Tual Khan Suan (Suanpi)
“ Mi kim in thu ngaihsut theihna, thu khentat theihna leh biakna tawh kisai suahtakna ngah hi. Hih suahtakna in biakna leh upna khek theihna suahtakna zong huam a, a biakna hiam, a upna hiam tawh kisai thuhilhna, zuihna, paaina leh tanna pulakna zong amah beka hih theihna, mi dangte tawh kipawlkhawma hih theihna leh tangpi maiah hih ding leh amah guakin sim hih theih nading suahtakna zong huam hi.” Mihing hamphatnate khuavannuai tangkona (Universal Declaration of Human Rights) thu gui ( article) 18.
Leitung bup tawh kisai thukimna laipi dang khat sungah zong:-
(A) Mi khempeuh in suakta tak a ngaihsut theihna, suakta tak a up theihna, suakta tak a biak piak theihna te nei hi. Hih thuzui in ei deihtel biakna leh upna ah suakta tak in kisuan theihna, mimal (or) midang te tawh kipawl in a hizong in, a simtham in ahizong in i biakna leh upna thute suakta tak a sinsakna, biakpiakna, zuihna, phuhkhiatna te nei thei hi.
(B) Kua mahpeuh a ma biakna leh upna te a siasak (nusia) ding in kisawl teitei kei hen.
(C) Mipi bitna ding, thukham vaihawmna ding, mipi cidamna ding, mipi gamtat hoihna ding leh midang te suahtakna te venbitna ding in thukham tawh khaktanna cih loh mikhat i biakna, upna te tangkona ding suahtakna pen kikhak tan theilo hi.
(D) Hih laipi dongta gam sung a teng nu leh pa, naucing (kem) te in a mau ta leh nau te pen a mau upna tawh kituak in biakna vai leh gamtat khohekna tawh kisai siamsinna, biakna suahtakna te zahtak ding in mawhpuakna nei uhhi. Hih thu in a kikhak tan theilo, bang hun peuh a zong a kizukkik theilo hamphatna ahihi. International Covenant on Civil and Political Rights (ICCPR), Article 18.
Kawlgam sung Zangkong khuapi pan in minam leh biakna a it leh a vei mahmah Thangboi in August 05, 2007 ni’n “Zomite hong kivalh tum ding” cih thulu zangin Kawlgam galkap kumpi in Christian biakna suksiatna ding leh minam neute mangthatna ding tawh kisai a nasep sawm zia uh kalbi ( step) -17 om ZoNet ah hong suahsak ciangin midangte bangin kei zong ka lungsim hong sukha mahmah a, ka sep masak ding thei lo in sak leh khang ka mai buambuam leh ka ngaihsut tawpna ah hih lai ka hong gelh hi.
Mihing khempeuh in suahtakna ki deih tek mah bangin i biak i paii Pasian zong suakta takin biak piakna i neih ding i lunggulh pen a hihi. A hizongin suakta tak a biak piakna i neih theih lohna a hang tuamtuam om ding sung pan in a tom in nampi nih (2) in kikhen thei hi. A khatna ah gam uk kumpi te in a mau gam sungah biak piakna pen suakta tak a neih ding khaam in gam sung thu khunpi sungah biakna nam khat bek biak ding in bawl na a hihi. A nihna gam uk kumpi te in gam sungah biakna pen suaktakna pia na pi gam mite’n a mau biakna a hilo biakna dang khat peuh bawlsiatna leh khaktan sakna a hihi.
Suakta tak a biak piakna neih theih lohna a hang nambat khatna pen leitung kumpi gam pawl khat ( a diak in communist leh dictatorship tawh ki-uk gam te ah) ah ki mu thei hi. Gentehna in a beisa hun a USSR , China , leh tuhun a kawlgam sungte ah tua bang thu te kimu thei zaw hamtang hi. Hih thu pen Zomi te’n i thuak a hih manin kitheih mawh bawl theih thu hilo in, vai thupi khat a hihi.
I theihsa ciat bangin Kawlgam pen minam tampi kigawmna gam hi a, biakna zong tampi mah a om hi. Tua sungah Buddhism bia pen majority hi uh a, a dang biakna tuamtuam a hi, Christian, Muslim, Hinduism te pen minority a hihi. Buddhism bia mi pen majority a hih uh zui in biakna dangte tawh tanh kikim ding ut lo uh a, biakna dang khempeuh nuaisiah ut tawntung uh hi. Biakna tawh kisai thu leh la khempeuh pen majority decision tawh a vaihawm uh ciangin biakna suahtakna palsak bek uh hilo in, biakna dangte siasak a suak uh hi. Tangpi tangta tawh kisai thu leh la ah majority deihna a kizat theih leh a hoih zawkna a om hangin biakna tawh kisai thu ah majority deihna zat ding thuman hilo hi.
Kawlgam sungah biakna tawh kisai buaina pen tuhun tawm a kipan hilo hi. Tuhun a Kawlgam kici gam in mangkang kumpi te khut sung pan in suahtakna a lak ding hun lai pek pan kipan a hihi. Tua hun lai in zong politician a sem makai pawlkhat pen biakna a zahtak leh a mi tampi na om uh hi. Tua bek hilo kawl mi te minam leh gam vai ah a khua muhna uh a tangzai sak/ a hon sak a hi Sayadaw U Ohdama pen Buddhism biakna ah Phonggyi hi a, a khauh pai mahmah khat a hihi. Kawlgam in suahtakna a ngah ding taktak ciangin kawlgam thu khunpi ding tawh kisai thu kikupna ah zong kawlmi makai pawl khatin in Buddhism pen gambup biakna suahsak ding na hanciam ngei khin uh hi. Tua bang mite sung pan Dedoh U Ba Cho pen Buddhism biakna ah a khauh pai mahmah hi a, kawlgam in suahtakna a ngah teh Buddhism pen kawlgam bup biakna in koih ding cih thu sun ( agenda) khat na pulak ngei hi. Tua hun laitak in biakna leh minam vai a khen tel siam makai U Aung San in “ Siate aw, I kawlgam sungah biakna pen nam tampi om hi. Tua bangin vaihawm leng i gamsung ah kilemna om ngeilo ding hi. Hoih nasak uh leh no semta un. Kei hong kihel ngeilo ding hing” ci’n khauh takin a gen teh tua thu a mit kik pak a hihi.
Kawlgam in suahtakna a ngah khit ciangin kawlgam pen democracy vaihawmzia tawh gam ki-uk a, gambup sungah a hat pen party a hi, AFPFL party pan U Nu in Prime Minister sem hi. A hizongin 1950’s ciangin gam uk party sunga om makai te sungah kilem lohna tuamtuam hangin a gualzo party pen U Kyaw Nyein makaihna leh U Nu makaihna ci’n khen nih in ki phel kek hi. Tua bang a hun linglawngna paulap in galkap mang Ne Win in 1958 kum in gambup thuneihna la a, a hizongin 1960 kum in gambup kitelna ah a gualzo pen party tungah gambup thuneihna ap kik hi. Tua 1960 kum kitelna ah U Nu in a ma party a gual zawhna dingin biakna paulap in Phongyi pawlkhat zol hi. Kitelna ah a mah ( U Nu) in a ngah leh Buddhism pen gambup biakna suaksak ding ci’n kamciam a piak tak teh gammi a tam zaw pen Buddhism a hih manin lungkim mahmah uh a, U Nu in 1960 kum kawlgam bup kitelna ah gualzawhna ngah takpi hi. U Nu in kitelna hun a, a kamciam lah pel ut lo a hih manin kawlgam bup thu khunpi ( constitution) puah a, Buddhism pen gambup biakna in koih hi. U Nu nasepna a deihlo biakna dang te’n langpan den na hang tawh “ Kawlgam sungah biakna khempeuh suakta takin ki bia thei ding hi” cih zong thu khunpi sungah kibeh lap hi.A hizongin tua bang a U Nu nasepna a deihlo Christian biakna bia Kachin te in Kachin Independent Organization (KIO) phuah pah uh a, gam sungah biakna bulphuh in kilem lohna kipan pah hi.
Suakta tak a biak piakna neih theihlohna a hang thu nihna a hi, gam uk kumpi te’n biakna suahtakna a piak uh hangin gam sung mite in a mau biakna a hilo biakna dang te khaktanna leh siatsakna pen a tukum sung (2007) a Mizoram sung a Nausel khua buaina ah i mu thei hi. India gam pen i theih sak tek bangin minam tampi leh biakna tampi tak kigawmna zong hi a, a diak in biakna kibat lohna hang tawh buaina a tuak pen gam khat zong hi ding hi. Gamkek mangkang te khut nuai panin suahtakna a ngah ding uh ciangin zong biakna ( Hinduism leh Muslim) hang tawh gam khat a om kimlai pen India leh Pakistan ci’n gam nih a suak uh hi zaw hi. Tua bangin biakna hang tawh haksatna leh gam kikekna na ciang dong a phukha ngei khin India makai te in biakna tawh kisai pen vai thupi in koih uh a, India gam bup thukhunpi Article 19 na sungah “(a) rights to freedom of speech and expression, (b)Rigth to assemble Peaceably and without arms ( c) to form Associantion or Unions” ci’n biakna tawh kisai bek hilo mihing te a dingin suahtakna pen amahkhan (guarantee) na pia hi. India Constitution sungah hih bangin biakna suahtakna a kigelh hangin Mizoram sungah Young Mizo Association (YMA) in Nausel khua sunga Evangelical Baptist Church (EBC) om ding deihlo uh hi. Paite pau ( Zomi) te in EBC biak inn a lam ding uh phallo bek hi lo in, makai te zong mimal in vau ( threaten) lai uh hi. Pawlpi mite zong khua sunga a om ding uh deih lo in hawlkhia uh hi. A tawpna ah Human rights tawh kisai kipawlna leh gamsung makai te in India gambup thukhun pi tawh kituaklo hi ci’n a leptuah uh teh thukham zui in kilemna hong om kik thei pan a hihi.
A tung a i gen sa a hi “ Mihing hamphatnate khuavannuai tangkona” ( Universal Declaration of Human Rights) pen United Nations Organization ( UNO) sunga a lut khempeuh in zuih ding thukimna a om a hihi. Tua laipi UDHR pen a tuam in thukimna letmat a thuh kul loh hangin UNO sungah member khempeuh in a zuih ding leh a zat ding tavuan nei pah uh hi. Kawlgam pen 1948 pan in UNO ah member khat a hih bek hilo in, kawlgam mi U Thant in UNO i Secreatary-General zong term nih ( kum 10) sung sem ngei khin hi. Kawlgam mite a dingin UNO ah khual mi bang hilo a, inntekna mun khat cileng i khial kei dinghi. UDHR sungah kigelh thu leh la te pen UNO member khat a hi kawlgam galkap kumpi in deih tuam leh paih tuam a neih loh a zuih ding thukimna om sa banga a sep ding tavuan nei hi. Biakna suahtakna tawh kisai zong a suksiat khak loh ding leh biakna khempeuh a kibanga suahtakna piak ding thupi mahmah hi. Kawlgam galkap kumpi in Christian biakna siatsakna ding a hanciamna uh pen lam khialhna khat in a muh ding uh leh UNO ah member khat a hih man in UNO i thu leh la te a zuih leh a sep ding pen kumpi te tavuan a hihi.
A tawpna ah gam uk kumpi te in gamsung kilemna deih takpi na tawh nasepna mun ah biakna pen vai thupi khat a koih ding kisam hi. Bang hang hiam cih leh biakna pen buaina kipatna mun a hih theih bangin kilemna kipatna mun zong hi thei hi. Biakna leh upna te hang a nengniamna leh khentuamna te beina ding thu tangko (The Declaration on the Elimination of All Forms Intolerance and of Discrimination Based on Religion (or) Belief) kam honna sung ah
" suakta tak a ngaihsutna, lunggelna, upna leh biakna te simmawh kosiatna in mihing te susia thei gal pen lam khat a hih kei leh lamdang khat pan in piangsak thei ahih man in santheih huai thu hilo hi". ci'n kigelh hi.
August 19,2007
“ Mi kim in thu ngaihsut theihna, thu khentat theihna leh biakna tawh kisai suahtakna ngah hi. Hih suahtakna in biakna leh upna khek theihna suahtakna zong huam a, a biakna hiam, a upna hiam tawh kisai thuhilhna, zuihna, paaina leh tanna pulakna zong amah beka hih theihna, mi dangte tawh kipawlkhawma hih theihna leh tangpi maiah hih ding leh amah guakin sim hih theih nading suahtakna zong huam hi.” Mihing hamphatnate khuavannuai tangkona (Universal Declaration of Human Rights) thu gui ( article) 18.
Leitung bup tawh kisai thukimna laipi dang khat sungah zong:-
(A) Mi khempeuh in suakta tak a ngaihsut theihna, suakta tak a up theihna, suakta tak a biak piak theihna te nei hi. Hih thuzui in ei deihtel biakna leh upna ah suakta tak in kisuan theihna, mimal (or) midang te tawh kipawl in a hizong in, a simtham in ahizong in i biakna leh upna thute suakta tak a sinsakna, biakpiakna, zuihna, phuhkhiatna te nei thei hi.
(B) Kua mahpeuh a ma biakna leh upna te a siasak (nusia) ding in kisawl teitei kei hen.
(C) Mipi bitna ding, thukham vaihawmna ding, mipi cidamna ding, mipi gamtat hoihna ding leh midang te suahtakna te venbitna ding in thukham tawh khaktanna cih loh mikhat i biakna, upna te tangkona ding suahtakna pen kikhak tan theilo hi.
(D) Hih laipi dongta gam sung a teng nu leh pa, naucing (kem) te in a mau ta leh nau te pen a mau upna tawh kituak in biakna vai leh gamtat khohekna tawh kisai siamsinna, biakna suahtakna te zahtak ding in mawhpuakna nei uhhi. Hih thu in a kikhak tan theilo, bang hun peuh a zong a kizukkik theilo hamphatna ahihi. International Covenant on Civil and Political Rights (ICCPR), Article 18.
Kawlgam sung Zangkong khuapi pan in minam leh biakna a it leh a vei mahmah Thangboi in August 05, 2007 ni’n “Zomite hong kivalh tum ding” cih thulu zangin Kawlgam galkap kumpi in Christian biakna suksiatna ding leh minam neute mangthatna ding tawh kisai a nasep sawm zia uh kalbi ( step) -17 om ZoNet ah hong suahsak ciangin midangte bangin kei zong ka lungsim hong sukha mahmah a, ka sep masak ding thei lo in sak leh khang ka mai buambuam leh ka ngaihsut tawpna ah hih lai ka hong gelh hi.
Mihing khempeuh in suahtakna ki deih tek mah bangin i biak i paii Pasian zong suakta takin biak piakna i neih ding i lunggulh pen a hihi. A hizongin suakta tak a biak piakna i neih theih lohna a hang tuamtuam om ding sung pan in a tom in nampi nih (2) in kikhen thei hi. A khatna ah gam uk kumpi te in a mau gam sungah biak piakna pen suakta tak a neih ding khaam in gam sung thu khunpi sungah biakna nam khat bek biak ding in bawl na a hihi. A nihna gam uk kumpi te in gam sungah biakna pen suaktakna pia na pi gam mite’n a mau biakna a hilo biakna dang khat peuh bawlsiatna leh khaktan sakna a hihi.
Suakta tak a biak piakna neih theih lohna a hang nambat khatna pen leitung kumpi gam pawl khat ( a diak in communist leh dictatorship tawh ki-uk gam te ah) ah ki mu thei hi. Gentehna in a beisa hun a USSR , China , leh tuhun a kawlgam sungte ah tua bang thu te kimu thei zaw hamtang hi. Hih thu pen Zomi te’n i thuak a hih manin kitheih mawh bawl theih thu hilo in, vai thupi khat a hihi.
I theihsa ciat bangin Kawlgam pen minam tampi kigawmna gam hi a, biakna zong tampi mah a om hi. Tua sungah Buddhism bia pen majority hi uh a, a dang biakna tuamtuam a hi, Christian, Muslim, Hinduism te pen minority a hihi. Buddhism bia mi pen majority a hih uh zui in biakna dangte tawh tanh kikim ding ut lo uh a, biakna dang khempeuh nuaisiah ut tawntung uh hi. Biakna tawh kisai thu leh la khempeuh pen majority decision tawh a vaihawm uh ciangin biakna suahtakna palsak bek uh hilo in, biakna dangte siasak a suak uh hi. Tangpi tangta tawh kisai thu leh la ah majority deihna a kizat theih leh a hoih zawkna a om hangin biakna tawh kisai thu ah majority deihna zat ding thuman hilo hi.
Kawlgam sungah biakna tawh kisai buaina pen tuhun tawm a kipan hilo hi. Tuhun a Kawlgam kici gam in mangkang kumpi te khut sung pan in suahtakna a lak ding hun lai pek pan kipan a hihi. Tua hun lai in zong politician a sem makai pawlkhat pen biakna a zahtak leh a mi tampi na om uh hi. Tua bek hilo kawl mi te minam leh gam vai ah a khua muhna uh a tangzai sak/ a hon sak a hi Sayadaw U Ohdama pen Buddhism biakna ah Phonggyi hi a, a khauh pai mahmah khat a hihi. Kawlgam in suahtakna a ngah ding taktak ciangin kawlgam thu khunpi ding tawh kisai thu kikupna ah zong kawlmi makai pawl khatin in Buddhism pen gambup biakna suahsak ding na hanciam ngei khin uh hi. Tua bang mite sung pan Dedoh U Ba Cho pen Buddhism biakna ah a khauh pai mahmah hi a, kawlgam in suahtakna a ngah teh Buddhism pen kawlgam bup biakna in koih ding cih thu sun ( agenda) khat na pulak ngei hi. Tua hun laitak in biakna leh minam vai a khen tel siam makai U Aung San in “ Siate aw, I kawlgam sungah biakna pen nam tampi om hi. Tua bangin vaihawm leng i gamsung ah kilemna om ngeilo ding hi. Hoih nasak uh leh no semta un. Kei hong kihel ngeilo ding hing” ci’n khauh takin a gen teh tua thu a mit kik pak a hihi.
Kawlgam in suahtakna a ngah khit ciangin kawlgam pen democracy vaihawmzia tawh gam ki-uk a, gambup sungah a hat pen party a hi, AFPFL party pan U Nu in Prime Minister sem hi. A hizongin 1950’s ciangin gam uk party sunga om makai te sungah kilem lohna tuamtuam hangin a gualzo party pen U Kyaw Nyein makaihna leh U Nu makaihna ci’n khen nih in ki phel kek hi. Tua bang a hun linglawngna paulap in galkap mang Ne Win in 1958 kum in gambup thuneihna la a, a hizongin 1960 kum in gambup kitelna ah a gualzo pen party tungah gambup thuneihna ap kik hi. Tua 1960 kum kitelna ah U Nu in a ma party a gual zawhna dingin biakna paulap in Phongyi pawlkhat zol hi. Kitelna ah a mah ( U Nu) in a ngah leh Buddhism pen gambup biakna suaksak ding ci’n kamciam a piak tak teh gammi a tam zaw pen Buddhism a hih manin lungkim mahmah uh a, U Nu in 1960 kum kawlgam bup kitelna ah gualzawhna ngah takpi hi. U Nu in kitelna hun a, a kamciam lah pel ut lo a hih manin kawlgam bup thu khunpi ( constitution) puah a, Buddhism pen gambup biakna in koih hi. U Nu nasepna a deihlo biakna dang te’n langpan den na hang tawh “ Kawlgam sungah biakna khempeuh suakta takin ki bia thei ding hi” cih zong thu khunpi sungah kibeh lap hi.A hizongin tua bang a U Nu nasepna a deihlo Christian biakna bia Kachin te in Kachin Independent Organization (KIO) phuah pah uh a, gam sungah biakna bulphuh in kilem lohna kipan pah hi.
Suakta tak a biak piakna neih theihlohna a hang thu nihna a hi, gam uk kumpi te’n biakna suahtakna a piak uh hangin gam sung mite in a mau biakna a hilo biakna dang te khaktanna leh siatsakna pen a tukum sung (2007) a Mizoram sung a Nausel khua buaina ah i mu thei hi. India gam pen i theih sak tek bangin minam tampi leh biakna tampi tak kigawmna zong hi a, a diak in biakna kibat lohna hang tawh buaina a tuak pen gam khat zong hi ding hi. Gamkek mangkang te khut nuai panin suahtakna a ngah ding uh ciangin zong biakna ( Hinduism leh Muslim) hang tawh gam khat a om kimlai pen India leh Pakistan ci’n gam nih a suak uh hi zaw hi. Tua bangin biakna hang tawh haksatna leh gam kikekna na ciang dong a phukha ngei khin India makai te in biakna tawh kisai pen vai thupi in koih uh a, India gam bup thukhunpi Article 19 na sungah “(a) rights to freedom of speech and expression, (b)Rigth to assemble Peaceably and without arms ( c) to form Associantion or Unions” ci’n biakna tawh kisai bek hilo mihing te a dingin suahtakna pen amahkhan (guarantee) na pia hi. India Constitution sungah hih bangin biakna suahtakna a kigelh hangin Mizoram sungah Young Mizo Association (YMA) in Nausel khua sunga Evangelical Baptist Church (EBC) om ding deihlo uh hi. Paite pau ( Zomi) te in EBC biak inn a lam ding uh phallo bek hi lo in, makai te zong mimal in vau ( threaten) lai uh hi. Pawlpi mite zong khua sunga a om ding uh deih lo in hawlkhia uh hi. A tawpna ah Human rights tawh kisai kipawlna leh gamsung makai te in India gambup thukhun pi tawh kituaklo hi ci’n a leptuah uh teh thukham zui in kilemna hong om kik thei pan a hihi.
A tung a i gen sa a hi “ Mihing hamphatnate khuavannuai tangkona” ( Universal Declaration of Human Rights) pen United Nations Organization ( UNO) sunga a lut khempeuh in zuih ding thukimna a om a hihi. Tua laipi UDHR pen a tuam in thukimna letmat a thuh kul loh hangin UNO sungah member khempeuh in a zuih ding leh a zat ding tavuan nei pah uh hi. Kawlgam pen 1948 pan in UNO ah member khat a hih bek hilo in, kawlgam mi U Thant in UNO i Secreatary-General zong term nih ( kum 10) sung sem ngei khin hi. Kawlgam mite a dingin UNO ah khual mi bang hilo a, inntekna mun khat cileng i khial kei dinghi. UDHR sungah kigelh thu leh la te pen UNO member khat a hi kawlgam galkap kumpi in deih tuam leh paih tuam a neih loh a zuih ding thukimna om sa banga a sep ding tavuan nei hi. Biakna suahtakna tawh kisai zong a suksiat khak loh ding leh biakna khempeuh a kibanga suahtakna piak ding thupi mahmah hi. Kawlgam galkap kumpi in Christian biakna siatsakna ding a hanciamna uh pen lam khialhna khat in a muh ding uh leh UNO ah member khat a hih man in UNO i thu leh la te a zuih leh a sep ding pen kumpi te tavuan a hihi.
A tawpna ah gam uk kumpi te in gamsung kilemna deih takpi na tawh nasepna mun ah biakna pen vai thupi khat a koih ding kisam hi. Bang hang hiam cih leh biakna pen buaina kipatna mun a hih theih bangin kilemna kipatna mun zong hi thei hi. Biakna leh upna te hang a nengniamna leh khentuamna te beina ding thu tangko (The Declaration on the Elimination of All Forms Intolerance and of Discrimination Based on Religion (or) Belief) kam honna sung ah
" suakta tak a ngaihsutna, lunggelna, upna leh biakna te simmawh kosiatna in mihing te susia thei gal pen lam khat a hih kei leh lamdang khat pan in piangsak thei ahih man in santheih huai thu hilo hi". ci'n kigelh hi.
August 19,2007
