Pasian in mihing pen a ma lim le meel (image) sun in bawl a, mihing in a bawltu (creator) bia uhhi. Pasian in a piansak nate khempeuh hoih sa mahmah a, a MA khutma tawh (sepna tawh) a bawl ngiat, a MA lim le meel sun a bawl mihing hangin a lungkimna pen a hihi. Pasian in a MA bawlsa mihing pen nusia mawklo in, mihing vai (affairs) ah kin mahmah a, nitak lam simin mihing tawh kimu dingin va pai hi. Hih pen Pasian in mihing vai a kin mahmah na a kilatna khat a hihi. Mihing vai pen a bawlpa Pasian in a MAH tawh khentuam lo in, kin mahmah hi.Minam vai tawh na sepna pen mihing khat ciat, khat ciat vai kigawm khopna vai a sem a hih manin minam vai leh mihing vai pen a tuam hi hetlo in, vai khat a kigawm khawm hi cileng kikhial lo ding hi. Mimal khatsim i vai kigawm khawm pen mi tampi tak a phak ciangin minam vai a kici hi a, minam vai i cih tak ciangin mimal khat sim, khat sim i vaiteng mah a huampi a genna hi kik zaw hi. Mimal khat i nuntakna nop zawkna ding, pilna siamna zonna ding, sum le pai zonna ding teng khempeuh pen mimal vai bulphuh zaw a, a hizongin mi tampi huam a i et tak ciangin minam vai in i koih zaw hi. Tua a hih manin a bawlsa mihing vai (mimal - Adam & Eve) vai a kin mahmah, thupi a sa mahmah Pasian in minam vai zong thupi sa in kinbawl hi.
Zomite sungah Pasian thu hong puak a, Pasian thu sungah hong gahsuah sak zo American Baptists Mission (ABM) te’n a mau hong kipatna gam khuahun luanzia zui in, Saptuam/Pawlpi vai leh gam ukna vai khenna ( Separation of the Church and the State) tawh hong makaih uh a, a hoihna tampi tak om hi. A hi zongin Zomite tua thu om dan leh thu paidan pen kanbeh nawnlo in, a hong kihilh bangbangin i sang a, i zui suk pah hi. Zomite tungah Pasian thu hong puak American te in, hih bang a hong pattahna uh a hang om a, tua pen kantel huai hi. A khatna a Saptuam/pawlpi leh gam ukna vai ( Church and State) i cih pen “Minam leh Biakna (Nation and Religion)” bangin kisang kha hi. “Church and State” leh “Religion and Nation” kammal deihna pen kinai pian na pi’n kibang lo a hihna ki phawklo hi. Tua hang in tu ni dong ciang mah “minam leh biakna” vai a ki gen ciangin mi tampi tak in Saptuam/Pawlpi leh Gam ukna vai” genna bangin kisang lai hi. A nihna ah, American gam in “Saptuam/Pawlpi leh gam ukna vai” a khen nopna uh a hang pen, hun khat lai in Europe gamte ah “Saptuam/Pawlpi leh Gam ukna vai” kikhenlo a hih manin gam khat sunga teng khawm te in, a mau upna pen suakta takin zui (practice) theilo uhhi. Saptuam/Pawlpi a biakna makai Siampi/Siampu te’n gam-uk kumpi te thu neih khum in, a deih loh mite uh hemkhia in, a deih mite uh kahsak cih zah dongin thu neihna lian nei ngei uhhi. Tua tawh kibang mah in gam pawlkhat ah Gam-uk kumpi in thu nei lua leuleu a, a mau upna bek mah thupi sa uh a hih manin a mau saptuam/pawlpi pen gambup in a zuih ding deihna tawh thukhun a bawl uh ciangin mite in suahtakna neilo uhhi. Mimal simin a mau upna bang a zuih theihna ding lunggulhna hang tawh Europe pan tai khia a America gam a pemta gammite in a gam thak uah, tua bangin saptuam/pawlpi leh gamvai a kikai-awk gawp ding deih nawnlo uh a hih manin America gam a phuh khiat uh ciangin tua thu pen vai thupi khat in koih uhhi. “Saptuam/Pawlpi leh Gam ukna vai” a kikai-awk thu om nawnlohna ding deihna tawh a gel uh a hihi.
American gam sungah “Saptuam/Pawlpi vai leh Gam ukna vai” a tuam tuak in a om ding a deih uh pen biakna leh minam vai sepna ah hoih leh cidam huai mahmah hi. Saptuam/Pawlpi makaite in Gam uk makaite tungah thu a neih khum theih loh bangin, Gam uk makaite in zong biakna makaite tungah a mau up lohpi thagum hatna (by force) in upna khatpeuh zui sak thei nawnlo uhhi. Mi khempeuh in a mau upna bangin zui leh bia (practice) thei uh a, upna ah suahtakna om hi. Gam uk kumpi te zong Saptuam khat pan Siampi/Siampu i suk hei to hei na tawh vaihawmna nawnlo pah hi. Saptuam/Pawlpi khat i upna pen Gam uk kumpi in zong gam sung mipi khempeuh zuih sak sawmna bei pah hi. Saptuam/pawlpi in Gam ukna vai ah a huzaapna (influence) a om loh bangin Gam uk kumpi in zong a ma thu neihna (power) zangin saptuam/pawlpi sungah a huzaapna (influence) om lo hi.
Kamsiatna tawh, Zomi sungah tua bang thugui leh paidan hong tun ciangin i kammal kicin loh man maw, a hih kei leh i thu muhna a kicin loh man maw, koi zaw hiam khat hangin, “Saptuam/pawlpi leh Gam ukna vai- Church and State) pen “ minam leh biakna ( nation and religion)” in kisang kha a hih manin a deihna a kibat loh bangin, a piang thunung (consequences) zong ki lam dang mahmah hi. Saptuam/pawlpi vai leh gam ukna vai ( church and State) ah pen ki-ukna, vaihawmna lam tawh kitam sai zaw deuh a, minam leh biakna ( nation and religion) ciangin a huampi leh a thu (theory) lam tawh kawk zaw deuh hi. Hih thu nihte gel kibatlohna leh kilamdanna hoih takin i theih khitteh Pasian mai i zonna zong hong kilam dang ding a, Pasian bawl sa midangte tawh kizopna zong hong hoih zaw pah ding hi.
Zomite in thu kicingin kikan nawn tuanlo in, “Saptuam/Pawlpi leh Gam ukna vai- Church and State” kikhen pen hoih mahmah a hih manin, “Pasian leh Minam” vai pen a kigawmlo ding bangin kisang suakpah leuleu hi. Tuhun diakdiak bangin Pasian thu a kigenna mun leh Pasian thu gen/ Pasian na sem Tuucing/ Siampi pawlkhat in hih thu nih pen a ki kelki mahmah bangin mu uh a, “Pasian maw, Minam vai” cih khat zawzaw tel ding bangin gen beh thei lai uhhi. “Pasian tel zaw ding maw, Minam tel zaw ding cih bangin Pulpit tung pan tona (challenge) bang nei mawkmawk uhhi. Minam vai pen Pasian thu tawh kituak hetlo, Pasian lung a tuaklo thu bangin thu ngai mite ngaihsut theih dingin kigen a, thu ngai sung pan thu khinkhai mello pawlkhat bangin a kigen bangbang kisang pah lianlian lai hi. Pasian in a bawlsa mihingte vai ah a kin mahmah kim lai, Pasian nasem a kici mi pawlkhat in minam vai tawh kisawh khak lohna pen Pasian lung tuakna ding bangin kigen mawkmawk hi. Minam vai a kin deuh mite bang Pasian thu tawh kituak lo, Kha thu tawh kipawllo bangin kiko bawl thei lai hi.
Pasian maw, minam? cih thulu tawh thu ngai mipite tungah thu gen ding hilo zaw hi. Pasian in minam it leh kin a hih manin “Pasian leh Minam” cih ding hi zaw hi. Pasian tel zaw ding maw, Minam tel zaw ding cih bang dotna tawh thu ngai mipite tel theihna piak ding hilo zaw a, Pasian leh Minam kipum khat hi a, a thu kihual a, a pai ding hi zaw hi cih a gen ding hi zaw hi. Pasian tel zaw ding maw, Minam tel zaw ding cih bang a thu ngai mipite tungah thu gen mi in a biak Pasian thu pen tel taktak lo hi zaw hi.
I biak Pasian min a than semsemna ding leh a bawlsa mite sungah khat leh khat ki-itna a om semsem na dingin makaite a kipan mipi khatsim khat sim in, “Saptuam/pawlpi leh Gam ukna vai- Church and State” leh “Minam leh Biakna- Nation and Religion (God)” kilam danna pen telsiam mahmah ding kisam hi. Minam khempeuh in biakna nei tek a, mimal khempeuh in Saptuam/pawlpi leh gam ukna ah thu neihna nei khin lo a hihna phawk siam ding kisam hi. Hih thu kibat lohna i khentel siam tak ciangin Pasian maipha i zon zia zong hong kilam dang ding a, Pasian lungtuak zaw in, Pasian bawlsa mite tawh zong nuntak nuam in kinungta khawm thei zaw ding hi.
Dated: March 1, 2019.
