A
kizatna mun pen dinmun (situation) tuamtuam ah kizang thei hi. A diak diak in,
"mikhat in sep ut khat nei khinkhian, a hih hangin lah mi mai ah minsiat
thuak utlo a hih manin a ma seploh dan khat a mite mu sak nuam in, a lang khat
a mite khial masa sak nuam in a maute'n hong khialh masak man a, ken ka tua cih
hi cih munte ah" kizang pha diak hi. " Kei khialh masak hi kei in, a
mau kei tungah hong khial masa a hih man a, ka hih pat hi" cih tawh pang
utna lungsim a hihi. Mite mai-ah kidik tang sak nuam mite zat kammal hi a, a
lang khatte ding in a kithang kamna dum sung ah a kiat hun a kizat kammal a
hihi.
A
nihna kizat theihna mun (situation) pen "mite siatna ding a gel leh mite
gamtat khialhna ding bek a ngak mite" a kigen na munah zong kizang thei
hi. Mite in a mau tungah tawm khat sep khialhna nei leh a zah tampi a thukkik
ut mite genna khat zong a hihi. A vengpa/nu sialpi, sialtal a deih gawh manin a
ma kelpi keltal sup thuak a mi dangte a thang kamkam te genna in kizang hi.
I
nuntakna sungah, i veng i pamte, lawm leh gualte, khuapih tuipih te tawh
kithuahna ah khat veivei hih bang din mun a mite'n i nuntakna hong koih lam
kiphawk leh kithei thei hi. I innkuan sung vai, i mimal nuntakna mahmah hong
haza giugiau, mi tei mawhlo mi pawlkhat in hih bang dinmun i tun theihna dingin
na tangpang gige thei uhhi. Na gamtatna a hi a, na kampauna a hi zongin nisim
in hong en cik tawh kibang in, na khialhna leh na lampialna khat neucik a om
leh tua mun hong kawk lian in, nang a dingin nakpi takin a sia zaw leh a lian
zaw thuakna theihna dingin, a mau deihna a tun dong hong tulian ding uhhi.
I
khuasung ah khotang nuntakna phungpite a hi khotang kipawlna (social
organizations), biakna kipawlna leh gamvai kipawlna tuamtuam te sunga zong mimal
khat leh khat kikal ah hih bang dingmun a om hun leh a om lam kimu thei hi. Tua
bang kipawlna tuamtuam sunga om mi phengphi pawlkhat pen a thu leh la lah tei
kisa pian, kam zong cidam pian si leh, kipawlna pen a ma mimal angsung bek ding
leh a ma utna bek a ding a gel sawmin, a tangtun theihna dingin midangte
khialhna zong masa den kei mi ki om mawk hi. Midangte'n a ma tupna leh sawmna
guk taktak a theih zawh lohna dingun, a om sa makaite peuh mawhna ding zong
masa hi. Tua bang dinmun a om theihna a tamzaw in a kitel baih pen dingin
biakna pawlpi sung tawh a genteh hi leng: Pawlpi sungah mi pawlkhat pen tua
pawlpi sungah utna takpi leh Pasian zahtakna takpi tawh pawlpi mi a hih hangin
mi pawlkhat pen tua bang hilo hi. A mau deih dan leh a mau utna bang tawh a pai
theihna ding ngimna bek tawh a lut pawlkhat om hi. Tua bang dinmun ah pawlpi
sungah a ma minsiat ding selna in makai dangte khialhna ding leh khialhtheihna
ding lampi sialsak in, dum to den a, tua mun ah makai dangte'n a sik khak tak
ciangin a ma deihna gen kipan thei hi. A hih kei leh pawlpi sungah lah nuam sa
nawnlo in, pawlpi pan pusuak ding lah a mah min sia ding a hih lam thei a hih
manin tua pawlpi sunga om mi khatpeuh in a khasiatna ding bawl, or a ma
santheihloh ding kam pau leh deih tinten den kei a hih manin tua bang in mite a
om theihna ding zawi bawlsak den thei hi. Kei khialhna tawh a tawp hi keng cih
theihna ding lampi a gelgel manin midangte tungah a guk in " a mei uh
siksak" den hi.
A
beisa hun in i pu le pate in innkuan dongta vai, ta leh mo vai cih bang thubuai
khat peuh a om leh a thu pen diah in awl sak mahmah thei uhhi. A khial min pua
ding ut masa lo uh a hih manin a lang leh a langin thu pan masa utlo uhhi. A
hizongin a langlam ten hong pat ngeingei leh, "ei pat hilo a hih teh"
ci in suk theih bangbang, tuk theih bangbangin kituk gawp pah lian hi. Min hoih
ding kidem na pi in, a sia huai zaw a kithuk sawmna khat na hi gige hi. Khat
veivei ngim thu hi lo a, a mei kisik sak kha gul in a gu neih teng tawh mi a
tuk kik bangin mi siatna a gel na hi gige thei hi.
Dated:
September 04,2016
