Sia/Makaite thu mang ni Or
Kumpi thu mang ni!
Dawhkang (stage/Podium)
tung pan thugen siam, thuhilh siam leh mipi kalsuan zia ding lam a lak mi tampi
takin thu a genna uh i za zel hi. Tua bang thugenna ah a kigen kha zelzel thei
thupen; Saptuam (church) sunga om Pulpit tung pan thu kigenna munte a hih leh “Siate
thu mang ni/ na mang un” cih a hihi. Pawlpi kipawlna (Organization) sunga dawhkang
(Stage) tung pan thu kigenna mun a hihleh, “Makaite thu mang ni/ na mang un”
cih a hihi. Gambup ki-ukna vaitawh kisai thugenna dawhkang (stage) tung pan a
hih leh “hong uk kumpite thu mang ni/ na mang un” cih a hihi. A mun leh mual
zui a kigen kammal zat a kibat loh hangin, a deihna pen kibang vek mai hi. “Hong
makaih a hih keileh, no mai a pai mite thu mang un” cihna a hihi. A kigen leh a
kigel thu nialnial selo a zuihna tawh sepna hangin gelna leh tupna kimualsuah
zo cih pen a man thu a hih manin hih bang kihilhna pen zuih ding siatna omlo
hi. A kigel, a kipia thu pen sep khop ngeingaina a hih manin “pankhopna” kilatna
zong hi a, thahatna zong piang sak takpi hi.
Biakna bulphuh etna pan in
muhna a gen mite i deihna in “a kigen, a kihilh, a kisawl bang a thu mang” a
zuihna pen, a zui mite i nuntakna ah hoihna piansak ding cih ahihi. Biakna
bulphuh etna pen tua biakna i thu guipi, thu hilhna, thu meilet (kammal dang
khat tawh gen leng), doctrines a om sa a hih manin tua biakna i thu hilhnate zui
ding a hilhna pen hamsa lo tak a zuih ding baih lel hi. Tua biakna i thuhilhna
a zui nuamlo mite lah, tua biakna sungah kihel theilo, or tua biakna a bia
nuamlo in ciapteh theih hi pah hi. Cihnopna ah a omsa thu hoih leh thupha
ngahna ding nak zuih ding a kihilhna pen thusia kici theilo hi. A zui mite in
hamphatna/ metna ngah ding a hih manin hoih zaw hi.
A hizongin in hih mun ah i
ngaihsut kak ding a kisam om hi. Biakna thu tawh kisai a om sa thu hilhna, thu
guipi (or) doctrines zuih ding kihilhna leh tua thu a zui veve mikhat deihna
zuih ding kisawlna a hihi. Biakna tawh kisai zuih ding doctrines a omsa
kihilhna pen mikhat peuh hoihna leh metna ding hilo a, tua biakna i Pasian
(pasian) a ding a hihi. Christian upna pan in a gen hileng, Laisiangtho sunga
om thute kihilhna, kisinsakna pen Pasian min liatna ding bek hi a, mimal
thuneihna, liatna ding hilo hi. Biakna sunga om mimal khat i thu zuih ding cih
kihilhna, kisinsakna leh kisawlna pen Pasian minliatna ding a hihleh hoih na pi’n,
mun khempeuh ah Pasian min liatna ding hi khinlo thei hi. Mimal metna ngahna
ding, thu neihna liatna ding, hamphatna ngahna ding peuh a hih khak ciangin
buaina om thei veve hi. (Hih mun-ah biakna thu guipi hi a, mimal thu gen
hilo hi cih phawk ni.)
Kipawlna pawlpi (Organization)
bulphuh etna pan in muhna ah zong, “Kipawlna pawlpi i tup leh ngimnate a
tangtung na ding leh a mualsuahna ding” a hih ciangin kizui zo tek hi. Kipawlna
pawlpi bup hoih zawhna ding bek hilo in, tua kipawlna pawlpi sung a om pawl
mite leh midangte hoih zawkna ding malakna ah a makaite thu zuih ding kisawlna
pen a siat luatna omlo hi. A hizongin, mimal leh makai khat i metna ding deihna,
thu neihna ding deihna leh hamphatna ngahna deihna lam a kawk tak ciangin tua
bang kisawl na pen zuih ding hamsa kisa thei hi.
Gambup vaihawm Kumpi bulphuh
a etna pan in muhna ah zong, “gam-uk kumpi thunei i cih pen gam mite i bitna
leh a huu ding in muanna leh lam-etna kipia” a hih manin gambup leh mipi hoihna
ding gel dingin kideih kaih hi. Gambup bitna ding, gam mipite cidamna ding leh
hoih zawkna ding ngimna nei thupiak leh sawlna a bawl uh ciangin gam mipi in “a
mau nuntakna a ding hoih zaw ding” cih mu uh ahih manin zuih ding hamsa salo
uhhi. Kumpite in zong gambup a ding leh mipi a ding na hoihzaw a hong sep takpi
uh ciangin gam mite in thunei kumpite tungah muanna lian zaw nei semsem hi.
A hizongin a tung a i gen
Biakna sunga Sia/Upate lah mihing mah, Kipawlna pawlpi sunga makaite zong lah mihing
mah leh thunei kumpite zong lah mihing mah a hih manin khat veivei ciangin
Biakna sunga Sia/Upate tung a kipia muanna (trust), Kipawlna pawlpi makaite
tungah kipia muanna (Trust) leh thunei kumpite tungah kipia muanna (trust) pen thunei
mite i mimal aituam metna leh punna dingin zang khial thei hi. Saptuam sungah
thuneihna liatsak semsem na ding, Kipawlna pawlpi sungah a met dawhna ding, gamvai
thunei mite in thuneihna letsuak zawhna ding cih bangin a leh lam in zang thei uhhi.
A hih leh Sia/Makai/thunei
kumpite thu manglo ding maw leh cih dotna om thei hi. I biakna Laisiangtho
sungah hong uk kumpite thu na mang un a cih om a hih teh, thunei Sia/Makai/
Kumpite thu manlohna pen Pasian thu tawh kituak lo hi, a ci zong om pah ding
hi. Laisiangtho sunga kigelh zui in thu manna pen hoih leh kilawm pen hi. A
hizongin hih mun-ah, thu man ding a cihtak ciangin “Bang ci bang thute ah
thu mang ding” cih kithuk gen khalo thei zel hi. Thunei Sia/Makai/Kumpite i
muk dawn pan a pusuak khempeuh a neng a tawng a mang ding maw cih ngaihsut ding
khat om hi. Laisiangtho sunga kigen thuman ding a kigen takteh, thunei
Sia/Makai/Kumpite pen “a thutang, a thu man, a dik” mite a hih ding bulphuh a
kigen cih phawk huai hi. Tua banah mimal angsung ding sangin Pasian deihna tawh
kituak thute hi zaw den hi. Mimal vaihawm zawhna ding leh thuneihna khansakna
ding deihna tawh thunei Sia/Makai/Kumpite thuman ding a gen hipeuh mahlo hi. (Ei
sung ah bel, Sia/Makai/Kumpite pumgup man a, a mau thu man ding kisawlna,
kihilhna tam zaw lai hi.)
Tua bang a hih leh “a
thutanglo, a thu manlo, a thu diklo Sia/Makai/Kumpite” thu nialna pen biakna
thu tawh tehkak in a hoih mah ding hiam, a hih kei leh kinial thei mah ding
maw? cih selkalh nopna lungsim sungah hong suak pah ding hi. A thu tanglo, a
thu manlo, a thu diklo a mipi a makaih sawm Sia/Makai/Kumpite i thu manloh
theihna leh nial theihna pen khialhna hipeuh mahlo hi. A maute thuhilh a kawkmuh
ding hi zaw lai hi. Hih mun ah a thutanglo, a thu manlo, a thu diklo i cih tak
ciangin “Saptuam i ngimnapi (doctrines) pan lampialna,
kipawlna pawlpi in tupna leh ngimna pan metdawhna, leh gambup vai ah ciampelna”
cihte a kipan mimal angsung ding gelna tawh nasep khempeuh huam hi. Kammal dang
khat tawh a gen hileng, na khatpeuh a kigel ciang, a kiphuh ciang leh a
kipiansak ciangin deihna leh ngimna nei a kigel, kiphuh, kipiangsak hi a, tua
deihna leh ngimnate a tangtunna ding in sepzia leh vaihawm zia zong a kibawlpah
hi. Tuate khempeuh tawh kituaklo in, mimal deihna leh lungphutna tawh makaihna
in a thu tanglo, a thu manlo, a thu diklo lampialna kici thei hi.
Deihna leh ngimna nei a kibawl
mihing pawlhuam (human society) sungah mipite’ muanna leh zahtakna pen sasanh (stepping-stone)
bangin zangin mimal angsung ding bek a khuat thunei mi om pahpah hi. Tua bang
mite in a thuneihna uh pen zangkhial uh a, mihing pawlhuam (Human Society) a
dingin hoihna leh phatna ding sangin a mau mimal khat, bawng khat, behkhat phungkhat,
biakna khat, kampau khat ciang bek i hoihna ding, a humbit ding in zangin
thupiak bawl in “a ma thu a kimanna ding” hasuan thei hi.
Tua bang thute a pian tak
ciangin, mipite in “a thutanglo, a thu manlo, a thu diklo thupiak, thukhun
khempeuh zuihloh ding, nialkalh ding” kisam a, tua bang nasepna pen thudik leh
thutang lampi hizaw a hih manin khialhna leh mawhna hilo cih phawk ding thupi
hi. Mipite a ding thu dik tawh mapang mite in zong tua bang in “a diklo thupiak
leh thukhun” pen phiatna ding malak na nei in, a thuman mihing pawlhuam in zong
panpih in gum zaw hi. Mimal khat in a mihin’ pihte tungah “dek si tawp in, a met
dawhna” dingin Biakna thu, Kipawlna pawlpi leh Gambup vai thuneihna, ukna ah
makai a sepna a zat tak ciangin tua bang mite pen mimal leh mi khatpeuh in langpanna
pen thuman nasepna hi zaw hi.
Thumanlo thusuah leh thupiak
i cih tak ciangin mihing khat i upna tawh kisai in biakna, paiina khaktan sakna
zong huam kha hi. Thunei Sia/Makai/Kumpite in a mau i upna tawh kisai biakna
leh paiina pen midang khat i upna leh biakna, paiina tawh a kituah loh manin
khaktansakna a hihi. Tua bangin Upna thu tawh kisai biakna leh paiina kikhak
tansakna ding thusuak leh thupiak a nei thunei mi khatpeuh pen “hoihlo hi, thu
tanglo hi, diklo hi” cih na pen thu man nasep a hihi.
Thunei Sia/Makai/Kumpite
in mi kim i hoihna ding leh mihing pawlhuam hoihna ding tawh kituaklo thupiak
leh thusuah a neih uh ciangin zuih loh a, “tua bang mite thu manlohna” pen thu
man nasep a hihi. Thunei Sia/Makai/Kumpite thu mang ni/ mang un cih kihilhna,
kisawlna pen, a thu omsa- biakna thu, kipawlna pawlpi tup leh ngim, gambup
hoihna ding thu guipite, a hih leh zuih ding hoih a, a thu omsa hilo in mimal
thuneihna ding, vangliatna ding leh metna ding a hih leh a thu uh manlohna pen
thu man nasep hi zaw hi. A mi i thu man ding kisawl, kihilh ding hilo a, a thu
bultu pen bulphuh a nasepna ah tua thu zuih ding kihilh, kisawl ding hizaw hi. A
mi i thu bek en in, i man tak ciangin thunei Sia/Makai/Kumpite zong kisia
(corrupt) thei a hih manin mihing pawlhuam (human society) a dingin siatna
piang sak hi.
Date: May 30, 2020
