“Politics a sem hilo i hih manin, kinialnial kullo in, mi khat i cih bangbang ki zui niitniit lel ni”.
“Politics pen biakna sungah a lut teh ngawn kai hi”.
ci a kigen kampau na za zelzel hiam?
Kipawlna pawlpi leh biakna sungah politics lut saklo in na a kisep zawh na ding deihna hi a, thu hoih khat ahihi.
A hi zongin “ki nialnial kullo, mi khat bek i cih ki zui niitniit lel ni” cih kammal sung mahmah ah zong politics na om khin a hih lam kiphawk khalo hi. A taktak in “mi khat bek i cih bangbang, ki zui niitniit lel ni” cih kammal in politics sungah a dingin a kideihlo penpen kammal mi khat bek i ukcipna, thu neihna leh vaihawmna a gengen na hi zaw lai dep hi. (Tu hun pau leh Kawl galkap MAL tawh a kibang ding gelna na hi gige zaw sop hi.) “Politics sem hilo hang, thu ki man ni” cih pen zaknop leh a ngaih nop a hih hangin, a nungsang gu taktak ah, “kei ma thu gen, kei ma vai hawm bek hong zui in, hong mang un” a hih kei leh “tua pa/nu gen bek, vaihawm ben zui in, mang ni” a ci na hi zaw sop thei hi.
Politics a kici thu i hoih lohna a gengen ut mite in, a thu gen uh leh a na sep uh tel theih mahmah uhhi. Mipite tungah a lah thu a tuam, a ngah ding a tuam thu kisel sim a om lam tel mahmah uh hi. Politics kammal pen mipi in a lipkhap theihtheihna ding ngimna zong hi thei kha ding hi. Tua bangin politics pen mipi in lipkhap henla hi leh, thu leh la khat peuh a om ciangin “politics” vai lua cih kammal tawh deng kik leh mipi in tua thu leh la khat peuh pen neh ngawm nawnlo ding cih deihna zong hi thei hi. Tua khit teh a mau sep loh khempeuh pen politics min puasak pah leh mipi in a ma lam zui zaw ding cih ngimna zong hi thei hi. Tua bangin a ma min le vaang, thu neihna a ngahna ding, a kipsuak na ding gelna tampi tawh a na sem khialkhial mite pen, a taktak in “politics” a sem taktak mite hi zaw dep hi. (Mipite tungah politics a kici thu lip khapna ding a gengen, minam vai a sem, ci le sa vai a sem mite pen politics sem a musak a, lip khap huai din mun in a musak mite pen a mau a ding leh angsung khualna bek tawh politics a sem taktak te hi zaw.) Zawng (monkey) pen mipi mai ah lak dingin, a mau in tua zawng (monkey) en mite tung pan in sum ngahngah ding cih ngimna hi zaw sop hi.
A hangin, politics cih taktak pen mikim in a nei leh a sem a hihi. Lampi khat teitei tawh bang ngah ding, or bang ci’n mite zo ding” ci’n ngaihsutna tawh na sep a hih nak leh Politics kihel nasep a hihi. Pawlkhat in a kilang tang in sem uh a, pawlkhat in a liahkhuh in a sem om hi zaw hi. A kilang tangin a sem mite in mipite khim seselo, bum sese lo in “a thu hoih sak leh hoih sakloh mipi tungah tak lang” in gen uh a, mipi i khensat dingin tangko khia uh hi. A tupna, sawmna, a sepzia dingte kicingin pulak uhhi. Mipi tungah kilang tang a na sepna (transparency) nei zaw pek uh hi. Mipi lam pan in “a thu le la” kicing in ngah zaw, thei zaw a hih manin a mau hoih sakna tawh kituak khensatna nei thei zaw uh hi. A liah khuh a politics sem pawl leuleu in, “mimal in hel, mimal in zui” uh a, a thu tawh pai sangin a mimal in zawh sawm zaw uhhi. A mimal in a kithuah pihte tung uah, a mau i deihna thunlut ding bek leh midangte i mimal tha nemna bek pulak ding gen bel in nei zaw uhhi. (Mimal a hong zui a, hong helhel mite pen a liah khuh a politics a sem mite cih phawk zaw ni). Mipi tungah a thu le la pen a mau gen khialo uh a, mi a gen khia ding, a sa khia ding mi hel, mi zol uhhi. A mau deihna teng tua mite tungah thunlut uh a, mipi tungah “thu kicing, la kicing” pulak khia ngeilo in, om khiankhuan zen uhhi. Tua a hih manin mipi in a mau deihna tawh kituak in thu khensat theihna dingin a thu le la kicing ngah lo uh a hih manin “a kithun lut thu leh la- mi cihna dan bek” tawh khensat uhhi. Mipi tungah a kilang tak a nasepna (transparency) om vetvet lo zaw hi. A tup leh sawm leh a sep zia ding uh mipi tung gen khia lo uhhi.
“Politics in biakna sung sia sak”, “Politics pen mi sung hong sutuah, hong kikhen sak hi” ci’n Politic kici thu mipi lipkhap dingin a gengen leh a sasa mite in, “politics paulap in a mau lam-ah a pang ding mi a khimkhim, a bumbum uh” hi zaw hi. Tua pen a taktak in “a nin politics – dirty politics” taktak hi zaw hi. A maute in a koko mite leh a demdem mite politics sep dan leh kimawl dan sangin a mau politics sepdan leh kimawl dan pen a nit zawk lam mipi in mu khia zolo hi.( Bang mu peuh mah ding, a mau mite na khim, na bum mang khin uh hi ven!).
Tua sung pan a dah huai zaw lai ah bel, mipite in a kikhim lam, a kibum lam theilo in a mau sunga kithun lut thu bek lian mah man a sak na uh a hihi. A mau sung a kithun lut thu bek lian pen khialhna omlo in a man hi, a cih khit uh tak teh, thu dang gen ding leh “bum leh na” piak ding baih pak nawnlo hi.
Politics sep dan kibang hetlo hi. Pawlkhat in minam bulphuh in politics sem hi. Pawlkhat in Party bulphuh in politics sem hi. Pawlkhat in Biakna bulphuh in politics sem hi. Pawlkhat leuleu in kipawlna bulphuh in politics sem hi. (Bulphuh leh paulap kibang lo hi.) Pawl khat leuleu in a tung a thute sung pan khat peuhpeuh “paulap” in politics sem lailai hi.
Zomite sungah bel Biakna thu kihat mahmah a hih manin i politics sepna ah biakna tawh kisai vive kimu tam zaw hi. “Biakna sungah politics lut lua” a kicih zel pen, Zomite i kituah khopna tualsung (society) in biakna bek a hih man zong hi thei hi. Upna kibang Pawl kikhenna, biak inn kikhenna cihte khempeuh zong biakna sunga politics a sem, a hawl makaite, siate teng hang hi thei zaw gige hi. Tua sungah pawlkhat in upna guipi (doctrines) paulap in a mau mi ding na khimkhim, na bumbum uh a, a mau hilh thu bek mansakna, diksakna leh sanna pan hong kipan den hi. Tua pen a makai a kinei mite in a mau ang ma khualna hang tawh upna leh biakna “paulap” a politics a sepna hang uh a hihi.
Mihing in min leh zaa, vaang leh panmun (position) deihlo kua mah omlo a hih manin leitung ah mihing a om laiteng tua mihingte in politics tawh kipelh theilo ding i hihi. Kammal dang khat in gen leng, mihing in min leh zaa, vaang leh panmun kituh den ding a hih manin politics a semlo makai, sia om lo hi. Makaite in zong a mau sepna kipawlna ah, Thuhilh sia te in zong a mau sepna biak inn ah a mau min le zaa ding, vaang ding leh panmun dingin a ma uh a khuat ( a lang tang leh a liah khuh a khuat vive) a hihi. (Mipi in tua bang mapanna pen tawlkhat khit ma kimu khia paklo thei zel hi.)
A hih leh mihing khempeuh politics tawh kipelh theilo a hih tak ciangin mi khempeuh a hoihlo vive hi ve hang maw. Hi mah hi. Mihing pen a hoih omlo hi. (LST) A hizongin paizia leh theih ding a kilawm, zuih ding a kilawm (common senses) zui in na sem leng mihing te om khawm thei lua, kipawl khawm theilua hi hang. A kikhung thu zui in kimawl leng (play by rules) khat leh khat ki suam ki bai na ding, ki natsakna ding omlo hi. Rules a kipat sat ciangin a liam a bai a om thei hi zaw hi.
Tual Khan Suan
January 1, 2022
