(
How dictators come to power)
Tual Khan Suan
Ukcippite (dictators) i cih pen thu
neihna khempeuh a mau bek in lencip a, midangte thusun leh ngaihsut piakna
peuhmah deihlo bek hilo in, tuabang ngaihsut piakna a nei mite pen henkolh bulh
in, a kisap leh gampua ah a hawl khia mite a hi uhhi. Ukcippi (dictator) i zia
leh tongte (gamtatzia) pen minam leh gamvai (politics) sung bek a kimu thei
hilo a, a ma deikan (level) ciatciat ah kimu thei hi. Gambup deikan (level) a minam
leh gamvai tawh kisai vaihawmna sungah thuneihna khempeuh a lencip ukcippi a om
theih bangin, khuasung deikan (level) ah zong khuasung tualsung vai khempeuh a
lencip Hausa om theihi. Kipawlna leh pawlpi deikan (level) ah zong ukcippi
(dictator) i zia leh tong (characteristics) zangin a mau thulo thu a salo,
midangte ngaihsutna leh muhna a sang nuam kilkello makai mi om theihi. Zomite
sungah ukcippi (dictator) i zia leh tong a nei, a zang makai pen gambup deikan
(level) ah kimu khollo hi. (A hangin ei ma vaihawm theihna nei gamgi khat
sungah gam kineihloh man hi kha dinghi.) A hizongin khuasung deikan
(level), kipawlna deikan (level) leh pawlpi/saptuam deikan (level) sungah hih
ukcippi (dictator) i zia leh tong tawh vaihawmna pen ki mu cilhcilh thei hi.
Ukcippi (dictator) in thu neihna a
ngahna pen sun kal zan kal a tungtun pan patung po bang a po ziau leh a piang
ziau thu hilo hi. Mipi (tangpi taangta) in a phungvuh man, a panpih man leh
muanna a neih man a hong pokhia leh palhkhia zo a hihi. Ukcippite (dictators) in
thuneihna (power) a neih ma leh a neih cillai hun sungin mipi in muang mahmah
leh pakta mahmah kha thei hi. Mipite deihna leh muanna ngah zawh nang hanciamin
mipi mai zong uh a, a piang thei lampi khempeuh tawh mipi lungkim sak ding
hanciam mahmah in mipi mai en kineih uhi. Mipi’ muanna a ngah khit tak-uh
ciangin thuneihna (power) khempeuh a buppi in a mau tungah a ki-ap khit ding ut
uhhi. Tua thuneihna a let khit tak uh ciangin, a mau deihdan in zang pah uh a,
mipi nung ngat san ding hamsa sa nawnlo uhhi.
Ukcippite (dictators) a kideih leh a
kimuan hun pen gamsung or khosung or kipawlna (Pawlpi) sungah khuahun (boruak)
siat hun lai tak hi a, a maute in mipite muhna a mihoih leh a dik bangin gamta
kampau siam uh a hih manin mipi in um leh muang pak kha thei hi. Kawlgam sunga
om Zomite in a tuakkhak (experiences) leh a thuak khak Kawlgam sungah ukcippi a
hong khanliatna en leng kimu thei hi.1958 kum in Kawlgam sungah gam vaihawm
makaite (politicians) kikal ah ki thuhual zawhlohna a om tak ciangin galkap
mangpi Gen. Ne Win muang mahmah uh a hih manin, tua laitak a thuneihna (power)
nei kumpi in Gen. Ne Win tungah gambup thuneihna na ap kha hi. Kammal dangkhat
in gen leng, Gen. Ne Win pen gambup vai ah makaite in mi hoih leh mi dik ding
sa kha uhhi. Gen. Ne Win in zong a ma mai a makaite na sepna leh kholsa tungah
a zek a hih manin mipi muhna ah a hoih mahmah leh a muan huai mahmah bangin
hong sem phot hi. Tua hun sungteng in a mah hihna taktak kisel thei lai a,
mihoih leh mi dik kineih (hypocrite) zo lai hi. Kum 1962 March 02, tak ciangin
mipite muanna leh deihna teng a lehlam in zangin gambup thuneihna (power) pen a
ma khutsung pan a pusuak nawnlo dingin humcip hi. A ma mun leh mual ding khuatkhuat
in, “kip
ta ning ei” a cih tak ciangin a ma hihna taktak, a
gial dawk sak hi. “Sakei in a gial kheklo” a
ki cih bangin a ma hihna taktak leh lungsim tawng taktak pen sel zo nawnlo hi. A
hizongin a hun masa lam sung hun tawlkhat pen mipi in mu zo paklo lai hi.
Ukcippi (dictator) dang khat a hi Adolf
Hitler pen leitung mibup in tangthu sungah a mangngilh loh ding a gilo ukcippi
khat a hihi. A mah in kumpi zaa a ngah cil in a gammi German te’n pakta, muang
leh deih mahmah uhhi. Kideih a hih manin a mau gam sungah kibawl kitelna
(election) pan a ngah makai khat hi zawlai hi. Kumpi tutna a ngah cil, a hun masa
lam sungin mipite’ muanna leh deihna a ngah behbeh na ding nakpi tak in hanciam
a, nasem a hih manin mipite in a ma’ siatna mupak lo uhhi. Tua bek hilo in, tua
hun lai a a gam mipite lungkimna dingin minam min zangin thu holhthoh (propaganda)
bawl beh lai hi. A hizongin a ma mun a kip taktak na ding khuatkhuat in a gam
thuneihna (power) khempeuh a lencip suak hi. A ma a ding mun kip a ngahna
dingin mipite muanna leh deihna kisam a hih manin, mipite mai en kineih, mipite
deihna pawlkhat zong sem masa hi. “Kip taktak
ta ning” a cih tak ciangin mipi
tungah ciampel in mi deihna leh muanna khempeuh a lehlam in zang ziau
hi. A mah a deih lo mi peuhmah gawtna pia hi. A gial taktak kidawk sak ta hi.
Hih a tunga ukcippite nih hong
khankhiat zia i et tak ciangin ukcippi (dictator) limlim pen a cil a kipat panin
mite muanna leh deihna ngah vive a hihi. Tua bek hilo in, leitunga ukcippite
zong thuneihna a ngah cil hunlai un, mipi (tangpi tangta) i pahtakna ngah vive
a hi uhhi. Gambup huam a ukcippi a sem mite a hizongin, khuasung or kipawlna
(pawlpi) sung huam a ukcippi sem mite a hizongin a hong khan cil un, mite
pahtakna a ngah vive uh a hihi. A maute pen a dik hithiat kineih zawhngeu bangin om zawzen uh a hih manin, mite in dik
leh cit tuak sa in, muangin deih mahmah thei uhhi. A hizongin a mau pen “bang hun in zusa bawh ding” cih a pang
khikhe Zawhngeu bang a hihman un, dai tak a, a om uh hi zaw hi. Hun hoih
(chances) a om lian tak ciangin lut lian se uh a, a mau deihna pen mun lian mah
a ngahna dingun mat cip pah lian uhhi. Pawlkhat leuleu in a “sa taang hawl” bangin a mau deihna lam ah
thu a luan theihna dingin “lam nin, lam
siang” tawn in kipawlna or pawlpi sung, khuasung leh gamsung ah thu
khinkhin uhhi. A mau deihna mun a tun ma dong “sa taang pang” bangin ngak khikhe
uhhi. A mau deihna mun a tun tak ciangin bawh lian uh a, “sanggam mel mak”
bangin khual leh tual zong khen nawnlo in a mau lam panglo teng galsuak sak
uhhi. A tup a ngim uh a ngah/ a mat khak lian ciangun a nung zui mipi na ngawn
in “siam lawmlawm ei” ci’n khut beng in pahtawi lai thei hi. A man bek
hi pan a, a kem le a cing (a khoii) hi lo a hih manin a gial kimu zo nailo a
hih man a hihi.
Ukcippite in a ngim uh ( hih mun-ah
thuneihna- power) a mat khak leh a ngah khit tak uh ciangin a mau khut sungpan
a taisuah (khakhiat) dinguh lau mahmah a hih man un “lamnin lamsiang”
tawnin dal uhhi. Thuneihna a khahsuah lohna ding, a zat lampite sung pan in:-
1) khat leh khat kimuan mawhna
(distrust) a om dingin thu bawl uhi.
2) Mipite lungsim sungah lauhna (fear)
tawh kidim in thu gen la sakna a kineih ngamloh na ding thu bawl uhhi.
3) Simmawhna leh nuaisiahna zangin a
mau deihna tawh kituaklo thu a gen, la a sa, gamta kampau mi khempeuh nencip,
gapcipna (oppression) tawh zing vaihawm uhhi.
4) Mite in thuman lampi a muh zawhlohna
dingun thu khat peuhpeuh zangin phuang in khimm uh a, Ukcippite pen a vanglian
hihna ( Supreme Being) nei tuam bangin ki pulak (proclaim) uhhi.
5) Mi tam tawh na sep sangin a mau thu
a niallo ding mi tawmcik tawh nasep khop pen mazanna, matutna cih thu pansan
uhhi.
1. Mi khat leh khat ki muanlahna
(distrust) pen Ukcippite a dingin thu neihna ngahna ding leh thuneihna a letkip
suakna dingun lamdot (tactic) hoih mahmah khat a hihi. Ki-it, kilemna,
lawhcinna leh matutna pen khat le khat kimuanna tung pan a hong pai khia i gah
hi a, kimuanna om leh mipi in a maute thusim teng a theih ding lau uh a hih
manin, mi khat leh khat kikal ah kimuanna a om loh theihna dingin thu
holhthohna (propaganda) tampi khah khia uhhi. Khat leh khat kikal ah thu dik
thuman kigenlo a, thusim a kigen ngamlohna ding ngimna a hihi. Mihoih leh mi
muanhuai khat na ngawn pen mite in a muan nawnloh theihna dingin thu holhthoh
uhhi. Mipite khat leh khat kimuang kei henla, vai kihawm khawm thei keileh cih
pen a mau deihna hi a, tua banga mipite kikal ah kimuan lahna a om laitak in a
mau lut in a mau deihna lam ah kai ding cih pen a gelna uh a hihi. Mipite sungah
a mau gen bek a dik pen in a ki-upna ding na ngawn in thu holhthoh bawl lai
uhhi. Thusia la sia om leh a mau a dingin lampi hoih zaw suak a hih manin mipi
kikal ah kimuan lahna a om theihna ding lampi zong uhhi.
2. Mipi in thunei mite i lauhman leh
kihtak manin thu kimang hi. Tua a hih manin mipi sungah lungsim lauhna (fear) a
lut theihna dingin kampauna, gamtatna leh gawtna nei uhhi. Mite in thuman leh
thu dik mu in thei kilkel mah leh a kigen ngamlohna dingin, mipite lungsim
sungah lauhna thu guan uhhi. Mipi in lauhna hau semsem leh a mau gen khempeuh “ hi hi, hoih hi” kici
pahpah a hih manin uk nop sa uhhi. Thu hoih thu pha a mu, a thei mite leh a gen
ding mite in zong, lauhna hangin a deih bangun thu gen ngam nawnlo uhhi.
Ukcippite thu gen leh vaihawmna tawh kisai dotna (question) leh genbehna
(comment), hoih sak zawk thu genna a nei mite pen mi khial leh thu manglo mi a
suahna dingin bawl uhhi. Ukcippite thusim (ngimna thugukte) a thei a, a
pholhkhia mite pen mi gilo leh siatna ding gel mite cih bangin min vawh uh a, gawtna
pia in midangte’n a lauhna ding leh a gen ngamloh na dingun bawl uhhi. Thu dik
leh thu tak kihum cip a, a gen mite pen a langpang mite suak sak uh a hih manin
mite in lau semsem hi. Lauhna (fear) tam semsem leh ukcippite a dingin zawh nop
semsem a hih manin mipi a lau semsem na dingin vaubawl uhhi.
3. Nencip, gakcipna (oppression) pen mi
khempeuh in hamsa kisa ciat a, kuamah utlo tek a hih manin kipel nuam tek hi.
Nencip, gakcipna a thuak ut ki omlo hi. A hizongin ukcippite vaihawmna ah mite
in thu a manna ding, a kilauhna dingin nencip, gakcipna pen vanzat hoih mahmah
khat a hihi. Mipite in thu leh la a kan ding bangin a kan theih lohna dingin
thu ngahna (resources) khempeuh kikhak tan sak hi. A mau gen-ut, sak-ut leh
hilh-ut thute bek a zak, a theihna dingun bawl uhhi. Thu neuno khatpeuh thu
lianpi kisuah a, thu nei vaihawm mite a kilauhna dingin tha neihzah tawh vai
kihawm khum hi. Mite in khupbawh in pek dikdek in om leh a mau a dingin vaihawm
nuam hi. A mau deihna tawh kituaklo khatpeuh sepkhakna, genkhakna pen khialhna
lianpi suaksak uh a, a mau deih bangin a kilawmlo ciang dongin gawtna leh vauna
nei uhhi. A thoh toh zawhloh ding zahciangin ki nengcip behbeh hi.
4. “Lam
nin, lam siang” khen nawnlo in
mite in a mau thu pen a neng a tawng in a zuihna ding ngimna tawh a vaanglian hihna
( supreme being) nei bangin kipulak uhhi. A nungta Pasian bia mite a hi a, a
nungta lo (milim) pasian a bia mite hizongin a mau biakna zong zahtak zo nawnlo
uhi. A sia huai mahmah khatah, a maute pen Pasian or pasian in ukna leh
vaihawmna nei ding ngiat a, thu neihna a piak bangin kigen uhhi. Tua a hih
manin Pasian or pasiante in a gen ding thu pen a mau tungtawn bek in gen a, a
mau pen kamsang bangin kineih uhhi. A mau thugente pen a mau ut thu hilo in a
sawlpa or a sehpa sawlna zui a thugen bang in kipulak uh a hih manin, a zuilo
leh a zanglo mite pen daipua lam a tunna ding vaihawm uhhi. Biakna thu pen a
mau thu neihna a kipsuakna dingin mi khimna nei uh a, mi khempeuh lungsim susia
uhhi. Mipi pen lunggim singimna pan biakna kilunggulh a hihna tawh kizui-in
biakna tawh kisai a hih nakleh zuih ding, paii dingin ki minsa a hih manin, thu
nial nuam omlo hi. Tua hi a, biakna pen a mau a dingin galvan hoih mahmah khat
suak hi.
5. Mi tamna mun ah mipil leh misiam tam
a hih manin mi tampi tawh na sep khop pen utlo uh a, “na sep matut zawhna ding” cih
paulap in a mau thu a zui ding leh a mau taang a, a ding ding mite bek tawh na
sep khop ding tel uhhi. Ukcippite deihna a sem khia ding, a panpih dingin a mau
deihdan bang lian in mi pawlkhat limsuih bangin mi sui in vuul uhhi. Ukcippite
khial a sa ngeilo ding mi, sihpih ngam a, a gum ding mi kem uhhi. A mau deihna
a nial peuh, a hih kei leh a mau hoih sak bang “hi
hi, man hi” a ci pahpah theilo mite pen hemkhia uhhi. Tua a hih
manin pilna leh siamna nei mite a pua lam pusuakna (brain drain) piang a, mipi
tampi a dingin supna om hi. A mau thu niallo le a sih gup tengbek tawh nasem a
hih manin thu pawlkhat leh nasep pawlkhat a vaihawmnate ah bel mualsuak zo
bilbel hi. Pilna nei, siamna nei leh thu mu mite in a mau panmun pen ki linglawng
sak thei leh a mau thusim teng mu khia thei uh a hih manin a mau tawh nasep
khop ding bek hilo, tua bang mi a omlohna ding na kisem hi. (Khmer Rouge
makai ukcippi Pol Pot in a gam sungah laisiam leh mipil ( lai mal gawm thei
ciang zong kihel) in mitampi that hi.) Mipil misiam sangin ukcippite vaihawmna a mang
ding mite kideih zaw in mun kipia zaw hi.
Ukcippi (dictator) pen gam leh minam
vai (politics) sung bek ah a om hilo a, khuasung, kipawlna or pawlpi sung na
ngawn ah a zia leh tong kimu thei hi. Nisim nuntakna vaihawmnate ah zong
ukcippite gamtat bangin a gamta mi om thei pahpah hi. A hizongin minam leh
gamvai (politics) a hilo mun dangte ah ukcippi (dictator) cih kammal pen kuamah
in zanglo a, “lem taang zaw, nasepna ma liau zaw”
cih peuh tawh kammal kilawm kizang se hi. Ukcippi zia le tong bang a na sepna
teng a kidawk lohna dingin paulap khatpeuh a hi, biakna or thu dang khatpeuh
tawh kiliah khuh hi. A taktak in thu neihna deih vive kihi a, thu neihna ngahna
dingin “lam nin, lam siangtho” khentuanlo in
lampi ki zawt tek a hihi. Pawlkhate in mipi sosang sak in, mipi zang uh a, tua
hun sungin a mau deihna mun lian mah na bawh pah uhhi. Mi pawlkhat leuleu in
mipi sungah khat leh khat ki muhdahna ding bawl uh a, tua hun sungin a mau
deihna mah na len tang pah uhhi. Tua bangin mipi sungah kisiatna ding bawl in
khuahun hoihloh lai tak in a mau lut lian thei uhhi. Tua bang hunlian in a lut tak
uh ciangin mipi muanna leh deihna a ngahna dingun mipi mah paulap in mipi
hoihna ding hi ci’n tangko khia zaw lai uhhi. Leitung ah ukcippi tawh ki-ukna
pen suahtakna omlo in, lauhna leh kimuan lohna tawh kidim den a hih manin mipi
in nuam sa lo a, khantohna a manlang ding zah in manlang zolo hi. Zomite pen
khantohna a deih minam i hih manin hih bangin ukcippi thu neihna tawh vaihawmna
pen a deihlo minam i hihi.
Date:
April 08,2019
Ekkakna:
