A mi sangin, a thu masak (Principles
Before Personalities)
A
mi hilo in, a thu lenkip a pai ding hizaw hi, a kicih ciangin, pawlkhat in, “a
mi masa lo in a thu om theilo pi” ci kha ding hi. Khial khinlo hi. Mi khat leh
a ma’ i mimal thu pen kikhen khia siang theilo mah ding hi. A hizongin mi tampi
tawh vaihawmna, midang tawh thu kituak a vaihawmna ah mimal khat i thu hi
nawnlo a hih manin, mimal khat i thu leh kipawlna thu guipi (te) khen khiat siam
ding kisin kul hi.
A mi sangin, a thu masak in pai ding cih tak ciangin “mikhat peuh i deih in, i deih kei zongin mi kim tungah diktatna (honesty), nuai lutna (humility), lai-natna (compassion), thuak zawhna (tolerance), lungduaina (patience)” cihte zatna (practice) ding cihna a hihi. Tua bang mah in, mi khat peuh i it pen leh itloh pen a hi zongin “gamtat khialhna leh mawhna a bawl mite tungah a kilawm a kituak in gawtna (punishment) leh khaalna (corrective action)” pen kilam danglo in zatna zong a hihi. A mimal sangin a thu masak a lampai na in hong sinsak a hih leh mi khempeuh a kikim (or) kibuk kim (equally) in bawl (treat) ding cihna a hihi.
June
13, 2023 (Tuesday) ni a New Orleans Ernest N. Morial Convention Center a kibawl
Southern Baptist Convention (SBC) i Kumcin Khawmpi (annual meeting) ah “Ngimna
Tawsawn Nuntakna – The Purpose Driven Life” laibu gelh pa, Southern California
a om Saddleback Church a phut khia pa leh Pawlpi kem Siapa (Founding Pastor) Rick
Warren pen Southern Baptist Convention (SBC) upna guipi (doctrines) tawh kituak
lo-in a pawlpi (Saddleback Church) ah Numei Tuucing (women pastor) pia a hih
manin, SBC pan in Palaite (Delegates) te in vote piakna tawh pawlpua ah koih
ding khensat uhhi. (Vote pia mite pen Tuucing – Pastor te a hihi).
Hih
thu a pian ciangin thu-um mi leh thu-umlo mi tampi tak sungah kitguihna (shock)
om hi. Pawlkhat in Rick Warren nasep pen hoih sa in panpih uhhi. A ma mimal
minthanna, sepzawhna, lawhcinna leh huzaapna hangin a sep a bawl khempeuh
panpih, thapia uh a, SBC in hih bangin mi thupi, mi lian leh mi pammaih khat a
hawlkhiat pen diksa lo in SBC mawhpaih uhhi. Pawlkhat leuleu in SBC pen mimal
sangin a thu (guipi) tung a ding zaw a hih manin a mau (SBC) upna bulpi (doctrines)
tawh kituak a nasem a hih manin hih bangin khaalna (corrective action) a kipiak
pen hoih sa, thukim uh a, SBC in a sep ding a kilawm a sem a hihi, ci uhhi.
(SBC pen doctrines tung a kilam a hih manin sep khial bawl khial omlo, paidan
man mahmah hi ci uhhi.)
Hih
gawtna (punishment) leh khaalna (corrective action) a pianna nung thu tom cik
hih bang a hihi. SBC i upna pulakna (statement of Faith) sungah “Tuucing (Pastor)
nasep pen pasal i sep ding bek a kiciangtan (limit) a hihi. Numei pen dai khinkhian
(quiet) in Pasal nung zui ding hi. Numei in Pasal nasep ding (Tuucing-
Pastoring) a sep ding hilo hi” ci’n sanna kigelh hi. Tua hi a, Saddleback
Church in numei Tuucing (Pastor) a neih (zat) pen SBC i upna guipi tawh kilawm ta
lo hi (deemed not be in friendly cooperation) a hih manin kihawlkhia (expel) hi
ci’n Baptist Press in thusuah nei hi. Saddleback Church in Numei Tuucing
(Pastor) a neih (zat) pen 2021 kum pan kipan hi a, Rick Warren a tawlngak (retire)
khit ciangin a ma mun a sem Andy Wood (Lead Pastor) i zi Stacie Wood in zong
Pawlpi Tuucing dingin a neih (zat) uh ciangin thu kizom toto suak hi. SBC in
kum 2000 a pat in pawlpi sungah Numei Tuucing neih (zat) ding a kham ua kipan
in pawlpi (5) bang a hawlkhia khin uh a hihi. Saddleback Church tung bek ah a bawl
uh hilo hi. (Kammal Siampi (Priest) leh Tuucing (Pastor) pen Laisiangtho sungah
a zatna zong kibanglo a hih manin, tuhun in zong a kibanglo in sanna leh zatna
pen Laisiangtho zuihna hi zaw ding hi) Hih mun ah a lak khiat huai thu khat in,
Saddleback Church i sepzia, sanzia leh paizia pen SBC i upna guipi tawh kituak maw,
kituaklo cih tawh kisai etcikna, kan khiatna pen a kip thukan pawl (Credential
committee) in kicing tak in nei hi. Tua bek hilo in, Saddleback Church pawlpi pan
in thu genna, Pastor Rick Warren i thu genna leh a aw uh mi kim in a zakna ding
lampi honsak, (BaptistNews.com ah suaksak) uh hi. (Thulang gen bek tawh thu
khensat loh ding, thu kicing in zak khit ciangin thukhupna bawl ding cih lim
lak a hih manin a kisep zia ah pau banna tawm hi.)
Hih
lai gelhna sungah, “Saddleback Church pen man hi, manlo hi; SBC nasep pen hoih
hi, hoihlo hi; Pasal Tuucing pen a man hi, manlo hi; Numei Tuucing pen kilawm
hi, kilawm lo hi cih a gen nuam i hi kei hi. I gennop thu pen a hih leh “A mimal
sangin a thu masa zaw” cih a gen nuam i hi a, Saddleback Church leh Southern
Baptist Convention (SBC) pen etkakna ding in zang ut i hih manin a gen masa i
hihi. (Cihnopna ah a upna guipi (doctrines) – or a thu paipi (theory) man leh
manlo a kalhkhia (argument) nuam i hi kei a, na kisep zia (or) paizia ah a om sa
thu leh a om sa mi kikal khen khia a vaihawmna a pulak nuam bek i hihi.)
Saddleback
Church leh Southern Baptist Convention (SBC) kikal a thupiang pen nang tungah
hong kipuak (ko) henla, nang thu khensat ding dinmun ah a om hi le ci’n “SBC i
upna guipite (doctrines) tungah dingin na khensat tam? Or Pastor Rick Warren i
mimal lawhcinna, pawlpi lawhcinna, makaih zawhna, min thanna, huzaapna cihte en
in na khensat tam? SBC in kum tampi a paipih sa upna guipite mah a man zaw a
hih man a, hih ciang kipai thei hi, na ci tam? A hikei leh Pasian in Pastor
Rick Warren thupha pia in a pawlpi khang, mitampi tak nei, lawhcing mahmah a hih
manin i nasep dan Laisiangtho tawh kituak zaw hi na ci tam? Hih thu kikal ah a
lang tuak ah, a khial zaw omlo, a manzaw omlo na ci maimai tam? A khial omlo in
a man tuak a hih leh, thu khensatna ah a thu masa sak ding hoih zaw hi, (or) a
mimal tungah kinga a hih manin a mi masa sak ding hoih zaw hi na ci tam? Dotna
tampi om thei hi.
Mimal
nuntakna (Zomite zong kihel in) sungah Saddleback Church leh Southern Baptist
Convention (SBC) kikal a thupiang bangin thulian khensat ding i phut khak kim
loh hangin hih tawh kibang pian “a thu paipi leh mimal” kikal ah tel ding a om
hun kituak kha zel thei hi. (Zomi) khat in hih a tungah thu kikal bangin ei mite
sungah om leh SBC te thukhensat bangin kikhen satlo kha ding hi, a cihteh ka
lungsim hong khoih kha hi. A cih nopna ah bel ei mite kipawlna (or) pawlpi
sungah hih bang dinmun in thu khensat a kul ding in om hi leng, a mi i
lawhcinna, minthanna en in a mimal lam ki-awn zaw ding hi, a ci a hihi. A
mitung a ding a thu gen tam zaw ding cihna hi leh kilawm hi.
Mihingte
pen a mi a om man a kipawl khawm a hih sam hangin, tua kipawl khawmna dingin
pen a thu a om na tung a kiphut, ki ding leh kilam masa zaw a hihi. Kipawl khop
theihna ding thu guipi (te) a om ciang a, tua a sang thei (tua thu guipi (te)
hangin a mimal a ding khantohna om ding cih san theih na) miteng in kigawm
khawm a hihi. A mi a kikhek hangin a thu guipi (te) kikhek lo ding cih sanna hang
zong a hihi. Tua bang a kipawl khawm hi na pi, mihingte pen kipawl khopna
huangsung a tun/lut khit ciangin a thu masak nawnlo in, a mi tungah ding/ kinga
in “thu pai lo in, mi pai” gawp thei mawkmawk hi. Pawl sungah lutang pawlkhat
bangin tua pawl sung a lut khit ciangin a kilam khiatna guipi (te) nawlkhin in,
a ma mimal thute a kizuih ding hanciam mawkmawk kimu thei lai hi. Tua bangin thu
a kikhek tak ciangin, pawl lut mite in zong kipawlna guipi (te) lenkip leh
panpih ding sangsik in, Lutang panmun len mite i cih bangbang “hoih hi, hi hi”
ci mawkmawk mi tampi om thei hi. A taktak in tua bang mite pen makai siamna kemlo
(lack of leadership qualifications) a hihi. Tua bang hun tak teh a kipau lap
(or) kidik tansakna (justify) na pen “a mah siam kei leh, (or) Pasian in sathau
nilh kei leh, (or) a mah om kei leh i pawl pen khangto lo ding” cih peuh a
hihi. Tua bang dinmun ah Lutang a sem mite in Pawl i kiphuh khiatna guipi (te)
pan lam a pial ciangin thu khensat ding mite in a thu tungah ding nawnlo in a
mimal tungah dingin thu khensat uh hi. (SBC Vs Rick Warren tawh tehkak zel thei
ding kisam hi)
Mi
pawlkhat pen nuntakna ah lawhcing mahmah na pi’n thu guipi (te) tungah dingtang
na lam-ah thanem mahmah hi. Lasak siam mahmah in thu gen lamah tha nem hi. Thugen
siam mahmah na pi’n lasak thanem zong om hi. Lo khoh siam mahmah na pi’n inn
bawl (lam) ah thanem hi. Mi cim khat in a genna ah “Zomite pen Tuucing nasep a
siam nak leh, pawlsung ah gelna leh vaihawmna (management) a siam mahmah kisa
lel hi” a cih ka za ngei hi. Pawl sung mite in zong “mun khat ah a lawhcin nak
leh, mun khempeuh ah a siam pen” ding sa ziau kha mawk thei hi. Tua a hih manin
“Lutang panmun lente cih bangbang a hoih pen hi; Sia/Siama (biakna sunga sem
mite bek hilo) cih pen a man pen hi” cih bangin pom mawkmawk laizang thei hi.
Tua bang hunte ah pawlmi sung pan in pawl kiphuhna thu guipi(te) a len leh a kepcing
sawm mite pen kikhial sak, man kisa lo thei zaw lai hi. Sangsia sem ding khat
pen a tawmpen in Tan (Class) -10 ong (pass) ding cih thu a omsa hi na pi’n, Tan
-10 onglo a sangsia panmun a siuah mi khat pen nang kicing kei teh, ci’n a na
gen mi pen a khial zaw in kimu kha thei hi. (A thu sangin a mi masak zaw cihna
a hihi)
A
thu zong khial thei, a mi zong khial thei hi. A thu a khial a hih leh, a
khialhna kicing tak leh hoih tak in kantel, lak khia in a kipuah theih bangin,
a mi a khialh leh zong a kim a kiang a om mite in a thu paizia tung ah ding kip
in a puah theih, a puah ding a hihi. A khial leh khiallo cih vai hilo in
deihdan (preference) ki banglo a hih leh bel, pawl kiphutna thu guipi (te) tawh
tehkak a khensat ding kisam hi. Tua hang a kipawlna tuamtuam om, Pawlpi tuamtuam
piang a hihi.
A
thu masak tawh vaihawmna leh paizia in mikim (pawl mi khempeuh) tungah kitam
kim in vaihawmna piangsak hi. Mimal khat, itna leh pahtakna a ngah zaw deuh
mite tungah bawldan, khawlhdan, dodan a tuam; it loh deuh leh muhdah deih mite
tungah kisam saklo, thupi bawllo, simmawh bawl, tuam bawl deuh cihte om sak lo
zaw hi. A mi masak tawh vaihawmna ah a mimal i lawhcinna, minthanna (fame),
hoihna leh hehpih huaina cih peuh bulphuh in thu kivaihawm a hih manin kitam
kimna omlo hi. A lawhcinglo, a ginalo zaw, a min thanglo zaw deuhte pen
nuaisiah, koih daap in thu in zong san lohna piang sak hi. Mi lawhcing khat, mi
minthang khat zong a lawhsap hun, a min siat hun a om teh tuam bawl leuleu cih
bang piang sak lai hi. Zomite pen thuman, thutang a deih, a zui leh a zang
minamte i hih manin “a mi sangin a thu masak” a vaihawm leh ukna nei leng, i
khua i tui, i pawl sungah buaina tampi
veng tuam ding hi.
July
22, 2023
