By Khansuan T. Guite
Pasian cih kammal i zak ciangin a hoih lam a hi:- itna bulphuhna tawh gamtat luhekna khempeuh i mit kha in kimu pah a, Satan cih kammal i zat nak leh siatna lam a hi:- gitlohna, huaihamna leh thu sia la sia khempeuh i mitkha in kibawl pah zatzat hi. Man mahmah hi. Pasian pen itna a hih manin Pasian nei khempeuh ITNA nei pah a, ITNA nei mi peuhmah in siatna bawl ding gel lo uhhi. Satan pen Pasian gal a hih manin, Pasian hihna a hilo khempeuh Satan a, a suak hi. Pasian le Satan kilam danna i muhdan i lah khiat ciangin zong mite tel baih dingin Pasian pen a cingh mahmah leh a it huai mahmah in lim kilak a, Satan a hih leh a luahuai, a gitloh mel, a hi viavua bangin i ciing hi. Pasian leh Satan kilam danna a kitel na ding a hihi.
Tua hang mah in zong Pasian min kilawhna leh Pasian min suanga na sepna khempeuh thu hoih tawh kizom, kivai hawm dingin kikoih pah lian hi. Mi khatpeuh in Pasian min leh gam a ding cih a gen khak nak leh mi dangte’n kipanpih nuam pah a, tha kipia pah ziahziah hi. Hih pen Pasian vaang hi a, mihing tungah kinga hetlo zaw hi. Mimal git lohna, khemhatna leh siatna te kimuh mawh bawl in, a hoih lam pan muhna bek tawh ki-en pah hi. Pasian pen itna leh hoihna tawh kitawi khai a hih manin, tua bang mite i tawikhaina zong Pasian i muhna dan mah bangin kitawi khai a, a it huai vive in kimu hi. Mihingin hoihna leh itna a kideih luatna a kilatna zong a hihi.
A lang khat panin Satan min kilo kha ta kei leh, siatna leh hoih lohna lam a kisepna mun peuh pen Pasian tawh kizom lo in kikoih a, Satan na sepna in ki mu lianlian theihi. Kuamah peuh in zong tha kipia lo bek thamlo in, siatna tawh ki sawh khak ding kilau mahmah a hih manin a hi thei zah in kipelh tek hi. Mihing in siatna a kideih hetloh na leh siatna bawl ding a ki-ut hetlohna a kilahna a hihi. Satan pen Siatna khempeuh kipatna in kitawi khai a hih manin a min lo/gen ta kei leng, hoih lohna leh siatna a hih nak leh Satan tawh i kizom sak hi.
Pasian pen hoihna tawh i tawi khai a, Satan pen siatna tawh i tawi khai laitak in, mihingte pen i ki tawikhaina ding a tuam omlo hi. Pasian tawi khaitna zang zaw ding maw, Satan tawi khaina zang zaw ding maw, cih bek a hihi. ( Hih mun ah, ei mihingte pen, ei leh ei i kineih loh lam, a hong nei a om lam kilatna zong a hihi:- Tua pen hoihna maw, siatna cih khat zawzaw hi ding hi). Mihingte in hoihna lam i zuih leh Pasian tawh kinai zaw leh Pasian vai zaw in kimu pah a, Siatna lam i zuih leh Satan tawh kinai zaw leh Satan vai zaw in i ciamteh hi.
Tua hoihna leh siatna i gen pen gamtatna bek hilo a, gamtatna hong nei sak ding lungsim ngaihsutna zong huam hi. Lungsim sungah itna leh hoihna omlo in, itna leh hoihna kikhah khia theilo hi. Siatna leh gitlohna a om leh, a hoih leh itna tawh kigamta thei lo hi. Tua hi na pi’n, mi tampi tak in lungsim sung pen ki mu theilo, ki en theilo leh ki lawngkha theilo a hih manin kisel sim nuam tek hi. Mite muhna ah hoihna le itna nei a hong kimuh ding ki ut tek hi. Siatna leh a hoih lo a hong kimuh ding ki ut lo tek hi. Tua a hih manin mihingte in i lungsim puak pen kisel sim thei den hi. A hoihlo sem ut, sep sawm na pi’n, a hoih leh itna nei a ki lah khiat kisawm teitei thei hi.
Pasian paulap in siatna bawl sawm, a bawlbawl mi ki om thei a, mi pawlkhat in zong tua bang mite ki um leh thupi kisa thei lai hi. Pasian paulap peuh leng a hoih khin ding dan in a sang leh a pom zong ki om mawk hi.
Mihingte in siatna leh gitlohna ki ut lo in, hoihna le itna kiteel na pi’n i sep taktak ciangin i teelloh pen zui in na kisem tawntung mawk hi. Hong kitawi khai ciangin Pasian tawi khaina a hi “Hoihna leh Itna” zang ut na pi hangin, i khai ding nate ( gamtatna) pen “Hoih lohna leh gitlohna” peuh hi zaw sop hi. Pasian paulap kawm pipi mah in Satan tawikhaina kizang zang hi.
Mi pawlkhatte in tua mah kiselna in ki nei a, tawikhaina a manlo pi kizang den hi. Pasian tawi khaina tawh hong kitawi teh ding ut in, kineih khemna tawh na kisem a, Pasian min kipau lap theihi. Siatna leh Hoihlohna sem na pi’n Pasian min mah I paulap pen, hoih hetlo hi.
Pasian min tawh na sepna a hih nak leh, Pasian min kigenna a hih nak leh, Pasian min a kalsuan na a hih nak leh ci’n a hoih lohna teng na ngawn cillum tawh valh ding kihan thawn, kisawl den zaw lai dep hi hang! A taktak in Pasian min zang a, gamtat luhekna pen a hoih leh itna bulphuh ding hi zaw a, ki gen zawh thu a hih loh ding hi zaw hi.
Siatna leh Gitlohna tawh nasem, gamta na pi’n Pasian min paulap na zong gamtat khialna taktak a hihi. Mi om muang khat, buaina bawllo khatpeuh gitlohna lungsim neihna tawh a mawhna ding zonna zong Satan tawikhaina zang i hih lam kiphawk khalo thei hi. Kipawlna khat peuh sungah ki siatna a tun mite zong Satan vanzat khat hi a, Pasian min a kipau lap phial zongin Satan deih tawi khaina tawh i teh theih ding hun hi ta hi.
Pasian min zangin “Siatna leh Gitlohna” na zat lai teng Pasian tawi khaina tawh a kiteh theilo i hih lam phawk hun a, Satan min zangin “ Hoihna leh itna” i neih phial zongin Satan tawi khaina a kizang lo a hihna i theih ding kilawm hi.
Na tawi khaina pen “Itna leh Hoihna” tawh a kiteh hiam? Or “Siatna leh Gitlohna” tawi khaina a hih hiam cih mihing in i muh theih ding thupi hi. Itna leh Hoihna pen Pasian zat tawi khaina hi a, Siatna leh Gitlohna pen Satan zat tawi khaina hi den hi.
Dated: February 27, 2019
