Tual
Khan Suan
“A hoihzaw ding, thutang leh thulai
khat om mah ve aw, a hih hangin kei gup leh kei deih mite’ gen a hih kei leh,
awl mawh keng”
Thu
piang khatpeuh a om ciangin mihingte in “a pianna ding a tawsawn (motive), a
piangsak thu (cause), bang ci bangin piang leh a nung thu (result) bang hiam
cih kantello pi in, “a sem mi (actor) bek en in thu kimpih leh thu kimpihlo
or gup huai leh paih huai kinei thei hi.
Tua pen a mi a i kimuan man, a hih kei leh a mi a i muhdah man ahihi. A mimal
a, i it man leh i deih manin thu hoih gen ding hi cih upmawhna i neih bangin, a
mimal in muhdah manin thu hoih gen ngeilo ding a i sansat (upmawh) gawpman zong
ahihi.
Pum
gup policy paidan pen a mi i deih manin (ei a te a hih manin) a thu gen leh a
sepna khempeuh mimal a khinkhaina omlo pi’n thukim pihna suak hi. Pum huat
policy paidan leuleu pen a mimal i deihloh man or i huat manin (ei a te a hih
loh manin) a thugen leh a sepna khempeuh langpan/ deihlo ding cihna suak hi. Hih
mun san-ah i deih leh i muan mite’ thu mah zuih ding hilo hiam? cih ngaihsutna
khat om thei ding hi. Tua mah bangin, i deihloh leh i huat mite thu gen pen kuamah
in sang theilo hi cih dan mah zong om ding hi. Hih bang thu i lungsim sungah ngaihsutna
a om pen a mihing ngeina khat ahihi. A hizongin hih mun ah, a ki phawk khalo
thu khat om hi. Tua thu in, i deih mite in thu tang/thulai gen denlo a, i
muhdah leh i huat mite in zong thu langbai/ thusia gen den tuanlo hi, cih a
hihi. I muhdah leh i huat mite in zong, a piang thu i paizia khempeuh na
khinkhai in mimal, kipawlna leh minam a dingin a huam kim pen ding zong na gel
thei veve uhhi cih ki nawlkhin kha thei hi.
Mimal
kipum gupna, kammal dangkhat tawh gen leng, mimal kimai-etna pen sia hetlo na
pi’n tualsung kipawlna (society) a ding leh mun dangdang a dingin siatna a tun
baih mahmah paidan khat hi citciat hi. Kimai-etna tawh na tampi kisem zo tuam
hi. Mai-etna a ngahte a dingin zong nuam mahmah a hih manin, kizong sang (habitual)
thei hi. Zum nasepna ah mi mai a en zo te’n sum ngah, nasep ngah, panmun ngah
thei hi. A en zolo mite pen nawlkhinna thuak thei uhhi. Society sungah a tawm
pen in khen nih pha pah lian a hih manin, i veng sung leh mimal kizopna cidam
lo pah hi. Mai-etna a ngah mite in “hih mimal ki mai-etna ( biakna)” pen hunhoih
(chance) in na zang kik uha, “A mau thu a mang tawntung ding, a mau thu gen
khempeuh a gum ding, a ma khut leh khe a ma pang ding” in na zang suak lian
uhhi. A mau a mimal galkap dingin na seak (koih) uhhi.
Zomi
sungah Biakna thu gen mi khat in, “Sia khat in pawlpi kipan leh UT LE
UTLOH THU HILO, a tanau tengin zuih kul den hi” ci hi. Hih thu genna en
leng, “ut le utloh thu hilo” a kicih tak ciangin mimal deihna leh thupi
sak hi masa lo pi in, tanau hihna hang tawh kipum gup, kipum panpihna a suak
hi. A thudik man leh a hoih pen ding hilo na pi’n, “ ei a te” a hih manin “thu dik,
thu lai leh thu hoih” ki mulo sak a mitsi teta kawm a zuihna suak hi. Lamkhat pan
in a semte a dingin tha a pia, a lawhcing sak a hih sam hangin, tangpi a ding a
hoih zaw ding ( greater good) a dingin leh tualsung kipawlna (society) a dingin
siatna tampi om zaw hi.
Khuasung
vaihawmna khat, kipawlna leh pawlpi sung vaihawmna khat om leh “ei beh ei boang
tengin tua cih ding, hua cih ding” cih lungsim neihna zong “ki pum gup
policy” khat mah a hihi. Ei beh ei boang teng ki-itna, kipanpihna leh ki-etna
pen a siatna omlo hi. Tua bang ki-itna pen ei beh ei boang sung ciang bek huamin
zang thei leng hoih mahmah hi. Khuasung khat, Kipawlna leh Pawlpi khat ah pen
ei beh leh ei boang bek om khawm hilo a hih manin, midang tawh vaihawmna ah ei bek
a ding a hoih policy i zat ciangin mite in hamsa sa uhhi. Khuasung kisiatna,
Kipawlna (party) leh Pawlpi sung kisiatna piang den zaw hi. ( Zomi leh Zogam
sungah beh khat boang khat bek khua sat, pawlpi khat om nailo a, a om dingin kigel
leh zong kuamah utlo ding hi.)
Kipawlna
(party/org) leh pawlpi sung khat-ah thu piang leh “ a thu” en nawnlo in, “ei
a lamte leh a mau a lamte” cih tawh en in gup tuam paih tuam kinei pahpah
hi. Gup tuam paih tuam neilo in bangcih ding cih na lungsim sungah om kha ding
hi. Khiallo hi teh. Gup tuam paih tuam na neihna ah, na et dan bek hi a kisam. A
mi en a, gup tuam paih tuam na neih leh na man ngitnget ngei kei ding a, a
hizongin a thu en a gup tuam paih tuam na neih leh na man den ding hi. A piang
thu khinkhai a, a thudik leh thu tang zaw lam ah “ei a lamte” a om hun a na gupna
hang zong, a mi hihna hang a hih kei nak leh hoih hi. Na gup leh na paih pen a
mi hihna in hong khensat sak kei henla, a thu in hong khensat sak ding thupi
zaw hi.
“I
nute i suang a, i pate i muang hi”
cih laisim bu sungah kisin hi. I nu leh pa i muan, i suan mah bangin a mau zong
hong gum uhhi. Khua sungah midangte tawh kitawng, kilai in a om naupangte pen,
a nu leh a pa te’n a mau tate tuak gum mah uhhi. A hi zongin a naupangte suanna
leh muanna zui in, a nu le pa in “a kitotna leh kilaina a hang” kan masa le
khinkhai lo pi’n a mau’ tate tuak pum gup leh a nu leh a pate uh zong kilai a
kul ding hi mawk hi. A naupangte mah bang ding or naupang vai mahmah ding hi. (
Thu kanlo pi a ki pum gupna pen naupang vai a hihna kilang hi) Tua bang
hilo in, a thu leh la kantuak in “thu tang leh thulai”tawh a gen uh ciangin inn
veng kisiatna ding, khuasung kisiatna ding pan kidal khol zo uhhi.
A
picing minam leh gamte ah zong, thu piang pen nisim in om den hi. Tua thu piang
(issues) khempeuh ah a kithu kim khin pahpah hi tuanlo uhhi. A mau mimal
ngaihsutna leh thupi sak (values) zui in mi tamzawte a ding a hoih zaw ding tupna
tawh a mau muhna tek ki gen, kinial (debate) uhhi. A hoihzaw ding deihna nei uh
a hih manin thu a vaihawmna uh a, a mi in ki-enlo uhhi. A thu leh a taktak thu
(facts) tungtawn in en uh a, kinial leh kikum uhhi. A thu bulphuh a kinial leh
kikum uh a hih manin a mimal a tamzaw in a zawhloh leh a lelh hun zong om theihi.
A mi mal kipum gup hilo a, a thu ki gum a hih man a, a zo hi zaw hi. A thu zui
a ki gupna mun a om ciang bek in veng sung, khua sung, minam sung leh gam
sungah hoih zawkna piang thei pan hi. A mi a tawm leh a tam hang hilo in, mi a
tam zaw a dingin a hoih zawkna lam-ah a thu in a zawhna munah ki-itna, kilemna
leh daihna om hi.
Kim
leh kiang ah thu diklo ( fake news) tampi tak kigenna mun leitung a nungta i
hih manin a piang taktak thu leh thudik thutang pen koi hi zaw a, koi hoih zaw
ding hiam cih khinkhaina ding lungbuai huai (complicated) thei hi. Thu pen i zak
tam na lamlam ki zui cih bangin, thu khinkhai lo pi’n pum gup leh pum huat
policy paidan i zat lai teng, “Thutang
leh thulai khat, a hoih zaw ding om mah ve aw, a hih hangin kei gup leh kei
deih lam a mi gen a hih kei leh, awl mawh keng” cih tawh vai kihawm ding hi. Tua
bek hilo in, thu piang khat peuhpeuh pen, khensatna neisa bangin thu geelna (
preconditioned) nei a vai i hawm ciangin a thu zui in vai kihawm thei lo a,
thudik leh thulai kimu khia zolo hi. Mimal khatsim in a mau’ ngaihsutna leh thupi
sak (valued) nei tek a, tua zui in ei ma hoih sak i lungsim tawng-ah kinei tek
hi. Mimal biakna ( personality cult) a om khit tak ciangin tua mimal in “Kei a
masa (kei gen)- Me First” cih lungsim om den a hih manin a ma deihna bek ah a
sang ding, a gum ding mi vuul (khoii) hi. A kivuul (khoii) mite in zong, “ei a
lamte” a hih nak leh pum gup pah lian a, “ a mau a lamte” a hih nak leh pum
huat pah lian hi. A piang thu pen a thu paizia tawh enlo in, “a sem mi (actor)”
tungah en in gup ding leh paih ding i khensat ciangin kikhial den hi.
Date:
April 18, 2019
