Taang-aa Nasep (Representation)
[Taangmi = Representative, Palai = Ambassador/ diplomat;
Taang-aa nasep (Representation) pen taangmi, palai leh bawmta (envoy, mediator) in zong sem thei hi.]
Mimal tawmna mun-ah taang-aa nasep (representation) kitam sap lo hi. A mi tawm a hih manin a vekpi un thu kikup, kidotna ah kihel thei pah hi. Mikim in a mau' mit tawh mu, a mau' bil tawh za leh a mau' muk/kam tawh gen theihna ding mun ah om tek a hih man a hihi. Innkuan khat sungah innkuan sung vai kikupna leh genna a om ciangin innkuan sung mi khempeuh in a zak leh a gen theihna tawh kibang hi a, taang-ai a gen leh sep kisam lo hi. Pawlkhat in hih bang nasepna pen direct democracy nam hi ci uhhi.
Mimal khang in a tam ciangin taang-aa nasep (representation) pen a lo theilo in kisam hi. Milip tamta a hih manin milip i muh theihna ding, zak theihna ding leh gen theihna ding a mun in pia nawnlo, a hun in pia nawnlo leh a thu in cin zo nawnlo a hih man a hihi. Khuasung vengsung leh gamsung ah mipi in a muhna ding, a zakna ding leh a gen theihna dingun lampi kizonna pan kingah cih theih hi. Mipi deihna muh khiatna dingin bang lampi zang ding cih zonna a suak hi. Khuasung khat ah thu leh vai thupi (gentehna in mipi leh tangpi tawh kisai thute) ah khuasung mi kim a kihel theihna dingin innsung khat pan mikhat ta (innkuan lutang teng) tualbuk ah pai khawm in thu a kikup, a khensatna nam a hihi. Tua a paikhawm inn khat pan in khat in a mau innkuan taang-aa nasep (representation) a sem hi a, a mau innkuan a dingin a hoih pen ding, a hih keileh a mau innkuan su kha ding thu a om leh a nial ding, cih bangin a pai tek uh a hihi. Khua sung buppi thu kikupna teng pen a mau innkuan sungah "bang thu hiam" cih a genkik ding vaipuak nei tek uhhi. Milip kihel kisam nawnlo in a mau taangin mi khat puak/zatna hangin thu kikupna, thu gelna leh vaihawmna tampi nuam tuam zaw hi. Pawlkhat in hih bang nasepna pen indirect/ representative democracy ci uhhi.
Taang-aa nasep (representation) a kisapna leh a pianna mun peuh ah thugui nam (5) kihel hamtang hi, ci'n mipil te'n gen uhhi. Tua thuguite pen:
1. Taang-aa pang/ a sem ding mi(na)te, ( some party that is representing)
2. A maute ai-taang ding a pan a laksak mi (na)te (some party that is being represented,
3. Na (bang) khat peuh ai- tang a ding, pang ding (something that is being represented),
4. Bang vai a ding a ai-tang a din, sep sak (a setting within which he activity of representation is taking place)
5. A kizalo, a kinusia (nolhsiah) bang thu hiam (something is being left out) cih teng a hihi.
Taang-aa nasep ah taangmi (or) palai a sem mite in bang ci bangin sem ding (or) semlo ding cih leh bang teng sem in, bangteng semlo ding cih kician tak in thugui khunna om khin theilo hi. Tua a hih manin i taangmi (or) palaite in i sawl mite (delegates) bangin sem ding maw, a hih kei leh i muan mite (trustees) bangin sem ding maw, cih thu nih tungah lungkaatna om thei ziuhziuh hi.
A kisawl mite (Delegates): Taangmi leh Palaite in a mau a teel mite i metna (or) deihna bek tawh kampau ding, thu genna ding, nasem ding a kisawl nasem mite a hihi. Tua hi a, a kisawm mite in thu a genna, na a sepna ah a mah a sawl mite i deihna leh utna tawh a kituak mah ding hiam cih a khinkhai ding kisam hi. A mau (taangmi leh palaite) i sia leh pha theihna zang in hoih a sak loh thu (or) mun a om hangin a mah a tel (or) a sawl mite deihna a zuih ding hi a, midangte' limlang (mirror) sak ding a kikoih a hih manin a ma' thu in thugen theilo hi. Taangmi leh Palaite in a mau theihna, siamna taktak zat theihna ding mun-awng tam neihlo cihna suak a hih man in a tawpna ah a tel (or) a sawl mite ai tangin pang thei taktak lo tawh kibatna mun om thei hi.
A kimuang mite (Trustees): Taangmi (or) Palaite tungah muanna buppi kipia ah a maute' hoih sak pen in thu gen, vaihawm leh nasem dingin mawhpuakna kipia taang-aa nasepna nam a hihi. Taangmi (or) Palaite in a mah a tel mite a dingin hoih a sak pen bangin thu gen thei, na sem thei hi. A mah (aangmi or palai) i sia leh pha theihna buppi zangin a mah a tel mite a ding khensat sak thei hi. Tua bang mah in taangmi (or) palaite in a mau theihna, siamna leh muhna pen mipite in hoihsa, thukim leh deih a hih manin a mah a tel bangin pom uh a hih manin na sem ngam, sem thei uhhi.
Ang-ma khual mite (Politico): Hih a tungah a kisawl mite (Delegate) leh a kimuang mite (Trustee) taang a nasepna gawmkhawm ah nasepna nam a hihi. A tangpi in bel taangmi (or) palai in a ma i sia leh pha theihna zangin (trustee model) thu gen, na sem leh khensat hi. A hizongin a mah a tel mite in thu (issue) pawlkhat ah a mau deihna leh hoihsakna a zui dingin a tawsawn uh tak ciangin tua zui in sem hi.
Pawl pumgup a panna (Partisan/mandate representation): Taangmi (or) Palai pen pawl (party) zui a kitel, kisawl a hih manin thu genna, nasepna leh thu khensatna ah a pawlpi (party) tawh kizui bek a dingin ma pang hi. Hih paizia pen a beisa kum nailo hun pan kipan in a langlek luatna (hyperpolarization) hangin ki lim zat mahmah lai zang hi.
Taang-aa nasepna (Representation) thu luanzia (theory) leh a thu paizia nungah zat dan tuamtuam om kha ding hi. American gam mi Political Theorist Pi Hanna Fenichel Pitkin (born July 17, 1931) in "the concept of representation" laibu a gelhna sungah thu khensatna paizia zuihna ah thukip leh thulut (legitimacy) zui in taang-aa nasepna seh (4) bangin na khen khia hi. Kuate in taangmi (or) Palai hi hiam (who are the representatives), a maute bangci bangin kitel hiam (how are they selected) leh a thukhensatna pan in bang piang hiam (what is the outcome of the decision making process) cih thuguipi teng omlo in taang-aa nasepna (representation) pen thukip (legitimacy) om theilo hi.
Limlak taang-aa nasepna: Kuate makai hiam? (Descriptive Representation: Who are the leaders?)
Taang-aa nasep (representation) i cihna mun ah taangmi (or) palai a sem mite in midangte taang a mapang uh a hih manin tua a pansan uh mite deihna leh lunggulhna bangzah in pansan uh hiam cih thupi sanna pen ding a hihi. Gelna leh deihzawkna (ideas and preferences) siksan a ma a pan nak leh, taang-aa omna (making present) leh taang-aa sepna (acting for) a kician a om na mun ah taang-aa nasep sem pen kua kua hi zongin phamawh lua lo hi. Gentehna in numei taang ding a numei mah makai (or) minam tawmte a ding a minam tawm makai cih sangin, kua kua in makai a sem zongin numeite' a ding bangte panlak sak (or) minam tawmte a ding bangteng sepsak cih tawh etkak zaw cihna a hihi. Hih taang-aa nasepna (representation) pen a kikhin khaina ah makai khatpeuh in midangte taang in a dinsak na ah bang ciangin a maute deihna leh lunggulhna sepsak gelsak hiam cih tawh kiteh kak zaw hi.
Ngeina taang-aa nasepna: Makaite bangci bangin kitel hiam? (Formal Representation: How are the leaders selected?)
Mipi leh mi nautang in panmun len makaite pen a kisam pilna leh siamna nei dingin lam-etna hi. Hih ngeina taang-a nasepna (formal representation) in a huamzai-na (dimension) nam nih in ki mu thei hi. Tuate in sep theihna-phalna ngahna (authorization) leh mawhpuak lakna (accountability) a hihi. Septheihna-phalna ngahna (authorization) pen makai khatpeuh in a ma dinmun (status), panmun (position) ngahna tawh kizui in thuneihna a lian, a neu neihna a hihi. Makaite in a mau dinmun leh panmun a ngahna dingin bang lampi tawn in bangci bangin mipi phalna leh theihpihna ngah hiam cih tungtawn in a maute sep theihna a liatna leh a neu-na in kitehkak thei hi.
Mawhpuak lakna (accountability) cih tak ciangin mipi (or) a sawl mite in a mau taang a nasem makai mi pen a mau deihna leh lam-etna tawh kituak lo in a sepna a om ciangin (or) sep khialhna a neih ciangin bangci bangin notkhia ding (or) bangci bangin dan pia ding cihna a hihi. Panmun len makai, taangmi (or) palai in mipi (or) mite a ding sang sik in a ma a dingin metna om ding bek in nasep in pan a lak ciangin bang lampi tungtawn in khawlsak ding, tawpsak ding leh nawl khin ding cih gelkholhna bawl ding kisam a hihi.
A kin valval taang mi nasep na: A gah bang hiam? (Responsive/Substantive Representation: What is the outcome?)
Taangmi (or) Palaite in a mau a teel leh a sawl mite' metna dingin a sep khiat ding uh masak hi. Taangmi (or) Palaite in a mau dinmun (status) leh panmun (position) zui in a sep na vuah, a mau mimal angsung metna ding sangin midang (a teel, a sawl) mite deihna, metna leh hamphatna ding in a sep zawh ding uh hanciam zaw hi. A mau a teel (or) a sawl mite a dingin na hoih leh phattuamna a sep sak, a gensak ding uh kin valval in a matutna a lakkhiat ding kisam hi.
Mipite' (Gammi) muhna ah thukip taang-a nasepna (Legitimate representation)
Taangmi (or) palai nasepna pen thukip leh thuman in mite ai-taang a ding, pang leh sem hi cih san theihna dingin tehkakna, etkakna nam nih zangin ki en thei hi. Paizia zui a (system level) tehkakna leh mimal zui a (individual level) tehkakna a hihi.
Paizia zui a thukip-thulut hi cih theihna pen kim leh kiang kivaipuak zia, kipawlna pawlpite nasep paizia leh huangsung thumeilet cihte siksan in a tamkim (fairness) thei pen, a hoih thei (efficiency) pen leh mawhpuakna (accountability) a la thei pen ding thugui zui in a kisep leh seploh etna pan kimu khia thei hi.
Mimal zui a (individual level) tehtakna tawh thukip-thulut hi cih theihna pen mipi (a teel, a sawl mite) nun zia (attitude) leh sepna (actions) kawk zaw, bulphuh zaw leh masak zawkna pan kimu khia thei hi. Mimal zui a thukip a sanna pen mi theihna (popular) leh lam-etna (expectation) tungah kingah pet mah hi. Mi a tam in a san leh hoih sa in san henhanna nam hi a, sem zo ding hi ci'n mi khat le nih genna tawh a ki pummuan gawp thei nam a hihi.
Thukhupna
Taang-aa nasepna (representation) pen mihing nuntakna leh vaihawmna ah gamhoih zawhna ding, kipawlna pawlpi sung hoih zawkna ding ah a omlo theilo, a kisam a hihi. Bangci nam tawh taangmi (or) palai kisawl (or) kipuak a hi zongin tua taangmi (or) palaite in a mau sepna ah thukip-thudik (legitimacy) a neih ding uh a thupi pen a hihi. A sawl (or) a teel mite in zong taangmi leh palaite tungah septheihna-phalna (authorization) a piak takpi a hih ding ban ah, a maute' tungah mawhpuakna (accountability) a nei taangmi (or) palai a hih ding kisam hi. Tua bangin septheihna-phalna (authorization) leh mawhpuakna (accountability) a kizuih khop ciang bek in taangmi (or) palai man taktak, kip taktak hi ci'n mipi in sang thei hi.
Behlapna:
A beisa hun a pan tuhun ciang dongin Kawlgam Chin State gamvai leh thu vai ah nasepna, vaihawmnate Kawlgam pualam pan in a om ciangin ( a diak in Tedim leh Tonzang khuapi uk a ding) taangmi leh palai om kici in, a mi zong kipulak khia thei zel hi. Tua taangmi leh palaite in a mau dinmun (status) leh panmun (position) a ngahna uh pen bang cih bangin ngah hiam cih mipite theipih lo, tel pihlo hi. Mi nautang leh mipi in a nuai pan in ko taangmi leh palai dingin hih mite kong tel, kong sawl uh hi cihna zong ngeina paizia zui (system level) leh mimal zui (individual level) in zong om ngeilo hi. A tung pan in kiseh suk, (or) a mau mahmah in a tung pan in bansuk in dinmun leh panmun la uh suak hi. Dinmun leh panmun a ngah zia uh lampi manlo a hih manin mipi nautang in a maute tungah septheihna-phalna (authorization) a piak loh ban-ah, a maute mahmah in zong mipi nautang tungah mawhpuakna (accountability) neilo uhhi. Kammal dang khat pan in cileng, a maute taangmi leh palai panmun pen mipi nautang in thukip-thudik (legitimacy) in sang zolo uhhi.
Date: February 17, 2023
