(Organizational structures and leadership styles)
By Tual Khan Suan
A masa in kipawlna pawlpi cih kammal ka zat teh Kawlgam lam a om Zomite’ bil ah Pasian biak khopna ding a kiphuh saptuam (church) i lungsim a om kha ding hi. A hizongin hih mun a “pawlpi” ka zatna i gen nopna tak pen Manglai a “Organization= Kipawlna/vai khatpeuh sem khawm dinga kiphut mite kipawl khopna” a gen nuam ka hihi. Tua kipawlna pawlpi sungah biakna kipawlnate a hi, tualsung Saptuam (local church), Association/ District kipawlna, Convention kipawlna dong kihel hi. Biakna sunga kipawlna hilo kipawlna tuamtuam te a hi, political party, khuatang kipawlna (community based organization) leh sum metbawlna dinga kiphuh company te zong huam hi.
Makaih zia tawh kisai i gen tak ciangin makaite makaihna mun a kipawlna pawlpi (organization) kilam khiat zia zong genlo in kinu sia theilo hi. Makaihzia in kipawlna pawlpi kilam zia a khek theih bangin, kipawlna pawlpi kilam zia in zong makaite makaih zia ding lamlak thei hi. Kipawlna pawlpi kilam zia leh makaih zia pen khat leh khat kipuah, kikhek sak thei tuak a hih manin hih thu nih pen a ki zom tawntung ahihi. Tua a hih manin kipawlna kilam khiat zia (organizational structures) nam nih i en masa nuam hi. Tuate pen:- 1) Mechanistic Structures leh 2) Organic Structures in a hampi in kikhen thei hi.
Mechanistic Structures pen Hierarchical Organizational Structures in zong kithei a, a zang kipawlna/pawlpi kilam zia a hih leh, nasepna ah thu neihna/ukna a nei mi tamlo a, bulpi pan thu gelna (centralization) tawh kisem/kizang hi. Nasepna mun peuh ah, makai ding a kiseh pen i thu bang a kisem hi pah a, a nuai a mite in dotna leh genkikna omlo in lamkhat (one way) kizopna tawh hong kisawl bang sepna a hihi. Nasem mi, nasem makai, supervisor, manager leh CEO cih bangin “nunun gah” bangin, a gah a kithuap to dimdim a, a mau munmun ciang bek tawh kizopna nam a hihi. Hih kipawlna pawlpi kilam zia a hoihna khat ah sepzia bawlzia ding pen kician takin makai te’n hong gen uh a, a sem mite in ngaihsut tawm/ khuak zat kullo in hong kisawl bang a nasep a hih manin kitel sinsin sawnlna bang a nasep a hihi.( Hih kilam zia pen khuak leh ngaihsut tawmna zat kullo a, thu piak dandan a zat ding a hih manin, makaipi (CEO) a kikhel kei leh thuthak lut theilo hi.)
Organic structures a hih kei leh, Flat Structures tawh zong a kithei kipawlna pawlpi kilam zia pen thu neihna leh thu khensatna piakna pen mi khatbek i khensat hilo a, bulpi (central) pan thupiak cih bang zong omlo zaw hi. Nasem nautang mite pen a kikhil diudeu hilo a, nasepna vai ah na sem khatpeuh in makai lianpente tungah thu sung, puak ziau thei hi. Nasem na ah makai a om tei hangin a maute pen a siamna uh leh nasep ding (project) zui in makai kikhek zelzel hi. Makai panmun pen a kisapna zui in ki hei (rotate) zel hi. Bulpi pan sepzia bawlzia ding thu piakna om denlo a, nasem mimal te in a mau ngaihsut tawmna zat kul a hih manin bangci sep ding leh koi hoih pen ding cih pen khensat theih ding hamsa thei hi. Nasem mipite in zong makai lianpen (CEO) tungah nasem makaite kantan in thu puak leh thu pulak thei hi.
Makaih zia tawh kisai in pawlpi/kipawlna (organizations) khempeuh a dingin ki makaih zia nam khat tawh kituak vek, hoih pen cih om theilo hi. Kipawlna pawlpi tuamtuam in a mau pawlpi a ding a hoih pen ding leh a mau kim leh kiang (environment) tawh kituak pen in a mau septheihna ding a hoih pen ding leh a mau a khuasuak (survive) na ding a hoih pen tek zangzaw uhhi. Kipawlpna pawlpi kilam khiat zia a tuam tek bangin makaite i makaih zia zong kibang kim theilo hi. Makai te in zong a mau makaihna sunga om pawlpi kim leh paam en a, a ki khung sat hu zui a makaihzia zong zuih a kisap leh a poimawh hun om thei hi.
Makaihzia pen kipawlna/pawlpi khat leh khat kibang kimvek ding cihpen a hih theihloh bangin kipawlna/pawlpi khat ah a lawhcing mahmah makaihzia pen kipawlna dang khat a dingin lawhcing zo hetlo thei hi. Makai siam mite in kipawlna/pawlpi kilam khiatzia en in, a mau makaihna ah a lawhcing ding bek hilo in, kipawlna sunga om panmun nei mite (managers leh a dangdangte) in kipawlna/pawlpi a ding na hoih zaw a sep suah theihna ding uh ngimna tawh makai uhhi. Makaih zia pen a huampi in nampi nih in kikhen thei hi. Tuate in: 1) Zia le tong pansan a zolna (Behavioral approach) leh 2) Mun leh thu zui a zolna ( Situational Approach) a hihi. Tua nampi nih (2) tung pan hong ka khia makaihzia nam (leadership styles) nampi (9) te tawh kisai i gen ut hi.
- Kikhelna piansakna makaih zia (Transformational Leadership):- Hih ki makaih zia nam in khotang nuntakna leh tuansuang nuntakna ah nungzui mite/nasem mite mimal zia leh tong a hoih lam a khekna ding bulphuh hi. Mite tha lawpsak, ngaih sutna hoih nei sak leh gamtat luhek zia a hoih lam a tunna ding tha piakna tawh makaihna a hih manin nungzui mite in tha ngah uh a, a zat a hamsat hangin mipi mit tu mahmah hi. Mimal khat sim bulphuh zaw leh mimal khat sim pen ngaihsut khak a koih ( Individualized consideration) a hih manin nungzui mite lungkim deuh se hi. Nungzui mite ngaihsutna leh thu muhna zong thupi san leh ngaihsutna neih ding thapia (intellectual stimulation) a hih manin nungzuite in a mau a zong kisansak ci in thalawp uhhi. Tua banah nungzui mite tha ngahna ding in (inspirational motivation) a, nungzui mite lungkimna ding leh ngimna hoih neih ding hanthon den hi. A hih zongin makaite pen khat veivei huih lak a innlam bang thei in a nung zuite a dingin a kician sinsen leh lamlahna omlo thei hi. Makaite in nungzui te lunglutna dingin “van bang hi leh zuak zawh thu” dan in phatphat a gengen zawh ding kisam makaihna nam a hihi.
- Aisa lo ngek a zol makaih zia (Transactional Leadership):- Hih makaih zia pen nasepna khat peuhpeuh ah a gah (result) muh ding lam-etna thupi sakna a hihi. Thu kikhung sa zui in na kisem hi a, lawhcinna leh lawhsapna munmun ah a kisam bangin thaman leh gawtna piakna bulphuh hi. “Sep hoih leh thaman, sep hoih kei leh gawtna” cih nam a hihi. Hih makaih zia in kipawlna/pawlpi pan kipia panmun leh thu neihna zui in mawhpuak nei a hih manin mimal khat sim i tavuan leh honpi (group) khat i tavuan pen ki-encik den hi. Hih makaih zia sungah makaite in sepzia, bawlzia leh paidan omsa zui in nasepna tawh kipawlna pawlpi tupna leh ngimna a sepsuah theihna ding bulphuh a hi, galkap sung makaih zia, Company golpi ah makaite, leitung bup kipawlna cihte tawh kituak mahmah hi. Kipawlna/pawlpi a makaite in a kikhungsa paizia zui in sep dan ding gel uh a, nasem mite in a mau sep ding leh thaman ding teltheih mahmah na mun ah kilawh cing mahmah thei hi.Mimal sim i sepkhiatna tunga thu ki-en zaw a, nasem mi khat ciat in bangci bangin sem uh hiam cih thu bulphuh zaw hi. A hoih (positive) gah khiatna lam thapia in a hoihlo (negative) gahkhiatna a om leh taina thuak cih tawh makaihna a hihi. A phattuam lohna (disadvantage) khat ah a omsa/ a kigelsa thu zuihna tawh kima kaihna a hih manin na thak patna (creativity) leh na thak bawlna lam a thupi sak kipawlna/pawlpi sungah kizang thei tak hi. Nasem mipite sepna khempeuh sulzuih leh etcikna ( supervision) na lam hah bawl makaihna a hihi.
- Sawltak makaih zia (Servant Leadership): Sawltak makaih zia pen a khangham mahmah makaihzia khat hi a, mimal leh kipawlna hoih zawkna ding; met zawkna ding bulphuh bek thamlo in mi khempeuh angvan (care) ding ngimna neihna tawh na sepna a hihi. Makaite in thu neihna (authority) pen a mau bek in lencip lo in, hawm (sharing) zaw uhhi. Tua banah mipi leh nasem mite a ding geel leh ngaihsun masa zaw uh a, thu khensatna ah zong kipawl khawm a thu khensatna (collective decision making) tawh thu gel hi. Mipi/nasem mite a dingin metna om pen ding ki masak a, tua khit teh nasepna (performance) a hoih zawkna dingin khat leh khat kihuh ding thupi sak hi. Tua khit teh mimal, kipawlna/ pawlpi in khotang nuntakna (society) ah na hoih sepna tawh mapan ding thapia hi. Hih kima kaih zia nam in khangsawn/hun sawt ah society kikhelna dingin thapia a, paizia leh sepdan hoihlo te damdam in kikhek sak thei a hih manin mi pawlkhat in pakta mahmah hi. Makaite in mipi leh nasem mite mai ah matawng den a hih manin mipi leh nasem mite in makaite tungah muanna neihi. A thanemna khat leuleu ah, makaite in thuneihna (authority) tawm nei lua a a hihmanin ngimna (project) khat matutna ding hamsa thei hi. Nasem leh mipite metna ding bek masak zawk in kinei a hih manin kipawlna pawlpi leh mipi/nasemte kikalah kua masak ding (conflict of interest) om thei tawhtung hi. Hih kimakaihna nam pen mimal ngiat kihel a nasemna (participative management) a hih manin mipi leh makaite kinaina om hi.
- Ukpi makaih zia ( Autocratic Leadership): Ukpi makaih zia pen mikhat bek in a nuai a na sem khempeuh sep leh bawl dan ding khensat sak leh vaihawmna sak a, thu neihna (authority) pen a mah bek in lencip a hih manin, a nuai a mite tungah thu nei mahmah hi. Aisa lo ngek a zol makaih zia (Transactional Leadership) a makaite sangin thuneihna ah tampi tak uang zaw lai in na sep theihna (authority) nei lai uhhi. Kipawlna pawlpi a makai thunei mite lo in bang mah kivai hawm theilo dingin lencip uhhi. Hih dan makaih zia pen nasepna ah khialhna om theilo ding a kisam kipawlna/pawlpi te ah kizang thei hi. Makaite pen thu neihna bekbek deih uh a, thu neihna kham/gui uh a hih manin mi dangte thusim zo lo thei hi. Hih bang a makaihzia pen pilna leh siamna a neilo mi te sung ah nungta zo bek a, mipil leh misiam kideihlo hi. Mipil leh misiamte i siamna zat khiat theihna ding mun hilo hi. Khut tum tawh vaihawmna nam a hihi. Galkap mangte makaih dan nam hi a, sawlna hilhna a kiman theihna ding mun bekah lawhcing thei hi. A hoihna khat ah thukin khensatna ding a omna munte ah midang tawh kikup kul selo in thu manlangtak in kikhensat thei hi. Kipawlna/pawlpi a thakhauhloh (disorganized) hun ah makaina pen kicina mahmah thei hi. Ahoih lohna lam khat leuleu ah makaite in a thu neihna uh a khengval in zang pahpah kha uhhi. Tua banah, mipil misiam tawh vaihawm khawm theilo a hih manin kilamdanna tampi piang ngeilo hi. Hih dan makaih zia pen tuhun tawh kituak in mi deihna a tawm hangin mun tampi tak mah ah kizang lai veve in, matun zo veve hi.
- Hih sak lel makaih zia ( Laissez-Faire Leadership): Laissez-Faire cih kammal pen French hi a, “ hih sak lel un” cihna a hihi. Tui luang lai pen hei suk, heito sese lo a tui luang hat bangin a ma thu a luansuak sakna dan a hihi. A semte sep dandan sang ziau a, makaite ki kausi phum (thuk lut) lo a, ki daithahna tawh makaihna nam a hihi. Lam khat panin cileng, kimuanna bulphuh in a sem pen i sep bangbang sansukna nam hi a, a nung thu ah zong min phatna (credit) zong deih masa tantan selo hi. Ngimna matutna ding a na a kisep ding masak zawkna a hih manin a semte in hoih ding hi ci a, a sep pen va sawk suk, va sawk toh kullo, matutna a kineih ding thupi ci a sepzia bawlzia tua ci ding cih gen tantan lo a,khah zanna tawh makaihna zia a hihi. Mimal khat bek tungah kingah hilo a, pawl (team) leh a honpi (group) nasem na ah a sem mite khensatna pen a hoih pen hi pah hi. Hih makaih zia pen ukpi makaih zia tawh a ki-elpuak lian hi a, thu khensatna pen pawl leh honpi (team and group) pan a kihel kha tengin khensat tawmna tawh kalsuan hi. Siamna nei mite in a siam tawp na uh suahkhia in a hoihzaw kidemna tawh mipi le nasem te in a mau tuahkhak thu haksate mualsuah zo ding in kisinna mun khat a hihi. Tua a hih manin haksat hun in bang ci kalsuan ding cih nasem mipi in thei pah hi. Pilna le siamna a nei mite tawn nasepna ah ki lawhcing mahmah a, kinai ukluatna nuai a na sepna a utlo mite in nuamsa uhhi. Siamna nei mite lubawk tang sak a panlakna mun a hihi. A thanemna ah bel na sepna pen lawhcihna leh lawhsapna ah a sittel ding omlo leh a hoihlo khatpeuh phut khak loh ding pan kiven kholhna dingin makai tawh kizopna tawmlua a hih manin kihial kha hi.
- Mipi kihel makaih zia (Democratic Leader): Mipi kihel makaihzia pen mikhat leh khat zahtakna kipiak tuahna (mutual respect) tung a kilam khia makaih zia hi a, makaite leh a makaih mite in khut kilen a sepkhawmna (collaboration) bulphuh hi. Makaite leh mipi/nasem mite in mawhpuakna lian mahmah tuak a kikim in nei a hihna ki uangsak hi. Hih makaih zia tawh kisai in Penn State University ah Professor John Gastil in a genciatna ah, “ kipawlna sunga om pawlmi khempeuh tungah mawhpuak kihawm kim tek a, pawlmi sungah vaihawmna, thu neihna kikim hawmna leh thu khensatna bawlna ah mipite kihelsak na a hihi” cin na gen hi. Mipi/nasemte in a mau tuahkhak thu (experience) pulak in kisinna in kiznang a hih manin khat leh khat kimuanna khangsak hi. Tua banah panmun nei sim in kipawlna pawlpi vai thu khensatna ah kihel kha hi. A hoihna khat ah nasem mipi khempeuh in a mau kihel kha a vai kihawm a hih manin tha ngahzaw uh a, lungkimna sang zaw hi. A thanemna lam ah thu kin tawh vaihawm kisapna munte ah thu kikupna leh khensatna in hun la thei a hih manin a hun laplo thei hi.
- Lubawkpi makaih zia (Bureaucratic Leadership): Hih makaih zia pen thukhun, thu meilet leh laibupi zui a kigelh sepzia bawlziate a ultung sak kipawlna pawlpite ah kizang zaw hi. Kumpi sung thu vaihawmna leh sum metbawlna company liante sunga department vaihawmna cih bangte ah kitam zat thei hi Kipawlna kisapna zui in Zalian zaneu lahna in panmun kithupi sak a, thu gen lasakna ah zong awsuah kibanglo hi.. Thukhun, thumeilet leh zuih ding thute (regulations) te tungtawn a nasem zaw a hih hangin siat luatna ding a om kei nak leh panmun lian nei khatin tuate zui tektek lo in sem veve thei hi. Hih kima kaihzia in pawl (team) sungah vaipuak (duties) leh panmun (role) thupi sak a hih manin vaipuak leh panmun neite in thu nei zaw pah uhhi. Tua banah thukhun, thu meilet leh zui ding thute tungtawn a kisem a hih manin kideihsakna (favoritism) tawh nasep hamsa hi. A thanemna khat ah panmun len makaite in kipawlna paizia leh sepzia khek ding pen hamsa sa thei uh a, panmun tawmcik om a hih manin nasem mipi te khantohna ding kong vang neu hi. Nasep ah matut zawhna dingin Laibu sungah kigelh paizia leh sepzia zui a hih manin cidamna lam, bitna (safety) lam a sem kipawlna pawlpite tawh kituah mahmah hi.
- Vangneihna tawh makaih zia (Charismatic Leadership): Hih makaih zia pen nasem mipi te phatna leh zolna bulphuh a kimakaihna nam hi a, makaite in a mau mimal kipum piakna ( personal conviction) leh a thu a la tunga mimal ki zawhna (commitment) bulphuh hi. Hih kimakaih zia pen a tunga i gensa a kikhelsak makaihzia (transformational leadership) tawh mun tampi a a zia leh tong uh kithuap a hih manin kikhen theihlohna mun om thei hi. A hangin makaite i mimal hihna (personality) leh mipi phatzawhna (charming) tunga kinga a hih manin vai khempeuh lohcinna, leh lawhsapna pen makai te tung bek ah om hi. A kibat phat diakna pen in makaite in ngimna khat a lawhcinna dingin hansuah den a, na sepna ah a mainawtna ding leh matut zawhna dingin hangsan takin mapanna nei tuaktuak hi. A kilamdan deuh a hih leh a bulphuh (focus) leh deihna mun mipi(audience) hi a, Charismatic makaite in a omsa kipawlna/pawlpi pai zia pansan in mipi lungsim long ding hanciam in, Transformational makai in a mau vision bangin kipawlna/pawlpi khek ding hanciam hi. Charismatic makai in mipite lungsim lawng ding (emotion) tungtawn in a mau deihna lam tun ding hanciam uhhi. Makaite in a ngimna khat a kizawh na dingin a mau hoih sakna dan in (paidan leh sepzia ding cih om selo in) sem zaw hi.
- A mun le hun zui a makaih zia (Situational leadership): Hih makaih zia pen a kipawm (adapt) nam hi a, makai te in kipawlna pawlpi kisapna leh a mun zui in a kipawm kikkik nam a hihi. Kipawlna khat a hi zongin a mun a kibat kei leh makaih zia pen kibang kimlo nam a hih manin a kol (flexible) mahmah makaih zia a hihi. Hih makaih zia pen makai ding mite in siamna nam kician (specific skills) kisam tuanlo a, a mau in kipawlna pawlpi hoih zawkna dingin a mau siamna lam bulphuh in sep khiat ding ultung sak zaw hi. Hih makaih zia ah a thupi pen in makai te’n a thu leh mun zui a a zia a tong khel siam na pen a hihi. Mipi tawh vaihawmna ding mun ah democratic leadership nam zang thei dingin, ukna leh vaihawmna lam ah bureaucratic leadership zang zel theih kisam makaih zia a hihi. Makai te in kipawlna pawlpi i kisapna mun ah makaih zia laih pahpah uhhi.
Makaih zia nam tuamtuam om na pi’n kipawlna pawlpi khat a dingin hih pen hoih pen leh kicing pen cih theih ding om theilo hi. Kipawlna pawlpi kilam khiat zia in a sai bangin makaih zia in zong kipawlna pawlpi kilam khiat zia puah thei hi.
Zomi sungah makaihzia tawh kisai sinna (leadership training) tampi tak om ngei khin, om lai ding hi. Tua hi na pi, a lamdang khat ah bel makaihzia hangin Zomi sungah tampi tak kilem lohna, kikhenna om khin a, om lai kha ding hi. Kikhenna i gen tak ciangin Zomi sungah a langtang a kimu thei leh a tampen kipawlna pawlpi a hi biakna saptuam (church), biakna kipawlna hi pen hi. Tua a hih manin saptuam sung leadership tawh kisai zong en phat huai hi.
Saptuam (church) makaih zia ding pen makai a tam zaw in Sawltak makaih zia (servant leadership) hi ci’n kisang kim thei pen hi. Servant leadership pen a tung a i gen sa bangin nasem mipi leh kipawlna pawlpi a ding masak ding, angsung masak lo ding leh thu neihna pen mipi leh midang te tawh hawm ding ( power sharing) bulphuh a hihi. A hi zongin Zomi saptuam sung makaihzia ah mipi leh kipawlna a ding masak sam na pi hangin power sharing pen kizang lo in kinawl khin den kha hi.
Biakna makai pawlkhat in saptuam makaihzia sinna a piak uh ciangin servant leadership pen kilim hilh mahmah na pi’n i sepna ah tua tawh a kileh bulh a hi ukpi makaih zia (autocratic leadership) ki zang tawntung hi. Biakna sung pen Theocracy vaihawmzia, makaaih zia a hih manin thu neihna hawmna (power sharing) peuh mah omlo hi, ci’n hilh zel hi. Pasian thu bek ah Theocracy vaihawm zia man mahmah na pi’n, mihingte thu vaihawmna ah mihing zia leh tong kitel khin lo tawh kibang hi. Khat veivei a thu kicingin a kigen loh manin makaih zia thusinna a thu pen a kituak lo tawh a kibat hun om hi. Topa Jesu hong hilh sawltak makaihzia (servant leadership) tawh kitu kalh kha tawh kibang thei hi.
Biakna makaipi pawlkhat leuleu in biakna pen mipi tawh kivai hawm nam hilo hi, biakna sungah democracy zat theih ding hilo ci’n cin mipi tungah lim gen mahmah thei hi. Pasian thu pen mipi tawh vai kihawm thei hilo a, Pasian in a hopih mite bek in vai a hawm ding hi ci lai uhhi. A taktak in mipi leh kipawlna pawlpi a ding deihsak na pi’n thu neihna hawm kimna (power sharing) ding i ut loh sim man hi zaw thei hi. Servant leadership i deihna bulpi pen a hi mi tawh kam kikum a vaihawm khawm ding, gel khawm ding leh khensat khawm ding pen ki theih mawh bawl in kizep sim tawh kibang hi.
Biakna sung makaih zia i genna ah Pasian thu vaihawm zia pen Theocracy hi in, mipi deihna (democracy) tawh vaihawmna nam hilo hi cih thugen (statement) pen a khialh hetloh hangin a vek in manlo tawh hi. Thu lang man hi. A hangin hih mun ah thu a kigen khinlo a om man a hihi. Tua in, biakna i cih tak ciangin Pasian leh mihing kikal om a, Pasian thu-um mimal te kipawl khopna saptuam sungah mimal leh mimal kikal a omna hang a hihi. Pasian thu sungah democracy tawh pai ding hi kei, Theocracy a hihna a manna pen Pasian leh mihing kikal ah a buppi in man hi. Pasian tawh kizopna ah Pasian thu bek man ding, a mah pen a Vanglian pen a hihna i zuih leh san ding a hihi. Tua pen Pasian le thu-um mimal khatsim, khatsim kizopna a zat ding a hoih penpen a hihi.
A hizongin a kizep sim leh a ki koihdap theilo ding thu khat pen Pasian thu um mite kikal thu hi a, mihing leh mihing kizopna thu a hihi. Hih dawl (step) pen kigen khalo hi. Mihing leh mihing kizopna a pen Pasian in mihingte a kibangin mu a hih mannin tanglai hun bangin a lian tuam, a neu tuam leh kumpi ding, ukpi ding a Pasian in a seh tuam, Pasian kiang pan thuneihna ngah tuam cih pen tuhun teh kisang zo nawnlo hi. Taanglai in kumpite in a mau thu neihna a khah suah dinguh a lau man un a mau pen Pasian in Kumpi ding ngiatna a bawl, a thuneihna uh pen Pasian piak ngiat in ci’n mite tungah gen in mite khim uhhi. A hizongin tuhun ciangin mihing khempeuh i manphatna (value) kikim in kisang theita hi. Tua hangin mihing leh mihing kizopna pen a kikim in kizop ding kilunggulh tek hi. Kipawlna pawlpi sungah zong ei hong kithu sim ding ki ut tek hi. Tua a hih manin mihing leh mihing kizopna ah a hoih pen vaihawm zia pen ki zong ut ta hi. Saptuam (church) pen dawl(step) nih om a hih lam i muh theih ding thupi ding hi. Dawl masa pen Pasian leh mihing kizopna hi a, tua pen Theocracy, Pasian thu tawh vaihawm ding leh Pasian thu mah liat sak penna ding mun a hihi. Dawl nihna pen Saptuam sunga om mite hi a, mihing leh mihing kikal thu a hihi. Mihing leh mihing a hih manin kuamah Pasian mai ah a lian tuam omlo a hih manin a kikim i hihna lah theihna ding makaih zia (leadership) kisam hi. Zomi saptuam sungah servant leadership ki sang tek a hih manin tua kicing tak in zat theihna a om nak leh kipawl theihna lam ah kikal suan thei ding hi.
Makaih zia nam tampi om sung pan in kipawlna tuamtuam khempeuh a dingin hih kimakaih zia pen hoih pen hi ci a ciapteh ding hi thei lo hi. Kipawlna khat ah a hoih mahmah phial zongin, kipawlna dang khat a dingin kizang theilo thei hi. Kipawlna kilam zia a hoih leh makaih zia a hoih a om theih bangin makaih zia a hoih leh kipawlna kilam zia zong hoih zo thei hi. Kipawlna i kisapna, kipawlna pianzia (the nature of the organization) leh kipawlna i ngimnate pansan in ei mun tawh kituan pen zat theih ding thupi hi.
Work Cites
- “9 Common Leadership Styles: Which Type of Leader Are You?” TEC, tec.com.au/resource/9-common-leadership-styles-which-type-of-leader-are-you/.
- Eric Devaney: “The pro & Cons of 7 popular organizational structures”: https://blog.hubspot.com/marketing/team-structure-diagrams
- “Education Articles.” Thomas University Online, online.stu.edu/articles/education.aspx.
- “Leadership StylesChoosing the Right Approach for the Situation.” Groupthink - Decision Making Skills Training from MindTools.com, Mind Tools, www.mindtools.com/pages/article/newLDR_84.htm.
Dated: November 08, 2018
