding
pen lamkhialhna dan in kisang mawkmawh hi. Minam i supna hi.
Biakna sung (hih mun ah Biakna ka cih ciangin Christian
pawlpi te vai a gen ut hi zaw ing) ah zong leitung vai kipawlna hilo ci
kawmkawm na pi'n thuneihna kituhna, kisutna tampi tak kimu mawk hi. Thuneih ut
man a, Pawlpi (Church) phuh hi keng, Pasian gam zaina ding a Pawlpi phuh hing,
cih bang kiza zelzel hi. A taktak in cileng, Pawlpi phuhna pen Pasian gamzaina
ding cih a paulap hi a, Pawlpi omsa pan a pawlpi mite kaikhia a kipatna in
Pasian gam a zaisak zaw khollo kha ding hi. A kiselsim thu khat om leh kilawm
hi. Pawlpi nei nailo thu-um mite kilawmtakna ding ngimna ahih leh Pasian
lungdam mahmah ding hi.
Pawlpi sung vaihawmna
tektek ah zong Pawlpi mi pawlkhat i zawhna dingin "hih pen kha thu, hih pen kha thu hi kei" cih tawh khen
sawnsawn lai thei hi. Pawlkhat pen Pasian kamsang dan kineih in, a mau gente
pen "Kha thu" ci'n gen in, Pawlpi sungah nasep pih mite thu gente
leuleu ciang in, "Kha thu hikei" cih tawh paulap bawl in a mau thugen
mite san ding paulap bawl mawkmawk thei uhhi. A taktak in Pawlpi sungah a ma
thu a lut ding a deihna leh a ma thu gen kizui henla, a ma gen khempeuh hoih in
hoih ta keileh kisang pahpah leh cih a deihna na hi zaw hi. Kha a hi, Pasian a
bia khawm tektek pen midangte thu cianga, "Kha thu hi kei" cih tawh
nial sak in, ei thu hong kiman ding deihna tawh " Kha thu hi" cih pen
a taktak in thuneihna deih man na hi zaw thei hi.
Tua bek thamlo in biakna
sungah a gualzo pen leh a thunei pen hi ding kituhna mun na tam mahmah lai mawk
hi. Tua bang munte ah i deihna pen kilang khia saklo na in "Min le
Puam" khat paulap in kinei laizang hi. Leitung nuntakna ding sum leh paii,
inn leh lo kisam mahmah in kigen ngam lo a, tua nate ngahna dingin "Min le
Puam" khatpeuh minvawh in kizawng kawikawi thei hi. I zonzon leitung
hauhna damnate i ngah takciangin in lah, mimal neihsa mah suak veve mawk hi. I
deihna leh i ngimna lian pen kigenlo in, a gei leh a pamteng kigen gen zaw mawk
hi. Tua bang kawmkal ah a siahuai mahmah khat in "ei lampi zuih mite'n hong zuih pih leh kisang zolo, Pasian thu
tawh kituak lo, a maute a khawng upna gina hi kei", cih tawh etdan
khat nei sawnsawn hi hang. Ei leh ei a kithei hi lehang bel, mite zuih lampi
pen ei zuih mah tawh kibang a hih manin ei zong a maute tawh kilam dang hetlo
ding hi ven. Paulap i zatna khat bek in a mau tawh i kilamdanna om hi.
Mihingte in thuneihna a
deihlo omlo hi. Thu neihna ngahna dingin lampi tuamtuam tek kizong hi. Pawlkhat
in lam-ol zaw zuih ding tel uh a, pawlkhat in lam hamsa zaw a zuih kul hi. I
deih ngahna dingin i lampai kawmkawm in "paulap" kizong tek hi. A
kizong paulap te sung pan pawlkhat pen "a
piang takpi thu hi ding a, pawlkhat te pen phuah tawm zong hi thei hi". Mipi
te in a piangtakpi thu paulap a, a zang mite pen um baih zaw uh a hih manin thu
neihna a deih mi a tam zaw in hih a piangtakpi thu pen paulap ding na zang zaw
uhhi. A hizongin thuneihna a deih mi pen in thu neihna a ngahna dingin a
piangtakpi thu pen a kin masa hi hetlo in, mipi te'n "a mah dik hi, man hi"
ci'n a san theihna ding ua paulap a deih bek uh a hihi. A mah i mawh sutnna
ding leh a ma sepnop leh ngah nop baihlam tak a a ngah theihna ding bek a, a
zang hi zaw gige hi.
November 05,2016
