Democracy ki-ukna tawh kisai in ei teldan, sandan, pomdan leh muhdan tek kigen zel hi.
Mi pawlkhat in Democracy paizia ki-ukna pen hoih
a sa leh a deih a om mah bangin,
Mi pawlkhat in ki-ukna leh vaihawmna ah Democracy
paizai pen hoih a sa lo zong na om hi.
Pawl khat leuleu in Ki-ukna leh vaihawmna ah
Democracy paizia pen gamsung kumpi ki-ukna bek ah zat dingin hoih a, biakna
sunga zat dingin hoih peuhmah lo hi, a ci zong om hi.
Hih bangin tel dan, sandan leh muhdan kibanglo
sung kawmkal ah “a man leh a khial” cih sangin deihdan leh masakdan
(preference) kibang lo hi ci’n kigen thei pen kha ding hi.
Leitung gam kumpi ki-ukna ah gam makai a sem ngei
Sir Winston Churchill in zong Democracy paizia pen mihing ki-ukna dingin a man
pen leh a hoih pen hilo a, a hi zongin mihing tangthu sungah ki-ukna dingin
Democracy paizia sangin paizia dang a hoihzaw om nailo hi” na ci hi.
Ki-ukna leh vaihawmna ah Democracy paizia pen
hoih sa leh hoih a salo mite in a mau muhdan tek a gen uh pen thu paipi
(concept) nih zui a, a gen uh a hihi.
Democracy paizia pen hoihlo hi, ci’n a gen mite i
pansan thu paipi (concept) a hih leh, Leitung mihingte sungah midangte tungah
ukna nei ding, makaihna sem ding pen Pasian sehsa a tuam vilvel a om hi a, a
maute pen Pasian Palaite a hih manun, a maute thuthu man ding cih sandan a
hihi. Hih sandan hangin ukna nei mite, makai sem mite thu a nial a om leh
Pasian in daan (gawtna) pia ding hi cih upna tawh kizui suk pah hi.
Hih concept a kizatna pen Leitung ki-ukna vai ah
a en ding hi leng, Kingdom (or) Monarch system a kizat lai hun a thu san leh a
min thang mahmah a hihi.
Biakna vaih ah a en ding hi leng, Church
reformation a kicih (Protestant) a hong khan ma lai hun a, biakna sungah kizang
leh a tha hat mahmah a hihi.
Democracy paizia pen hoih hi ci’n a gen mite i
pansan thu paipi Concept a hih leh, ukna nei ding leh makai ding pen piahpih
hilo, khang gui tawh kisai lo hi cih san dan a hihi. A maute pen Pasian a
dingin tangmi/Palai cih bang hi tuanlo uhhi. Mihing pen guak tang tek in kisuak
a hih manin kuamah a niam zaw, a sangzaw om tuanlo in Pasian mai ah kikim tek
hi hang, cih sandan ahihi. Mi khempeuh in Kumpi tokhom tungah tut theihna ding kong
vangpi (opportunity) nei tek hi cih sandan a hihi. Biakna sunga kizang thu
paipi zui in gen leng, Pasian leh mihingte kizopna ah, Pasian zaa a nei Topa
Zeisu cih sim loh Palai kisamlo hi. Mihing leh Pasian kizopna pen direct hi a,
mawhmai sakna ding ngetna leh Pasian tawh kihona ah zong mi khempeuh in direct
in Pasian tungah kou thei hi, cih sanna a hihi.
Hih thu paipi (concept) nihte pen democracy
hoihna leh hoihlohna a kiu lang tuak ah etna a hihi.
Democracy paizia tawh ki-ukna, vaihawmna pen hoih
lo hi ci’n a gen mite nialna/kalhna (argument) pawlkhat en leng:
1.
Democracy pen a tamzaw hoih sak tawh kipai hi a,
mipil sangin mi pillo tamzaw a hih man in mihaite deihna tawh kipai hi ci uhhi.
Hih kalhna (argument) pen manna ciang nei hi.
Mihing khat leh khat pilna, theihna leh siamna kikim lo hi. Laipil na, thu
theihna, siamna tuamtuam a nei a om bangin siamna leh theihna tungtuan a nei lo
mi zong om hi. A hizongin mihing khempeuh in “Theihna” kikim tek a neih khat om
a, tua in “ei mimal a dingin bang hoih zaw, bangin metna hong pia ding a,
bangin siatna leh supna piang sak” cih pen theih theihna kikim kinei tek hi. ( A
hoih leh a man” pen kibang lo hi. A hoih cih tak ciangin ei mimal a tek dingin
a metna a kizang thei ding cihna hi a, mimal khat ding a hoih pen midang
adingin hoih kim lo mai thei hi. A man cih tak ciangin ei mimal a dingin a hoih
pen kei zongin mikim a dingin metna pia ding cihna lam hi zaw hi)
Mi khat leh khat pen pilna le siamna, sinkhat thu
(experience) kikimlo a hih manin “thu a man pen” i muh khiatna kibanglo thei hi.
A man zaw pen mi a tamzaw in hoih a sak nailoh hun zong om thei hi. Kammal khat
pan in gen leng a tamzaw hoih sak pen A man pen hi den lo thei mah hi. Hih mun
ah kammal “hoih” leh “Man” cih pen kibang lo a hihna phawk huai hi. A man pen
mi a tamzaw in a muh khiat theih nailoh hangin tu photphot in a tamzaw hoihsak
kizui phot leh a lungkim lo ding mi tawm zaw hi. Mi a tamzaw in mi a tawmzaw
sangin tha nei zaw a, thahat zaw hi. A man zaw pen mi a tamzaw in a muh khiat
naikei leh zong, a hoih zaw kici pen zui phot leng a lungkim lo mi tawm zaw a,
pai khialhna tawm zaw hi.
2.
Pasian pen a tamzaw tawh vaihawm hilo a hih manin
biakna sungah a tamzaw deihna cih om theilo hi. (Or) Pasian thu pen Theocracy
hi a, Democracy hilo hi.
Biakna sung ah thu a kigen ciangin i phawk ding
thu khat om hi. Biakna sung thu pen thu thuap (layer) nih om a hihi. Thuap
(layer) masa pen “Pasian leh mihing kikal ki zopna (or) vantung gam tunna ding
lamlak thu paipi” tawh kisai a hihi. Hih thuap (layer) masa pan in en leng,
Pasian in a tamzaw tawh vai hawmlo hi cih pen za ah za man hi. Thuap (layer)
nihna pen leitunga om Pasian bawlna nate (mihingte zong kihel) khat leh khat
kikal ah kituak tak in (harmony) in nuntak theih ding cih a hihi.
Thuap masa a hi, Pasian leh mihing kikal kizopna
(or) Pasian gam lutna ding lampi tawh kisai in Pasian gen kammal pen a man pen
a hihi. Tua pen, mi tam thu, tha tang hat thu leh phut zawh thu tawh kipuah
theilo thu zong a hihi. Hih thuap masa tawh kisai in mi hing khempeuh, (a pil,
a hai, a zawng a hau) in Pasian kammal cih bangbang lam piallo a zuih ding a
hihi. Pasian thu lieliau ah paizia pen Theocracy paizia hi a, mihingte
lehkhiatna (interpretation) tawh kaihkawi theih ding hilo hi. Pasian in hi hi,
a cihte a hi hipah a, hilo ci a cihte a hilo hi pah hi. Hih mun ah Pasian
kammal leh thu genna pen a bawlsa nate, A MA nasem mite in “ei mahmah pen
Pasian dinmun ah kikoih khazel thei a, ei pen thu man leh thuman lo a khensat
thei dinmun ah kitu sak kha mawk mawk thei hi hang. A ma na i sep sak i TO
(Pasian) a nei, a om a hih lam kimang ngilh kha thei in, “Kei gen pen Pasian
gen hi” kici kha thei hi. A taktak in Pasian gen kammal pen kei gen kammal a
hih ding hizaw a, kei gen kammal pen Pasian gen kammal a i kaih loh ding pen TO
(Pasian) neihna a hihi.
Biakna sung thu thuap nihna i gen ut thu pen a
hih leh, leitung a om hinna nei leh hinna neilo khempeuh pen Pasian bawlsa
(nate) hi hang a, ei le ei kikal ah kituak (harmony) tak a nun tak ding,
vaihawm ding, na sep ding kisam hi. Tua bangin (Pasian) bawlsa mihing khat leh
khat kikal ah kituak (harmony) tak a nuntak theihna dingin mihing khempeuh in
mihing hihna kikim in nei tek (nampi
namneu omlo, a niamzaw a sangzaw omlo) a i san ding, i muh ding a hihi. Ei leh
midangte kikal ah kizahtakna om leh kilemna om ding a, kituak tak in nungta
thei ding hi hang.
3.
Ei bek man kisak na hangin ei cih bangbang
midangte in hong zuih zawh loh ciangin Democracy ki-ukna hoih kei ki ci thei
hi.
A taktak in hih bang lungsim i nungguk ah, “ei
bek in thu nei ut, ei bek a lian pen hi den utna lungsim” a om man hi gige hi.
Tua bang lungsim puakzia pen midangte sangin kei lian zaw, thupi zaw, nampi zaw
ka hih manin kei thuthu ding hi cih hi a, Aannashin (dictator) lungsim a hihi.
Committee thu kikupna tawh kisai ciamnuih cihtak
a kigen thei zel, a pualam ah zong kigen pahpah zel thu khat ah “e’n gelgel,
ngaih sunsun in hoih pen in teh” cih na tawh thu kikupna ah i gen tak ciangin,
thu ngaihsun mello khatpeuh in hong bing nial dikdek mawk in thu khupna ki ngah
zolo in na kisem thei kei” cih a hihi. Hih bangdan thu a pian pen hoih lo a,
kipawlna in zong mainawt zolo thei mah hi. A hizongin thu khat leuleu ah, e’n
hoih i sak mahmah pen midangte in a hoihna a muh theih ding, a tel theih ding a
i gen or lah khiat (prove) zawh nailoh man zong hi thei hi. (A hoih leh a man
cih kammal kibanglo a, ei hoih sak pen midangte a dingin na hoihlo zong hi kha
ding hi. A hoih pen in, a man pen a hih nak leh hong kiphawk kik hun om veve
ding hi). A hoih pen a i muh pen a man pen a hihna i lahkhiat theih nak leh
lungkia lo in (lungduai tak in) pulak tohtoh ding a hihi. Mi a tamzaw in a hoih
in a man pen a hoih in a muh theih nai kei leh a hoihna leh a manna thu gen
tohtoh ding a hihi. Ei a dingin a hoih pen sungah midangte i thun lut nop leh,
a mau a dingin na hamsa mahmah kha thei hi. Ei muhna ah a man pen, a hoih pen a
hi phial zongin midangte etna kiu (angle) pan in zong i etsak, i muhsak theih
ding pen pilna nei hihna kilatna zong a hihi. Pilna nei mite in midangte muhdan
in thu mu thei uh a, pilna neilo mite in a mau muhna bek pan in thu gen thei
uhhi.
Tua hi a,
Piangsak Pa Pasian pen Vanglian pen hi. (God is
Supreme)
Piansak nate (mihingte zong) a lianzaw, a neu zaw
omlo in kikim hi. (We all are created in God’s image)
Pasian mai ah Siampi zaa ngah tek a, Jesu cih loh
Palai kisam lo hi cih thu kisang kim tek hi. (Jesus is the the highest Priest
and the only way to find Truth)
Hih thuteng I san theih nak leh “kei pen ukna nei
ding khanggui pan Pasian sehna, hi ing cih sanna bei ding a, aannashin lungsim
bei ding hi.
Aannashin lungsim bei peuhpeuh leh Democracy
paizia a ki-ukna, vaihawmna hoih kisa ding a hihi.
July 24, 2023
