Proportional Representation (PR) Electoral System i cih bang hiam?
Kitelna pen a tel mipi (voters) in a mau tang in a pang (nasem) ding a muan pen mite a tel khiatna hi cih pen mi kim in a theih khitsa a hihi. A tel mipite i deihna a hih leh a mau tel mi in ngah henla, a mau tang in ma pang (nasem) leh cih a hihi. A hizongin kitelna i cih pen a ngah om a, a ngahlo om ding cih pen theihsa thu hi leuleu hi. Khat veivei a tel mipite in a mau deih tel mi in a ngah loh ciangin a mau tang a pang (represent) ding mi omlo leh a mau i deihna (will) pen ki nawl khin hi ci’n thuak thei uhhi. Tua a hih man in, Democracy gam ah a kinawl khin bang a thuak mi a tawm theithei ding leh a tel mite i deihna a tam theithei a kimuh khiat theihna ding kitel zia (electoral system) a kizong kawikawi ahihi. Democracy gam sunga kizang kitel zia sung pan in sehhawm tangmi panna (Proportional Representation -PR) kitel zia thu tawm khat i taklang ut hi.
Sehhawm tangmi panna (Proportional Representation-PR) i cih pen Panmun (position) khat a dingin a ki dem Party (or) Pawlpi (Organization) tuamtuamte in kitelna ah a mau i Party (or) Pawlpi (Org) i vote ngahzah zui in Tangmi/Palai sehhawm na a hihi. Me (vote) bial khen khat (constituency) ah Tangmi/Palai khat bek tel khiatna hilo a, Tangmi/Palai ding a tel cing hihna ding ding kiciangtan zah za-ah (percentage) a ngahna zui in Tangmi/Palai nih leh thum zong tel khiatna nam a hihi. Gentehna in Tangmi/Palai mi (4) a om Tonzang bial bangah mipi vote 50% bang ZCD party in a ngah leh Tangmi/Palai mi (2) ngah ding a, mipi vote 25% bang NLD in a ngah leh Tangmi/Palai mi (1), leh mipi vote 25% bang USDP in a ngah leh Tangmi/Palai mi (1) ngah ding cih dan a hihi. Mimal kidemna en a vote kipia hilo a, Party (or) Pawlpi (Org) bulphuh a kitelna nam a hihi.
PR system pen hih a nuai a nam (3) khen dan in leitung kitelna ah a kizatna ki mu thei hi.
1. Party List Proportional Representation (PLPR) Electoral System
Hih kitelzia pen Tangmi/Palai a kidem mite en a kitel hilo a, a Party (or) Organization en a me kitelna a hihi. Party in vote a ngah zah za-ah (percentage) zui in Tangmi/Palai sehhawm ngah hi. Hih kitel zia pen PR kitel zia sung pan a baih (simple) pen leh a kitam zat pen kitel zia a hihi. Bial (khawk) khat ah a kidem Party te in tua bial (constituency) ah kidem ding Tangmi/Palai mite min tangko khiat kul masa sese lo in, a mau (Party) te i sehkholh sa mite min ciang puak thei lel uhhi. Mipite in a hih leh Party (or) Organization i Policy en a vote pia a telna a hihi. (Mimal a mipi in a tel hilo a hih manin kua pen lian in tua mun ah Tangmi/Palai sem ding cih kithei nailo hi. A hizongin hih kitel zia ah Tangmi/Palai te in a mau sepna bial (constituency) pualam, a mau party in a zawhna mun bial dang ah ding zong na sem thei kawikawi veve hi.)
A hi zongin hih PLPR kitel zia sungah Vote piak dan nam neu (2) om lai a, Closed Party List Ballot leh Open Party List Ballot hi a, Tangmi/Palai khat sangin a tamzaw tel khiatna bial (constituency) ah kizang hi. Closed Party List Ballot ah vote piak zia pen mipi te in a mau deih Party bek tel thei uhhi. Gentehna in Party pan in a kidem ding Tangmi/Palai min sazian a puak uh hangin, tua sung pan Party in a vote ngahna zui in a mi (Tangmi/Palai) pen Party pan hawmsak bek hi. (Party khat ah Tangmi/Palai khat tungsiah zo ding vote percentage a ngah leh zong Party vaihawmna zui in a masa, a nihna in pai in kiseh hi.) Open Party List Ballot ah vote piak zia pen mipi te in a mau deih party leh tua party sung pan Tangmi leh Palai a sem ding mi i min tawh tel khawm thei hi. Mipite in Party i sehsa Tangmi/Palai omsa sung pan in a mau deih pen numbat khat, a deih zom pen numbat nih cih bangin a mau deih dan in gual in tel thei uhhi.
2. Mixed Member Proportional (MMP) Electoral System
Gawmkhop sehhawm Kitelna (MMP) pen min tuamtuam a hi, Additional Member System (AMS), Compensatory PR (CPR), Two Vote System (TVS), The German System cih bangin ki gen thei hi. Bial (constituency) khat sungah Tangmi/Palai panmun a sem ding mi a lang (half) pen mipi vote a tam ngah pen a zo (First Past The Post-FPTP) zangin kitel a, a om lai a lang (half) pen a tung a i gen Party List Proportional Representation (PLPR) zangin kitel na a kizang a kigawm khawm a hihi. Thu dang khat in a gen hi leng, a ngah tam pen a zo (FPTP) i hoihna teng leh PLPR kitel zia i hoihna teng a gawm khawm ding hanciamna kitelzia a hihi. Kitelna a kidem Party khempeuh in Tangmi/Palai a ngah kim theihna ding lampi zonna khat zong kici thei hi.
Hih kitel zia zatna ah mipite (Voters) in me tang nih ta piak khat in pia ding hi. Me tang khat pen a tam ngah pen a zo (FPTP) me tang hi a, a dang me tang khat pen (PLPR) a ding me tang a hihi. Me tang a kisim ciangin me tang khat a hi FPTP a ding me tang tawh kitel na ah a ngah pen in bial bup a dingin 50% a ngah hi pah a, a dang me tang kisim lai ding, PLPR me tang pen a om lai 50% sungah kidem ding cihna a hihi. Me tang a kisim ciangin buai na leh hun tampi la hi.
3. Single Transferable Vote (STV) Electoral System
Hih kitel zia pen Australia ah Hare-Clark System ci uh a, US gam ah Choice Voting system ci’n zong kithei hi. Hih kitel zia pen a vial thuap tam lua in PR system dangte sangin buai huai zaw hi. A kidem Party te in bial (constituency) khat sunga kidem ding Tangmi/Palai mite min sazian teng pen pulak in me tang tungah tua a kidem mi teng min khum khol hi. Bial khat sungah Tangmi/Palai tampi kidem thei a, gualzawhna ding ciangtan zah a ngah mite leh me tang tawm a ngah pente a banban in, a kidem pih mite me tungah gawm beh a kitel na nam a hihi. Gentehna in, Bial khat ah a kidem Tangmi/Palai mi (5) om ci ni. Me piate (Voters) tua Tangmi/Palai sung pan in a deih teng uh a masa, a nihna ci’n a banban in me pia uh hi. Tua sung pan in Tangmi/Palai a telcing na ding a kiciang tan zah a ngah pen, a kitel khia masa hi a, tua ciangin a tam ngah pen in ngahzah sung pan a cing val me tang teng leh me tang tawm ngah pen i me tang teng pen a tam ngah nihna, a tam ngah thumna tungah kihawm sak hi. Tua dan in a banban in kipai sak a, tel cing hihna ding ciangtanna zah a ngah thei miteng pen Tangmi/Palai dingin kitel suak a hihi. Hih kitel zia pen me (vote) simna ah hamsatna tampi om hi.
Hih Proportional Representation (PR) kitelzia i hoihna (advantages) leh hoih lohna (disadvantages) tampi om a, tua sung pan in pawlkhah hih a nuai a bang a hihi.
PR Kitelzia i hoihna (Advantages)
1. Sehhawm Tangmi panna a hih manin me tang thel thang tawm zaw hi.
2. Mi namneu te in a mau me tang hangin a mau deih tel mite in a ngah na ding lampi om zaw deuh hi.
3. A thahat party khat bek in bup luah theilo zaw deuh a, mi tamte leh mi tawmte in a mau mun ciatciat ah tangmi leh palai a kilawm in ngah thei zaw hi.
4. Numei leh Pasal liangko kikimna dingin lampi sialna nuam zaw hi.
PR kitelzia i hoih lohna (Disadvantages)
1. Bial (constituency) sunga om mipite leh Tangmi/Palai kikal ah kizopna, kinai na tawm mahmah hi.
2. Party bulpi lam pan a Tangmi/Palai kiseh bek a hih manin Party bulpi a om makaite thu neihna lianlua thei a, mipi mai sangin Party makaite mai en zaw thei uhhi.
3. Party neuneu tampi om thei a hih manin gambup vai tawh kisai vai thupi khensatna ah thukimna ngah ding a haksat ban ah, gambit leh daihna ding vaihawm hamsa thei hi.
4. A luanglet (Extreme) party neuneu te in zong panmun ngah thei (Gentehna in Weimar Republic- Hitler) a hih manin gam leh minam a dingin zong lau huai thei hi a ci zong om hi.
Date: November 2, 2021
